1-2. Murago ki oguli omu Isaya 65:16, 17 ogurukutwekambisa kugumiisiriza?

ORUSORROKANO orukooto orw’ebiro bisatu orwa 2017, rukaba rwine omutwe “OTAJWAHA!” ogwali nigwekambisa muno. Puroguraamu egi ekatwoleka omulingo tusobora kugumira ebizibu ebitutunga. Hati harabireho emyaka ena, kandi na hati nitukyagumiisiriza ebizibu omu nsi enu embi.

² Bizibu ki ebiwakaruga kutunga? Oferiirwe omu h’ab’omuka yaawe rundi omunywani ow’obaire n’ogonza muno? Oine oburwaire obw’amaani? Obwomeezi bweyongiire kuguma habw’okukura muno omu myaka? Otalibaniziibwe ebigwererezi, akaimukirro, rundi kuhiganizibwa? Rundi oburwaire, nka COVID-19? Tulindiriire n’ekihika ekiro nambere ebintu binu byona biriba bitakyaroho, tubyeberwe kandi bitalyongera kubaho!​—Soma Isaya 65:16, 17.

3. Kiki ekitusemeriire kukora omu kasumi kanu, kandi habwaki?

³ Obwomeezi omu nsi enu embi bugumire, kandi omu kasumi ak’omu maiso nitusobora n’okutunga ebizibu ebigumangaine kukiraho. (Mat. 24:21) Nahabweki, nitwetaaga kwikara nitwega omulingo tusobora kwongera ha kugumiisiriza kwaitu. Habwaki? Habwokuba Yesu akagamba ati: “Omu [kugumiisiriza] kwanyu numwo murakizaga obwomezi bwanyu.” (Luk. 21:19) Kutekerezaaho omulingo abandi barukugumiisirizaamu ebirengo ebirukusisana n’ebyaitu, nikisobora kutwongera amaani ag’okugumiisiriza.

4. Habwaki nitusobora kugamba ngu Yahwe nuwe atuteriireho ekyokurorraho ekirukukirayo oburungi eky’okugumiisiriza?

⁴ Noha atuteriireho ekyokurorraho ekirukukirayo oburungi eky’okugumiisiriza? Yahwe Ruhanga. Ekigarukwamu eki kikuhuniriize? Nikisobora kukuhuniriza, baitu kakuba okitekerezaaho nukwo kiri. Ensi enu eri omu busobozi bwa Sitaani, nahabweki ijwiremu ebizibu bingi muno. Yahwe aine obusobozi obw’okuhwerekereza  ensi enu embi kandi akaihaho ebizibu byona aho naaho, baitu alinzire okukikora omu kasumi ak’omu maiso. (Bar. 9:22) Omu kasumi kanu, Ruhanga n’agumizaamu kugumiisiriza kuhika akasumi ak’ayataireho obukalihika. Leka tubazeeho ebintu mwenda Yahwe eby’acwiremu kugumiisiriza.

5. Ibara lya Ruhanga lisiigirwe lita enziro, kandi eki nikikuleetera kwehurra ota?

⁵ Ibara lye kusiigwa enziro. Yahwe n’agonza muno ibara lye, kandi n’agonza buli omu wena aliteekemu ekitiinisa. (Is. 42:8) Baitu kumara emyaka nka kakaaga, ibara lye erirungi likaire nirisigwa enziro. (Zab. 74:10, 18, 23) Kinu kikatandikira omu rugonjo rwa Adeni, Daibolo (ekirukumanyisa “Omuhangirizi”) obuyagambire ngu Ruhanga akaba aimire Adamu na Hawa ekintu eki bakaba nibetaaga kusobora kutunga okusemererwa. (Kub. 3:1-5) Kuruga obu, Yahwe baikaire nibamuhangirra ngu aima abantu ebintu ebibarukwetaaga. Yesu akakwatwaho muno habw’omulingo ibara lya Ise likaba nirisiigwa enziro. Egi niyo ensonga habwaki yayegeseze abegeswa be kusaba bati: “Isitwe ali omu iguru, Ibara lyawe dyezebwe.”​—Mat. 6:9.

