1. Tumanyisa ki obutukoseza ekigambo “amananu”?

“OKEEGA ota amananu?” “Okakurra omu mananu?” “Omazire kasumi ki oli omu mananu?” Nibasobora kuba barakukagwizeeho ebikaguzo ebi rundi naiwe okabikaguzaaho omuntu ondi. Obutukozesa ekigambo “amananu” tuba nitumanyisa ki? Ekigambo kinu tukira kukikozesa kumanyisa enyikiriza zaitu, omulingo turamyamu, n’omulingo twetwazaamu nk’Abakristaayo. Abantu abali “omu mananu” bamanyire biki Baibuli eyegesa, kandi bahondera emisingi yayo. Kinu kibakonyera kuleka kwikiririza omu nyegesa ez’ebisuba kandi batunga obwomeezi oburukukirayo oburungi n’obubaraaba batahikiriire.​—Yoh. 8:32.

2. Kusigikirra ha Yohana 13:34, 35, kiki ekisobora kuba ky’abandize kukusikiriza kwija omu mananu?

² Kiki eky’abandize kukusikiriza kwija omu mananu? Nizisobora kuba zaali engeso enungi ez’abantu ba Yahwe. (1 Pet. 2:12) Obundi kwali kugonza okubakwolekere. Abantu baingi bakakwatwaho muno habw’okugonza okubabolekere obu baizire omu nsorrokano omurundi ogw’okubanza hatali ebibahuliire nibyegesebwa. Kinu tikirukutuhuniriza habwokuba Yesu akagamba ngu abantu bakumanyire abegeswa be ab’amananu habw’okugonza okubolekangana. (Soma Yohana 13:34, 35.) Baitu okugonza oku tikurukumara kusobora kutunga okwikiriza okugumire.

3. Kiki ekisobora kubaho kakuba okwikiriza kwaitu omuli Ruhanga kuba nikusigikirra ha kugonza Abakristaayo batwoleka?

³ Okwikiriza kwaitu tikusemeriire kusigikirra ha kugonza kwonka Yesu yabalizeeho okw’abantu ba Ruhanga boolekangana. Habwaki? Habwokuba okwikiriza kwaitu nikusobora kuhwaho kakuba kuba nikusigikirra ha kugonza oku kwonka. Nk’ekyokurorraho,  nitusobora kuleka kuheereza Yahwe kakuba ow’oruganda rundi munyaanya itwe, rundi omugurusi omu kitebe, rundi payoniya akora ekibi eky’amaani. Nitusobora n’okuleka kuheereza Yahwe kakuba ow’oruganda rundi munyaanya itwe atubiihiza, rundi akecwaho ekitebe kandi akagamba ngu ebiturukwikiririzaamu bigwire. Nahabweki obuturaaba nitugonza kutunga okwikiriza okugumire, kusemeriire kusigikirra ha nkoragana ey’amaani na Yahwe. Kakuba oyombeka okwikiriza kwawe omuli Ruhanga nosigikirra ha bikorwa eby’abantu abandi, noija kuba otaine okwikiriza okugumire. Obworaaba noyombeka enju yaawe ey’okwikiriza, tosemeriire kusigikirra ha nyehurra zaawe zonka baitu naha bintu ebyorukugumya ngu mali by’amananu. Osemeriire kukigumya ngu Baibuli eyegesa amananu agarukukwata hali Yahwe.​—Bar. 12:2.

4. Kusigikirra ha Matayo 13:3-6, 20, 21, kiki ekihika h’abantu abamu okwikiriza kwabo obukulengwa?

⁴ Yesu akagamba ngu abamu bakwikiriize amananu “nokusemererwa,” baitu okwikiriza kwabo kwakucekere habw’okulengwa. (Soma Matayo 13:3-6, 20, 21.) Obundi batakyetegereze ngu, kuhondera Yesu tikyanguhire kandi kirumu n’ebizibu. (Mat. 16:24) Rundi nibasobora kuba baali nibatekereza ngu obwomeezi obw’Omukristaayo tiburumu bizibu baitu emigisa yonka. Baitu ensi enu eiturumu eijwiremu ebizibu bingi. Enyikara yaitu n’esobora kuhinduka, kandi eki nikisobora kutumaraho okusemererwa habw’akacu kake.​—Zab. 6:6; Mug. 9:11.

