Mary na musaija we, John, a baikara omu kicweka eky’ensi nambere basobora kutebeza amakuru amarungi abantu abaija kukora kuruga omu ihanga lya Philippines. Omu kasumi k’oburwaire bwa Korona, Mary akatunga abeegi ba Baibuli hatali omu ihanga eri arukwikaramu lyonka baitu n’omu bicweka ebindi eby’ensi. Eki akakikora ata?

Mary yakaguzaaga abeegi be ba Baibuli ati, “Haroho omuntu ondi weena ow’omanyire ayakugondeze kwega Baibuli?” Obu baagambaga ego, yabasabaga kubamubanjurra. Kukaguza ekikaguzo kinu ekyanguhire, kirugiremu ebirungi. Habwaki? Habwokuba abantu abarukugonza Ekigambo kya Ruhanga emirundi erukukira obwingi bagonza kugambiraho abanyabuzaale baabo n’abanywani ebintu ebi beegere. Birungi ki ebyarugire omu kukaguza ekikaguzo kinu?

Omwegi wa Mary owa Baibuli ow’arukwetwa Jasmin akamwanjurra abantu bbana abakaba nibagonza kwega Baibuli. Omu hali bo ow’arukwetwa, Kristine, akegondeza muno omu ebi arukwega yahika n’okusaba Mary kwega na uwe emirundi ebiri omu wiiki. Mary obu yamukagwize obu araaba naamanya omuntu ondi weena ow’akaba naagonza kwega Baibuli, Kristine akagamba ati, “Ego, ninyija kukwanjurra banywani bange.” Omu wiiki nke, Kristine akanjurra Mary banywani be bbana abakaba nibagonza kwega Baibuli. Hanyuma, Kristine akamwanjurra abanywani be abandi kandi bamu hali bo na bo bakaikara nibamwanjura hali abanywani baabo abandi.

Kristine na uwe akaba naagonza abanyabuzaale be kuruga omu Philippines kwega Baibuli. Nahabweki akabaza na muhara we ow’arukwetwa, Andrea. Ha kubanza, Andrea akaba naatekereza ngu, ‘Abakaiso ba Yahwe eri diini empyaka, tibaikiririza omuli Yesu kandi bakozesa Endagaano Enkuru yonka.’ Baitu hanyuma y’okwega kwabo okw’okubanza, akakyetegereza ngu byona ebi akaba naatekereza hali Abakaiso ba Yahwe bikaba bitahikire. Obu baabaga nibeega yagambaga ati, “Baibuli obu eraaba nikyo erukugamba, kiine kuba kihikire!”

Hanyuma y’akasumi, Andrea akanjura Mary hali abanywani be babiri n’omukozi mutaahi we abaatandikire kwega Baibuli. Ekindi, Mary, eki akaba atamanyire nikyo ngu isenkati Andrea aw’akaba afiire amaiso ow’arukwetwa, Angela, yabaga naahulirirza obu baabaga nibeega. Hanyuma, kiro kimu Angela akakaguza Andrea kumwanjurra Mary nukwo na uwe atandike kumwegesa Baibuli. Angela akagonza muno ebi akaba naayega. Omu kwezi kumu kwonka, Angela akakwata omu mutwe ebyahandikirwe bingi kandi yagonza kutandika kwegaga emirundi ena omu wiiki! Habw’obukonyezi  bwa Anderea, Angela akatandika kuba omu nsorrokano butoosa naakozesa videoconferencing.

Mary obu yakyetegeriize ngu iba wa Kristine, ow’arukwetwa Joshua, yabaga haihi na bo obubabaga nibeega na Kristine, Mary akakaguza Joshua obu araaba naagonza kubeteranizaaho. Joshua akagamba ati, “Ninyija kuhuliriza kwonka, baitu otankaguza ekikaguzo kyona; obu orakikora ninyija kurugaho ngende.” Omu dakiika itaano ez’okwega kwaitu ezaabandize, Joshua akakaguza ebikaguzo bingi kukira Kristine kandi na uwe yagonza kutandika kwega Baibuli.

Ekikaguzo kya Mary ekyanguhire kikarugamu abeegi ba Baibuli baingi. Kandi baingi hali bo, akabakorra entekaniza nukwo beege n’Abakaiso ba Yahwe abandi. Mary akatandika kwegesa abeegi ba Baibuli 28 kuruga omu mahanga ana agarukwahukana.

Jasmin, omwegi w’okubanza ow’abazibweho omu kyokurorraho kinu, akabatizibwa omu Apuli 2021. Kristine akabatizibwa omu Maayi 2022 kandi akagaruka omu Philippines kuba n’eka ye. Abeegi ba Baibuli abandi babiri, Kristine abayayanjuliire Mary na bo bakabatizibwa. Angela akabatizibwa hanyuma y’emyezi nke Kristine amazire kubatizibwa kandi hati naheereza nka payoniya ow’akasumi koona. Iba wa Kristine, ow’arukwetwa Joshua, hamu na muhara wabo, Andrea, hamu n’abeegi ba Baibuli abandi baliyo nibakurakurana.

Omu kyasa eky’okubanza, amakuru amarungi gakanguha kujanjaara omu bantu ab’omuka n’abanywani. (Yoh. 1:​41, 42a; Ebik. 10:​24, 27, 48; 16:​25-33) Habwaki otakaguza abeegi baawe ba Baibuli hamu n’abantu abandi abarukugonza kwega Baibuli oti, “Haroho omuntu ondi ow’omanyire ayaakugondeze kwega Baibuli?” Obu orakaguza ekikaguzo eki ekyanguhire, obundi naiwe nosobora kutunga abantu baingi abarukugonza kwega Baibuli.