Ripooti ey’Abatebezi b’Obukama

Akazoora Ekigendererwa ky’Obwomeezi

YESU n’agamba ngu amanyire entaama ze. (Yohana 10:14) Kakuba omuntu aba aine omutima omurungi kandi n’agonza obusinge n’okuhikirra, Yesu naija kumucunda n’amufoora omu h’abahondezi be. Omuntu nk’ogu naija kutunga ekigendererwa omu bwomeezi nk’oku omukazi omu kuruga Belgium yakitungire. Binu nibyo birukumukwataho:

Abakaiso ba Yahwe obubaatiire kodi ha rwigi rwange, nkaba nyenuubire muno kandi nintekerezaaho kweyita. Nkagonza Abakaiso ba Yahwe ekibangambiire ha mulingo ebizibu eby’ensi enu embi birahwaho, baitu ntagonze ekibaagambire ngu Ruhanga nuwe naija kubimaraho. Nkaba ndekere kugenda ha kanisa kumara emyaka munaana habw’obugobya obunarozereyo. Baitu nkakyetegereza ngu Abakaiso ba Yahwe ebibaali nibegesa mananu kandi nkakirora ngu nikiguma kwomeera otaine Ruhanga.

Ekyobusaasi, hanyuma y’akacu kake nkaleka kurora Abakaiso ba Yahwe. Nkahurra mbuzabuziibwe. Nkatandika kunywa pakiti ibiri z’etaaba buli kiro kandi hanyuma nkatandika n’okukozesa ebitokooza bwongo. Nkatandika n’okwejumbira omu buraguzi. Nkatiina muno obunatahiriirwe badaimoni omu bwire bw’ekiro! Kinu kikambaho kumara emyezi nyingi. Buli rwebagyo natiinaga obunateekerezaahoga kuba nyenka omu bwire bw’ekiro.

Hanyuma, kiro kimu obunkaba nindubatarubata omu muhanda ogurukwahuna n’ogunarubatiramuga buli kiro, nkarora ekyombeko ekikooto ekikaba nikikyayombekwa. Ekyampuniriize hakaba haroho abantu baingi. Obunairiire haihi, nkasanga ngu baali Bakaiso ba Yahwe abakaba nibombeka Ekyombeko ky’Obukama. Kinu kikanyijukya Abakaiso ba Yahwe abambungiraga kandi nkatekerezaaho omulingo kyakubaire kirungi abantu omu nsi yoona obubaakubaire nibetwaza nk’Abakaiso ba Yahwe.

Nkehurra ngu hakire Abakaiso ba Yahwe baakugarukire owange, nahabweki nkabazaaho n’abamu abaali nibombeka Ekyombeko ky’Obukama. Nkasaba Ruhanga, kandi hanyuma y’ebiro ikumi omusaija ayantebiize ha kubanza akaija ha mulyango gwange. Akagamba ngu tugumizeemu nitwega Baibuli kandi n’okusemererwa nkaikiriza. Aho naaho akandaaliza omu nsorrokano ha Kyombeko ky’Obukama. Nkaikiriza. Ekinarozereyo nkaba ntakakiroraga hantu handi hoona! Nkaba mazire obwire bwingi ninserra abantu abasemeriirwe kandi abarukugonzangana. Kandi hakumalirra nkabasanga hanu!

Hanyuma nkatandika kugenda omu nsorrokano zoona. Hanyuma ya wiiki nka isatu, nkaleka engeso embi ey’okunywa etaaba. Nkanaga ebitabu byange by’oburaguzi hamu na CD ezikaba ziroho ebizina ebirukusagika eby’oburaguzi, kandi hanyuma nkehurra ngu badaimoni nkaba ndiyo nimbasingura. Nkatandika kuhondera endengo za Yahwe ezirukusigikirra ha Baibuli omu bwomeezi bwange kandi hanyuma y’emyezi esatu, nkatandika kutebeza amakuru amarungi. Hanyuma y’emyezi mukaaga nkabatizibwa. Hanyuma y’ebiro bibiri mbatiziibwe, nkatandika kuheereza nka payoniya omusagiki.

“Ninsiima Yahwe habw’ebirungi byona ebyankoliire. Hati, obwomeezi bwange bwine ekigendererwa. Ego, ibara lya Yahwe rukomero rw’amaani nambere natungire obwirukiro n’obulinzi. (Enfumo 18:10) Mali ninyehurra nk’omuhandiiki wa Zabuli 84:10 ayagambire ati: ‘Ekiro kimu omu zigati zawe nikikira orukumi [ahandi]. Nakugondeze okuba omukumirizi omu nju ya Ruhanga wange, okukira okuikara omu hema ezobubi.’”

Omukazi onu ow’omutima omuculeezi akatunga ekigendererwa omu bwomeezi. Nikyo kimu n’omuntu weena arukuserra Yahwe n’omutima omurungi.