1-3. (a) Tusemeriire kutwara tuta amananu ag’omu Baibuli? Ha ekyokurorraho. (Rora ekisisani ekiri ha rupapura 9.) (b) Bikaguzo ki ebiturukwija kugarukamu omu kicweka kinu?

BIRO binu, abantu bakira kugura ebintu omu duuka hanyuma babigarrayo. Kandi kukira muno abo abagura nibakozesa omukura nubo bakira kubigarrayo. Nibasobora kusanga ngu ekintu ekibaguzire tikiri nk’oku bakaba nibakanihira, rundi nikisobora kuba kiine akamogo. Nahabweki bacwamu kusaba bakibahingisize n’ekintu ekindi, rundi basaba babagarurre sente zabo.

² Titwakugondeze kukora ekintu nikyo kimu obukirukuhika h’amananu ag’omu Baibuli. Hanyuma ‘y’okugura’ amananu, titwakugondeze ‘kugatunda,’ amakuru gakyo, okugarugamu. (Soma Enfumo 23:23; 1 Timoseo 2:4) Nk’oku twarozere omu kicweka ekyahoire, tukatamu obwire bwingi kusobora kwega amananu. Ekintu ekindi, nitusobora kuba twelekereho omulimo ogukaba nigututahiza sente nyingi. Kandi nitusobora kuba twahindwiremu enkoragana yaitu n’abantu abamu, twahindwire entekereza rundi ebikorwa byaitu, rundi nitusobora kuba twalekere ebikorwa n’emigenzo ey’etakusemeza Yahwe. Baitu nitukigumya ngu busaho kintu kyona ekitwayerekeseze ekiri ky’omuhendo mwingi kwingana n’emigisa ei tutunga habw’okwega amananu.

 ³ Yesu akaha ekyokurorraho eky’omusubuzi ow’akaba n’aserra eruru ey’omuhendo. Omusaija onu obuyazoire eruru ey’omuhendo omwingi, aho n’aho akatunda buli kimu eky’akaba aine nukwo agule eruru. Eruru Yesu yabalizeho n’emanyisa Obukama bwa Ruhanga. Akakozesa ekyokurorraho kinu kwoleka nk’oku amananu gali g’omuhendo hali abo abagaserra. (Matayo 13:45, 46) Naitwe obutwahuliire amananu agarukukwata ha Bukama bwa Ruhanga omurundi gwaitu ogw’okubanza, n’amananu gandi goona ag’omuhendo agali omu Baibuli, tukasobora kwerekesa buli kimu nukwo tugatunge. Obuturayeyongera kugatwara kuba g’omuhendo, titurukwija kugarugamu. Baitu eky’obusaasi, abamu ha baheereza ba Ruhanga balekere kutwara amananu kuba kintu ky’omuhendo kandi abandi bahikire bagarugamu. Titwakugondeze kukora ekintu ky’omulingo gunu! Tusemeriire kuhondera obuhabuzi bwa Baibuli oburukututererra kwikara nitugendera omu mananu. (Soma 3 Yohana 2-4.) Kinu nikimanyisa ngu twebembeze amananu kandi tukyoleke omu mulingo turukutwazamu obwomeezi bwaitu. Baitu habwaki omuntu asobora ‘kutunda’ amananu, rundi kugarugamu, kandi nasobora kugatunda ata? Ekintu kinu nitusobora kukyerinda tuta? Nitusobora kwoleka tuta ngu tucwiremu kwikara nitugendera omu mananu?

4. Habwaki abamu baalekere kugendera omu mananu omu busumi bwa Yesu?

⁴ Omu busumi bwa Yesu, abamu hali abo abaabandize kwega amananu batagaikalemu. Ekyokurorraho, Yesu obuyakozere ekyamahano yaliisa ekitebe ky’abantu baingi muno, bakamuhondera obuyagenzere ha rubaju orundi orw’Enyanja ya Galiraya. Baitu haroho ekintu Yesu yagambire ekyabatinisize. Akagamba: “Obumutalya omubiri gwa Mwana w’Omuntu nimunywa esagamaye, timunyina bwomezi omuliinywe.” Omu kiikaro ky’okusaba Yesu abasoborre eky’akaba namanyisa, ubo bakagamba bati: “Ekigambo eki nikiremera: noha asobora kukihurra?” Ekyarugiremu, “baingi omuli abegeswabe nikyo bayegendiire, nibagarukayo enyuma, okutagendera obundi hamu nauwe.”​—Yohana 6:53-66.

