Kasi Ŵakaboni ŵa Yehova Ŵakuchichizga Ŵanthu Kuleka Visopa Vyawo?

JULANI

Yayi, tikuŵachichizga yayi. Tili kulemba mu Gongwe la Mulinda linyake kuti: “Kuchichizga ŵanthu kuleka chisopa chawo nkhuheni.” a Tikuchichizga ŵanthu yayi kuleka visopa vyawo pa vifukwa ivi:

Yesu wakachichizganga ŵanthu yayi kuti ŵalondezge ivyo wakasambizganga. Wakamanyanga kuti mbachoko waka awo ŵangategherezga uthenga wake na kuchitapo kanthu. (Mateyu 7:13, 14) Apo ŵasambiri ŵake ŵanyake ŵakakhuŵara na ivyo wakayowoya, wakaŵaleka kuti ŵalutenge, wakaŵachichizga yayi kuti ŵalutilire kumulondezga.—Yohane 6:60-62, 66-68.
Yesu wakasambizga ŵalondezgi ŵake kuti ŵaleke kuchichizga ŵanthu kusintha ivyo ŵakugomezga. M’malo mwa kuchichizga ŵanthu kuti ŵategherezge uthenga wa Ufumu, ŵalondezgi ŵa Yesu ŵakapenjanga ŵanthu awo ŵakakhumbanga nadi kutegherezga.—Mateyu 10:7, 11-14.
Kuchichizga ŵanthu kuti ŵasinthe visopa vyawo nkhuheni chifukwa Chiuta wakukhumba kuti ŵanthu ŵamusopenge na mtima wose.—Dotoronome 6:4, 5; Mateyu 22:37, 38.

Kasi tikupharazga kuti tikope waka ŵanthu?

Tikupulikira ivyo Baibolo likuyowoya kuti tipharazgenge makani ghawemi gha mu Baibolo m’paka “ku vigaŵa vyakutali chomene vya charu chapasi” ndipo tikuchita nthena mwa kupharazga “pakweru na ku nyumba na nyumba.” (Milimo 1:8; 10:42; 20:20) Nga umo vikaŵira na Ŵakhristu ŵakwambilira, nase nyengo zinyake ŵanthu ŵakutinena kuti tikupharazga kuti tikope waka ŵanthu. (Milimo 18:12, 13) Kweni uwu mbutesi. Tikuchichizga ŵanthu yayi kuti ŵenderenge ivyo tikugomezga. M’malo mwake, tikugomezga kuti ŵanthu ŵakwenera kusambira dankha ndipo paumaliro ŵasankhe ŵekha ivyo ŵakwenera kugomezga.

Tikuchichizga ŵanthu yayi kuti ŵaleke visopa vyawo ndipo tikunjilirapo yayi pa ndyali kuti tifiske chilato chithu. Ndipo tikupeleka vinthu ku ŵanthu yayi kuti ŵambe chisopa chithu. Kweni ndimo ghakuchitira matchalitchi ghanyake yayi agho ghakuti ngachikhristu, nakuti vikupambana chomene na ivyo Yesu wakasambizganga. b

Kasi munthu wali na wanangwa wa kusintha chisopa chake?

Ntchimi Abrahamu yikaleka chisopa cha ŵapapi ŵake

Enya, Baibolo likulongora kuti munthu ni mwanangwa kusintha chisopa chake. Mu Baibolo muli ŵanthu ŵanandi awo ŵakaleka chisopa cha ŵapapi ŵawo ndipo mwa kukhumba kwawo, ŵakamba kusopa Chiuta waunenesko. Ŵanyake mwa ŵanthu aŵa ni Abrahamu, Rute, mpositole Paulosi na ŵanthu ŵanyake ŵa ku Ateni. (Joshuwa 24:2; Rute 1:14-16; Milimo 17:22, 30-34; Ŵagalatiya 1:14, 23) Kweniso Baibolo likulongora kuti ŵanthu ŵanyake ŵakaleka kusopa Chiuta waunenesko. Ndipouli, ŵakalongora kuti ŵalije mahara.—1 Yohane 2:19.