5. Kiki ekirukwoleka ngu ab’oruganda na banyaanya itwe abarukukira obwingi nibakigumya ngu bali omu mananu?

⁵ Ab’oruganda na banyaanya itwe baingi nibakigumiza kimu ngu bali omu mananu. Habwaki nitugamba tuti? Okwikiriza kwabo tikuceka Omukristaayo mugenzi wabo obw’abakora kubi rundi obwakora ekibi eky’amaani. (Zab. 119:165) Okulengwa kwona okubarabamu tikucekya okwikiriza kwabo baitu kweyongera bweyongera kuguma. (Yak. 1:2-4) Nosobora ota kwombeka okwikiriza nk’oku okugumire?

6. Abegeswa ab’omu kyasa eky’okubanza bakombeka okwikiriza kwabo nibasigikirra hali ki?

⁶ Abegeswa ab’omu kyasa eky’okubanza, bakombeka okwikiriza kwabo nibasigikirra ha kumanya okubatungire kuruga omu Byahandiikirwe n’enyegesa za Yesu, ago nugo “amazima agenjiri.” (Bag. 2:5) Amazima ganu nigwatwarramu enyegesa zoona ez’Ekikristaayo otwaliiremu amananu agarukukwata ha kicunguro kya Yesu, hamu n’okuhumbuka kwe. Omukwenda Paulo akaba nakigumiza kimu ngu enyegesa zinu zihikire. Habwaki? Habwokuba akakozesa Ebyahandiikirwe kugumya ngu “Kristo kikamuhikirra okuhu’rwa, nokuhumbuka omu bafu.” (Eng. 17:2, 3) Abakristaayo ab’omu kyasa eky’okubanza bakaikiriza enyegesa ezi kandi bakonyerwa omwoyo ogurukwera kwetegereza Ekigambo kya Ruhanga habwokuba bakaba nibagwesiga. Bakakora okuseruliiriza kusobora kugumya ngu enyegesa ezo nizisigikirra ha Byahandiikirwe. (Eng. 17:11, 12; Baheb. 5:14) Batombeke okwikiriza kwabo nibasigikirra ha nyehurra zaabo zonka kandi bataheereze Yahwe ngu habwokuba baali nibagonza kwikara n’Abakristaayo bagenzi baabo. Baitu okwikiriza kwabo kwali nikusigikirra ha “kumanya Ruhanga [okuhikire].”​—Bak. 1:9, 10.

7. Okwikiriza kwaitu okurukusigikirra h’amananu kuruga omu Baibuli nikwija kutukonyera kuta?

⁷ Amananu kuruga omu Kigambo kya Ruhanga tigahinduka. (Zab. 119:160) Ekyokurorraho, tigahinduka Omukristaayo mugenzi waitu obwatukora kubi rundi obwakora ekibi eky’amaani. Kandi tigahinduka obututunga ebizibu. Nahabweki, tusemeriire kuba nitwetegereza kurungi enyegesa za Baibuli kandi nitukigumiza kimu ngu zihikire. Okwikiriza kwaitu  okugumire okurukusigikirra h’amananu kuruga omu Baibuli nikwija kutukonyera omu bwire bw’okulengwa, nk’omulingo enanga ekonyera eryato kugumira ekiyaga eky’amaani. Nosobora ota kukigumiza kimu ngu oli omu mananu?