6. Habwaki Yahwe aikiriize obwire bwingi kurabaho atakolekere ngu nuwe asemeriire kulema iguru n’ensi?

⁶ Baingi nibahakaniza Ruhanga hamu n’obulemi bwe. Yahwe nuwe wenka asemeriire kulema iguru n’ensi, kandi omulingo alemamu nugwo gurukukirayo oburungi. (Kus. 4:11) Baitu Sitaani alengereho kubiihabiiha bamalaika hamu n’abantu kutekereza ngu Ruhanga tali nuwe asemeriire kulema. Kyali nikyetaaga obwire kugumya ngu Yahwe nuwe asemeriire kulema, kandi ngu nuwe omulemi arukukirayo oburungi. Habw’amagezi ge, Ruhanga aikiriize abantu kwerema kumara akasumi kaingi nukwo bakyetegereze ngu tibasobora kwerema kurungi, kakuba batahuliiriza Omuhangi waabo. (Yer. 10:23) Ruhanga habw’okugumiisiriza busaho n’omu alyongera kugurukyagurukya ngu nuwe asemeriire kulema iguru n’ensi. Boona balimanya ngu omulingo Ruhanga arukulemamu nugwo gurukukira oburungi, kandi ngu Obukama bwe bwonka nubwo burukwija kuleeta obusinge n’eteeka omu nsi.

7. Nibaha abaajemiire Yahwe, kandi kiki eky’arukwija kubakorra?

⁷ Abaana be abamu kumujeemera. Yahwe akahanga abaana be boona, bamalaika hamu n’abantu bahikiriire. Baitu hanyuma, omu ha bamalaika arukwetwa Sitaani (ekirukumanyisa “Omuhakaniza”) akamujeemera, kandi yaleetera abantu abahikiriire, Adamu na Hawa nabo kujeemera Yahwe. Bamalaika abandi hamu n’abantu baketeraniza ha bujeemu bunu. (Yud. 6) Hanyuma, n’ihanga lya Isaleri, Ruhanga ery’akaba akomere, nalyo likamujeemera kandi ly’atandika kuramya baruhanga ab’ebisuba. (Is. 63:8, 10) Yahwe akehurra ngu bamugobiize. Baitu akagumiisiriza, kandi naija kugumizaamu n’agumiisiriza kuhika akasumi ak’okwihaho abajeemu boona obukarahika. Eki nikiija kurugirramu okujunwa okw’abaheereza be abesigwa abarukugumiisiriza hamu na uwe obubi obuli omu nsi enu embi!

8-9. Bisuba ki abantu ebibabaza hali Yahwe, kandi kiki ekitusobora kukoraho?

⁸ Ebisuba bya Sitaani. Sitaani akahangirra Yobu hamu n’abaheereza ba Yahwe abandi abesigwa ngu, nibaramya Yahwe habwokuba baine ebibarukumugonzaaho. (Yob. 1:8-11; 2:3-5) Sitaani agumizeemu kuhangirra abantu kuhikira kimu n’omu kasumi kanu. (Kus. 12:10) Nitusobora kwoleka ngu Sitaani mubiihi w’ebisuba kurabira omu kugumira ebirengo, kandi n’okwikara tuli besigwa hali Yahwe habwokuba nitumugonza. Yahwe akaha Yobu empeera, kandi naitwe naija kugituha obuturagumiisiriza.​—Yak. 5:11.

 ⁹ Sitaani akozesa abebembezi b’amadiini ag’ebisuba kuhangirra Yahwe ngu taine mbabazi, kandi ngu aleetera abantu kubonabona. Abaana obubafa, abamu bahika n’okugamba ngu Ruhanga abatwaire omu iguru habwokuba abaire nayetaaga bamalaika abandi. Eki kanikijumisa muno ibara lya Ruhanga! Baitu itwe tukimanyire ngu Yahwe ali Isiitwe ow’okugonza. Obuturwara oburwaire obw’amaani rundi omuntu outurukugonza obw’afa, titujunaana Ruhanga. Oihireho twikiriza ngu kiro kimu naija kukiza abarwaire boona, kandi ahumbuule abafu. Nitusobora kugambira omuntu wena ow’aikiriza kutuhuliiriza ngu Yahwe ali Ruhanga ow’okugonza. Eki kiha Yahwe eky’okugarukamu hali ogu anyakumujuma.​—Nfu. 27:11.

10. Zabuli 22:23, 24 n’eyoleka ki hali Yahwe?

¹⁰ Kubonabona okw’abaheereza be abarukugonza. Yahwe aine embabazi. Nahabweki asalirwa muno obw’arora nitubonabona habw’okuhiganizibwa, oburwaire, rundi habw’obutahikirra bwaitu. (Soma Zabuli 22:23, 24.) Yahwe nayetegereza obusaasi bwaitu; n’agonza kubwihaho, kandi naija kubwihaho. (Lengesaniza na Okuruga 3:7, 8; Isaya 63:9.) Ekiro kirihika nambere “alisusura amaizi gona ha maiso gabu; kandi tihakiroho okufa; nobukwakuba okutera empamo, nobukwakuba okurra, nobukwakuba okusasa tibikiroho.”​—Kus. 21:4.

