Omulimo gw’okutebeza obugwayeyongiire, obwetaago bw’ebitabu bukeyongera. Ab’oruganda omu Beseeri ya Brooklyn baaturukyaga magaziini, baitu nabwo baali nibakyakozesa kampuni ezindi kubaterra ebitabu ebiine ebyesweko ebigumire. Hanyuma y’okumara emyezi nyingi tutaine bitabu by’okukozesa ekyaletiire omulimo gw’okutebeza kugarukirra, Ow’oruganda Rutherford akakaguza Robert Martin, ow’akaba n’ajunanizibwa n’ikorro, obuturaaba nitusobora kweturukiza ebitabu ebyaitu habwaitu.

Ow’oruganda Martin akagamba ati: “Eki kikaba kiteekerezo kirungi habwokuba eki kikaba nikimanyisa kukora ikorro ery’okukora ebitabu.” Ab’oruganda bakatunga ekiikaro ha 18 Concord Street omu Brooklyn kandi baatunga n’ebikwato ebirukwetagisa.

Ekitekerezo kinu kitasemeze buli omu. Mukuru w’ikorro erikaba niriturukya ebitabu byaitu akabungira ekiikaro kyaitu ekihyaka. Akagamba ati: “Mwine ekyoma ekirungi eky’okuteera ebitabu, baitu busaho n’omu omuli inywe amanyire kukikozesa, omu myezi mukaaga yonka nikiija kuba kisisikaire.”

Ow’oruganda Martin akagamba ati: “Ebigambo eby’omusaija ogu bikazooka nk’ebihikire, baitu tukaba tukimanyire ngu Yahwe yakutukonyire kandi nukwo kyabaire kiti.” Ow’oruganda Martin akaba ahikire. Omu kaire kake, ekyoma kyaitu ekihyaka kikaba nikiturukya ebitabu 2,000 buli kiro.

Oihireho kuteera ebitabu ebimu ebyabo habwabo, abantu ba Yahwe bakatandika n’okukozesa omulingo omuhyaka ogw’okurarangya amakuru amarungi nibakozesa rediyo. Ha kiro kya Sande nyamusana, Febwali 26, 1922, Ow’oruganda Rutherford akabaliza ha rediyo habw’omurundi ogw’okubanza. Akaha orubazo orwine omutwe “Obukaikuru n’Obukaikuru bw’Abantu Abomiire  Hati Tibalifa” ha rediyo erukwetwa KOG in Los Angeles, California, U.S.A.

Abantu abarukuhika nka 25,000 nubo bahuliire puroguraamu egi. Bamu h’abantu abo bakasindika amabbaruha nibasiima habwa puroguraamu egi. Emu ha bbaruha ezi ekaruga owa Willard Ashford, omwikazi wa Santa Ana, California. Akasiima Ow’oruganda Rutherford habw’orubazo orurungi kandi orurukusemeza. Akongeraho ati: “Nkaba nyine abarwaire basatu omu nju abakaba batasobora kuturukamu, nahabweki titwakusoboire kuhuliiriza orubazo rwawe baitu habwokuba okakozesa omulingo ogu tukasobora kukuhurra.”

Embazo nyingi zikahonderaho omu wiiki ezayongireho. Ha kumalirra kw’omwaka 1922, The Watch Tower ekatebereza ngu abantu nka 300,000 bakaba batungire obutumwa kuraba ha rediyo.”

Ebbaruha zinu zikagarramu abeegi ba Baibuli amaani kandi bacwamu kwombeka rediyo omu kyombeko ekikaba kiri omu Staten Island, haihi na Beseeri ey’omu Brooklyn. Omu myaka eyayongiireho, Abeegi ba Baibuli bakakozesa rediyo enu, WBBR, kurarangya obutumwa bw’Obukama bwa Ruhanga kandi omu biikaro bingi.

Watch Tower eya Juuni 15, 1922, ekaranga ngu nihaija kubaho orusorrokano orukooto omu Cedar Point, Ohio, kuruga Sebutemba 5 kuhika 13, 1922. Abeegi ba Baibuli bakasemererwa muno obubahikire omu Cedar Point.

Omu rubazo rwe orw’okubanza, Ow’oruganda Rutherford akagambira abarukumuhuliiriza ati: “Nintekereza ntaine okurukyagurukya kwona ngu Mukama naija . . . kuha omugisa orusorrokano runu kandi akigumye ngu obwakaiso obw’amaani bwaheebwa omu nsi obutakabahoga.” Abaahaire embazo ha rusorrokano oru bakaikara nibekambisa ab’oruganda na banyaanya itwe kutebeza.

Hanyuma, omu Sebutemba 8, abantu abamu abarukuhika 8,000 bakaijura omu kyombeko n’ekihika eky’okuhuliiriza orubazo orwa Ow’oruganda Rutherford. Bakaba nibanihira ngu akaba nagenda kusoborra amakuru g’ekigambo “ADV,” ekyabaire kihandikirwe ha kaadi zaabo ez’okubaraaliza. Obubaikaliire omu biikaro byabo, abamu bakarora ekyapa ekikaba kizingirwe haiguru ya siteeji. Arthur Claus, ow’akaba arugire omu Tulsa, Oklahoma, U.S.A., akaserra ekiikaro  ekyakumusobozeseze kuhurra kurungi habwokuba omu biro ebi hakaba hataroho emizindaaro.