8. Nk’oku kyolekerwe omu 2 Timoseo 3:14, 15, Timoseo akasobora ata kukigumya ngu ali omu mananu?

⁸ Timoseo akaba nakigumiza kimu ngu ali omu mananu. Kiki eky’amukonyire kukigumya? (Soma 2 Timoseo 3:14, 15.) Nyina hamu na nyinenkuru nubo babandize kumwegesa “ebyahandikirwe ebirukwera.” Baitu hataroho kugurukyagurukya, na uwe habwe akatamu obwire n’amaani kwesomesa Ebyahandikirwe ebi. Ekyarugiremu ‘aketegereza mali’ ngu Ebyahandiikirwe ebi bikaba by’amananu. Hanyuma yakasumi, Timoseo, nyina, hamu na nyinenkuru bakeega enyegesa ez’Ekikristaayo. Hataroho okugurukyagurukya, Timoseo akakwatwaho okugonza abahondezi ba Kristo bayolekaga, kandi yagonzaaga muno kusorrokana nabo hamu n’okubafaaho. (Baf. 2:19, 20) Baitu okwikiriza kwe kutasigikirre ha kugonza akaba ainiire Abakristaayo abo, baitu kukasigikirra h’amananu agamukonyire kwirra haihi na Yahwe. Naiwe osemeriire kwesomesa Baibuli nukwo ogumye ngu ebyerukwegesa hali Yahwe mananu.

9. Bintu ki bisatu eby’osemeriire kubanza kugumya?

⁹ Kikuru muno kubanza kugumya ngu ebintu binu bisatu by’amananu. Eky’okubanza, osemeriire kukigumya ngu Yahwe nuwe Muhangi w’ebintu byona. (Kurug. 3:14, 15; Baheb. 3:4; Kus. 4:11) Ekyakabiri, osemeriire kukigumya ngu Baibuli butumwa bwa Ruhanga hali abantu. (2 Tim. 3:16, 17) Kandi eky’akasatu osemeriire kukigumya ngu Yahwe aine ekitebe eky’abantu abatekaniziibwe kurungi kumuramya abarukwebemberwa Kristo kandi ekitebe eki nikyo eky’Abakaiso ba Yahwe. (Is. 43:10-12; Yoh. 14:6; Eng. 15:14) Kusobora kugumya ebintu binu bisatu tikirukwetaagisa kubanza kumanya buli kimu kyona ekiri omu Baibuli. Baitu ekigendererwa kyaitu kisemeriire kuba eky’okukozesa kurungi “obusobozi bwaitu obw’okutekereza” kusobora kugumya ngu mali tuli omu mananu.​—Bar. 12:1, NW.

10. Oihireho kumanya amananu, kintu ki ekindi ekyorukwetaaga kumanya?

¹⁰ Obworamara kugumya amananu agarukukwata hali Ruhanga, Baibuli, hamu n’abantu be, noyetaaga kumanya omulingo osobora kukozesa Ebyahandiikirwe kukonyera abantu kugumya amananu ago. Habwaki? Habwokuba nk’Abakristaayo twine obujunanizibwa obw’okwegesa abantu amananu agaturukwega. * (1 Tim. 4:16) Kandi obutuba nitulengaho kukonyera abandi kwetegereza amananu kuruga omu Baibuli, naitwe tweyongera kugumya okwikiriza kwaitu omu mananu ago.

11. Omukwenda Paulo akatuteraho kyokurorraho ki obwakaba nayegesa abandi amananu?

¹¹ Omukwenda Paulo obuyayegesaaga abantu, ‘yabaikirizisaaga obw’ebigambo bya Yesu, ebiragiro bya Musa, n’ebya banabbi.’ (Eng. 28:23) Nitusobora tuta kuhondera ekyokurorraho kya Paulo obuturukuba nitwegesa abandi amananu? Titusemeriire kugarukira ha kubagambira kwonka amananu agali omu Baibuli, baitu tusemeriire kubakonyera kwecumitirizaaho ebibarukwega kuruga omu Baibuli. Nitugonza baikirize amananu habwokuba nibagumya ngu ebibarukwega nugo mananu agarukukwata hali Ruhanga waitu ow’okugonza hatali ngu habwokuba nibatugonza.