5, 6. (a) Kiki ekiretiire abamu kuruga omu mananu omu kasumi kanu? (b) Omuntu nasobora kutandika ata kuruga omu mananu mporampora?

⁵ Eky’enaku, n’omu kasumi kanu, haroho abamu abarugire omu mananu. Habwaki? Abamu nibasobora kuba batabaijukire habw’empinduka enyakukozerwe omu nsoborra y’ekyahandiikirwe, rundi nibasobora kuba batabaijukire habw’ekintu ow’oruganda anyakumanyirwe muno yagambire rundi yakozere. Kandi abandi nibasobora kuba baahairwe obuhabuzi kuruga omu Baibuli baitu tibwabasemeza, rundi nibasobora kuba baatungire obutetegerezangana n’omuntu ondi omu kitebe. Rundi abandi nibasobora kuba baahondiire enyegesa z’ebisuba ez’abantu abahakaniza ekitebe kya Yahwe n’abantu abandi abatubazaaho ebisuba. Zinu ziri zimu ha nsonga eziretiire abantu abamu kwecweramu bonka kuruga hali Yahwe n’okuruga omu kitebe. (Abaheburaniya 3:12-14) Omu kiikaro ky’okuruga omu mananu, tikyakubaire kirungi besige Yesu nk’oku Petero yamwesigire? Abandi obubaatinire habw’ebigambo bya Yesu, Yesu akakaguza abakwenda be nabo obubaraaba baali nibagonza kugenda. Petero akagarukamu ati: “Mukama waitu turagenda hali oha? Oyina ebigambo ebyobwomezi obutahwaho.”​—Yohana 6:67-69.

 ⁶ Abandi bagenzere nibaruga omu mananu mporampora, obwire obundi nibatamanya ngu baliyo nibaruga omu mananu. Omuntu ow’aruga omu mananu omu mulingo gunu aba nasisana nk’elyato eriruga ha musa gw’enyanja mporampora. Baibuli etutererra ngu tweride tutesanga nituruga mporampora ha bintu ebitwahuliire. (Abaheburaniya 2:1, NW) Emirundi erukukira obwingi, omuntu ow’aruga omu mananu aba atakigenderiire. Oihireho aleka enkoragana ye na Yahwe kweyongera kuceka, kandi obwire nibusobora kuhika enkoragana enu n’ehweraho kimu. Ekintu kinu nitusobora kukyerinda tuta?

7. Kiki ekisobora kutukonyera okutatunda amananu?

⁷ Kusobora kweyongera kugendera omu mananu, tusemeriire kwikiriza kandi tukorobera buli kintu kyona Yahwe arukuturagira. Amananu tusemeriire kugafoora kintu ekirukukirayo obukuru omu bwomeezi bwaitu kandi omu buli kintu kyona ekituraaba nitukora tuhondere emisingi ya Baibuli. Omukama Daudi obwakaba nasaba Yahwe, akaraganiza ati: ‘Ndagenderaga omu mananu gawe.’ (Zabuli 86:11) Daudi akacweramu kimu ngu naija kugendera omu mananu kandi nikyo kimu naitwe ekitusemeriire kukora. Kakuba tutakora tuti, nitusobora kwesanga tutandikire kutekerezaho ebintu ebitwayerekeseze kusobora kwega amananu kandi nitusobora n’okwesanga tugondeze kugarukira ebimu halibyo. Baitu titusobora kucwamu ngu amananu agamu nitwija kugaikiriza kandi agandi tugange. Tusemeriire kugendera omu ‘mananu gona.’ (Yohana 16:13) Omu kicweka ekihoire tukarora ebintu bitano ebitusobora kuba twayerekeseze nukwo twege kandi tute omu nkora amananu. Hati nitugenda kurora omulingo tusobora kwetantara kugarukira ebintu ebi ebitwalekere enyuma.​—Matayo 6:19.