11. Yahwe n’ayehurra ata h’abaheereza be abesigwa abaafiire?

¹¹ Kwahukanizibwa h’abanywani be abaafiire. Yahwe ayehurra ata h’abaheereza be abesigwa abaafiire? Aine ekihika ky’amaani eky’okwongera kubarora! (Yob. 14:15) Tekerezaaho omulingo Yahwe aine ekihika kingi eky’okwongera kurora munywani we Iburahimu! (Yak. 2:23) Rundi Musa ouyabazaaga na uwe “nibarorangana ha maiso”! (Kurug. 33:11) Kandi aine ekihika kingi eky’okwongera kuhurra Daudi hamu n’abahandiiki abandi aba Zabuli nibazina ebizina ebirungi eby’okumukugiza! (Zab. 104:33)  N’obukiraaba ngu banywani ba Ruhanga banu bagwijagiire omu kufa, Yahwe takabebwaga. (Isa. 49:15) Naijuka emiringo yabo yoona. Baibuli n’egamba ngu, “bona bomiire [haliwe].” (Luk. 20:38) Kiro kimu, boona naija kubahumbuura, kandi ayongere ahurre esaara zaabo ezikuruga ha mutima, kandi aikirize okuramya kw’abo. Obw’oraaba waferiirwe omuntu ow’orukugonza, kutekerezaaho ensonga zinu nikisobora kukuhuumuza.

12. Kiki ekirukukira kusaaliza Yahwe omu biro binu ebya ha mpero?

¹² Abantu ababi kubonabonesa abantu abandi. Obujeemu obubwatandikireho omu Adeni, Yahwe akaba akimanyire ngu enyikara ekaba negenda kusiisikara muno nukwo hanyuma esemere. Yahwe anoba ebintu ebibi, obutalibwinganiza, hamu n’okurwana okuli omu nsi. Aikaire n’afaaho muno abantu abakira kurubatirirwa​—abaceke, abatasobora kwerwanaho, enfuzi hamu n’enfaakati. (Zek. 7:9, 10) Kandi ekirukukira kusaaliza Yahwe nukwo kurora abaheereza be abesigwa nibarubatirirwa, kandi nibateekwa omu nkomo. Mukigumize kimu ngu Yahwe n’abagonza inywena abarukugumiisiriza hamu na uwe.

13. Ruhanga n’arora bikorwa ki omu bantu ebirukuswaza, kandi kiki eky’arukwija kukoraho?

¹³ Ebikorwa by’obusihani kweyongera muno. Abantu bakahangwa kwegera ha kyokurorraho kya Ruhanga, baitu Sitaani agonza kubaleetera kukora ebintu ebibi. Yahwe obuyarozere nk’oku “obubi bwomuntu bwingi” omu kasumi ka Nuha, “[akeyijukya] okukora omuntu omu nsi, kandi kikamubihiza omu mutimagwe.” (Kub. 6:5, 6, 11) Kuruga obu, ensi ekeyongera kusemera? Nangwa! Sitaani aine okusemererwa kwingi kurora ngu ebikorwa eby’obusihani eby’embaganiza byeyongeriire kimu, otwaliremu obusihani hagati y’abasaija n’abakazi hamu n’okulya ebisiyaga! (Bef. 4:18, 19) Kandi Sitaani asemererwa muno obw’aleetera abantu abarukuramya Yahwe kukora ebkibi eby’amaani. Kugumiisiriza kwa Yahwe obukulihwaho, naija kwoleka nk’oku anoba ebikorwa byona eby’obusihani obw’alihwerekereza abasihani boona abanga kwegarukamu.

14. Kiki abantu ekibarukukora ensi hamu n’ebisoro?

¹⁴ Abantu kuhwerekereza ebintu ebiyahangire. Omuntu tagarukiire ha ‘kukora kubi omuntu ondi’ baitu alemerwe kurolerra ensi n’ebisoro nk’oku Yahwe yaragiire abantu kukora. (Mug. 8:9; Kub. 1:28) Abanyasayansi abamu nibagamba ngu habw’ebikorwa by’abantu, omu myaka nke erukwija, ebihangwa eby’embaganiza ebirukuhingura omu kakaikuru kamu nibiija kuhweraho kimu. Kyanguhire kukyetegereza habwaki abantu beralikiriire haby’obuhangwa! Baitu ekirungi kiri ngu, Yahwe akaraganiiza ‘kuhwerekereza abo abahwerekereza ensi’ kandi n’okufoora ensi yoona orugonjo orurungi.​—Kus. 11:18; Is. 35:1.

15-16. Kiki ekisemeriire kutuleetera kugumiisiriza hamu na Yahwe? Bazaaho ekyokurorraho.

