1. Ekyahandiikirwe ekiri omu Omugambizi 3:1, 7 nikitwegesa ki?

ABAMU omuli itwe tugonza kubaza muno. Kandi abandi tugonza kwikara tuculiire. Nk’oku ekyahandiikirwe ekyebembiire ekicweka kinu kirukwoleka, haroho akasumi akatusemeriire kubalizaamu n’ak’okuculerramu. (Soma Omugambizi 3:1, 7.) Nihasobora kuba haroho ab’oruganda rundi banyaanya itwe abatwakugondeze babaze kukiraho. Kandi haroho abatwakugondeze bafooke baculeezimu kake.

2. Noha asemeriire kututeraho emisingi ey’eratukonyera kumanya akasumi akatusemeriire kubalizaamu n’omulingo tusemeriire kubaza?

² Okubaza kisembo kuruga hali Yahwe. (Kurug. 4:10, 11; Kus. 4:11) Omu Kigambo kye atukonyera kwetegereza omulingo tusemeriire kukozesaamu kurungi ekisembo kinu. Omu kicweka kinu nitwija kurora ebyokurorraho kuruga omu Baibuli ebiratukonyera kumanya akasumi akatusemeriire kubalizaamu n’ak’okuculerramu. Nitwija n’okubazaaho omulingo Yahwe ayehurra ha bigambo tubaliza abantu abandi. Baitu katubanze tubazeeho akasumi akatusemeriire kubalizaamu.

3. Kusigikirra ha Abarumi 10:14, kasumi ki akatusemeriire kubalizaamu?

³ Tusemeriire kwikara twetekaniize kubazaaho amakuru amarungi agarukukwata hali Yahwe n’Obukama bwe. (Mat. 24:14; soma Abarumi 10:14.) Kinu obutukikora tuba nituhondera ekyokurorraho kya Yesu. Emu ha nsonga enkuru habwaki Yesu yaizire omu nsi yali y’okumanyisa abantu amananu agarukukwata hali Ise. (Yoh. 18:37) Baitu tusemeriire kwijuka ngu omulingo tubaza obutuba nitutebeza nagwo mukuru. Nahabweki obuturaaba nitugambira abandi ebirukukwata hali Yahwe, tusemeriire kukikora omu mulingo ‘ogw’obuculeezi n’okutiina,’ kandi tusemeriire kufaaho  enyehurra zaabo n’okutekamu ekitiinisa enyikiriza zaabo. (1 Pet. 3:15) Binu obuturabikora nibisobora kutukonyera kwegesa n’okuhika ha mitima y’abantu hatali kubabaliza kwonka.

4. Kusigikirra ha Enfumo 9:9, ebigambo byaitu nibisobora bita kukonyera abandi?

⁴ Abagurusi b’ekitebe tibasemeriire kutiina kuha ow’oruganda rundi munyaanya itwe obuhabuzi kakuba kiba nikyetagisa. Baitu, kinu bakikora omu kasumi akahikire nukwo bataswaza omuntu ogu. Kinu nikyetagisa kulindaho kuhabura omuntu obubarukuba bali omu kiikaro nambere hali bantu baingi. Abagurusi balengaho kurora ngu tibabaliza omuntu ogu omu mulingo ogutali gw’ekitiinisa. Eki n’obukiraaba nukwo kiri, tibatiina kuha omuntu obuhabuzi kuruga omu Baibuli oburamukonyera kukora encwamu ezihikire. (Soma Enfumo 9:9.) Habwaki kikuru muno kwoleka obumanzi tukabaza obukirukuba nikyetagisa? Hati leka tubazeeho ebyokurorraho bibiri ebirukwahukana muno, eky’okubanza ky’omusaija ow’akaba aine kuhana batabani be kandi ekyakabiri ky’omukazi ow’akabaine kugenda kuhabura omusaija ow’akaba nagenda kuba omukama.

5. Nidi Nyakatagara Omukuru Eri yalemerwe kukora ekihikire?

⁵ Nyakatagara Omukuru Eri akaba aine abatabani babiri abayagonzaga muno. Baitu batabani be abo bakaba batarukutamu Yahwe ekitiinisa. Bakaba baine obujunanizibwa bw’amaani habwokuba baheerezaaga nk’abanyakatagara ha heema ey’okutangatanganiramu. Baitu bakakozesa kubi obusobozi bwabo, tibatekamu ekitiinisa ebihongwa abantu baleteraga Yahwe, kandi n’abantu bali bakimanyire nk’oku bakaba bali basiihani. (1 Sam. 2:12-17, 22) Kusigikirra ha biragiro ebya Musa, batabani ba Eri baali basemeriire kwitwa, baitu ise bo akabahana n’ebigambo kwonka kandi y’abaleka bagumizaamu nibaheereza nk’abanyakatagara. (Bir. 21:18-21) Yahwe akehurra ata ha mulingo Eri yakwasiremu ensonga enu? Akagambira Eri ati: “Notaho ekitinisa ha batabani bawe okubakiza nyowe?” Kandi Yahwe akacwamu kwita abasaija banu ababi.​—1 Sam. 2:29, 34.

