1. Kiki omukwenda Paulo yayebalizeeho atarukutiina?

OMUKWENDA Paulo akabaza atarukutiina ngu obwire obumu yayehurraga ali muceke. Akaikiriza yagamba ati omubiri gwe gukaba ‘niguhwaho’ habwokuba akaba narwana kukora ekihikire kandi Yahwe akaba atarukugarukamu esaara ze nk’oku akaba nanihira. (2 Kol. 4:16; 12:7-9; Bar. 7:21-23) Paulo akongera yakyetegereza ngu abantu abamuhakanizaaga bamutwaraga kuba muceke. * Baitu ataikirize ebintu ebibi ebibamubalizeeho rundi obuceke bwe kumuletera kutekereza ngu taine mugaso.​—2 Kol. 10:10-12, 17, 18.

2. Kusigirra ha 2 Abakolinso 12:9, 10, isomo ki erikuru omukwenda Paulo yayegere?

² Omukwenda Paulo akeega isomo erikuru muno​—omuntu nasobora kuba w’amaani n’obwarukuba nayehurra ali muceke. (Soma 2 Abakolinso 12:9, 10.) Yahwe akagambira Paulo ngu akaba nagenda kumuha amaani agaakaba nayetaaga. Leka tubanze tubazeeho ensonga habwaki tutasemeriire kubihirwa abahakaniza baitu obubatujuma.

3. Habwaki nitusobora kusemerererwa omu kujumwa?

³ Busaho n’omu omulitwe ayakugondeze kujumibwa. Baitu kakuba abanyanzigwa baitu batujuma kandi tuketuntura muno habw’ebigambo byabo, nitusobora kuhwamu amaani. (Nfu. 24:10) Hati, tusemeriire kwehurra tuta abarukutuhakaniza  obubatujuma? Nk’omukwenda Paulo, nitusobora kusemerererwa “omu kukorwa kubi.” (2 Kol. 12:10) Habwaki? Habwokuba abantu obubatujuma kandi bakatuhakaniza, kyoleka ngu tuli begeswa ba Kristo ab’amananu. (1 Pet. 4:14) Yesu akagamba ngu abahondezi be baija kuhiganizibwa. (Yoh. 15:18-20) Eki kikahikirra h’Abakristaayo ab’omu kyasa eky’okubanza. Omu kasumi ako, abo abaali batwaliriziibwe enyetwaza ey’Abayonaani, baroraga Abakristaayo nk’abantu abataine magezi kandi aba hansi muno. Kandi Omubayudaaya, Abakristaayo babaroraga nk’abantu “abatakegesebwaga” nk’ekyokurorraho bakarora Yohana na Petero omu mulingo ogu. (Eng. 4:13) Abakristaayo bazookaga nk’abaceke habwokuba bakaba batarukwetahya omu by’obulemi, batarukutaaha amahe. Nahabweki, abantu babaroraga nk’ebinugwa.

4. Abakristaayo ab’omu kyasa eky’okubanza bakakora ki abahakaniza obu bababazaahoga ebintu ebibi?

⁴ Tugambe ngu omulingo omubi abahakaniza batwazaamuga Abakristaayo ab’omu kyasa eky’okubanza gukabalemesa? Nangwa. Ekyokurorraho, abakwenda Petero na Yohana, bakagurora nk’omugisa kuhiganizibwa habw’okuhondera Yesu n’okutebeza enjiri ey’Obukama. (Eng. 4:18-21; 5:27-29, 40-42) Abegeswa batakwatwe ensoni. N’obukiraaba ngu abantu bakaba batarukutamu Abakristaayo ab’omu kyasa eky’okubanza ekitiinisa, bakakonyera muno abantu. Ekyokurorraho, ebitabu ebyahandiikirwe Abakristaayo abo abaterekereziibwe omwoyo ogurukwera, nibikonyera obukaikuru bw’abantu kandi nibibaha okunihira okurungi. Kandi Obukama obubatebiizeeho, kasumi kanu nibulemera omu iguru kandi omu kasumi akatali kahara nibwija n’okulema ensi. (Mat. 24:14) Kandi obulemi kirimaani obwa Roma obwahiganiize Abakristaayo bukahwaho kara. Baitu Abakristaayo abo abesigwa hati bakama omu iguru. Abahakaniza abo obu baliba batungire omugisa ogw’okuhumbuuka, nibaija kulemwa Obukama obwali nibutebezebwa Abakristaayo abahiganizibwaga.​—Kus. 20:4, 6.

