1-2. Habwaki tubaho ha mukoro gw’Ekiijukyo buli mwaka?

 HAIHI nk’emyaka 2,000 enyuma, Yesu akahayo obwomeezi bwe habwaitu ekyatukingulireho omuhanda ogw’okutunga obwomeezi obutahwaho. Omu bwire bw’ekiro Yesu atakafiire, akaragira abahondezi be kwijuka ekikorwa kye eky’okugonza kuraba omu kukora omukoro ogwanguhire obu nibakozesa omugaati n’eviino.​—1 Kol. 11:23-26.

² Tworobera ekiragiro kya Yesu habwokuba nitumugonza muno. (Yoh. 14:15) Buli mwaka omu kasumi ak’Ekiijukyo, twoleka okusiima kwaitu habw’ekintu ekiyatukoliire kuraba omu kusaba hamu n’okwecumitirizaaho omugaso ogw’okufa kwe hali abantu. Ekindi, n’okusemererwa kwingi, twongera ha buheereza bwaitu obuturaaliza abantu baingi nk’okukirukusoboka kutweteranizaaho ha mukoro ogu ogw’embaganiza. Kandi ky’amananu ngu tucweriiremu kimu kutaikiriza ekintu kyona kutulemesa kubaho ha mukoro ogw’Ekiijukyo.

3. Biki ebiturukugenda kubazaaho omu kicweka kinu?

³ Omu kicweka kinu, nitwija kubazaaho emiringo esatu erukwoleka nk’oku abantu ba Yahwe bakozere kyona ekibarukusobora kubaho ha mukoro ogw’okwijuka okufa kwa Yesu: (1) kuraba omu kukora omukoro gw’Ekiijukyo omu mulingo Yesu yagukozeremu, (2) kuraba omu kuraaliza abandi kwija ha Kiijukyo, kandi (3) n’okuraba omu kwijuka okufa kwa Yesu n’obukiraaba ngu enyikara zigumire.

4. Bintu ki ebitwegaho buli mwaka ha Kiijukyo, kandi habwaki tusemeriire kutwara ebintu binu nk’eby’omuhendo? (Luk. 22:19, 20)

⁴ Buli mwaka ha Kiijukyo, tuhurra orubazo orukusigikirra ha Baibuli orutuha eby’okugarukamu ebirukwetegerezebwa kurungi ebirukukwata ha bikaguzo bingi. Twega ensonga habwaki abantu nibetaaga ekicunguro kandi nk’oku okufa kw’omuntu omu kusobora kusasurra ebibi eby’abantu baingi. Twijukibwa omugaati n’eviino nibikikirra ki, kandi nibaha abasemeriire kulya n’okunywa. (Soma Luka 22:19, 20.) Kandi twecumitirizaaho emigisa ey’erindiriire abo abaine okunihira okw’okwomeera omu nsi ebiro n’ebiro. (Is. 35:5, 6; 65:17, 21-23) Amananu agarukukwata ha bintu binu tusemeriire kugatwara nk’ag’omuhendo. Obukaikuru n’obukaikuru bw’abantu tibamanyire ebintu binu, kandi tibamanyire nk’oku ekihongwa kya Yesu kiri ky’omuhendo muno. Kandi tibakora omukoro gunu ogw’okwijuka okufa kwe omu mulingo Yesu yakikozeremu. Habwaki eki kiri kiti?

