1. Habwaki ky’amagezi kwetekaniriza kara ebigwererezi?

 KWETEKANIZA kara kijuna obwomeezi. Ekyokurorraho, obuhabaho ekigwererezi abantu abetekaniize kara bakira kukiraho kandi banguhirwa kukonyera abandi. Ekitongole ekimu kuruga Bulaaya ekikonyera abahikirweho ebigwererezi kikagamba kiti: “Kwetekaniza kara kisobora kukiza obwomeezi.”

2. Habwaki tusemeriire kwetekaniriza omuhito omwingi? (Matayo 24:44)

² “Omuhito omwingi” gulitandika ahonaaho. (Mat. 24:21) Baitu kwahukanaho n’ebigwererezi ebindi, abantu abamu baliba bakimanyire ngu nigwija. Nk’emyaka 2,000 enyuma, Yesu akagambira abahondezi be kwetekaniriza ekiro eki. (Soma Matayo 24:44.) Obuturayetekaniza kara, nikiija kutwanguhira kuraba omu kasumi ako akagumangaine n’okukonyera abandi.​—Luk. 21:36.

3. Okugumiisiriza, embabazi, n’okugonza nibiija kutukonyera bita kwetekaniriza omuhito omwingi?

³ Tekerezaaho emiringo esatu eratukonyera kwetekaniriza omuhito omwingi. Tulyetwaza tuta obutulisabwa kutebeza obutumwa obw’omusango kandi bakatuhakaniza? (Kus. 16:21) Nitwija kwetaaga okugumiisiriza kusobora kworobera Yahwe n’okukigumya ngu naija kutulinda. Tulikora ki kakuba ab’oruganda bafeerwa bimu ha bintu byabo rundi byona? (Hab. 3:17, 18) Embabazi niziija kutukonyera kubaha ebibarukwetaaga. Tulikora ki amahanga ageteraniize hamu obugalitutahirra kandi kikatwetaagisa kwikara hamu omu kiikaro kimu n’ab’oruganda na banyaanya itwe? (Ez. 38:10-12) Nitwija kwetaaga kwolekangana okugonza okw’amaani kusobora kuraba omu kasumi ako akagumire.

4. Baibuli n’etwekambisa eta kwikara nitukurakuraniza okugumiisiriza, embabazi, n’okugonza?

 ⁴ Ekigambo kya Ruhanga nikitwekambisa kwikara nitukurakuraniza okugumiisiriza, embabazi, n’okugonza. Omu Luka 21:19 nihagamba ngu: “Omu [kugumiisiriza] kwanyu numwo murakizaga obwomezi bwanyu.” Abakolosai 3:12 nihagamba ngu: “Mujwale . . . omutima gwembabazi.” Kandi omu 1 Abasesalonika 4:9, 10 nihagamba ngu: “Baitu ninywe mwayegesiibwe Ruhanga okugonzangana . . . Baitu tubesengeriize bene baitu kweyongera nokusaga.” Enkarra zinu zoona zikahandiikirwa abegeswa ba Yesu abayolekaga okugumiisiriza, embabazi, n’okugonza. Baitu baali baine kugumizaamu nibakurakuraniza emiringo egi. Kandi naitwe nikyo tusemeriire kukora. Kusobora kukora kinu, nitwija kubazaaho omulingo Abakristaayo ab’omu kyasa eky’okubanza bayolekere emiringo egi. Hanyuma nitwija kurora omulingo tusobora kubegeraho ekiratukonyera kwetekaniriza omuhito omwingi.