12-13. Abazaire nibasobora bata kukonyera abaana baabo kwikara omu mananu?

¹² Hataroho kugurukyagurukya, abazaire nimugonza abaana banyu baikale omu mananu. Nosobora kutekereza ngu kakuba batunga abanywani abarungi omu kitebe nibaija kukurakurana omu by’omwoyo. Baitu abaana baawe kusobora kukigumya ngu bali omu mananu, haroho ekintu ekindi ekibarukwetaaga. Nibetaaga kutunga enkoragana enungi na Ruhanga kandi n’okugumya ngu ebibarukwega kuruga omu Baibuli mananu.

¹³ Abazaire kusobora kukonyera abaana baabo kwega amananu agarukukwata hali Ruhanga, basemeriire kubateraho ekyokurorraho ekirungi eky’okwesomesa Baibuli. Kandi basemeriire kutunga obwire obw’okwecumitirizaaho ebibegere. Obubarakora eki nubwo barasobora kwegesa abaana baabo kukora ekintu nikyo kimu. Basemeriire kwegesa abaana baabo omulingo basobora kukozesaamu ebikwato ebitukozesa kwesomesa, nk’oku begesa abeegi baabo aba Baibuli kubikozesa. Kakuba bakora kinu, nibaija kukonyera abaana baabo kugonza Yahwe kandi kwesigira kimu ngu akozesa omwiru omwesigwa kutukonyera kwetegereza Baibuli. (Mat. 24:45-47) Abazaire, mutagarukira ha kwegesa abaana banyu amananu agarukubandirizibwaho gonka. Mubakonyere kutunga okwikiriza okugumire kuraba omu kubegesa “ebintu bya Ruhanga ebihamire”  kusigikirra ha myaka yabo hamu n’obusobozi bwabo.​—1 Kol. 2:10, NW.

14. Habwaki tusemeriire kwegaho obunabbi obuli omu Baibuli? (Rora akasanduuko “ Nosobora Kusoborra Obunabbi Bunu?”)

¹⁴ Obunabbi buli kicweka kikuru eky’Ekigambo kya Ruhanga kandi butukonyera kwombeka okwikiriza okugumire omuli Yahwe. Bunabbi ki obugumize okwikiriza kwawe? Nosobora kubazaaho obunabbi oburukukwata ha “biro bya hanyuma.” (2 Tim. 3:1-5; Mat. 24:3, 7) Bunabbi ki obundi obuhikiriziibwe obusobora kugumya okwikiriza kwawe? Ekyokurorraho, nosobora kusoborra obunabbi obuli omu Danieri esuura 2 rundi obuli omu Danieri esuura eya 11, obuhikiriziibwe kandi n’obuli omu kuhikirizibwa hati? * Okwikiriza kwawe kakuba kuba nikusigikirra ha Baibuli, nikuba kugumire muno. Tekerezaaho ekyokurorraho eky’ab’oruganda ababonabonesiibwe muno omu Obulemu obw’Ensi Yoona Obwakabiri omu Germany. Nobukiraaba ngu bakaba batarukwetegereza buli kimu kyona ekirukukwata ha bunabbi obw’ebiro ebya ha mpero, bali baine okwikiriza okugumire omu Kigambo kya Ruhanga.

15-17. Kwesomesa Baibuli kukakonyera kuta ab’oruganda abahiganiziibwe Abanazi?

¹⁵ Gavumenti ey’Abanazi obw’ekaba n’erema Germany, enkumi n’enkumi z’ab’oruganda na banyaanya itwe bakasindikwa omu nkambi ez’abanyankomo. Hitler hamu n’omukuru ondi ayayetwaga Heinrich Himmler bakaba banobere muno Abakaiso ba Yahwe. Kusigikirra ha bigambo bya munyaanya itwe omu, Himmler akagambira guruupu ya banyaanya itwe omu nkambi emu ati: “Yahwe wanyu nalema omu iguru, baitu hanu omu nsi niitwe turukulema! Nitwija kubooleka noha araikaraho kukira mutaahi we, inywe rundi itwe!” Kiki ekyakonyire abantu ba Yahwe kwikara bali besigwa?