6. Eri ekiyakozere nikitwegesa ki?

⁶ Eri ekiyakozere nikitwegesa isomo ery’amaani. Kakuba tukimanya ngu omunywani rundi omunyabuzaale waitu acwire ekiragiro kya Ruhanga titusemeriire kuculeera, baitu twine kumwijukya emisingi ya Yahwe. Kandi tusemeriire kukigumya ngu atungire obukonyezi kuruga omu bagurusi b’ekitebe. (Yak. 5:14) Titwakugondeze kutekamu muno ekitiinisa omunywani rundi omunyabuzaale kukira Yahwe  nk’oku Eri yakozere. Nikyetagisa obumanzi bwingi kusobora kuhikirra omuntu arukwetaaga kuhaburwa, baitu obutukikora harugamu ebirungi. Hati wetegereze embaganiza hagati ya Eri n’omukazi Omunyaisaleri arukwetwa Abigairi.

7. Habwaki Abigairi yabalize na Daudi?

⁷ Abigairi akaba ali mukazi w’omusaija omuguuda ow’akaba aine itaka lingi arukwetwa Nabali. Daudi n’abasaija be obubakaba nibairuka Omukama Saulo, bakaikara n’abaliisa ba Nabali kandi balinda entaama ze zitaibwa abasuma. Nabali akasiima habw’obukonyezi bunu? Nangwa. Daudi obuyasabire Nabali kuha abasaija be eby’okulya n’amaizi, Nabali akabihirwa muno kandi y’atandika kubajuma. (1 Sam. 25:5-8, 10-12, 14) Ekyarugiremu, Daudi akakora encwamu ey’okwita buli musaija wena ow’omu nju ya Nabali. (1 Sam. 25:13, 22) Noha akaba nasobora kutangira akabi kanu? Abigairi akakyetegereza ngu ako kakaba kasumi ak’okubaza, nahabweki n’obumanzi akagenda kubaza na Daudi nobwaraaba akaba ali n’abasaija 400 abaali baine enjara, ekiniga, hamu n’eby’okurwanisa.

8. Ekyokurorraho kya Abigairi nikitwegesa ki?

⁸ Abigairi obuyahikire hali Daudi, akabaza nauwe omu mulingo ogw’obumanzi, ogw’ekitiinisa, kandi ogurukunanura. Nobukiraaba ngu Abigairi tali nuwe y’alesereho ekizibu kinu, akasaba Daudi ekiganyiro. Akagambira Daudi nk’oku ali musaija murungi ow’akaba nagenda kuhindura encwamu ye. Abigairi akesigira kimu ngu Yahwe naija kumukonyera. (1 Sam. 25:24, 26, 28, 33, 34) Nka Abigairi, naitwe tusemeriire kuba bamanzi tukahabura omuntu outukurora nakora ekintu ekisobora kumurugiramu kukora ensobi. (Zab. 141:5) Nobukiraaba ngu tusemeriire kukikora omu mulingo ogw’ekitiinisa, titusemeriire kutiina.​—Nfu. 27:17.

9-10. Kiki abagurusi ekibasemeriire kwijuka obu barukuba nibahabura abantu abandi?

⁹ Kikuru muno abagurusi b’ekitebe kwoleka obumanzi obw’okubaza n’omuntu ow’akozere  encwamu ey’etahikire. (Bag. 6:1) N’obwebundaazi abagurusi bakimanyire nk’oku nabo tibahikiriire kandi nk’oku akasumi kasobora kuhika n’abo batunge obuhabuzi. Baitu eki tikitanga abagurusi kuhana abo abasemeriire kuhanwa. (2 Tim. 4:2; Tit. 1:9) Obuba nibahabura omuntu, balengaho kukozesa ekisembo eky’okubaza omu mulingo ogw’amagezi kandi ogw’okugumisiiriza. Okugonza nukwo kuletera abagurusi kukonyera omuntu ogu. (Nfu. 13:24) Baitu ekirukukira obukuru nibagonza kutekamu Yahwe ekitiinisa kuraba omu kuhondera emisingi ye kandi n’okulinda ekitebe kitahikwaho akabi.​—Eng. 20:28.

¹⁰ Tubalizeeho akasumi akahikire akatusemeriire kubalizaamu. Baitu haroho akasumi nambere kitali kirungi kubaza nakake. Habwaki nikisobora kutugumira kuculeera?

