EKICWEKA KY’OKWEGA 42
EKIZINA 103 Abagurusi b’Ekitebe Bisembo
Yoleka Okusiima ‘Habw’Ebisembo omu Bantu’
“Obuyatembere haiguru . . . , yabaha abantu ebisembo.”—BEF. 4:8.
EBI TURAYEGA
Omulingo abaheereza, abagurusi hamu n’abaroleerezi b’ebicweka batukonyera n’omulingo tusobora kwoleka okusiima kwaitu habw’ebintu abasaija banu abesigwa bakora.
1. Bisembo ki ebimu ebi tutungire kuruga hali Yesu?
BUSAHO muntu ow’akyakizireyo kukonyera abantu nka Yesu. Yesu obu akaba akyali omu nsi, akakozesa amaani ge ag’okukora ebyamahano kukonyera abandi. (Luk. 9:12-17) Akatuha ekisembo ekirukukirayo kuraba omu kuhayo obwomeezi bwe habwaitu. (Yoh. 15:13) Kurugira kimu ha kuhumbuuka kwe, Yesu agumiizeemu kutukonyera. Nk’oku yaraganiize, akasaba Yahwe kutuha omwoyo ogurukwera kutwegesa n’okutuhuumuza. (Yoh. 14:16, 17; 16:13) Kandi kuraba omu nsorrokano z’ekitebe, Yesu naagumizaamu kutuha ebiturukwetaaga kusobora kufoora abantu abegeswa omu nsi yoona.—Mat. 28:18-20.
2. Bamu h’abantu abarukubazibwaho ‘nk’ebisembo omu bantu’ omu Abefeso 4:7, 8 nubo baha?
2 Haroho ekisembo ekindi Yesu eki atuhaire. Omukwenda Paulo akahandiika ngu hanyuma ya Yesu kugenda omu iguru, ‘akaha ebisembo omu bantu.’ (Soma Abefeso 4:7, 8.) Paulo akasoborra ngu Yesu akaha ebisembo binu kukonyera ekitebe omu miringo ey’erukwahukana. (Bef. 1:22, 23; 4:11-13) Kasumi kanu, ‘ebisembo omu bantu’ nibitwarramu abaheereza, abagurusi b’ekitebe hamu naabaroleerezi b’ebicweka. a Ky’amananu ngu abasaija banu tibahikiriire, nahabweki bakora ensobi. (Yak. 3:2) Baitu Mukama waitu Yesu Kristo abakozesa kutukonyera, kandi mali bali bisembo eby’omuhendo hali itwe.
3. Bazaaho ekyokurorraho ekirukwoleka omulingo tusobora kusagika omulimo ogukorwa ‘ebisembo omu bantu.’
3 Yesu akaha ‘ebisembo omu bantu’ kugumya ekitebe. (Bef. 4:12) Baitu itwena nitusobora kubakonyera kukora omulimo gunu omukuru. Ekyokurorraho: Abamu hali itwe nitusobora kuba nitwejumbira omu mulimo ogw’okwombeka Ebyombeko by’Obukama. Abandi bakonyera abombeki kuraba omu kubaleetera ebyokulya, kubakonyera omu by’endubata hamu n’emiringo endi. Omu mulingo nugwo gumu, itwena nitusobora kukonyera abaheereza, abagurusi b’ekitebe hamu naabaroleerezi b’ebicweka kuraba omu bigambo n’ebikorwa byaitu. Leka tubazeeho omulingo tusobora kugasirwa omu bwekambi bwabo n’omulingo tusobora kubooleka n’okwoleka Yesu ayatuhaire ‘ebisembo omu bantu’ ngu nitubasiima.
ABAHEEREZA BAKONYERA OMU MIRINGO NYINGI
4. Mirimo ki emu ‘ey’okukonyera’ abaheereza ei baakoraga omu kyasa eky’okubanza?
4 Omu kyasa eky’okubanza, ab’oruganda abamu bakakomwa kuheereza nk’abaheereza. (1 Tim. 3:8) Nikisobora kuba ngu nubo baakoraga emirimo ‘ey’okukonyera’ Paulo ei yahandiikireho. (1 Kol. 12:28) Nahabweki nikizooka ngu abaheereza baakoraga emirimo nyingi enkuru nukwo abagurusi basobole kuteeka omutima ha kwegesa n’okugarramu amaani ab’oruganda na banyaanya itwe. Ekyokurorraho, abaheereza nibasobora kuba baakonyeraga omu kukopoorra Ebyahandiikirwe rundi nibasobora kuba baaguraga ebintu eby’okukozesa kukoporra Ebyahandiikirwe.