5. Hanyuma y’abakwenda abarukukira obwingi kufa, abantu bakatandika bata kwijuka omukoro ogw’okufa kwa Yesu?

⁵ Omu kaire kake abakwenda ba Yesu abarukukira obwingi bamazire kufa, Abakristaayo ab’ebisuba bakatahirra ekitebe Ekikristaayo. (Mat. 13:24-27, 37-39) Bakagamba ‘ebigambo eby’okuhaba, bacunda abegeswa enyuma yabu.’ (Eng. 20:29, 30) Kimu ha bintu “ebyokuhaba” Abakristaayo ab’ebisuba ekibatandikire kwegesa kiri ngu, Yesu ataheyo omubiri gwe ‘habw’omurundi gumu kwetweka ebibi by’abaingi,’ nk’oku Baibuli egamba, baitu ngu ekihongwa kye kisemeriire kwikara nikiheebwayo habw’emirundi nyingi. (Baheb. 9:27, 28) Kasumu kanu abantu abarukukira obwingi baikiririza omu nyegesa enu ey’ebisuba. Bagenda omu kanisa kwijuka omukoro ogw’ekihongwa kya Yesu buli wiiki, obwire obumu buli kiro, kandi Abakatuliki omukoro gunu bagweta “Ekihongwa kya Misa.” b Amadiini agandi tigakira muno kwijuka okufa kwa Yesu habwokuba tibarukwetegereza kurungi omugaso ogw’ekihongwa kya Yesu. Abamu nibasobora kwekaguza, ‘Mali okufa kwa Yesu nikumanyisa ngu ebibi byange nibisobora kuganyirwa?’ Habwaki bekaguza ekikaguzo eki? Habwokuba bakahabisibwa abantu abarukugamba ngu ebibi tibisobora kuganyirwa n’ekihongwa kya Yesu. Abahondezi ba Yesu ab’amananu bakonyiire bata abantu kwetegereza amakuru ag’ekihongwa kya Yesu n’omulingo oguhikire ogw’okwijukamu okufa kwe?

6. Omu 1872, kiki guruupu ey’Abeegi ba Baibuli ekibayetegeriize?

⁶ Omu 1870, guruupu ey’Abeegi ba Baibuli eyebembiirwe Charles Taze Russell ekatandika kukora okwekebiija okw’Ebyahandikirwe okw’amaani. Bakaba nibagonza kumanya amakuru g’ekihongwa kya Yesu n’okumanya omulingo okufa kwe kusemeriire kwijukwa. Omu 1872, bakakyetegereza ngu Yesu mali akahayo ekicunguro habw’abantu boona. Ebibayegere batabyesigalize bonka. Oihireho, bakabimanyisa n’abantu abandi kuraba omu bitabu, empapura z’amakuru hamu n’omu magaziini. Hanyuma omukaire kake, bakatandika kusorrokana hamu omurundi gumu buli mwaka kwijuka okufa kwa Yesu nk’Abakristaayo ab’omu kyasa ky’okubanza baakoraga.

7. Nitugasirwa tuta omu kuseruliiriza okwakozerwe Abeegi ba Baibuli abaakara?

⁷ Kasumi kanu nitugasirwa omu kuseruliiriza  Abakristaayo abo okubaakozere emyaka nyingi enyuma. Omu mulingo ki? Yahwe atukonyiire kwetegereza amakuru g’ekihongwa kya Yesu kandi n’ebikirahikiriza. (1 Yoh. 2:1, 2) Kandi twegere ngu Baibuli eha okunihira kw’emirundi ebiri hali abantu abarukusemeza Ruhanga​—obwomeezi obutafa obw’omu iguru hali abantu abamu, n’obwomeezi obutahwaho omu nsi hali obukaikuru n’obukaikuru bw’abantu abandi. Tweyongera kwirra haihi na Yahwe obututekerezaaho omulingo atugonza, n’omulingo tugasirwa omu kihongwa kya Yesu. (1 Pet. 3:18; 1 Yoh. 4:9) Nahabweki, nk’oku ab’oruganda abesigwa abaakara bakozere, naitwe turaaliza abandi kutweteranizaaho ha mukoro gw’Ekiijukyo ogukorwa omu mulingo Yesu yaragiire abahondezi be kugukoramu.

8. Kiki abaheereza ba Yahwe ekibakozere kuraaliza abandi ha Kiijukyo? (Rora ekisisani.)

⁸ Kumara emyaka nyingi, abaheereza ba Yahwe baikaire nibaraaliza abantu kwija ha mukoro ogw’Ekiijukyo. Omu 1881, ab’oruganda na banyaanya itwe omu Amerika bakaraalizibwa omu ka ey’ow’oruganda kubaho ha mukoro ogw’embaganiza omu kicweka kya Allegheny, Pennsylvania. Hanyuma, buli kitebe kikatandika kusorrokana hamu kuba n’omukoro gw’Ekiijukyo. Omu Maaci 1940, abatebezi bakaragirwa kuraaliza abantu abali omu kicweka kyabo eky’okutebezaamu abaayolekere okugonza. Habw’omurundi gw’okubanza omu 1960, Beseeri ekaturukya kaadi hali ebitebe ez’okuraaliza abantu kwija ha Kiijukyo. Kuruga  obu, obukaikuru n’obukaikuru bwa kaadi z’okuraaliza abantu kwija ha Kiijukyo zigabirwe. Habwaki tutamu amaani maingi n’obwire kuraaliza abandi?