11. Kyokurorraho ki Yakobo ekiyakozeseze kandi kiine kakwate ki n’okubaza?

¹¹ Obumu nikisobora kutugumira kutanga orulimi rwaitu. Omuhandiiki omu owa Baibuli Yakobo akakozesa ekyokurorraho ekirungi kwoleka nk’oku kitanguhire kukikora. Akagamba ati: “Omuntu wena obwatasobya omu kigambo kyorulimi, ogu nuwe muntu ahikiriire, nasobora okutanga omubiri gwona. Kandi obututa ebyoma ebyembarasi omu minwa yazo zitworobera, tuhindurahindura emibiri yazo yona.” (Yak. 3:2, 3) Ekyoma kinu bakijweka omu mutwe n’omu kanwa nk’embarasi. Omuvugi w’embarasi obw’asika enkoba ez’ekyoma kinu kimusobozesa kugihabura rundi kugyemereza. Kakuba omuvugi wayo alemwa kukwata kurungi enkoba zinu, embarasi n’esobora kugenda hoona nambere erukwenda kandi ekaleta ebizibu. Omu mulingo nugwo gumu, kakuba tulemwa kutanga orulimi rwaitu nikisobora kuleeta ebizibu. Leka tubazeeho enyikara ezimu nambere tusemeriire kutanga orulimi rwaitu.

12. Nidi obutusemeriire kutanga orulimi rwaitu tukaculeera?

 ¹² Kiki eky’okora obw’okimanya ngu Omukristaayo ondi amanyire ebintu eby’atasemeriire kugambira abantu abandi? Ekyokurorraho, kakuba otangatangana omuntu kuruga omu ihanga nambere omulimo gwaitu gutangirwe ohurra nogonza kumukaguza omulingo bakoramu omulimo ogw’okutebeza? Nosobora kuba oine ensonga enungi habwaki n’omukaguza. Nitugonza muno ab’oruganda bagenzi baitu kandi tugonza kumanya ebibarukurabamu. Kandi nitugonza obuturaaba nitubasabira tumanye kiki kyonyini eky’okugambira Yahwe. Baitu kanu nuko kasumi tusemeriire kutanga orulimi rwaitu kandi tukaculeera. Kakuba tusindikiriza omuntu kutugambira ebintu eby’atasemeriire kubaza tuba tutarukwoleka okugonza hali we hamu n’ab’oruganda abamwesigire ngu tarukwija kubaza ebirukubakwataho. Busaho n’omu mulitwe ayakugondeze kwongera kugumanganiza obwomeezi obw’Abakristaayo bagenzi baitu abali omu mahanga nambere omulimo gwaitu gutangirwe. Omu mulingo nugwo gumu busaho Mukristaayo arukuheereza omu ihanga nambere omulimo gwaitu gutangirwe asemeriire kugambira abandi omulingo omulimo ogw’okutebeza gukorwamu rundi emirimo endi ey’ekitebe.

13. Nk’oku kyolekerwe omu Enfumo 11:13, abagurusi b’ekitebe basemeriire kukora ki kandi habwaki?

¹³ Kikuru muno abagurusi b’ekitebe kuhondera omusingi oguli omu Enfumo 11:13 ogw’okweriinda kugambira abantu ensita ezibatasemeriire kumanya. (Soma.) Kinu tikyanguhire kukira muno omugurusi w’ekitebe obwarukuba aswire. Abaswerangaine bagumya enkoragana yabo kuraba omu kugambirangana ensita, nk’oku barukwehurra, hamu n’ebiberalikiriize. Baitu omugurusi ow’ekitebe akimanyire ngu tasemeriire kugambira mukazi we ensita ez’abantu abali omu kitebe. Kakuba akikora nibasobora kuleka kumwesiga kandi asiisa ibara lye. Abo abakomerwe kutwara obujunanizibwa omu kitebe tibasemeriire kuba “nyandimi ibiri,” rundi abarukubaza ebisuba. (1 Tim. 3:8) Kinu nikimanyisa ngu tibasemeriire kubaza ebisuba rundi kugonza orugambo. Omugurusi arukugonza mukazi we, tamutweka omugugu ogw’okumanya ensita ez’atasemeriire kumanya.

14. Omukazi w’omugurusi w’ekitebe nasobora ata kukonyera iba kwikara aine ibara erirungi?

¹⁴ Omukazi nasobora kukonyera iba kwikara aine ibara erirungi kakuba ayeriinda kumusindikiriza kumugambira ensita ez’atasemeriire kumanya. Nyina bwenge obwahondera obuhabuzi bunu, ayoleka ngu nasagika iba kandi natekamu ekitiinisa abantu abesigire iba. Kandi ekikuru muno asemeza Yahwe habwokuba aba n’akonyera kwikazaaho obusinge n’obumu omu kitebe.​—Bar. 14:19.