Kukigumya ngu tihabaho kuhugurwa kwona, ceyamaani akaranga ngu boona abaraija bakereriirwe tibarukwija kwikirizibwa kutaaha omu kyombeko Ow’oruganda Rutherford obwaraaba naha orubazo. Saaha isatu n’ekicweka eza nyenkyakara Ow’oruganda Rutherford akatandika nabazaaho ebigambo bya Yesu ebirukusangwa Matayo 4:17 ebirukugamba biti: “Obukama obwomu iguru bumalize okuhika.” Obwakaba nabazaaho omulingo abantu baakuhuliirize ha Bukama bunu akagamba ati: “Yesu uwe wonyini akaranga ngu omu kasumi ak’okubaho kwe, yakwebembiire okugesa okw’abantu be, nambere yakusoroliize abantu ab’amananu kandi abesigwa.”

Ow’oruganda Claus ow’akaba aikaliire omu kyombeko akagamba ati: “Tukaba nituhuliiriza kurungi buli kimu kyona.” Baitu ahonaaho, akatandika kwehurra kubi kandi yaturukamu omu kyombeko. Arthur akaturukamu atarukugonza habwokuba akaba akimanyire ngu tarukwija kwikirizibwa kugarukamu.

Hanyuma y’edakiika nke, akatandika kwehurra kurungi. Akagamba ngu obw’akaba narubata kugaruka omu kyombeko, akahurra engaro ez’amaani. Kinu kimamuleetera kuba n’ekihika eky’amaani! Akacwamu ngu n’obukiraaba nikyetaagisa kutemba ha rusu, naija kukikora nukwo asobole kumalirra orubazo orw’Ow’oruganda Rutherford orurungi. Ow’oruganda Claus, omusigazi omuto ow’akaba aine emyaka 23 omu kasumi ako, akaserra omulingo gw’okutemba ha rusu! Amadirisa ga ha rusu gakaba gakingwirwe, kandi obuyairiire haihi nago akakyetegereza ngu akaba nasobora kuhurra kurungi orubazo.

Baitu Arthur atabe wenka. Bamu h’abanywani be nabo bakaba ha rusu. Omu halibo, Frank Johnson, akaija yamukaguza ati, “Oineho akahyo akatoire?”

Arthur akamugarukamu ati, “ego nkaine.”

Frank yamugambira ati: “Twikaire nitusaba ngu tutunge omuntu aine akahyo. Norora omuzingo  gunu omukooto? Kiri ekipande ekisibirwe ha misumaali enu. Huliiriza n’obwegendereza Omuramuzi. * Obwaragamba, ‘Kandi musemeriire kurangirra, kurangirra,’ sara emiguha enu enna.”

Nahabweki Arthur akwasire omuhyo, alindiriire hamu n’abanywani be akokurorraho. Omu kaire kake Ow’oruganda Rutherford akahika ha kicweka ekikuru muno eky’orubazo rwe. Ow’oruganda Rutherford akaba aine omuhimbo mwingi muno kandi akaba ali haihi kutokera haiguru obuyagambire ati: “Mube besigwa kandi Abakaiso ab’amananu aba Mukama. Mugumizeemu nimurwana okuhikya Baburoni obwerahwerekererra kimu. Mutebeze amakuru amarungi omu nsi yoona. Ensi esemeriire kumanya ngu Yahwe nuwe Ruhanga kandi ngu Yesu Kristo nuwe Mukama wa Bakama kandi omulemi w’abanyoro. Kanu nuko kasumi akakuru muno omu byafaayo. Murole Omukama nalema! Muli bakwenda be mali. Nahabweki, murangirre, murangirre, murangirre, Omukama n’Obukama bwe!”

Arthur akagamba ngu uwe n’ab’oruganda abandi bakasara emiguha kandi ekipande kyasirimuka mpora mpora. Ekipande kinu kikaba kiroho enyuguta “ADV,” ezaihirwe omu kigambo eky’Orungereeza “advertise” ekiine amakuru g’okutebeza rundi kuha obwakaiso.

Orusorrokano orukooto omu Cedar Point rukakonyera ab’oruganda kuteeka omutima ha mulimo omukuru ogw’okutebeza Obukama kandi abo abakaba nibagonza bakasemererwa kwejumbira omu mulimo ogw’okutebeza. Omukolopoota (hati arukwetwa payoniya) kuruga omu Oklahoma, U.S.A., akahandiika ati, “Tukatebeza omu kicweka nambere abantu baingi bakora omulimo ogw’okuhaiga eby’obuguuda omu itaka kandi bali banaku muno.” Akagamba ngu emirundi erukukira obwingi abantu obubahurraga obutumwa oburukusangwa omu magaziini erukwetwa Golden Age, “baatandikaga kurra.” Akamalirra nagamba ati, “Mali twine omugisa ogw’amaani ogw’okubahuumuza.”

Abeegi ba Baibuli banu bakarora obukuru bw’ebigambo bya Yesu ebirukusangwa omu Luka 10:2 ebirukugamba biti: “Okugesa kwingi, baitu abakozi bake.” Nambere omwaka gwahweriire, bakaba bacweriiremu kimu kurangirra obutumwa bw’Obukama kukira nakara omu nsi yoona.