5. Kusigikirra ha Yohana 15:19, habwaki abaheereza ba Yahwe barorwa nk’abantu ab’orulengo orwa hansi?

⁵ Kasumi kanu, itwe Abakaiso ba Yahwe, obumu tugayibwa kandi tusekerezebwa nk’abantu abataine magezi kandi ab’orulengo orwa nsi. Habwaki? Habwokuba twanga kuba n’entekereza ey’abantu ababi abatwetoroire. Kandi tulengaho kuba abebundaazi, abaculeezi, kandi abahulizi. Baitu abantu b’ensi kasumi kanu begomba abantu b’ensi ab’emyehembo, abarukwempanka kandi abajeemu. Kwongera hali eki, titwetahya omu bintu eby’obulemi kandi titutaaha amahe. Nk’oku tuli bantu ab’embaganiza h’abantu ab’ensi, kinu kiretiire abantu kutekereza ngu tuli ba hansi muno.​—Soma Yohana 15:19; Bar. 12:2.

6. Yahwe asobozesa abaheereza be kukora mirimo ki ey’amaani?

⁶ Nobukiraaba ngu abantu b’ensi nibatekereza ngu tuli baceke, Yahwe natusobozesa kukora ebintu eby’amaani. Natusobozesa kukora omulimo ogw’okutebeza ogukyakizireyo omu byafaayo. Abaheereza be kasumi kanu nibaturukya magaziini ezitiirwe omu ndimi nyingi kandi ezikizireyo kugabibwa omu nsi yoona. Kandi bakozesa Baibuli kukonyera obukaikuru n’obukaikuru bw’abantu kuba n’obwomeezi oburungi. Yahwe nuwe asobozesa ebintu binu byona kukorwa. Asobozesa ekitebe eky’abantu abarukuzooka nk’abaceke kukora ebintu binu eby’amaani. Kandi iwe nk’omuntu? Yahwe nasobora kukukonyera kuba w’amaani? Ego. Hati, kiki eky’osemeriire kukora kutunga obukonyezi bwe? Katubazeeho amasomo asatu agatusobora kwegera ha kyokurorraho ky’omukwenda Paulo.

7. Limu h’amasomo agaturukwega kuruga omu kyokurorraho kya Paulo niryo liha?

⁷ Limu h’amasomo agaturukwega omu kyokurorraho kya Paulo niryo linu: Otesiga amaani rundi obusobozi bwawe obworaaba noheereza Yahwe. Abantu baingi bakaba nibegomba Paulo habw’enyikara ey’akaba arumu hamu n’obusobozi bwe. Kandi kinu kyakumuletiire kwehemba n’okweyesiga wenka. Akakurra Taruso orubuga orukuru orwa Kirikiya isaza lya Roma. Kasumi ako Taruso rukaba rubuga orukurakuraine kandi orurumu itendekero ery’amaani ery’eby’enyegesa erikaba limanyirwe muno. Paulo akaba asomere muno kandi akegesebwa omu ha bebembezi b’Abayudaaya owu baali nibatamu muno ekitiinisa ayayetwaga Gamalyeri. (Eng. 5:34; 22:3) Kandi Paulo akaba abaireho muntu w’amaani omu Bayudaaya. Kandi akagamba ati: “Nkahingurana omu dini Yabayudaya okukira baingi abomu ihanga lyange abanakuzire nabo.” (Bag. 1:13, 14; Eng. 26:4) Paulo ateyesige wenka.