5. Miringo emu abaheereza ei bakonyeramu kasumi kanu?
5 Tekerezaaho emu ha miringo abaheereza bakonyera omu kitebe kyawe. (1 Pet. 4:10) Nibasobora kuheebwa obujunanizibwa obwokukora ha mbalirra y’ekitebe, ha bikaro by’okutebezaamu, kusaba ebitabu n’okubiha abatebezi, kukora ha byoma bya vidiyo n’amaraka, kutangirra abagenyi, rundi kukonyera omu kuddabiriza Ekyombeko ky’Obukama. Emirimo enu yoona n’eyetaagisa kurora ekitebe kyaikara kitekaniziibwe kurungi. (1 Kol. 14:40) Ekindi, abaheereza abamu baheebwa ebicweka omu rusorrokano orw’Obwomeezi n’Obuheereza Bwaitu nk’Abakristaayo rundi embazo za boona. Omuheereza naasobora kukomwa kukonyera omuroleerezi wa guruupu y’obuheereza. Kandi obwire obumu abaheereza abamu beteranizaaho abagurusi abamu omu kubungira ab’oruganda na banyaanya itwe kubagarramu amaani.
6. Nsonga ki ezimu ezituleetera kusiima abaheereza baitu abekambi?
6 Abaheereza bagasira bata ekitebe? Munyaanya itwe Beberly b kuruga Bolivia naagamba ati: “Ninsiima muno abaheereza omu kitebe kyaitu habwokuba nyegondeza omu nsorrokano. Habwokuba bakora n’amaani, ninsobora kuzina, kuhuliiriza embazo, n’eby’okugarukamu byange kandi ninsobora kwegera ha bisisani na vidiyo. Bakonyera kurora ngu haabaho obulinzi nukwo abaizire omu nsorrokano behurre batekaine kandi bakora kyona ekirukusoboka kurora ngu abataizire omu nsorrokano maiso h’amaiso bazejumbiramu kuraba ha videoconference. Hanyuma y’ensorrokano bebembera omu kuyonja, kukora ha by’embalirra n’okurora ngu twatunga ebitabu ebi turukwetaaga. Mali ninsiima muno ebi barukukora!” Leslie, ow’arukwikara omu Colombia kandi musaija we ow’arukuheereza nk’omugurusi naagamba ati: “Abaheereza bakonyera iba nyowe kuhikiiriza obujunanizibwa oburukwahukana. Kuba bataroho naasobora kuba na bingi muno eby’okukora, nahabweki ninsiima muno abaheereza habw’okwikara betekaniize kukonyera.” Busaho kugurukyagurukya, na iwe nukwo orukwehurra oti.—1 Tim. 3:13.
7. Nitusobora tuta kwoleka ngu nitusiima abaheereza? (Rora n’ekisisani.)
7 N’obu kiraaba ngu twehurra ngu nitusiima habw’okuba n’abaheereza, Baibuli etuteererra kwoleka okusiima. (Bak. 3:15) Omugurusi omu Finland arukwetwa Krzysztof, obu aba naabazaaho omulingo ayoleka okusiima agamba ati: “Nsindikira omuheereza kaadi rundi obutumwa ha simu oburumu ekyahandiikirwe kandi mmugambira omulingo angarwiremu amaani n’ensonga habwaki nsiima obuheereza bwe.” Pascal and Jael, abarukwikara omu New Caledonia, bakira kusabira abaheereza. Pascal naagamba ati: “Enyumaho, twikaire nitusabira muno abaheereza, nitusiima Yahwe habwokubatuha na habw’omulingo batukonyeramu omu kitebe kyaitu.” Yahwe ahurra esaara nk’ezi kandi ekitebe kyona kigasirwa.—2 Kol. 1:11.
