1. Habwaki kihikire kugamba ngu Yahwe nuwe mukama wa byona? (Rora ekisisani ekiri ha rupapura 21.)

EBINTU byona bya Yahwe! “Iguru niguru elya haiguru, ensi na byona ebirumu bya [Yahwe] Ruhanga waitu.” (Ekyebiragiro 10:14; Okusuku’rwa 4:11) Kusigikirra nk’oku Yahwe nuwe yahangire abantu, nuwe mukama wa buli omu. (Zabuli 100:3) Baitu omu bantu boona abayahangire, haroho abantu abamu abayakomeremu okuba bantu be omu mulingo ogw’embaganiza.

2. Kusigikirra ha Baibuli, abantu ba Yahwe ab’embaganiza nubo baha?

² Ekyokurorraho, omu Zabuli 135, Yahwe akeeta Abaisareri abesigwa ab’omu kasumi aka kara “owe mali.” (Zabuli 135:4) Ekintu ekindi, Hoseya akaragura ngu abantu abamu abakaba batali Baisareri nabo bakaba nibagenda kufooka bantu ba Yahwe. (Hoseya 2:23) Obunabbi bunu bukahikirizibwa Yahwe obuyatandikire kukoma abantu b’amahanga kugenda  kulema na Yesu Kristo omu iguru. (Engeso Ezabakwenda 10:45; Abarumi 9:23-26) Abaseswerweho amagita betwa “ihanga erikome.” Hali Yahwe, bali “abantu abokutungwa.” (1 Petero 2:9, 10) Yahwe arora ata Abakristaayo abanyakwine okunihira kw’okwomeera ebiro n’ebiro omu nsi? Nabo Yahwe nabeta “abantu bange” kandi ‘abakome bange.’​—Isaya 65:22.

3. (a) Omu kasumi kanu, nibaha abaine enkoragana ey’embaganiza hamu na Yahwe? (b) Kiki ekiturukwija kubazaho omu kicweka kinu?

³ Omu kasumi kanu, “igana like,” abo nubo bantu abanyakwine okunihira okw’okwomeera ebiro n’ebiro omu iguru, hamu naabo abarukwetwa “entama ezindi,” abanyakwine okunihira kw’okutunga obwomeezi obutahwaho omu nsi boona hamu baramya Yahwe nka “igana limu.” (Luka 12:32; Yohana 10:16) Nitugonza kwoleka Yahwe ngu nitusiima muno habw’okutufoora banywani be ab’embaganiza. Omu kicweka kinu nitwija kubazaho omulingo tusobora kusiima Yahwe habw’okututamu ekitiinisa kya mulingo gunu.

4. Nitusobora kwoleka tuta ngu nitusiima Yahwe habw’okutwikiriza kuba n’enkoragana enungi hamu nauwe, kandi Yesu nauwe akakora ata ekintu nikyo kimu?

⁴ Obutuhayo obwomeezi bwaitu hali Yahwe kandi tukabatizibwa tuba nitwoleka ngu nitumusiima. Obu nubwo buli muntu arora ngu tuli bantu ba Yahwe kandi ngu twetegekere kumworobera. (Abaheburaniya 12:9) Yesu akakora ekintu nikyo kimu obuyabatiziibwe. Nobwaraaba yali naruga omu ihanga elikaba lyehaireyo hali Yahwe, nauwe nk’omuntu akehayo haluwe. Akasisana nk’owarukugamba: “Ninsemererwa okukora ebyogonza, Ai Ruhanga.”​—Zabuli 40:7, 8.

5, 6. (a) Yahwe akagamba ki Yesu obuyabatiziibwe? (b) Kyokurorraho ki ekisobora kutukonyera kumanya omulingo Yahwe ayehurra obutwehayo haluwe?

