1-2. (a) Kusigikirra ha Abefeso 6:16, habwaki nitwetaaga engabu enkooto ey’okwikiriza? (b) Nitugenda kubazaaho bikaguzo ki?

OINE engabu enkooto ey’okwikiriza? (Soma Abefeso 6:16.) Bushaho kugurukyagurukya naiwe ogiine. Nk’oku engabu enkooto erinda omubiri gwona, nukwo n’okwikiriza kwaitu kutulinda kutatwalirizibwa ebintu ebibi ebiri omu nsi ya Sitaani nk’obusihani, kurwana, hamu n’ebintu ebindi ebirukucwa endengo za Ruhanga.

² Baitu nk’oku tuli “omu biro ebya hanyuma,” okwikiriza kwaitu nikwija kwikara nikulengwa. (2 Tim. 3:1) Nosobora ota kwekebiija engabu yaawe kurora obweraaba egumire? Kandi nosobora ota kwikara okwatiire kimu engabu yaawe? Leka tugarukemu ebikaguzo binu.

3. Abaserikale barolerraga bata engabu zaabo kandi habwaki?

³ Omu busumi bwakara, abaserikale bakiraga kukozesa engabu ezabaga ziswekerwe oruhu. Ebyoma n’oruhu rw’engabu babisigaga amagita nukwo bitamoma. Omuserikale obuyakimanyaga ngu engabu ye esisikaire, yagidabirizaaga omu bwangu atakatahire omu bulemu bundi. Ekyokurorraho kinu nikitwegesa ki ha kwikiriza kwaitu?

4. Habwaki osemeriire kukebera engabu yaawe ey’okwikiriza, kandi osemeriire kukikora omu omulingo ki?

⁴ Nk’abaserikale abakara, naitwe Abakristaayo tusemeriire kwikara nitukebera okwikiriza kwaitu butoosa nukwo twikale twetekaniriize obulemu. Tuli omu bulemu obw’omwoyo kandi twine kurwana n’emwoyo emibi. (Bef. 6:10-12) Busaho omuntu ondi wena ow’asobora kurolerra engabu yaawe. Kiki  ekisobora kukukonyera kumanya okwikiriza kwawe obukuraaba kugumire ekirukumara otakalengerwe? Eky’okubanza, osemeriire kusaba Yahwe akukonyere. Kandi okozese Ekigambo kya Ruhanga kukukonyera kwerora omulingo Ruhanga arukukuroramu. (Baheb. 4:12) Baibuli egamba eti: “Yesiga [Yahwe] nomutima gwawe gwona, oleke okwigamira okwetegereza kwawe wenka.” (Nfu. 3:5, 6) Hati banza otekerezeeho enyikara eziwakaruga kurabamu, n’omulingo wayetwaizeemu. Ekyokurorraho, obworaaba watungire ebizibu omu by’entahya, okatekerezaaho omurago gwa Yahwe oguli omu Abaheburaniya 13:5 ogurukugamba ngu: “Tindikuleka na kake, kunu tindikuhemukira na kake”? Omurago ogu gukakuleetera kwesigira kimu ngu Yahwe naija kukukonyera? Obukiraaba nukwo kyabaire, eki nikyoleka ngu engabu yaawe ey’okwikiriza eri omu nyikara enungi.

5. Kiki eky’osobora kurora obwokebera okwikiriza kwawe?

⁵ Kakuba okebera kurungi engabu yaawe ey’okwikiriza, nosobora kurora ebintu eby’obaire otarukunihira. N’osobora kurora obuceke obwokaba otakaroraga. Ekyokurorraho, n’osobora kusanga ngu okweralikiirra ekihinguraine, ebisuba, hamu n’okuhwamu amaani biletiire okwikiriza kwawe kuceka. Obworaaba ohikirweho ekintu kyamulingo gunu, n’osobora kukora ki kurora okwikiriza kwawe tikwayeyongera kuceka?