¹⁵ Tekerezaaho ebintu ebirukusaaliza Isiitwe ow’omu iguru eby’aikaire n’agumiisiriza kumara enkumi n’enkumi z’emyaka. (Rora akasanduuko “ Yahwe eby’Arukugumiisiriza.”) Yahwe akaba n’asobora kumaraho ensi enu embi ha bwire bwona obw’akaba n’agonza. Baitu kugumiisiriza kwe kuturugireemu ebirungi! Tekerezaaho kinu. Kakuba omusaija na mukazi we bagambirwa ngu omwana oubarukugenda kuzaara naija kuba aine oburwaire obw’amaani, obwomeezi buceke, kandi ngu naija kufa akyali muto. Baitu, abazaire abo basemererwa omwana ogu obwazaarwa, n’obukiraaba ngu nikiija kubagumira muno kumurolerra. Kandi habwokuba nibagonza omwana wabo, bagumira ebizibu byona kusobora kumukonyera kutunga obwomeezi oburukukirayo oburungi.

 ¹⁶ Omu mulingo nugwo gumu, abaijukuru ba Adamu na Hawa boona bazaarwa batahikiriire. Baitu Yahwe abagonza kandi abafaaho. (1 Yoh. 4:19) Kandi kwahukanaho n’abazaire abatubalizeeho omu kyokurorraho kyaitu, Yahwe aine obusobozi obw’okumaraho okubonabona okw’abaana be. Ataireho ekiro nambere alimaraho okubonabona kw’abantu. (Mat. 24:36) Kugonza kwa Yahwe kusemeriire kutuleetera naitwe kugumiisiriza na uwe nk’oku kirayetaagisa.

17. Habwaki omulingo Yesu arukubazibwaho omu Abaheburaniya 12:2, 3 nigutwekambisa kwikara nitugumiisiriza?

¹⁷ Yahwe ataireho ekyokurorraho ekirukukirrayo kimu eky’okugumiisiriza. Yesu akasobora kuhondera ekyokurorraho kya Ise eky’okugumiisiriza. Yesu obw’akaba ali omu nsi akagumira okujumwa, kuswazibwa, hamu n’okubonabonesebwa ha muti habwaitu. (Soma Abaheburaniya 12:2, 3.) Busaho kugurukyagurukya, ekyokurorraho kya Yahwe eky’okugumiisiriza kikakonyera Yesu kugumiisiriza. Kandi naitwe nikisobora kutukonyera.

18. Ekyahandiikirwe ekiri omu 2 Petero 3:9 nikitukonyera kita kwetegereza ekibaireho habwokuba Yahwe n’agumisiriiza muno?

¹⁸ Soma 2 Petero 3:9. Yahwe amanyire obwire oburungi obw’okuhwerekereza ensi enu embi. Habw’okugumiisiriza kwe abantu baingi basoboire kumumanya. Hati, ekitebe kingi eky’obukaikuru bw’abantu nibamuramya, kandi nibamukugiza. Boona nibasiima habwokuba Yahwe akagumiisiriza ekirukumara baasobora kuzaarwa, kwega kumugonza, kandi bayehayo hali uwe. Obuhalibaho obukaikuru n’obukaikuru bw’abantu abaliba bagumiisirize kuhika ha mpero, nikiija kweyolekera kimu ngu Yahwe akaba ahikire obuyacwiremu kugumiisiriza!

19. Kiki ekitusemeriire kucweramu kimu kukora, kandi mpeera ki eiturukwija kutunga?

¹⁹ Nitwegera hali Yahwe omulingo tusobora kugumiisiriza twine okusemererwa. N’obukiraaba ngu Sitaani alesereho obusaasi bwingi hamu n’okubonabona, Yahwe aky’ali “Ruhanga ow’asemeriirwe.” (1 Tim. 1:11, NW) Naitwe nitusobora kugumiisiriza twine okusemererwa obu nitulindirra akasumi Yahwe obw’alyeza ibara lye, obw’alyoleka ngu nuwe asemeriire kulema obuhangwa bwona, obwalimaraho ebintu ebibi byona, kandi n’obwalimaraho ebizibu byona ebitwine omu kasumi kanu. Leka tucweremu kimu kugumiisiriza kandi tuhumuzibwe habw’okumanya ngu Isiitwe ow’omu iguru na uwe nagumiisiriza. Obuturakikora, ebigambo binu nibiija kuhikirra habwa buli omu wena omuli itwe, ebirukugamba ngu: “Anyina omugisa omuntu anyakugumangana omu [kulengwa]: baitu obwalimara okusimwa, alihabwa ekondo yobwomezi, [Yahwe] eyiyanihiize abarukumugonza.”​—Yak. 1:12.