Abakristaayo abamu bakozesa ebya kalimagezi ebiroho omu kasumi kanu kwikara nibabaza n’ab’omu maka gaabo hamu n’Abakristaayo abandi. Baitu Omukristaayo ow’akuzire omu by’omwoyo naija kwikara naijuka obuhabuzi oburukugamba buti: “Omuntu omwekengi arora akabi, ayesereka: baitu abatanyina magezi bahinguraho, baferwa.”​—Nfu. 27:12.

Nitukyetegereza ngu Yahwe nagonza kutulinda. Nahabweki, titukoragana nabo abalengaho kubaganizaamu ekitebe, ababingirwe, rundi abakurakuraniza enyegesa ezitahikire. (Bar. 16:17; 1 Kol. 5:11; 2 Yoh. 10, 11) Abamu abaija omu kitebe, nibasobora kuba baturukworobera ebiragiro bya Baibuli. (2 Tim. 2:20, 21) Nahabweki, kinu osemeriire kukiijuka obworaaba noserra abanywani. Baitu nikisobora kutugumira kukoma abanywani n’obwegendereza obuturukuba nitukozesa puroguraamu ez’okusindika obutumwa.

Tusemeriire kutekerezaaho muno abantu abaturukwija kuba nitukoragana nabo kakuba tweteranizaaho guruupu ey’okusindika obutumwa ey’erumu abantu baingi muno. Abakristaayo abamu beteranizeeho gurupu ezirumu abantu baingi kandi kinu kibarugiiremu ebizibu. Ow’oruganda rundi munyaanya itwe, nasobora kwoleka ata ngu nayegendereza guruupu obwerukuba erumu abantu nka kimu rundi enkumi n’enkumi z’abantu? Tikirukusoboka kumanya abantu boona abali omu guruupu egi kandi n’okumanya nk’oku bemeriire omu by’omwoyo. Zabuli 26:4 n’egamba eti: “[Tinyikarra] nabantu abatarumu; kunu tinditahamu hamu nabagobya.” Kinu nikyoleka ngu ky’amagezi muno kusindikira obutumwa abantu abatumanyire bonka.

Guruupu n’obwerukuba eri ntaito, Omukristaayo asemeriire kwegendereza obwire obwamara nasindika obutumwa hamu n’ebintu ebibabazaaho. Titusemeriire kwehurra ngu tusemeriire kugarukamu buli butumwa bwona obubatusindikira tutabandize kutekerezaaho ebibarukubazaaho rundi obwire obuturamara. Paulo akatererra Timoseo kwerinda abantu “ab’orugambo kandi abarukwetahya omu nsonga ez’abantu abandi.” (1 Tim. 5:13, NW) Omu kasumi kanu kyanguhire kukora ekintu nikyo kimu nitukozesa ebyoma ebya kalimagezi.

Omukristaayo ow’akuzire omu by’omwoyo tarukwija kusindika rundi kuhuliiriza obutumwa oburumu ebintu ebirukubazaaho kubi Abakristaayo bagenzi be rundi ensita zaabo. (Zab. 15:3; Nfu. 20:19) Kandi naija kwerinda kugarukamu rundi kuhuliiriza obutumwa bwona obutagumiibwe ngu bw’amananu. (Bef. 4:25) Twine obutumwa bwingi oburungi oburukusigikirra ha Baibuli hamu n’amakuru agarukwesigwa ha mukura gwaitu ogwa jw.org hamu n’omu puroguraamu zaitu eza buli mwezi eza JW Broadcasting^®.

Abakristaayo abamu bakozesa purogurramu ez’okusindika obutumwa kutunda, kugura, kuranga eby’amaguzi, rundi n’okugaba emirimo. Ezi nsonga z’obusubuzi kandi tiziine kakwate koona n’okuramya Yahwe. Abakristaayo abarukugonza kwerinda “okwegomba erupiya” berinda kwohebwa kukozesa enkoragana eibaine n’ab’oruganda abandi kwekorra sente.​—Baheb. 13:5.

Tusemeriire kukozesa puroguraamu ez’okusindika obutumwa kuserurra ab’oruganda abali omu bwetaago rundi abahikirweho ebigwererezi obukonyezi? Tugonza ab’oruganda bagenzi baitu kandi tubafaaho, nahabweki tukira kukonyera abo abali omu bwetaago kandi n’okubagarramu amaani. (Yak. 2:15, 16) Baitu kulengaho kukozesa guruupu enkooto ey’okusindika obutumwa kulengaho kuserra obukonyezi bunu, nikisobora kutalibaniza entekaniza enungi ezikozerwe itaagi, rundi abarugusi b’ekitebe. (1 Tim. 5:3, 4, 9, 10, 16) Kandi busaho n’omu omulitwe ayakugondeze kuletera abantu kutekereza ngu tukomerwe omu mulingo ogw’embaganiza kurolerra ab’oruganda bagenzi baitu.

Nitugonza kukora ekirahaisa Yahwe ekitiinisa. (1 Kol. 10:31) Nahabweki, obworaaba nocwamu kukozesa puroguraamu ey’okusindika obutumwa, rundi puroguraamu endi eya kalimagezi, tekerezaaho akabi akasobora kurugamu kandi oyegendereze.