6. Byokurorraho ki ebirukwoleka ngu obwire obumu tikiri kibi kweralikirra?

⁶ Obwire obumu tikiri kibi kweralikirra. Ekyokurorraho, tikiri kibi kutekerezaaho muno omulingo tusobora kusemezaamu Yahwe hamu na Yesu. (1 Kol. 7:32) Obutukora ekibi eky’amaani nitusobora kweralikirra muno ha mulingo turagarraho enkoragana yaitu na Ruhanga. (Zab. 38:18) Kugonza kusemeza ou tuli nawe omu buswere, kurolerrra abanyabuzaale baitu rundi ab’oruganda omu kitebe nibisobora kutuleetera kweralikirra rundi kwetuntura.​—1 Kol. 7:33; 2 Kol. 11:28.

7. Kusigikirra ha Enfumo 29:25, habwaki tutasemeriire kutiina abantu?

⁷ Baitu kandi kweralikirra ekihinguraine nikisobora kucekya okwikiriza kwaitu. Ekyokurorraho, nitusobora kwikara tweralikiriire omulingo turatungamu eby’okulya n’eby’okujwara. (Mat. 6:31, 32) Habw’okugonza kukehya okwetuntura kunu, omutima gwona nitusobora kuguteeka ha kuserra itungo. Nitusobora n’okutandika kugonza sente. Kakuba kinu kitubaho, okwikiriza kwaitu omuli Yahwe nikwija kuceka kandi kinu nikiija kusiisa enkoragana yaitu hamu nawe. (Mar. 4:19; 1 Tim. 6:10) Ekyakabiri, nitusobora kutandika kugonza kusiimwa abantu kandi nakyo kituleetere kweralikirra ekihinguraine. Kinu nikisobora kutuleetera kutiina abantu kutusekereza rundi kutuhiganiza omu kiikaro ky’okutiina Yahwe. Kusobora kwerinda akabi kanu, tusemeriire kwesengereza Yahwe atuhe okwikiriza n’obumanzi obuturukwetaaga kusobora kuleka kutiina abantu.​—Soma Enfumo 29:25; Luk. 17:5.

8. Tusemeriire kukora ki kakuba omuntu atandika kutubaliza ebisuba?

⁸ Sitaani “ise ebisuba,” akozesa abantu abayahabisize kara kurarangya ebisuba ebirukukwata hali Yahwe hamu n’ab’oruganda n’abanyaanya itwe. (Yoh. 8:44) Ekyokurorraho, abecwireho ekitebe nibasobora kurarangya ebisuba rundi kubazaaho kubi ekitebe kya Yahwe nibakozesa emikuru eya intaneeti, tivi, empapura z’amakuru, rediyo hamu n’ebindi. Ebisuba binu eri emu ha ‘misogi’ rundi oburaso Sitaani obw’akozesa. (Bef. 6:16) Tusemeriire kukora ki kakuba omuntu atandika kutubaliza ebisuba nk’ebi? Titusemeriire kumuhuliiriza.  Habwaki? Habwokuba nitwikiririza omuli Yahwe kandi nitwesiga ab’oruganda bangenzi baitu. Kandi twetantarra kimu abantu abecwireho ekitebe. Titwikiriza kutera nabo empaka ha nsonga yoona, kandi twerinda kulengaho kumanya ebibarukutubazaaho.

9. Bizibu ki ebisobora kuruga omu kuhwamu amaani?

⁹ Kuhwamu amaani nikusobora kucekya okwikiriza kwaitu. Titusobora kuleka kufaayo ha bizibu byaitu. Kuba tukikora nituba tutali b’obujunanizibwa. Ky’amananu obwire obumu tuhwamu amaani. Baitu titusemeriire kwikara nitutekerezaaho ebizibu byaitu buli dakiika. Kakuba twikiriza ekintu kinu kubaho, nitusobora kwebwa ebirungi byona Yahwe ebyaturaganiize. (Kus. 21:3, 4) Kuhwamu amaani nikisobora kutucekya kandi tukaleka kuheereza Yahwe. (Nfu. 24:10) Baitu kinu nitusobora kukyerinda.