8. Kusigikirra ha Abafiripi 3:8, Paulo akarora ata ebintu ebiyayeferiize, kandi habwaki ‘yasemereriirwe omu [by’obuceke]’?

⁸ Kikamusemeza Paulo kuleka ebintu ebyali nibimuleetera kuzooka nk’ow’amaani. Akakyetegereza ngu ebintu binu mananu kwo bikaba “nkesabu.” (Soma Abafiripi 3:8.) Paulo akaraba omu bizibu bingi habw’okufooka muhondezi wa Kristo. Akanobwa Abayudaaya bataahi be. (Eng. 23:12-14) Abaroma bataahi be ab’omu ihanga ly’owabu bakamutera kandi bamuta omu nkomo. (Eng. 16:19-24, 37) Kwongerraho, Paulo yasalirwaga muno habw’okulemwa kukora ebintu ebihikire habwokuba akaba atahikiriire. (Bar. 7:21-25) Paulo ataikirize abantu abamurwanisaaga rundi obutahikirra bwe kumulemesa kuhondera Kristo, oihireho ‘akasemererwa omu [by’obuceke].’ Habwaki? Habwokuba obwakaba ali muceke nubwo yarozera omulingo Ruhanga yamokonyiremu.​—2 Kol. 4:7; 12:10.

9. Tusemeriire kwehurra tuta ha bintu ebituleetera kwehurra nk’abaceke?

⁹ Obuturaaba nitugonza kutunga amaani kuruga hali Yahwe, titusemeriire kutekereza ngu  amaani, kusoma kwaitu, ebiikaro nambere twakuliire, rundi eby’obuguuda ebitwine, nibyo byoleka ngu tuli b’omugaso. Binu ebintu tibiri nibyo bitufoora b’omugaso omu maiso ga Yahwe. Kandi omu baheereza ba Yahwe, “tibali baingi abamagezi omu mubiri, tibali baingi abamani, tibali baingi abekitinisa.” Baitu Ruhanga akakomamu “[eby’obuceke] ebyensi.” (1 Kol. 1:26-28) Nahabweki n’obworaaba otaine ebintu ebibaziibweho ha kutandika kw’akacweka kanu, nosobora kuheereza Yahwe. Enyikara yaawe girole nk’omugisa ogw’okurora omulingo Yahwe arakuhamu amaani. Ekyokurorraho, kakuba nohurra ngu otiniire abantu abalengaho kukuletera kugurukyagurukya enyikiriza zaawe, saba Yahwe kukuha obumanzi obworaaba nobasoborra enyikiriza zaawe. (Bef. 6:18-20) Obworaaba oine oburwaire obw’amaani, saba Yahwe akuhe amaani kusobora kumuheereza nk’oku orukusobora. Buli murundi ogw’orarora Yahwe n’akukonyera, okwikiriza kwawe nikwija kweyongera kuguma.

10. Habwaki tusemeriire kwegaho ebyokurorraho eby’abantu abesigwa ab’omu Baibuli nk’abo abarukubazibwaho omu Abaheburaniya 11:32-34?

¹⁰ Paulo yayekambaga muno kwesomesa Ebyahandiikirwe. Kwesomesa Ebyahandiikirwe kikamukonyera kwega bingi, kandi akegera nahabyokurorraho eby’abaheereza ba Ruhanga abesigwa ab’omu Baibuli. Obwakaba nahandiikira Abakristaayo Abaheburaniya, Paulo akabagambira kutekerezaaho ebyokurorraho eby’abaheereza ba Yahwe abesigwa abaakara. (Soma Abaheburaniya 11:32-34.) Tekerezaaho kimu habyokurorraho binu, eky’Omukama Daudi. Daudi akaba aine kugumira kuhiganizibwa abanyanzigwa be hamu nabo abakaba bali banywani be. Obuturaaba nitubazaaho ekyokurorraho kya Daudi, nitwija kwetegereza omulingo ekyokurorraho kye kisobora kuba kyakonyire Paulo kandi n’omulingo tusobora kwegera hali Paulo.