5. Abakristaayo ab’omu kyasa eky’okubanza bakooleka bata okugumiisiriza?

⁵ Abakristaayo ab’omu kyasa eky’okubanza baali nibetaaga okugumiisiriza. (Baheb. 10:36) Oihireho kugumiisiriza ebizibu nk’abantu abandi, bakatunga ebizibu ebindi habwokuba baali Bakristaayo. Baingi omulibo bakaba nibahiiganizibwa ab’omu maka gaabo, abebembezi b’ediini ey’Ekiyudaaya, n’ab’obusobozi Abarooma. (Mat. 10:21) Obwire obumu n’omu kitebe, baali baine kurwanisa enyegesa ez’ebisuba ez’abecwireho ekitebe. (Eng. 20:29, 30) Baitu Abakristaayo abo bakagumiisiriza. (Kus. 2:3) Omu mulingo ki? Bakecumiitirizaaho ebyokurorraho eby’okugumiisiriza ebiri omu Baibuli nk’ekya Yobu. (Yak. 5:10, 11) Bakasaba Yahwe abahe amaani. (Eng. 4:29-31) Kandi omutima baaguteekaga ha birungi ebyakurugire omu kugumiisiriza kwabo.​—Eng. 5:41.

6. Munyaanya itwe Merita ekiyakozere kugumira okuhakanizibwa nikikwegesa ki?

⁶ Naitwe nitusobora kugumiisiriza kakuba twikara nitwesomesaho kandi nitwecumiitirizaaho ebyokurorraho eby’okugumiisiriza ebiri omu Baibuli n’omu bitabu byaitu. Eki nikyo kyakonyiire munyaanya itwe Merita kuruga Albania, kugumira okuhakanizibwa kuruga omu banyabuzaale okwali nikutwarramu n’okumuteera. N’agamba ati: “Nkagarurwamu muno amaani obunasomereho ekyokurorraho kya Yobu. Akabonabona muno atarukumanya ow’akaba namuleetera ebizibu, baitu akagamba ati: ‘Okuhikya okufa kwange tindyeyihaho okuhikirra kwange.’ (Yob. 27:5) Nkatekerezaaho omulingo ebizibu bya Yobu bikaba nibikira ebyange. Akaba atamanyire ow’arukumuleetera ebizibu, baitu nyowe nkaba manyire ow’arukubindetera.”

7. N’obukiraaba ngu titwine ebizibu by’amaani ebiturukurabamu kasumi kanu, kiki ekitusemeriire kwega kukora?

⁷ Ekindi, naitwe nitusobora kwongera kukurakuraniza okugumiisiriza kwaitu kuraba omu kusaba kuruga ha mutima nitugambira Yahwe ebikutweraliikiriza. (Baf. 4:6; 1 Bas. 5:17) N’osobora kuba otaine ekizibu eky’amaani kasumi kanu. N’obukiraaba nukwo kiri, osaba Yahwe obwohurra oyetuntwire, rundi otamanyire eky’okukora? Obworaikara n’osaba Yahwe obworukuba oine ebizibu ebitaito, noija kugumizaamu n’omusaba n’obworatunga eby’amaani omu kasumi ak’omumaiso. Kandi noija kukigumiza kimu ngu namanya omulingo arakukonyeramu kandi n’omu bwire obuhikire obw’okukikoramu.​—Zab. 27:1, 3.

8. Ekyokurorraho kya Mira nikyoleka kita ngu okugumiisiriza ebizibu kasumi kanu nikiija kutukonyera kubigumira omu kasumi ak’omumaiso? (Yakobo 1:2-4) (Rora ekisisani.)

⁸ Obuturaikara tuli besigwa hali Yahwe  n’obuturatunga ebizibu kasumi kanu, nikiija kutwanguhira kugumiisiriza omu muhito omwingi. (Bar. 5:3) Habwaki? Ab’oruganda baingi bakizoire ngu buli murundi bagumira ekirengo, kibakonyera kugumira ekirengo ekindi. Kinu kibakonyera kukigumya ngu Yahwe ayetekaniize kubakonyera kandi ngu n’agonza kukikora. Okwikiriza oku kubakonyera kugumira ebirengo ebindi ebibatunga. (Soma Yakobo 1:2-4.) Payoniya arukwetwa Mira, kuruga omu Albania akyetegeriize ngu kugumira ekizibu kimu kimukonyera kugumira ekindi. Obwire obumu atekereza ngu nuwe wenka arukuraba omu bizibu bingi. Baitu aijuka omulingo Yahwe amukonyiire omu myaka 20 enyuma kandi ayegambira ati: ‘Ikara oli mwesigwa. Otaleka kuheereza Yahwe hati habwokuba aikaire nakukonyera kuraba omu bizibu byona ebyotungire.’ Naiwe n’osobora kwecumiitirizaaho omulingo Yahwe aikaire nakukonyera kugumiisiriza. Kigumye ngu aba narora buli murundi ogw’ogumira ekirengo kandi naija kukuha empeera. (Mat. 5:10-12) Hanyuma omuhito omwingi obuguratandika, noija kuba oyegere kugumiisiriza kandi ocweriremu kimu kugumizaamu n’ogumiisiriza.