⁵ Yahwe akehurra ata Yesu obuyabatiziibwe? Baibuli egamba: “Kandi Yesu obuyamazire kubatizibwa, ahonaho yaruga omu maizi, dora, iguru likamwesukurra, yarora omwoyo gwa Ruhanga nugusirimuka nkeriiba, nigutaha haluwe; Dora, niraka likaruga omu iguru, nirigamba ngu ogu nuwe Mwana wange oundukugonza, ounsemereriirwe muno.” (Matayo 3:16, 17) N’obwakaba atakabatiziibwe, Yesu akaba ali wa Ruhanga. Baitu Yahwe kikamusemeza kurora ngu Yesu akaba ayetegekere kukozesa obwomeezi bwe kuheereza uwe wenka. Naitwe obutuhayo obwomeezi bwaitu kuheereza Yahwe, asemererwa kandi naija kutuha emigisa.​—Zabuli 149:4.

⁶ Baitu hati Yahwe obwaraaba ali mukama wa buli kimu kyona, kiki ekitusobora kumuha? Tuteremu akasisani omuntu abyaire ebyako omu zigati ye. Hanyuma, omwana we acwa kimu ha byakyo kandi akimuhereza nk’ekisembo. Nobukiraaba ngu ekyakyo ekimuhairwe kirugire omu byakyo bye habwe, nikisobora kumusemeza. Nikiba nikimwoleka ngu omwana onu namugonza. Ekyakyo eky’omwana amuhaire nakitwara kuba ky’omuhendo kukira ebyakyo bindi eby’omuzigati. Nikyo kimu na Yahwe, asemererwa muno obutucwamu kuhayo obwomeezi bwaitu haluwe twegondiize.​—Okuruga 34:14.

7. Maraki natukonyera ata kwetegereza omulingo Yahwe ayehurramu hali abo abamuheereza begondiize?

⁷ Soma Maraki 3:16. Habwaki kiri kikuru  kuhayo obwomeezi bwawe hali Yahwe kandi okabatizibwa? Mananu ngu kuruga obaho nk’omuntu, okaba oli wa Yahwe habwokuba nuwe Muhangi. Baitu teramu akasisani orole omulingo Yahwe asobora kusemererwa kakuba oyehayo hali uwe kandi okamwikiriza kuba Mulemi waawe. (Enfumo 23:15) Yahwe amanyire abo boona abamuheereza begondiize, kandi amabara gaabo agahandiika omu ‘kitabu eky’okuijukya.’

8, 9. Kiki Yahwe ekyarukwetagisa abo boona abanyakwine amabara gabo gahandikirwe omu ‘kitabu eky’okwijukya’?

⁸ Obuturaaba nitugonza amabara gaitu gaikale omu ‘kitabu eky’okwijukya’ ekya Yahwe, haroho ekintu ekitusemeriire kukora. Maraki akagamba ngu tusemeriire kutiina Yahwe kandi twecumitirize haibara lye. Kakuba turamya omuntu ondi wena rundi ekintu kindi kyona, Yahwe naija kusiimuura amabara gaitu omu kitabu kye!​—Okuruga 32:33; Zabuli 69:28.

⁹ Nahabweki tikirukumara itwe kuraganiza Yahwe ngu nitwija kukora eby’arukugonza kandi hanyuma tukabatizibwa. Binu biri bintu ebitukora omurundi gumu gwonka, baitu okuramya Yahwe kwo kusemeriire kugumizamu obwomeezi bwaitu bwona. Buli kiro leka ebikorwa byaitu byolekere kimu ngu nitworobera Yahwe.​—1 Petero 4:1, 2.

10. Mbaganiza ki esemeriire kuba hagati y’abantu abarukuheereza Yahwe n’abatarukumuheereza?

¹⁰ Omu kicweka ekihoire, tukarora ngu Kaini, Sulemani, n’Abantu ba Isareri bayeforaga ngu nibaramya Yahwe baitu bakaba batali besigwa haluwe. Ebyokurorraho binu bikatwoleka ngu tikirukumara kugamba bugamba ngu nituramya Yahwe. Tusemeriire kunoba ebibi kandi tugonze ebirungi. (Abarumi 12:9) Yahwe nagamba ngu kyakwanguhire kumanya embaganiza enyakuli hagati y’abantu “abahikiriire nababi, ogu arukukorra Ruhanga, nogu atarukumukorra.”​—Maraki 3:18.