ABAGURUSI ‘ABAKORA N’AMAANI OMULI INYWE’
8. Habwaki Paulo akaba naasobora kuhandiika ngu Abagurusi omu kyasa eky’okubanza bakaba ‘nibakora n’amaani’? (1 Abasesalonika 5:12, 13)
8 Abagurusi ab’omu kyasa eky’okubanza baakoraga n’amaani omu kitebe. (Soma 1 Abasesalonika 5:12, 13; 1 Tim. 5:17) Bakaba ‘nibebembera’ ekitebe—omu nsorrokano n’okukora encwamu nk’akatebe k’abagurusi. ‘Baagambirraga’ ab’oruganda na banyaanya itwe obu nibabaha obuhabuzi kusobora kulinda ebitebe. (1 Bas. 2:11, 12; 2 Tim. 4:2) Kyamananu ngu abasaija banu baakoraga n’amaani kuhikyaho ab’omu maka gaabo eby’etaago n’okwikaza enkoragana yabo na Yahwe egumire.—1 Tim. 3:2, 4; Tit. 1:6-9.
9. Bujunanizibwa ki obumu abagurusi obu baine kasumi kanu?
9 Abagurusi kasumi kanu baine bingi ebyokukora. Batebeza. (2 Tim. 4:5) N’obwekambi bateekaho ekyokurorroho ekirungi omu buheereza, batekaniza omulimo gw’okutebeza omu kicweka ekibarumu, batutendeka kusobora kutebeza kurungi. Ekindi baheereza nk’abacwi b’emisango ab’embabazi kandi abatarukugwera rubaju. Omukristaayo obu akora ekibi eky’amaani, abagurusi balengaho kumukonyera kugarraho enkoragana ye na Yahwe. Ha murundi nugwo gumu, begendereza kurora baikaza ekitebe kiri kyecumi. (1 Kol. 5:12, 13; Bag. 6:1) Ekirukukirayo, abagurusi baheereza nk’abaliisa. (1 Pet. 5:1-3) Baha embazo ezirukusigikirra ha byahandiikirwe, balengaho kumanya buli omu kitebe n’okubabungira kubagarramu amaani. Kwongerra habujunanizibwa obundi, abagurusi abamu bakonyera omu kwombeka Ebyombeko by’Obukama n’okubiddabiriza, kutekaniza ensorrokano enkooto otwaliremu n’okuheereza ha butebe obwa Hospital Liaison na Patient Visitation Groups. Mali abagurusi bakora n’amaani!
10. Nsonga ki ezimu ezituleetera kusiima abagurusi baitu abakora n’amaani?
10 Yahwe akaranga ngu abaliisa baakuturoleriire kandi ngu ‘tituligaruka okutiina n’obukwakuba okwekanga.’ (Yer. 23:4) Eki nikyo kyahikire hali munyaanya itwe Johanna, kuruga Finland, hanyuma ya nyina kurwara oburwaire obw’amaani. Naagamba ati: “N’obu kiraaba kitanyanguhira kugambira abandi omulingo ndukwehurra, omugurusi ou nkaba ntamanyire, akampuliiriza n’okugumiisiriza, yasaba na nyowe kandi yangumya ngu Yahwe naangonza. Tindukwijuka kurungi ebi yagambire baitu ninyijuka ngu nteyongere kwetuntura. Ninkigumya ngu Yahwe akamusindika kunkonyera omu kasumi akahikire.” Abagurusi ab’omu kitebe kyanyu bakukonyiire bata?
11. Nitusobora tuta kwoleka ngu nitusiima abagurusi? (Rora n’ekisisani.)
11 Yahwe naagonza twoleke ngu nitusiima abagarusi habw’emirimo yabo. (1 Bas. 5:12, 13) Henrietta, ow’arukwikara omu Finland, naagamba ati: “Abagurusi behayo kukonyera abandi, baitu eki tikirukumanyisa ngu baine obwire bwingi n’amaani agarukukira ag’abandi rundi ngu tibaine bizibu omu bwomeezi bwabo. Obwire obumu mbagambira nti, ‘Ningonza kukumanyisa ngu mali oli mugurusi omurungi.’” Munyaanya itwe kuruga Türkiye c arukwetwa Sera naagamba ngu: “Abagurusi betaaga kugarurwamu amaani kusobora kugumizaamu nibakora omulimo gwabo. Nahabweki nitusobora kubaha kaadi erukwoleka okusiima, kubaraaliza kulya hamu na itwe rundi nitubeteranizaaho omu buheereza.” Haroho omugurusi ou wakugondeze kusiima habw’ebyarukukora? Serra emiringo osobora kwoleka ngu nosiima ebi arukukora.—1 Kol. 16:18.