9. Ekitebe eky’omu Antyokiya eya Busuli kikooleka kita embabazi?

⁹ Tekerezaaho ekyabaireho Abakristaayo omu Buyudaaya obubaahikirweho enjara ey’amaani. Hanyuma y’ekitebe omu Antyokiya eya Busuli kukihurra, bakabakwatirwa embabazi ab’oruganda omu Buyudaaya. Baitu batagarukire aho, bakagira ekibakoraho. Abakristaayo banu, “nkokubasoboire omuomu, bakacwa amagezi okutwekera ebyokugaba bene babu abakaba baikaire Buyudaya.” (Eng. 11:27-30) N’obukiraaba ngu Abakristaayo abahikirweho enjara baali nibaikara hara, Abakristaayo omu Antyokiya bakabakonyera.​—1 Yoh. 3:17, 18.

10. Miringo ki eitusobora kwoleka Abakristaayo bagenzi baitu embabazi obubahikwaho ebigwererezi? (Rora ekisisani.)

¹⁰ Naitwe nitusobora kwoleka embabazi obutukimanya ngu Abakristaayo bagenzi baitu bahikirweho ekigwererezi. Twanguha kubakonyera kuraba omu kukaguza abagurusi emiringo tusobora kukonyeramu, kuhayo kusagika omulimo ogw’ensi yoona, rundi kusabira abahikirweho ebigwererezi. b (Nfu. 17:17) Ekyokurorraho, omu 2020, obutebe oburukukonyera abahikirweho ebigwererezi oburukuhingura omu 950 bukakomwa kukonyera ab’oruganda omu bwire bw’oburwaire bwa Korona. Nitusiima muno ab’oruganda na banyaanya itwe abejumbira omu mulimo ogw’okukonyera abo abahikirweho ebigwererezi. Embabazi zibekambisa kuhikyaho ab’oruganda ebintu ebibarukwetaaga, kubakonyera omu by’omwoyo, kandi obwire obumu basemeza amaju gaabo n’ebyombeko byaitu ebyokuramizaamu.​—Lengesaniza na 2 Abakolinso 8:1-4.

11. Ebikorwa eby’embabazi bihaisa bita ekitiinisa Isiitwe ow’omu iguru?

¹¹ Obutwoleka embabazi obuhaba hacwekereho ekigwererezi, abandi barora okwefereza okutukora. Ekyokurorraho, omu 2019, ihunga ery’amaani likahwerekereza Ekyombeko ky’Obukama omu Bahamas. Ab’oruganda obubakaba nibagarukamu kukyombeka bakasaba injiniya ow’atali omu h’Abakaiso ba Yahwe kubagambira sente ezirukwetaagisa kukora omulimo. Akabagambira ati: “Ningonza kubatiiza ebyokukozesa, mbahe abakozi, n’eby’okwombekesa ebya busa. Kinu ningonza kukibakorra inywe nk’ekitebe. Nkwatwaho muno omulingo mwolekangana okugonza.” Abantu baingi omu nsi tibamanyire Yahwe.  Baitu barora omulingo Abakaiso ba Yahwe bakonyera abandi. Mali kanikisemeza kukimanya ngu ebikorwa byaitu eby’embabazi nibisobora kuleetera abantu kugonza kumanya ebirukukwata hali Yahwe “anyakuli owobuguda omu mbabazi”!​—Bef. 2:4.