Munthu waliyose ni mwanangwa kuleka chisopa nakuti fundo iyi yili mu Chikalata cha Fundo za Wanangwa wa Munthu Wakubabika Nawo (Universal Declaration of Human Rights) cha wupu wa United Nations. Wupu wa United Nations ukuti chikalata ichi “ni faundeshoni ya pa charu chose ya wanangwa wa munthu wakubabika nawo.” Chikalata ichi chikuyowoya kuti munthu waliyose ni mwanangwa kusintha chisopa chake na ivyo wakugomezga. Kweniso chikuti munthu ni mwanangwa kufufuza, kupulika, na kuphalira ŵanyake ivyo wakugomezga vyakukhwaskana na chisopa. c Nangauli munthu ni mwanangwa kuchita vyose ivi, kweni wakweneraso kuchindika wanangwa wa munthu wakugomezga panji kulondezga chisopa chinyake.

Kasi para munthu wanjira chisopa chinyake ndikuti wakuchindika yayi ŵapapi ŵake?

Yayi, ndimo viliri yayi. Baibolo likutichiska kuti tikwenera kuchindika munthu waliyose kwali ngwachisopa wuli. (1 Petrosi 2:17) Kweni Ŵakaboni ŵa Yehova ŵakupulikira dango lakuti ŵachindikenge ŵapapi ŵawo nanga ŵangaŵa kuti ŵali mu chisopa chinyake.—Ŵaefeso 6:2, 3.

Ndipouli, ni waliyose yayi wakukolerana na ivyo Baibolo likuyowoya. Chiyelezgero pa nkhani iyi ni mwanakazi munyake uyo wakakulira ku Zambia. Iyo wakati: “Mu chikaya chithu, para munthu wasintha chisopa chake, ŵanthu ŵakumuwona kuti wakuchindika yayi ŵapapi ŵake . . . kweniso ŵanthu ŵanyake ŵamuchikaya chake.” Ndivyo mwanakazi uyu wakakumana navyo apo wakaŵa msungwana. Wakati wasambira Baibolo na Ŵakaboni ŵa Yehova wakakhumbanga kusintha chisopa chake. Iyo wakati: “Kanandi waka ŵapapi ŵane ŵakaniphaliranga kuti niŵakhuŵazgenge para nasintha chisopa. Nkhani iyi yikanisuzganga chomene chifukwa nkhakhumbanga yayi kuti ŵapapi ŵane ŵakhuŵarenge chifukwa cha ine. . . . Kweni nkhasanga kuti niŵe wakugomezgeka kwa Yehova m’malo mwa kulondezga waka mitheto yithu. Ichi chikang’anamura kuti nkhuleka kuŵatemwa yayi ŵapapi ŵane.” d

a Wonani Gongwe la Mulinda la January 1, 2002, peji 22, ndime 15.

b Mwachiyelezgero, cha mu 785 C.E., themba linyake zina lake Charlemagne ku Saxony likati waliyose uyo walekenge kubatizika na kuŵa Mkhristu, wakomekenge. Kweniso chikalata cha mtende icho chikasayinika mu 1555 C.E. na magulu gha ŵanthu awo ŵakambananga, chikayowoya kuti waliyose uyo wakuwusa kachigaŵa kanyake mu ufumu wake wakwenera kuŵa Mukatolika panji wa Lutheran. Chikalata ichi chikayowoyaso kuti waliyose wakwenera kunjira chisopa icho chikuwusa panyengo iyo ndipo para wakana, wakomeke.

c Wanangwa wa ŵanthu nga uwu, ukusangikaso mu African Charter on Human and Peoples’ Rights, American Declaration of the Rights and Duties of Man, 2004 Arab Charter on Human Rights, Association of Southeast Asian Nations na mu Phangano la pa Charu Chose la Wanangwa wa Ŵanthu na Ndyali. Kweni vyaru ivyo vikuzomerezga mapangano agha, vikuchita vinthu mwakupambanapambana pakulondezga wanangwa uwu.

d Baibolo likuti Yehova ni zina la Chiuta waunenesko.