Nosobora kugarramu ab’oruganda abaine obujunanizibwa amaani nukwo basobole kukora kurungi omulimo gwabo (Rora akacweka 7, 11, 15)
ABAROLEEREZI B’EBICWEKA NIBAGARRAMU AMAANI
12. Ntekaniza ki endi eyakonyiire kugumya ebitebe omu kyasa eky’okubanza? (1 Abasesalonika 2:7, 8)
12 Yesu Kristo akaha ekitebe ab’oruganda abali ‘nk’ebisembo omu bantu’ abaheereza omu miringo endi. Hansi y’obwebembezi bwa Yesu, abagurusi omu Yerusalemu bakatuma Paulo, Baranaba n’abandi kubungira ebitebe. (Eng. 11:22) Habwaki? Habw’ensonga niyo emu abaheereza n’abagurusi omu kitebe baakomwaga kandi egi niyo kugumya ebitebe. (Eng. 15:40, 41) Abasaija banu bakefeereza ebintu bingi kandi bakateeka obwomeezi bwabo omu kabi nukwo basobole kwegesa n’okugarramu abandi amaani.—Soma 1 Abasesalonika 2:7, 8.
13. Abaroleerezi b’ebicweka baine bujunanizibwa ki?
13 Abaroleerezi b’ebicweka baikara nibagenda. Abamu bagenda kilomita nyingi kubungira ebitebe. Buli wiiki, omuroleerezi w’ekicweka aha embazo, abungira ab’oruganda kubagarramu amaani, ayebembera orusorrokano rwa bapayoniya, orw’abagurusi hamu n’ensorrokano ez’obuheereza. Ateekaniza embazo n’ensorrokano enkooto. Ayegesa omu masomero ga bapayoniya, atekaniza orusorrokano orw’embaganiza orwa bapayoniya ab’omu kicweka eki abungira kandi akonyera n’omu nsonga ezimu enkuru eziba nizetaagisa kugonjoorwa omu bwangu ezimuheebwa ofiisi y’itaagi.
14. Nsonga ki ezimu ezituleetera kusiima emirimo ey’amaani abaroleerezi b’ebicweka ei bakora?
14 Abaroleerezi b’ebicweka bagasira bata ekitebe? Ow’oruganda kuruga omu Türkiye abazaaho omulingo agasirwa. Naagamba ati: “Buli murundi omuroleerezi abunga, kinyekambisa kumara obwire bwingi ninkonyera ab’oruganda na banyaanya itwe. Ntagaine abaroleerezi baingi baitu tinkehurraga ngu baine bingi ebyokukora kuhika ha rulengo orw’okulemwa kutunga obwire obw’okubaza na nyowe.” Johanna, ou tusangirwe tubalizeeho akakora n’omuroleerezi w’ekicweka omu buheereza baitu batasange muntu n’omu omuka. Naagamba ati: “Ekiro eki tikirinyeba. Banyaanya nyowe babiri nubwo bakaba bakyafurukire kandi nkaba nimpurra nyine amasu. Omuroleerezi w’ekicweka akankonyera kukirora ngu omu buheereza bwaitu hali Yahwe, abanyabuzaale baitu n’abanywani baitu nibasobora kutuba hara, kandi eki ky’akacu kake. Baitu omu nsi empyaka nitwija kuba hamu ebiro n’ebiro.” Baingi omuli itwe nitusiima omulingo abaroleerezi baitu b’ebicweka batukonyiire.—Eng. 20:37–21:1.
15. (a) Kusigikirra ha kyahandiikirwe ekiri omu 3 Yohana 5-8, nitusobora tuta kwoleka ngu nitusiima abaroleerezi b’ebicweka? (Rora n’ekisisani.) (b) Habwaki tusemeriire kusiima abakazi b’ab’oruganda abakora n’amaani omu kitebe, kandi eki nitusobora kukikora tuta? (Rora akasanduuko “ Ijuka Abakazi Baabo.”)