11. Habwaki Daudi akaba nazooka nk’omuceke? (Rora ekisisani ekya ha kyesweko.)

¹¹ Goliasi omurwani ow’amaani akarora Daudi nk’omuceke. Goliasi obuyaboine Daudi, ‘akamugaya.’ Habwokuba Goliasi akaba ali mukooto, aine eby’okurwanisa eby’amaani, kandi akaba atendekerwe omu kurwana. Daudi akaba nazooka nk’omuceke habwokuba akaba mwojo muto, atatendekerwe kurwana, kandi akaba ataine eby’okurwanisa eby’amaani. Baitu Daudi ow’akaba nazooka nk’omuceke, akaba ali w’amaani. Akesiga Yahwe kumuha amaani, kandi akasingura Goliasi.​—1 Sam. 17:41-45, 50.

12. Bizibu ki ebimu Daudi ebiyarabiremu?

¹² Hali haroho ensonga endi ey’esobora kuba yaletiire Daudi kwehurra nk’omuceke. Daudi y’aheerezaaga Saulo omukama wa Isaleri Yahwe ow’akaba akomere. Omukama Saulo ha kubanza yatekamuga Daudi ekitiinisa. Baitu hanyuma, emyehembo akaleetera Saulo kukwatirwa Daudi ihali. Saulo akatwaza kubi Daudi, yalengaho n’okumwita.​—1 Sam. 18:6-9, 29; 19:10, 11.

13. Daudi aketwaza ata Saulo obuyamutwaize kubi?

¹³ Daudi akagumizaamu natekamu Omukama Saulo ekitiinisa Yahwe ow’akaba akomere n’obukiraaba ngu Saulo akamutwaza kubi. (1 Sam. 24:6) Daudi atajunaane Yahwe habw’ebintu ebibi Saulo yamukozere. Baitu akesiga ngu Yahwe naija kumuha amaani agarukwetaaga kugumira ekizibu kinu eky’amaani.​—Zab. 18:1, rora obugambo oburukubanza.

14. Nyikara ki Paulo eziyarabiremu ezirukusisana n’eza Daudi?

¹⁴ Omukwenda Paulo akaraba omu nyikara  ezirukusisana neza Daudi yarabiremu. Abanyanzigwa ba Paulo abarukukira obwingi bakaba nibamukira amaani. Akaba anoberwe abebembezi ab’amaani abaali baroho omu kasumi ako. Emirundi nyingi bakamutera kandi bamuteeka omu nkomo. Kusisanaho na Daudi, Paulo nauwe akatwazibwa kubi abantu abakubaire banywani be. Haroho n’abamu omu kitebe abamuhiganiize. (2 Kol. 12:11; Baf. 3:18) Baitu Paulo akasingura abo boona abakaba nibamuhiganiza. Omulingo ki? Akagumizaamu natebeza nobukiraaba ngu akaba nahiganizibwa. Akaikara ali mwesigwa hali ab’oruganda n’obubakoraga ebintu ebirukumusaaliza. Baitu ekirukukira obukuru, akaikara ali mwesigwa hali Ruhanga obwomeezi bwe bwona. (2 Tim. 4:8) Akasobora kuraba omu bizibu bingi, habwokuba akesigira kimu Yahwe hatali amaani ge.