¹⁶ Abeegi ba Baibuli abo, baali bakimanyire ngu Obukama bwa Ruhanga bukatandika kulema omu 1914. Nahabweki kitabahunirize obubahiganiziibwe  muno. Abantu ba Yahwe baali nibakigumiza kimu ngu busaho gavumenti y’abantu ey’esobora kulemesa ekigendererwa kya Ruhanga kuhikirra. Hitler akaba aturukusobora kumaraho okuramya okw’amananu rundi kutaho gavumenti ey’erukusobora kukira amaani Obukama bwa Ruhanga. Ab’oruganda baali nibakigumiza kimu ngu obulemi bwa Hitler bukaba nibugenda kuhwaho.

¹⁷ Kandi mali ekibakaba nibaikiriza kikahikirra. Hakarabaho akasumi kake gavumenti y’Abanazi yagwa, kandi Heinrich Himmler ayagambire ngu “hanu omu nsi niitwe turukulema,” akaba nairuka kukiza obwomeezi bwe. Obwakaba nairuka akatangaana Ow’oruganda Lübke ayabaireho munyankomo kandi Himmler akamumanyirra. Himmler ow’akaba ayenubire muno akakaguza Ow’oruganda Lübke ati: “Hati Omwegi wa Baibuli, kiki ekirukugenda kuhonderaho?” Ow’oruganda Lübke akamusoborra ngu Abakaiso ba Yahwe bakaba bakimanyire kara ngu obulemi bw’Abanazi bukaba nibugenda kuhwaho kandi baali nibagenda kucungurwa. Himmler ayabazaaga ebintu ebibi bingi h’Abakaiso ba Yahwe, murundi gunu akaba atakyaine bigambo. Hakarabaho akasumi kake, y’ayeyita. Kinu nikitwegesa ki? Kwesomesa Baibuli, otwaliremu n’obunabbi oburumu nikisobora kutukonyera kutunga okwikiriza okugumire kandi n’okugumira okuhiganizibwa.​—2 Pet. 1:19-21.

18. Nk’oku kyolekerwe omu Yohana 6:67, 68, habwaki nitwetaaga “okumanya okuhikire n’okwetegereza omu bwijwire” Paulo okuyahandiikireho omu Abafiripi 1:9?

¹⁸ Itwena tusemeriire kwoleka okugonza kusobora kugumya ngu tuli Bakristaayo abamananu. Baitu nitwetaaga “okumanya okuhikire n’okwetegereza omu bwijwire.” (Baf. 1:9, NW) Kitali eki, nitusobora kubihwabihwa “omuyaga gwona ogwokwegesa, omu kubihabiha okwabantu,” otwaliremu kuhabisibwa abo abayecwireho ekitebe. (Bef. 4:14) Abegeswa baingi omu kyasa eky’okubanza obubalekere kuhondera Yesu, omukwenda Petero uwe akakigumiza kimu ngu Yesu aine “ebigambo ebyobwomezi obutahwaho.” (Soma Yohana 6:67, 68.) Nobukiraaba ngu Petero omu kasumi ako akaba atarukwetegereza buli kimu kyona ekirukukwata ha bigambo ebi, akaikara ali mwesigwa habwokuba akaba amazire kumanya amananu agarukukwata ha Kristo. Naiwe nosobora kugumiza kimu okwikiriza kwawe omu nyegesa za Baibuli. Obw’orakikora, okwikiriza kwawe nikwija kwikara kugumire omu nyikara zoona, kandi noija n’okukonyera abandi kutunga okwikiriza okugumire.​—2 Yoh. 1, 2.