15. Yahwe akehurra ata habw’abanywani ba Yobu abasatu kandi habwaki?

¹⁵ Ebiri omu kitabu kya Yobu nibitukonyera kwega bingi ha mulingo n’akasumi tusemeriire kubalizaamu. Hanyuma ya Yobu kuhikwaho ebizibu eby’amaani kandi ebyali bihonderaine, abasaija bbana bakaija kumuhuumuza n’okumuha obuhabuzi. Abasaija abo bakamara obwire bwingi baculiire. Baitu ebigambo Erifazi, Biridadi, na Zofa babalize hanyuma y’okumara obwire baculiire, bitooleke ngu baali nibaserra omulingo ogw’okukonyeramu Yobu. Baitu bakaba nibaserra omulingo ogw’okwolekamu Yobu ngu haroho ekibi eky’akaba akozere. Haroho ebintu ebihikire ebibabalize, baitu ebirukukira obwingi ebibabalizeeho Yobu na Yahwe byali bitali by’embabazi rundi byali bisuba. Bakajunaana Yobu kuba muntu mubi muno. (Yob. 32:1-3) Yahwe akakora ki? Akakwatirwa abasaija abasatu abo ekiniga eky’amaani. Akabeeta badomadoma kandi yabagambira kugenda hali Yobu abasabire.​—Yob. 42:7-9.

16. Ekyokurorraho ekibi ekya Erifazi, Biridadi na Zofa nikitwegesa ki?

 ¹⁶ Ensobi za Erifazi, Biridadi, na Zofa nitusobora kuzegeraho amasomo maingi. Ery’okubanza, titusemeriire kucwera ab’oruganda omusango. (Mat. 7:1-5) Baitu tusemeriire kubahuliiriza kurungi tutakabalize ekintu kyona. Kinu nikyo kirukwija kutukonyera kwetegereza enyikara yabo. (1 Pet. 3:8) Eryakabiri, obutaracwamu kubaza tukigumye ngu ebigambo byaitu by’embabazi kandi bihikire. (Bef. 4:25) Yahwe atekaho omutima ebintu ebitubaliza abantu abandi.

17. Ekyokurorraho kya Erihu nikitwegesa ki?

¹⁷ Omusaija owakana ayaizire kubungira Yobu akaba nayetwa Erihu kandi akaba ali munyabuzaale wa Iburahimu. Akahuliiriza Yobu n’abasaija abasatu obu bakaba nibabaza. Aine kuba yataire omutima ha bintu ebi bakaba nibabaza habwokuba akaha Yobu obuhabuzi omu mulingo ogw’embabazi obwamukonyire kuhindura entekereza ye. (Yob. 33:1, 6, 17) Ekigendererwa kya Erihu ekikuru kyali ky’okukugiza Yahwe hatali kwenyumiza wenka rundi omuntu ondi. (Yob. 32:21, 22; 37:23, 24) Ekyokurorraho kya Erihu nikitwegesa ngu haroho akasumi akatusemeriire kubaza n’ak’okuhuliriza. (Yak. 1:19) Kandi nikitwegesa ngu obuturukuba nituha obuhabuzi, ekigendererwa kyaitu ekikuru kisemeriire kuba eky’okukugiza Yahwe hatali kwenyumiza itwenka.

18. Nitusobora tuta kwoleka ngu nitusiima habw’ekisembo eky’okubaza?

¹⁸ Obutuhondera obuhabuzi bwa Baibuli oburukukwata h’akasumi n’omulingo tusemeriire kubazaamu twoleka ngu nitusiima habw’ekisembo eky’okubaza. Yahwe akaterekereza Omukama Sulemani owakaba aine amagezi kuhandiika ati: “Ekigambo ekirukugambwa nambere kisemeriire nikisisana nkamapera gezabu omu bigega byefeza.” (Nfu. 25:11) Kakuba tuhuliriiza kurungi abandi ebibarukutugambira kandi tukabanza kutekereza tutakabalize, ebigambo byaitu nibiija kuba nk’amapeera ag’ezaabu ag’omuhendo mwingi kandi amarungi. Ekirugamu, byona ebitubaza bibe bike, rundi bingi nibiija kwombeka abandi kandi biretere Yahwe kutugonza. (Nfu. 23:15; Bef. 4:29) Gunu nugwo omulingo ogurukukirrayo kimu oburungi ogutusobora kwoleka Ruhanga ngu nitumusiima habw’ekisembo eky’okubaza!