10. Ebbaruha ya munyaanya itwe n’ekwegesa ki?

¹⁰ Tekerezaaho ekyokurorraho ekya munyaanya itwe kuruga omu ihanga lya United States anyakwine okwikiriza okugumire n’obwaraaba n’arolerra iba anyakwine oburwaire obw’amaani. Akahandiikira ekitebe kyaitu ekikuru eky’ensi yoona, nagamba ati: “Nobukiraaba ngu obwire obumu enyikara yaitu eguma muno kandi etumaramu amaani, okunihira kwaitu kugumire. Ninsiima muno habw’ebintu byona Yahwe eby’atuhaire kugumya okwikiriza kwaitu n’okutugarramu amaani. Obuhabuzi obw’atuha tuba nitubwetaaga muno kandi butugarramu amaani. Butukonyera kugumizaamu nituheereza Yahwe n’okugumira ebizibu Sitaani eby’atuleetera kutumaramu amaani.” Ebigambo bya munyaanya itwe onu nibitwegesa ngu nitusobora kusingura ekizibu ky’okuhwamu amaani. Omulingo ki? Tusemeriire kukimanya ngu ebizibu byaitu birengo kuruga hali Sitaani, n’okukigumiza kimu ngu Yahwe naija kutuhumuza. Kandi tukozesa kurungi eby’okulya eby’omwoyo eby’atuha.

11. Kusobora kumanya okwikiriza kwaitu obukuraaba kugumire, bikaguzo ki ebitusemeriire kwekaguza?

¹¹ Haroho ebintu eby’orukwetaaga kusemezaamu kusobora kulinda engabu yaawe ey’okwikiriza eri omu nyikara nungi? Omu meezi make agahingwireho, osoboire kwetantara kweralikirra ekihinguraine? Osoboire kwanga kuhuliiriza rundi kuteera empaka n’abantu abacwireho  ekitebe kandi abarukurarangya ebisuba? Kandi osoboire kusingura ekizibu eky’okuhwamu amaani? Obukiraaba nukwo kiri, okwikiriza kwawe kuli omu nyikara enungi. Baitu tusemeriire kwikara tuli bulindaara habwokuba Sitaani aine eby’okurwanisa bindi eby’asobora kukozesa kuturwanisa. Leka tubazeeho kimu hali byo.

12. Kiki ekisobora kuruga omu kugonza itungo?

¹² Kugonza itungo nikusobora kucekya okwikiriza kwaitu kandi kukatuleetera kuleka kwekamba omu kuheereza Yahwe. Omukwenda Paulo akagamba ati: “Busaho murwani obwaramaga ayetaba nebigambo byobwomezi bunu: nukwo asimwe ogu ayamuhandikire okuba omurwani.” (2 Tim. 2:4) Abaserikale Abaroma tibaikirizibwaga kukora omulimo gundi gwona. Kiki akyabahoga omuserikale obuyayangaga kuhondera ekiragiro eki?

13. Habwaki omuserikale bamutangaga kukora emirimo y’obusubuzi?

¹³ Teramu akasisani. Ekitebe kya baserikale bazindukire kwetekaniriza obulemu baitu omu halibo taroho. Omuserikale ogu agenzere omu katale kutunda eby’okulya. Rwebagyo, Abaserikale bagenzi be bakozesa obwire bwabo bwona kukebera eby’okurwanisa byabo hamu n’okuteekera empirima zaabo. Baitu ow’arukutunda eby’okulya aliyo natekaniza ebyaratunda nyenkya. Ekiro ekihonderaho abanyanzigwa babo babatahirra batabetekaniriize. Notekereza muserikale ki araaba ayetekaniriize obulemu kandi arasemeza omudumizi we? Kandi kakuba naiwe oba oli omu bulemu bunu, noha ou wakugondeze akurwanire haihi​—omuserikale ayayetekaniize rundi owakaba n’atunda eby’okulya?

14. Nk’abaserikale ba Kristo, kintu ki ekirukukirayo obukuru halitwe?

¹⁴ Naitwe nitusisana nk’abaserikale abo abarungi. Titwikiriza ekintu kyona kutuhugura kuruga ha kigendererwa kyaitu ekikuru eky’okusemeza Abaduumizi baitu abakuru, Yahwe hamu na Yesu. Kinu ky’omugaso muno kukira ekintu kyona ensi ya Sitaani eky’esobora kutuha. Tukora kyona ekiturukusobora kwikara twine amaani n’obwire ebiturukwetaaga kuheereza Yahwe kandi n’okwikaza engabu yaitu ey’okwikiriza hamu n’ebicweka ebindi ebyekijwaro kyaitu eky’omwoyo bidabiriziibwe kurungi.