11. Habwaki kitasemeriire kugumira abantu bandi kurora ngu nituramya Yahwe?

¹¹ Nitusiima Yahwe habwokutukoma kuba abantu be! Buli muntu wena asemeriire kwanguhirwa kukirora ngu tuli ha rubaju rwa Yahwe. (Matayo 5:16; 1 Timoseo 4:15) Hati wekaguze: ‘Abantu abandi nibakirora ngu mali ndi mwesigwa hali Yahwe? Mpurra ninyesiimisa kugambira abandi ngu ndi omu ha Bakaiso ba Yahwe?’ Teramu akasisani orole omulingo Yahwe asobora kwehurramu kakuba ogira ensoni ez’okugambira abandi ngu oli omu ha bantu be.​—Zabuli 119:46; soma Marako 8:38.

12, 13. Abaheereza ba Yahwe abamu betwaza bata ekiretera abantu kulemwa kubamanyirra nk’Abakaiso ba Yahwe?

¹² Eky’enaku, haroho n’Abakaiso ba Yahwe abamu abarukuhondera “omwoyo ogwensi.” Kandi kinu kibaletiire kusisana n’abantu abandi abatarukuramya Yahwe omu bintu ebimu. (1 Abakolinso 2:12) “Omwoyo ogwensi” guletera abantu kuta emitima yabo ha kwegomba kwabo habwabo.  (Abefeso 2:3) Nk’ekyokurorraho, n’obuturaaba tutungire obuhabuzi bwingi oburukukwata ha njwara, abamu na hati nibakyajwara kubi. Bajwara engoye ezirukukwatira ha mibiri, kandi ezirukurorrana, n’obubarukuba bali ha mikoro ey’Ekikristaayo. Rundi bacwamu kukora amasoke agatarukuhaisa Yahwe ekitiinisa. (1 Timoseo 2:9, 10) Kinu kiretera abantu abandi kugumirwa kumanya omuntu wa mulingo ogu obwaraaba ali omu ha Bakaiso ba Yahwe rundi atali.​—Yakobo 4:4.

¹³ Haroho emiringo endi nambere Abakaiso ba Yahwe abamu balemerwe kwoleka ngu nibahukanaho n’abantu ab’ensi. Nk’ekyokurorraho, obubagenda ha magenyi, abamu bacwamu kuzina rundi kwetwaza omu mulingo ogutali gw’Ekikristaayo. Abandi bata ebisisani byabo ha mikura rundi bahandikaho ebigambo ebirukwoleka ngu entekereza yabo nesigikirra ha kwegomba kwabo okw’omubiri. Nibasobora kuba batakabafubirwaga omu kitebe habw’okukora ekibi ky’amaani, baitu nibasobora kusiisa ab’oruganda n’abanyaanya itwe abarukulengaho kwetantara ensi.​—Soma 1 Petero 2:11, 12.

14. Nitusobora kulinda tuta kurungi enkoragana yaitu ey’omuhendo ei twine na Yahwe?

¹⁴ Buli kintu kyona omu nsi kitairweho kukurakuraniza “okwegomba okwomubiri, nokwegomba okwamaiso, nokwenyumiza okwobwomezi okutarumu.” (1 Yohana 2:16) Itwe tuli ba Yahwe nahabweki nitwahukanaho. Twanga “obutatina Ruhanga nokwegomba okwomunsi,” kandi twetwaza omu mulingo ogw’amagezi “nukwo tube abomezi omu businge bwa hati bunu omu kwerinda nokuhikirra nokutiina Ruhanga.” (Tito 2:12) Obwomeezi bwaitu bwona, otwaliremu n’omulingo tubaza, tulya,  tunywa, tujwara, n’omulingo tukora emirimo yaitu bisemeriire kwoleka buli muntu wena ngu itwe tuli ba Yahwe.​—Soma 1 Abakolinso 10:31, 32.

15. Habwaki tusemeriire kuba b’embabazi kandi tukagonza Abakristaayo bagenzi baitu?

¹⁵ Omulingo tutwazamu ab’oruganda n’abanyaanya itwe gwoleka obuturaaba nitutwara enkoragana yaitu na Yahwe nk’ey’omuhendo. Nabo bali bantu ba Yahwe nk’oku naitwe tuli bantu be. Obuturaikara nitwijuka ekintu kinu nitwija kubagonzaaga n’okubatwazaaga omu mulingo ogw’embabazi obwire bwona. (1 Abasesalonika 5:15) Habwaki ekintu kinu kikuru? Yesu akagambira abahondezi be ati: “Nukwo bona balimanya muli begeswa bange,​—obumurabaga nokugonzangana inywenka.”​—Yohana 13:35.