9-10. Nibaha abagasirwa omu maani tutamu kuraaliza abandi kwija ha Kiijukyo? (Yohana 3:16)

⁹ Ensonga emu habwaki turaaliza abandi kwija kubaho ha Kiijukyo niyo ngu, nitugonza abo abaraabaho habw’omurundi gwabo ogw’okubanza, beege ebintu Yahwe na Yesu ebibatukoliire itwena. (Soma Yohana 3:16.) Tuba nitunihira ngu ebibararora kandi bakahurra ha Kijukyo biija kubaleetera kugonza kwega ebirukukiraho kandi n’okufooka abaheereza ba Yahwe. Baitu n’abandi nabo bagasirwa.

¹⁰ Ekindi, turaaliza abaafukire omu by’omwoyo. Tukikora kubaijukya ngu Ruhanga nakyabagonza. Baingi baikiriza okuraalizibwa oku, kandi tusemererwa muno obutubarora. Kubaho ha Kiijukyo kibaijukya omulingo bayegondezaaga omu kuheereza Yahwe omu busumi obwa kara. Tekerezaaho ekyokurorraho kya Monica. c Akongera yatandika kutebeza omu kasumi k’oburwaire bwa Korona. Hanyuma y’okubaho ha Kiijukyo eky’omwaka 2021, akagamba ati: “Ekiijukyo kinu, kibaire kyembaganiza muno hali nyowe. Omu myaka 20 eyimmazire ntarukwejumbira omu buheereza, habw’omurundi gwange gw’okubanza, nsoboire kutebeza abantu n’okubaraaliza kwija ha Kiijukyo. Nkozere kyona ekirukusoboka kuraaliza abandi habwokuba ninsiima muno Yahwe na Yesu ekibankoliire.” (Zab. 103:1-4) Abantu kababe baikiriize okuraalizibwa kwaitu rundi nangwa, tugumizaamu nituraaliza abandi kwija ha Kiijukyo, obu nitumanya ngu Yahwe nasiima amaani turukutamu.

11. Yahwe atuhaire ata emigisa habw’amaani tutekamu kuraaliza abantu kwija ha Kiijukyo? (Hagai 2:7)

¹¹ Yahwe atuhaire emigisa habw’amaani tutamu kuraaliza abantu kwija ha Kiijukyo. Omu 2021, abantu 21,367,603 bakabaho ha Kiijukyo n’obukiraaba ngu hali haroho ebiragiro ebitairweho habw’oburwaire bwa Korona. Eki kiri nka kimu kya kabiri eky’omuhendo gw’Abakaiso ba Yahwe abali omu nsi yoona! Ky’amananu ngu Yahwe tafaaho omuhendo gw’abantu abaizire ha Kiijukyo. Baitu agonza buli muntu ow’aija ha Kiijukyo. (Luk. 15:7; 1 Tim. 2:3, 4) Nitukigumya ngu obuturaaliza abandi, Yahwe aba natukonyera kutunga abantu ab’emitima enungi.​—Soma Hagai 2:7.

12. Nyikara ki ezisobora kutugumanganiriza kubaho ha Kiijukyo? (Rora ekisisani.)

¹² Yesu akaranga ngu omu biro ebya ha mpero twakuhikirweho enyikara ezigumire ez’abuli mulingo​—kuhakanizibwa kuruga omu banyabuzaale, okuhiiganizibwa, obulemu, endwaire hamu n’ebindi bingi. (Mat. 10:36; Mar. 13:9; Luk. 21:10, 11) Obwire bumu enyikara zinu zitugumanganiriza kubaho ha Kiijukyo. Biki ab’oruganda na banyaanya itwe ebibakozere kusobora kusingura ebizibu ebi, kandi Yahwe abakonyiire ata?