8. Omulingo Omukristaayo akozesa obwire bwe nikisobora kumuletera kita kutandika kuruga hali Yahwe mporampora? Ha ekyokurorraho.

⁸ Obwire. Kurora ngu twitwatandika kuruga omu mananu mporampora, tusemeriire kwikara nitukozesa obwire bwaitu omu mulingo ogw’amagezi. Kakuba tuteriinda, nitusobora kutandika kumara obwire bwingi omu by’okwesemeza, omu kukora ebintu ebitugonza muno, kwikara ha mikura ya intaneti, rundi kurora tivi. N’obukiraaba ngu ebintu binu tibiri bibi, nitusobora kuba nitubikora omu bwire obutwakubaire nitukozesa kuheereza Yahwe. Munyaanya itwe arukwetwa Emma akahikwaho ekintu ekya mulingo gunu. * (Rora obugambo obuli hansi.) Kuruga omu buto bwe, yagonzaaga muno embaraasi kandi yazivugaga obwire bwona obuyagonzaaga. Baitu akatandika kwehurra kubi habw’obwire obuyamaraga nakora ekintu kinu, kandi akacwamu kwebembeza ebintu ebirukukirayo obukuru. Ebyahikire hali Cory Wells, munyaanya itwe ayagonzaaga muno kuvuga embaraasi nabyo bikakonyera Emma. * (Rora  obugambo obuli hansi.) Hati Emma nakozesa obwire bwe oburukukira obwingi kuheereza Yahwe kandi aine obwire oburukumara obw’okuba n’abantu ab’omu ka ye n’abaheereza ba Yahwe bagenzi be. Hati nayehurra ali haihi muno na Ruhanga kandi aine okusemererwa habw’okumanya ngu nakozesa kurungi obwire bwe.

9. Kiki ekisobora kutuletera kutandika kutwara itungo kuba likuru muno?

⁹ Itungo. Obuturaaba nitugonza kwikara omu mananu, titusemeriire kutwara itungo nk’ekintu ekirukukirayo obukuru omu bwomeezi bwaitu. Obutwayegere amananu, tukakirora ngu kuheereza Yahwe kintu kikuru kukira itungo, kandi tukaba twetegekere kuleka ebintu ebimu habw’okugonza kwega amananu. Baitu hanyuma y’obwire kugenda niburabaho, nitusobora kutandika kurora abandi nibagura ebintu ebiri ha mulembe nk’amasimu rundi nibagura ebintu ebindi ebya sente nyingi. Naitwe nitusobora kutandika kwehurra nkabaine ekiturukuferwa. Nitusobora kutandika kurora ngu ebitwine tibirukutumara kandi nitutandika kuta omutima gwaitu ha kuserra ebintu omu kiikaro ky’okuheereza Yahwe. Ekintu kinu nikitwijukya ekyahikire hali omusaija ayayetwaga Dema. Baibuli egamba ngu ‘akagonza obusinge bwa hati bunu’ kyamuletera kusigaho omukwenda Paulo. (2 Timoseo 4:10) Dema nasobora kuba yagondeze muno itungo kukira kuheereza Ruhanga. Rundi nikisobora kuba ngu akaba atakyagonza kwefereza nukwo ayeyongereyo kuheereza n’omukwenda Paulo. Ekintu kinu nikitwegesa ki? Nitusobora kuba twali bantu abagonzaga muno itungo obutukaba tutakegere amananu. Kakuba tuterinda, okugonza oku nikusobora kuhumbuuka kandi nikufokera kimu kw’amaani nitumalirra tulekere kugonza amananu.