16. Ekiragiro kya Musa nikyoleka kita ngu Yahwe agonza abantu be?

¹⁶ Haroho ekyokurorraho kuruga omu Biragiro bya Musa ekisobora kutukonyera kumanya omulingo tusemeriire kutwazaamu abantu abandi omu kitebe. Omu yekaru ya Yahwe hakaba harumu ebintu ebyakozesebwaga omu kuramya honka. Ekiragiro kikasoborra kurungi muno omulingo Abalevi bakaba basemeriire kurolerra ebintu ebi kandi omuntu wena atahonderaga obuhabuzi bunu yaitwaga. (Okubara 1:50, 51) Yahwe obwaraaba yafayoga muno ha mulingo abantu batwazamuga ebintu ebyakozesebwaga omu kuramya, torukunihira nafayo muno ha mulingo abantu abandi batwazamu abaheereza be abehaireyo haluwe kandi abanyakuli besigwa? Natumanyisa ngu tuli bomuhendo kuraba omu bigambo binu: “Wena akora [haliiwe] buli akozire ha mboni [y’eliiso lyange].”​—Zakaliya 2:8.

17. Yahwe ‘ategere amatu kuhurra’ ki?

 ¹⁷ Maraki akagamba ngu Yahwe ‘atega amatu kandi ahurra’ omulingo abantu be batwazangana. (Maraki 3:16) Yahwe “amanyire abe.” (2 Timoseo 2:19) Amanya ebitukora n’ebitubaza. (Abaheburaniya 4:13) Obututagirra abaheereza bagenzi baitu embabazi, Yahwe akirora. Baitu tutebwa ngu n’obutugirra abandi amakune, tukabagabira, tukabaganyira, kandi tukaboleka embabazi, ebikorwa binu nabyo Yahwe abirora.​—Abaheburaniya 13:16; 1 Petero 4:8, 9.

18. Nitusobora kwoleka tuta Yahwe ngu nitumusiima habw’okutufoora abantu be?

¹⁸ Nitugonza kwoleka Yahwe ngu nitusiima muno habw’okuba abantu be. Nitukimanya ngu obutwahaireyo obwomeezi bwaitu haluwe, egi ekaba ncwamu erukukirayo obukuru ei twakozere. Nobuturaaba tuli “hagati omu businge obuhabire,” nabwo nitusobora kwikara ‘tutanyina akamogo’ kandi nitusobora kweyongera kwaka “nketabaza omunsi.” (Abafiripi 2:15) Nahabweki twehaireyo kwetantara kukora ekintu kyona eki Yahwe anoba. (Yakobo 4:7) Tugonza ab’oruganda n’abanyaanya itwe kandi tubatamu ekitiinisa habwokuba nabo bantu ba Yahwe.​—Abarumi 12:10.

19. Yahwe aha abantu be empeera omu mulingo ki?

¹⁹ Baibuli neturaganiza eti: “[Yahwe] talinaga abantu be.” (Zabuli 94:14) Gunu guli murago ogututasobora kugurukyagurukya. Kyonakyona ekiraabaho, Yahwe naija kwikara ali hamu naitwe. N’obuturafa, tarukwija kutwebwa. (Abarumi 8:38, 39) “Obuturaba ntwomera, ntwomera hali [Yahwe] waitu: obuturaba ntufa ntufa hali [Yahwe] waitu: Nukwo, rundi obutulyomera, rundi obutulifa, tuli ba [Yahwe].” (Abarumi 14:8) Tulindiriire akasumi Yahwe obwalihumbuura abaheereza be boona abesigwa abaafiire. (Matayo 22:32) Kandi nahati nitwegonza habw’ebisembo bingi ebirungi ebi Isiitwe arukutuha. Mali kiri nk’oku Baibuli egamba, “liine okusemererwa ihanga eliine Yahwe nka Ruhanga walyo, abantu abayakomeremu okuba obugwetwa bwe.”​—Zabuli 33:12, NW.