12. Kukurakuraniza embabazi kasumi kanu kitukonyera kita kwetekaniriza omuhito omwingi? (Okusuku’rwa 13:16, 17)

¹² Habwaki nitwija kwetaaga kwoleka embabazi omu kasumi ak’omuhito omwingi? Baibuli eyoleka ngu abo abatarukusagika gavumenti ez’ensi enu nibaija kutunga ebizibu hati, n’omu kasumi ak’omuhito omwingi. (Soma Okusuku’rwa 13:16, 17.) Ab’oruganda na banyaanya itwe nibaija kwetaaga obukonyezi kutunga ebintu ebibarukwetaaga kusobora kukiraho. Omukama waitu Yesu Kristo obwaraija kucwera abantu omusango, nitugonza atusange nitwoleka embabazi kandi aturaalize ‘kugwetwa Obukama.’​—Mat. 25:34-40.

13. Kusigikirra ha Abarumi 15:7, Abakristaayo ab’omu kyasa eky’okubanza bakeyongera bata kwolekangana okugonza?

¹³ Abakristaayo ab’omu kyasa eky’okubanza bayolekanganaga okugonza. Baitu kinu kyali kyanguhire? Tekerezaaho ekitebe ekya Rooma. Kikaba kirumu Abayudaaya abaali begesiibwe kworobera Ebiragiro bya Musa, n’Abayamahanga abaali nibaruga omu biikaro ebirukwahukana. Abakristaayo abamu nibasobora kuba baali bairu kandi abandi bali bakama ba bairu. Abakristaayo abo bakasobora bata kwikara niboolekangana okugonza n’obukiraaba ngu baali nibahukana? Omukwenda Paulo akabagambira ati: “Mwirizanganege inywenka nainywenka.” (Soma Abarumi 15:7.) Akaba namanyisa ki? Ekigambo ekihindurwa nka “mwirizanganege” nikimanyisa kutangirra omuntu omu ka yaawe okamwoleka embabazi n’amakune, rundi kumwikiriza kufooka omu h’abanywani baawe. Ekyokurorraho, Paulo akagambira Firemoni omulingo aratangirramu omwiru we Onesimo owakaba amwirukireho. Akagamba ati: “Omuikirize nka nyowe nyenka.” (Fir. 17) Pirisikira na Akura baali bamanyire bingi ebirukukwata ha Bukristaayo kukira Apolo, baitu bakamutangirra kandi “bamutwara nambere bali.” (Eng. 18:26) Abakristaayo abo bataikirize enyikara ezirukwahukana ezibaakuliremu kubaleetera kwebaganizaamu rundi kubalemesa kutangirra abandi.

14. Munyaanya itwe Anna na musaija we bakooleka bata okugonza?

¹⁴ Naitwe nitusobora kwoleka ab’oruganda na banyaanya itwe okugonza, kuraba omu kubatangirra omu maka gaitu n’okubafoora banywani baitu. Eki nikiija kubekambisa kutwoleka okugonza. (2 Kol. 6:11-13) Tekerezaaho ekyokurorraho kya munyaanya itwe Anna na musaija we. Hanyuma ya kasumi kake basindikirwe kuheereza nk’abamiisani omu bugwaizooba bwa Afrika, hakacwekaho oburwaire bwa Korona. Nahabweki batasobole kuba omu nsorrokano ez’amaiso h’amaiso. Bakooleka bata okugonza? Baabazaaga n’ab’oruganda na banyaanya itwe kuraba ha vidiyo nibabagambira nk’oku nibagonza kweyongera kubamanya. Baingi bakakwatwaho kandi batandika kubaterra esimu, n’okubasindikira obutumwa. Habwaki Anna na musaija we baalengereho kumanya kurungi ab’oruganda? Anna n’agamba ati: “Okugonza ab’oruganda na banyaanya itwe banyoleka omu bwire oburungi n’obubi kukanyekambisa kugonza abandi.”