10. Kintu ki ekitusemeriire kwetantara kutuhikaho?

¹⁰ Enkoragana yaitu n’abandi. Kusobora kweyongera kugendera omu mananu, tusemeriire kwerinda nukwo abantu abatarukuheereza Yahwe batatwegesa engeso embi. Obutwayegere amananu, enkoragana yaitu n’abantu abatali Bakaiso ba Yahwe hamu n’abanyabuzaale baitu ekahinduka. Abamu nibasobora kuba bataratuhakaniize, baitu abandi nibasobora kuba baatuhakanize. (1 Petero 4:4) Amananu gali ngu, tulengaho muno kuba n’enkoragana enungi n’abanyabuzaale baitu kandi tuboleka embabazi. Baitu titusobora kucwa emisingi ya Yahwe habw’okugonza kusemeza abanyazaale baitu. Kusigikirra ha 1 Abakolinso 15:33, abanywani baitu aba ha mutima basemeriire kuba abantu abagonza Yahwe.

11. Nitusobora tuta kwetantara ebikorwa n’ebitekerezo ebibi?

¹¹ Ebitekerezo n’ebikorwa ebitasemiire. Kusobora kwikara niturubatira omu mananu, nikitwetagisa kuba abarukwera kusigikirra ha rulengo rwa Yahwe. (Isaya 35:8; Soma 1 Petero 1:14-16.) Obutwayegere amananu, tukakora empindahinduka omu bwomeezi bwaitu nukwo tusobole kugendera ha ndengo za Baibuli. Abamu bakakora empindahinduka z’amaani muno. Baitu na hati tusemeriire kwerinda muno kurora ngu twitwahindura obwomeezi bwaitu oburungi tukatandika kukora ebikorwa eby’obusihani. Kiki ekisobora kutukonyera kwanga okwohebwa kwona okw’okukora ebikorwa eby’obusihani? Tekerezaho ekintu Yahwe yatuhaire kurora twaba abarukwera. Akahayo obwomeezi obw’omuhendo omwingi muno, obu nubwo obwomeezi obw’Omwana we Yesu Kristo! (1 Petero 1:18, 19) Tusemeriire kwikara nitwijuka omulingo  ekicunguro kya Yesu kiri ky’omuhendo mwingi nukwo kitukonyere kwikara tuli abarukwera kusigikirra ha rulengo rwa Yahwe.

12, 13. (a) Habwaki tusemeriire kurora ebiro bikuru nk’oku Yahwe abirora? (b) Kiki ekiturukugenda kubazaaho?

¹² Emigenzo hamu n’engeso ezitarusemeza Ruhanga. Abantu abaturukwikara nabo omu ka, abakozi bagenzi baitu, hamu n’abeegi bagenzi baitu nibasobora kutusonasona kubeteranizaaho omu kujaguza ebiro eby’ekikafiri. Kiki ekisobora kutukonyera kwanga okusindikirizibwa kwetaahya omu migenzo n’okujaguza ebiro ebikuru ebitasemeza Yahwe? Twine kwikara tumanyire kurungi ensonga habwaki Yahwe atasiima ebiro binu ebikuru. Nitusobora kuseruliiriza omu bitabu byaitu nukwo twikale nitwijuka omulingo ebiro binu ebikuru byatandikire. Obutwecumitiriza ha nsonga ez’omu byahandiikirwe ezirukwoleka habwaki tutajaguza ebiro ebikuru, kitukonyera kugumya ngu niturubatira omu muhanda kandi nitukora “ekirukusemerra Mukama waitu.” (Abefeso 5:10) Obuturayesiga Yahwe n’Ekigambo kye, titurukwija kutiina eky’abantu baratutekererezaamu.​—Enfumo 29:25.

¹³ Nitunihira ngu nitwija kwikara nitugendera omu mananu ebiro n’ebiro. Kiki ekisobora kutukonyera kweyongera kurubatira omu mananu? Katurole ebintu bisatu ebitusobora kukora.

14. (a) Kweyongera kwega Baibuli nikisobora kita kutukonyera kutaruga omu mananu? (b) Habwaki nitwetaaga amagezi, okuhanwa, hamu n’okwetegereza?