15. Omukwenda Paulo akatutererra ki, kandi habwaki?

 ¹⁵ Tusemeriire kwikara bulindaara! Habwaki? Omukwenda Paulo akatutererra ati “abanyakugonza okutunga itungo” nibaija ‘kuhabisibwa baruge omu kwikiriza.’ (1 Tim. 6:9, 10) Ekigambo ‘kuhabisibwa’ nikyoleka ngu kakuba tulengaho kutunga ebintu ebitutarukwetaaga nikisobora kutuhugura tukaruga ha kigendererwa kyaitu. Nitusobora kweretera ‘okwegomba kwingi [okw’obudomadoma] okwakabi okurukusiisa.’ Omu kiikaro ky’okwikiriza okwegomba kunu kukatutaaha omu mutima, tusemeriire kukurora nk’ekyokurwanisa Sitaani eky’akozesa kucekya okwikiriza kwaitu.

16. Ebiri omu Marako 10:17-22 bisemeriire kutuletera kutekerezaaho bikaguzo ki?

¹⁶ Nitusobora kuba twine sente ezirukumara kugura ebintu ebiturukugonza. Kibi kugura ebintu byona ebiturukugonza n’obukiraaba ngu titurukubyetaaga? Tikiri kibi. Baitu tubanze tutekerezeeho ebikaguzo binu: N’obuturaaba twine sente z’okugura ekintu, twine obwire n’amaani ag’okukikozesa n’okukirolerra? Ekintu ekindi, nitusobora kutandika kugonza muno ebintu ebitwine? Kugonza itungo lyaitu nikisobora kutuletera kwetwaza nk’omusigazi ayayangire omugisa ogw’okwongera ha buheereza bwe, Yesu oguyamuhaire? (Soma Marako 10:17-22.) Kirungi tube n’obwomeezi obworobere  kandi tukozese obwire bwaitu n’amaani kukora Ruhanga eby’agonza.

17. Kiki ekitusemeriire kwikara tumanyire?

¹⁷ Tusemeriire kwikara tukimanyire ngu tuli omu bulemu kandi twine kurwana buli kiro. (Kus. 12:17) Ab’oruganda n’abanyaanya itwe tibasobora kutuhimbira engabu yaitu ey’okwikiriza. Buli bujunaanizibwa bwaitu kwikara tukwatiire kimu engabu yaitu.

18. Habwaki abaserikale abaakara bakwatiraga kimu engabu zaabo?

¹⁸ Omu busumi bwa kara omuserikale obuyayolekaga obumanzi omu bulemu yatungaga ekitiinisa ky’amaani. Baitu kandi yaswaraga muno obuyagarukaga omu ka ataine engabu ye. Omusaija Omuroma omunyabyafaayo arukwetwa Tacitus akahandiika ati: “Omuserikale kuleka engabu ye omu bulemu nikyo ekintu ekyali nikikirayo kuswaza.” Enu ery’emu ha nsonga habwaki abaserikale bakwatiraga kimu engabu zaabo.

19. Nitusobora tuta kwikara tukwatiire kimu engabu yaitu ey’okwikiriza?

¹⁹ Twikara tukwatiire kimu engabo yaitu ey’okwikiriza obutugenda omu nsorrokano butoosa kandi tukagambiraho abandi ibara lya Yahwe hamu n’Obukama bwe. (Baheb. 10:23-25) Ekindi, tusoma Ekigambo kya Ruhanga buli kiro kandi tusaba Yahwe kutukonyera nukwo tuteke omu nkora ebitusomere hamu n’okuhondera obuhabuzi bwe omu byona ebitukora n’ebitubaza. (2 Tim. 3:16, 17) Obuturakora ebintu binu, busaho ky’okurwanisa kyona Sitaani eky’akozesa ekiratulemesa kutunga obwomeezi obutahwaho. (Is. 54:17) Engabu yaitu enkooto ey’okwikiriza niija kutulinda. N’obumanzi nitwija kugumizaamu nitukorra hamu n’ab’oruganda n’abanyaanya itwe. Nitwija kusingura obulemu obuturwana buli kiro obw’okwikaza okwikiriza kwaitu kugumire. Kandi ekirukira obukuru nitwija kutunga omugisa ogw’okuba ha rubaju rwa Yesu obwaliba narwanisa Sitaani hamu n’abahondezi be.​—Kus. 17:14; 20:10.