15. Ekyokurorraho kya Vanessa nikikwegesa ki obukirukuhika ha kugonza ab’oruganda na banyaanya itwe? (Rora ekisisani.)

¹⁵ Baingi omuliitwe tuli omu bitebe ebirumu ab’oruganda na banyaanya itwe abakuruga omu biikaro ebirukwahukana kandi abarukwetwaza  omu miringo erukwahukana. Nitusobora kweyongera kubagonza kakuba tuteeka omutima ha miringo yabo enungi. Munyaanya itwe Vanessa kuruga New Zealand, kyamugumiraga kuba n’enkoragana enungi n’abandi omu kitebe. Baitu omu kiikaro ky’okwecwaho abo abayetwazaaga omu mulingo ogutamusemezaaga, akacwamu kumara nabo obwire. Eki kikamukonyera kurora ensonga habwaki Yahwe n’abagonza. N’agamba ati: “Kuruga musaija wange afooka muroleerezi w’ekicweka, tutangatangana ab’oruganda na banyaanya itwe abarukwetwaza omu miringo erukwahukana, kandi kinyanguhira kukoragana nabo. Hati ningonza ab’oruganda na banyaanya itwe abarukwetwaza omu miringo erukwahukana. Na Yahwe kimusemeza habwokuba aikiriza abantu abarukwahukana kwija kumuramya.” Obuturora abandi nk’oku Yahwe abarora, twoleka ngu nitubagonza.​—2 Kol. 8:24.

16. Habwaki nitwija kwetaaga kwolekangana okugonza omu kasumi ak’omuhito omwingi? (Rora ekisisani.)

¹⁶ Nitwija kwetaaga kwolekangana okugonza omu kasumi ak’omuhito omwingi. Omuhito omwingi obuguratandika, turatunga nkaha obulinzi? Tekerezaaho Yahwe ekiyaragiire abantu be kukora Baburoni eyakara obuyatahiriirwe, akagamba ati: “Muije nnu abantu bange, mutahe omu bisika banyu, mwekingireho enyigi zanyu: mwesereke akacu kake, okuhikya okubihirwa kunu obukulihwaho.” (Is. 26:20) Nikisobora kuba ngu naitwe nitwija kuhondera oburagirizi nubwo bumu omu kasumi ak’omuhito omwingi. ‘Ebisiika’ binu nibisobora kuba nibimanyisa ebitebe byaitu. Yahwe naturaganiza ngu naija kutulinda omu kasumi ak’omuhito omwingi, obuturagumizaamu tuli omu bumu n’ab’oruganda na banyaanya itwe. Nahabweki, kasumu kanu twekambe tutagarukira ha kubagumiisiriza kwonka, baitu tubooleke okugonza. Nikyo tusemeriire kukora kusobora kukiraho.

17. Obuturayetekaniza hati, kiki ekiturukwija kusobora kukora omu kasumi ak’omuhito omwingi?

¹⁷ “Ekiro ekikuru ekya [Yahwe]” kaliba kasumi akagumangaine hali abantu boona. (Zef. 1:14, 15) Abantu ba Yahwe nabo balitunga ebizibu. Baitu kakuba twetekaniza hati, nitwija kusobora kwikara tutekaine kandi tukonyere abandi. Nitwija kugumiisiriza ebizibu byona ebituratunga. Ab’oruganda na banyaanya itwe obubaratunga ebizibu, nitwija kukora ekiturukosobora kubakonyera, nitubooleka embabazi kandi tubahe ebibarukwetaaga. Obuturagumizaamu nitugonza ab’oruganda na banyaanya itwe, nikiija kutwanguhira kubooleka okugonza omu kasumi ak’omumaiso. Kandi Yahwe naija kutuha empeera ey’obwomeezi obutahwaho omu nsi ey’etarumu ebigwererezi n’emihito.​—Is. 65:17.