¹⁴ Eky’okubanza, weyongere kwega Baibuli n’okutekerezaho muno eby’orukwega. Buli kiro weterehoga obwire bw’okukora ebintu binu. Amaani ag’oratamu kwesomesa Baibuli nukwo n’okugonza kwawe okw’amananu kurayeyongera, kandi kinu nikiija kukuletera kugumira kimu omu mananu otarukugarugamu. Enfumo 23:23 etutererra ‘kugura amazima’ kandi eyongera etutererra kugura “amagezi, nokwegesebwa, nokwetegereza.” Tikirukumara kumanya bumanya amananu ag’omu Baibuli. Tusemeriire kuhondera amananu ago omu bwomeezi bwaitu. Obututunga okwetegereza, tutandika kurora akakwate akali hagati y’ebintu ebitwegere n’ebintu ebitusangirwe tumanyire. Amagezi gatukonyera kuta omu nkora ebitumanyire. Obwire obumu amananu gatuhana obugatwoleka empindahinduka ezitusemeriire kukora. Tusemeriire kwanguha kukorra ha kuhanwa nk’oku, okwa Baibuli egamba ngu nikukira efeza.​—Enfumo 8:10.

15. Amananu gatulinda gata nk’oku omweko gwalindaga omuserikale?

¹⁵ Ekyakabiri, cweramu kimu kuteka omu nkora amananu omu bwomeezi bwawe obwa buli kiro. Baibuli erengesaniza amananu n’omweko ogwajwarwaga abaserikale. (Abefeso  6:14) Omu busumi bwa kara, omuserikale obuyajwaraga omweko akagusiba kandi gukaguma, gwamulindaga kandi gwamukonyeraga kusigika. Baitu obuyagusibaga jegejege, tigwamukonyeraga. Amananu gatukonyera gata nk’omweko? Kakuba amananu ag’omu Baibuli tugaikaza omulitwe obwire bwona, nigaija kutulinda hali entekereza enyakugwire kandi nigaija kutukonyera kukora encwamu ezihikire. Obuturukuba twine ebizibu eby’amaani rundi nitwohebwa kukora ekintu ekibi, amananu ag’omu Baibuli nigaija kutwekambisa kukora ekintu ekihikire. Nk’oku omuserikale akaba atasobora kugenda omu bulemu atajwaire omweko gwe, naitwe titusemeriire kuleka amananu. Tukole kyona ekirukusoboka kuta omu nkora amananu ag’omu Baibuli. Omuserikale yatwarraga empirima ye ha mweko gwe. Leka turole omulingo naitwe tusobora kukora ekintu nikyo kimu.

16. Kwikara nitwegesa amananu kitukonyera kita kwikara nitugarubatiramu?

¹⁶ Ekyakasatu, kora kyona ekirukusoboka kwegesa abandi amananu. Baibuli erengesanizibwa n’empirima. Nk’oku omuserikale omurungi yaikaraga akwatiire kimu empirima ye, naitwe omukono gwaitu tigusemeriire kuruga ha Kigambo kya Ruhanga. (Abefeso 6:17) Itwena nitusobora kufooka begesa barungi abarukwegesa “kurungi ekigambo kyamazima.” (2 Timoseo 2:15) Obutukozesa Baibuli kwegesa abandi amananu, tweyongera kugamanya n’okugagonza. Kandi kitukonyera kweyongera kugarubatiramu.

17. Habwaki amananu kiri kintu ky’omuhendo hali iwe?

¹⁷ Amananu kisembo ky’omuhendo kuruga hali Yahwe. Gatusobozesa kuba n’enkoragana enungi na Isiitwe Ow’omu iguru. Eki nikyo ekintu ekirukukirayo omuhendo ekitusobora kutunga. Yahwe atwegeseze bingi baitu egi ekyali ntandikwa! Naturaganiza ngu naija kwikara natwegesa ebiro b’ebiro. Nahabweki, amananu gatwale nk’eky’omuhendo nk’oku osobora kutwaza eruru ey’omuhendo. Weyongere “[ku]gura amazima, kandi oleke okugatunda.” Obu nubwo oraaba nka Daudi, nohikiriza omurago gunu: “Ndagenderaga omu mananu gawe.”​—Zabuli 86:11.