15 Omukwenda Yohana akekambisa Gayo kwoleka amakune hali ab’oruganda abaabaga babungire kandi “[abasindike] omu rugendo rwabu, nk’okukisemera hali Ruhanga.” (Soma 3 Yohana 5-8.) Gumu ha miringo tusobora kukikoramu nukwo kuraaliza omuroleerezi w’ekicweka ha kiihuro. Omulingo ogundi nukwo kusagika entekaniza ez’okugenda omu buheereza omu wiiki y’orubungo. Leslie, ou tusangirwe tubalizeeho, aine emiringo endi ey’ayolekamu okusiima. Naagamba ati: “Nsaba Yahwe abahikyeho ebyetaago byabo,” Ekindi, nyowe na iba nyowe tubahandiikira amabbaruha nitubagambira omulingo orubungo rwabo rutukonyiire.” Ijuka ngu abaroleerezi b’ebicweka na bo batunga ebizibu kandi bajwaha nka itwe. Obwire obumu barwara, betuntura kandi bahwamu amaani. Obundi ebigambo byawe eby’embabazi rundi ekisembo kyawe ekitaito nikisobora kuba ky’okugarukamu ky’esaara y’omuroleerezi.—Nfu. 12:25.
NITWETAAGA ‘EBISEMBO OMU BANTU’
16. Kusigikirra ha Enfumo 3:27, bikaguzo ki ab’oruganda ebi basobora kwekaguza?
16 Omu nsi yoona nitwetaaga ab’oruganda kuheereza ‘nk’ebisembo omu bantu.’ Obu oraaba oli w’oruganda ow’abatiziibwe, oine ‘obusobozi’ bwokukonyera? (Soma Enfumo 3:27.) Nogonza kwekamba kuhika ha kigendererwa eky’okuheereza nk’omuheereza? Obu oraaba oli muheereza, nosobora kwehayo kukonyera ab’oruganda, okaheereza nk’omugurusi? d Nosobora kukora empindahinduka omu bwomeezi bwawe nukwo osobole kusaba kugenda omu Isomero ery’Abatebezi b’Omukama? Isomero linu niriija kukutendeka nukwo Yesu asobole kukukozesa omu bwijwire. Obu oraaba noyehurra ngu tosobora kukora ebintu binu, saba Yahwe. Musabe akukonyere n’omwoyo gwe ogurukwera kusobora kuhikiiriza obujunanizibwa oburakuheebwa.—Luk. 11:13; Eng. 20:28.
17. ‘Ebisembo omu bantu’ byoleka ki ha Mukama waitu, Kristo Yesu?
17 Ab’oruganda Yesu abaakomere ‘nk’ebisembo omu bantu,’ buli bwakaiso oburukwoleka ngu aikaire naatwebembera omu biro binu ebya ha mpero. (Mat. 28:20) Mali nitusiima muno ngu twine Omukama omurungi, ow’okugonza, ow’arukutufaaho kandi ow’arukuhikyaho ab’oruganda ebyetaago byabo! Nahabweki serra omugisa ogw’okwoleka ngu noosiima abasaija banu abarukukora n’amaani. Kandi otalyebwa kusiima Yahwe habwokuba nuwe ndugirro “yekisembo kyona ekirungi nekisembo kyona ekihikiriire.”—Yak. 1:17.
EKIZINA 99 Enkumi n’Enkumi ez’Ab’oruganda
a Abagurusi abaheereza h’Akatebe Akalemi, abakonyezi b’Akatebe Akalemi abali h’Akatebe k’Itaagi hamu n’abandi abaine obujunanizibwa obundi na bo bali ‘bisembo omu bantu.’
b Amabara agamu gahindwirwe.
c Eyayetwaga Turkey.
d Kusobora kumanya ebirukukiraho ha mulingo osobora kuhikiiriza ebirukwetaagisa kuheereza nk’omuheereza rundi omugurusi, rora ekicweka “Ab’oruganda—Nimukurakurana Kusobora Kufooka Abaheereza?” hamu na “Ab’oruganda—Nimukurakurana Kusobora Kuheereza nk’Abagurusi?” ebiri omu Omunaara gw’Omulinzi ogwa Novemba 2024.
