OKYETEGERIIZE ngu abantu baingi omu nsi kasumi kanu behurra ngu basemeriire kutunga obujunaanizibwa obw’embaganiza, obugabe, rundi kutwazibwa omu mulingo omurungi kukira abandi? N’obu batwazibwa kurungi kwingana nkaha, behurra ngu basemeriire kuheebwa ekirukukiraho. Abantu abatekereza bati baba nibefaaho bonka kandi baba batarukusiima habw’eki ekibaine. Kandi Baibuli egamba ngu gunu nugwo omulingo abantu baakwetwaize omu biro ebya ha mpero.—2 Tim. 3:2.

Ky’amananu ngu abantu kuba n’omutima gw’okwefaaho bonka tikiri kintu kihyaka. Ekyokurorraho, Adamu na Hawa bakaba nibagonza obugabe obw’okwecweramu ekihikire n’ekitahikire, kandi hati itwena nitubonabona habw’encwamu yaabo. Hanyuma y’ebyasa bingi kurabaho, Omukama Uziya akatekereza ngu akaba asemeriire kwoterra emyamirro ha yekaru, baitu egi ekaba nsobi ey’amaani. (2 Byom. 26:​18, 19) Omu mulingo nugwo gumu, Abafalisaayo n’Abasadukaayo baatekerezaaga ngu bakaba basemeriire kusiimwa Ruhanga omu mulingo ogw’embaganiza ngu habwokuba bakaba barugire omu ruzaaro rwa Iburahimu.—Mat. 3:9.

Na itwe twetoroirwe abantu abaine omwoyo ogw’okwefaaho bonka, kandi enteekereza yabo nesobora kututwaliiriza. (Bag. 5:26) Nitusobora kutandika kutekereza ngu tusemeriire kuheebwa obujunaanizibwa obumu rundi kutwazibwa omu mulingo ogw’embaganiza. Nitusobora tuta kwetantara enteekereza egi? Eky’okubanza, tusemeriire kumanya omulingo Yahwe arukuroramu ensonga. Emisingi ebiri kuruga omu Baibuli niija kutukonyera.

 Yahwe nuwe acwamu eki tusemeriire kutunga. Tekerezaaho ebyokurorraho binu.

• Omu nteekaniza ey’eka, nyineeka asemeriire kwehurra ngu mukazi we naamutamu ekitiinisa, kandi nyinabwenge asemeriire kwehurra ngu iba naamugonza. (Bef. 5:33) Abaswerangaine basemeriire kwolekangana engonzi eziba hagati y’abaswerangaine hatali kuzooleka omuntu ondi. (1 Kol. 7:3) Abaana basemeriire kworobera abazaire baabo, kandi n’abazaire basemeriire kugonza n’okusagika abaana baabo.—2 Kol. 12:14; Bef. 6:2.

• Omu kitebe, tusemeriire kuteekamu ekitiinisa abagurusi abarukukora n’amaani. (1 Bas. 5:12) Baitu nabwo tibasemeriire kulema ab’oruganda na banyaanya itwe.—1 Pet. 5:​2, 3.

• Ruhanga ahaire gavumenti z’abantu obugabe obw’okusaba emisoro abantu abali hansi y’obusobozi bwazo, n’okubateekamu ekitiinisa.—Bar. 13:​1, 6, 7.

Omu mulingo ogw’okugonza, Yahwe atuha ebintu bingi kukira n’ebi ebitusemeriire. Habwokuba tuli bantu abasiisi, ekintu kyonka ekitusemeriire nukwo okufa. (Bar. 6:23) Baitu nabwo, Yahwe atuhaire emigisa nyingi habw’okugonza kwe okutalekera oku atwiniire. (Zab. 103:​10, 11) Buli mugisa rundi obujunanizibwa obu tutunga kuruga hali uwe, tubutunga habw’embabazi ze ezitatusemeriire.—Bar. 12:​6-8; Bef. 2:8.

Werinde kutwalirizibwa entekereza y’ensi. Nitusobora kutandika kutekereza ngu tusemeriire kuheebwa bingi kukira abandi tutakimanyire. Yesu akooleka nk’oku entekereza egi eyanguhire kutwijamu kuraba omu kukozesa ekyokurorraho eky’abakozi abaasaswirwe edinaali. Abakozi abamu bakazinduka nyenkyakara muno kandi baakora ekiro kyona omu musana gw’amaani muno; kandi abandi bakakora esaaha emu yonka. Abaabandize bakaba nibatekereza ngu basemeriire kusasurwa sente nyingi habw’omulimo ogu bakaba bakozere. (Mat. 20:​1-16) Omu kubazaaho ekyokurorraho kinu, Yesu akooleka ngu abahondezi be basemeriire kumarwa Ruhanga ebi arukubaha.

Ba muntu ow’arukusiima, hatali ow’arukunihirramu abandi kukuha ebintu. (1 Bas. 5:18) Yegera hali omukwenda Paulo ow’atarasabire obukonyezi omu byetaago bye eby’omubiri kuruga hali ab’oruganda omu Kolinso n’obu kiraaba ngu akaba aine obugabe obw’okukikora. (1 Kol. 9:​11-14) Tusemeriire  kusiima buli mugisa gwona ogu tutunga kandi twetantale omwoyo ogw’okunihirramu abandi kutuha ebintu.

Kurakuraniza obwebundaazi. Omuntu obu ayetekerezaaho ekihinguraine, obwire oburukukira obwingi atandika kwehurra ngu asemeriire kutunga ebintu ebirukukira hali ebi ebyaine. Obwebundaazi nugwo omubazi ogw’entekereza egi embi muno.

Nabbi Danieri akatuteraho ekyokurorraho ekirungi eky’okwoleka obwebundaazi. Akaba naaruga omu ka ey’amaani, naazooka kurungi, ali w’amaani, kandi aine obusobozi. Binu byona byakumuletiire kwehurra ngu asemeriire kutwazibwa omu mulingo omurungi kukira abandi, kandi aheebwe obujunaanizibwa obw’embaganiza. (Dan. 1:​3, 4, 19, 20) Baitu, Danieri akaikara ali mwebundaazi, kandi omulingo gunu gukamufoora w’omuhendo hali Yahwe.—Dan. 2:30; 10:​11, 12.

Leka tucweremu kimu kwangirra omwoyo ogw’okwefaaho itwenka ogunyakuli omu nsi kasumi kanu. Oihireho, leka itwena tugumizeemu nitutunga okusemererwa omu buli mugisa gwona Yahwe ogu atuha habw’embabazi ze ezitatusemeriire.