13. Yahwe akaha ata Artem emigisa habw’encwamu ye n’obumanzi ebiyayolekere kwijuka okufa kwa Yesu ali omu nkomo?

¹³ Kuteekwa omu nkomo. Abakristaayo bagenzi baitu abatairwe omu nkomo habw’okwikiriza kwabo bakora kyona ekibarukusobora kwijuka okufa kwa Yesu. Tekerezaaho ekyokurorraho kya Artem. Omu kasumi ak’Ekiijukyo eky’omwaka 2020, akatekwa omu kasiika akataito muno akabamuga abanyankomo nka bbana rundi bataano. N’obukiraaba ngu akaba ali omu nkomo, akasobora kutunga  ebintu ebimu ebyarakozesa ha Ekiijukyo kandi yatekaniza kuha orubazo rw’Ekiijukyo oruramugasira wenka. Baitu abanyankomo bagenzi be baanywaga etaaba kandi babaza kubi muno. Kiki ekiyakozere? Akabasaba kuleka kunywa etaaba n’okubaza kubi habw’esaaha emu yonka. Artem akahunirra muno abanyankomo obubaikiriize kuleka kunywa etaaba n’okubaza kubi omu bwire bw’Ekiijukyo. Artem nagamba ati, “Nkacwamu kubagambiraho ebirukukwata ha Kiijukyo.” N’obukiraaba ngu bakaba bagambire ngu tibarukugonza kuhurra ebirukukwata ha Kiijukyo, hanyuma y’okurora n’okuhurra Artem nakora omukoro gw’okwijuka okufa kwa Yesu, bakamukaguza byona ebirukukwata ha Kiijukyo.

14. Biki ebyakozerwe kusobora kutunga Ekiijukyo n’obukiraaba ngu hakaba hacwekereho oburwaire bwa Korona?

¹⁴ Omu kasumi ak’oburwaire bwa Korona. Obuhacwekereho oburwaire bwa Korona, abaheereza ba Yahwe bakaba batakyasobora kubaho ha Kiijukyo maiso h’amaiso. Baitu eki kitabatange kubaho ha Kiijukyo. d Ebitebe ebikaba nibisobora kutunga Intaneeti bikaijuka okufa kwa Yesu kuraba ha vidiyo. Baitu obukaikuru  bw’abantu abakaba batasobora kutunga Intaneeti bakakora ki? Omu mahanga agamu, bakakora entekaniza nukwo orubazo rw’Ekiijukyo basobole kururorra ha tivi rundi kuruhulirra ha rediyo. Ekindi, ofiisi z’amataagi zikakwata orubazo omu ndimi ezirukuhingura omu 500 nukwo n’abantu abali omu biikaro ebyenagire hara basobole kutunga Ekiijukyo. Kandi ab’oruganda abesigwa bakakora entekaniza nukwo embazo zinu zisobole kuhika hali abo abarukuzetaaga.

15. Kiki eky’orukwegera ha kyokurorraho ky’omwegi wa Baibuli arukwetwa Sue?

¹⁵ Okuhakanizibwa abanyabuzaale. Ekikyakizireyo kulemesa abamu kubaho ha Kiijukyo, nukwo okuhakanizibwa okw’abanyabuzaale. Tekerezaaho ekyokurorraho ky’omwegi wa Baibuli arukwetwa Sue. Omu 2021, Ekiijukyo kitakabaireho, Sue akagambira omwegesa we wa Baibuli ngu tarukwija kubaho ha Kiijukyo habwokuba akaba nahakanizibwa abanyabuzaale be. Omwegesa we akamusomera Luka 22:44. Hanyuma akamusoborra ngu obututunga ebizibu, tusemeriire kuhondera ekyokurorraho kya Yesu kuraba omu kusaba hali Yahwe n’okumwesigira kimu. Ekiro ekyahondiireho, Sue akatekaniza omugaati n’eviino kandi yarora puroguraamu ey’embaganiza ey’Okuramya kwa Nyenkyakara ha jw.org. Rwebagyo oru, obwakaba ali wenka omu kisiika, akatekaho esimu ye kuhuliiriza orubazo orw’Ekiijukyo. Hanyuma, Sue akahandiikira mwegesa we ati: “Ijo ongarwiremuga muno amaani. Nkozere kyona ekindukusobora kubaho ha Kiijukyo kandi na Yahwe yankonyera. Nsemeriirwe muno kandi ninsiima!” Notekereza Yahwe naiwe nasobora kukukonyera kakuba ohikwaho enyikara niyo emu?

16. Habwaki nitukigumya ngu Yahwe naija kutuha emigisa habw’amaani tutamu kubaho ha Kiijukyo? (Abarumi 8:31, 32)

¹⁶ Yahwe asiima muno amaani tutamu kwijuka okufa kwa Yesu. Nitukigumya ngu naija kutuha emigisa kakuba twoleka okusiima habw’ebintu byona ebyatukoliire. (Soma Abarumi 8:31, 32.) Leka tucweremu kimu kurora ngu twabaho ha Kiijukyo mwaka gunu, n’okukora kyona ekiturukusobora kwongera kwejumbira omu bintu eby’omwoyo omu kasumi ak’Ekiijukyo.