15. Ekigendererwa kyaitu nikiha, kandi nitusobora tuta kukihikiriza?

¹⁵ Abeegi abosoma nabo, abakozi bagenzi baawe, rundi abanyabuzaale baawe abatali omu mananu bakujuma, rundi bakuhiganiza? Haroho omuntu omu kitebe ayakutwaizeho kubi? Eki obukiraaba nukwo kiri, ijuka ekyokurorraho ekya Daudi na Paulo. Nosobora kwikara ‘n’osingura obubi obw’oburungi.’ (Bar. 12:21) Abantu obubatuhakaniza, titubarwanisa nk’oku Daudi yarwanisize Goliasi, baitu ekigendererwa kyaitu kibe eky’okusingura obubi kuraba omu kulengaho kubakonyera kwega hali Yahwe. Nitusobora kuhikiriza ekigendererwa kinu kuraba omu kukozesa Baibuli kugarukamu ebikaguzo by’abantu, kuteekamu ekitiinisa n’okutwaza kurungi abantu abatukora kubi, kandi n’okukorra abantu boona ebirungi otwaliremu n’abanyanzigwa baitu.​—Mat. 5:44; 1 Pet. 3:15-17.

16-17. Kiki Paulo ekyatarayeberwe?

¹⁶ Paulo obwakaba atakafookere omwegeswa wa Kristo, akaba ali musigazi atarukuteekamu abantu ekitiinisa kandi ayahiganizaaga abahondezi ba Yesu. (Eng. 7:58; 1 Tim. 1:13) Paulo obwakaba nakyayetwa Saulo, Yesu wenyini akamutanga kurwanisa ekitebe ky’Abakristaayo. Yesu akabaza na Paulo nasigikirra omu iguru kandi yaita Paulo amaiso. Kusobora  kwongera kurora, Paulo akaba aine kwikiriza abantu abaakaba nahiganiza kumukonyera. Akebundaaza yaikiriza omwegeswa arukwetwa Ananiya kumwigura amaiso.​—Eng. 9:3-9, 17, 18.

¹⁷ Hanyuma Paulo akahika yamanywa muno omu kitebe, baitu ateebwe isomo Yesu yamwegeseze obwakaba ali omu muhanda n’agenda Damasiko. Paulo akaikara ali mwebundaazi, kandi akaikiriza ab’oruganda na banyaanya itwe kumukonyera. Akagamba ngu ‘bakamuhuumuza muno.’​—Bak. 4:10, 11.

18. Kiki ekisobora kutuletera kwanga abandi kutukonyera?

¹⁸ Ekyokurorraho kya Paulo nikitwegesa ki? Obutwatandikire kusorrokana n’abantu ba Yahwe, obundi twali twine ekihika eky’okwikiriza abandi kutukonyera habwokuba twali nitukyetegereza ngu tuli baana omu by’omwoyo kandi twali twine bingi eby’okwega. (1 Kol. 3:1, 2) Baitu hati tuli tuta? Obuturaaba tumazire emyaka nyingi nituheereza, kandi tutungire obukugu bwingi, nitusobora kwanga kwikiriza kukonyerwa omuntu ow’atamazire obwire bwingi omu mananu nkaitwe. Baitu Yahwe akira kukozesa ab’oruganda na banyaanya itwe kutugarramu amaani. (Bar. 1:11, 12) Nahabweki obuturaaba nitugonza Yahwe kutuha amaani tusemeriire kwikiriza ab’oruganda na banyaanya itwe batukonyere.

19. Habwaki Paulo y’abaire musinguzi?

¹⁹ Paulo akakora ebintu ebimu ebirukuhuniriza hanyuma y’okufooka Mukristaayo. Habwaki? Habwokuba akakyetegereza ngu kusobora kuba musinguzi tikirukusigikirra, h’amaani, okusoma, ekiikaro nambere omuntu akuliire, rundi eby’obuguuda eby’aine, baitu habw’obwebundaazi hamu n’okwesiga Yahwe. Leka itwena tuhondere ekyokurorraho kya Paulo (1) kuraba omu kwesiga Yahwe, (2) kwegera ha byokurorraho kuruga omu Baibuli, kandi (3) n’okwikiriza Abakristaayo bagenzi baitu kutukonyera. Obu nubwo Yahwe aratuha amaani n’obuturaaba nitwehurra tuli baceke!