Cha kuumaliro wa November mu 2016, chivula chikuru chikalokwa kumpoto kwa Italy, ndipo mizi yinyake kumwera kwa tawuni ya Moncalieri yikazura maji. Mu malo ghanyake maji ghakazura m’paka kujumpha hafu mita. Nyuzipepara yinyake yikati: “Waliyose wakakhwaskika na soka ili.” Nyengo yeneyiyo, boma likasamuska ŵanthu pafupifupi 1,500 mu nyumba zawo, ndipo chifukwa cha kuchitapo kanthu mwaluŵiro pakaŵavya munthu uyo wakafwa. Ndipouli, ŵanthu ŵanandi ŵakaluza katundu wawo.

Magulu gha Ŵakaboni ŵa ku malo agha ghakambapo kugwira ntchito nyengo yeneyiyo. Ŵakawovwira mabanja ghakukhwaskika kuwuskamo mathipa na vinyake mu nyumba zawo kweniso kunozga vinthu nga ni mathebulu, mipando, na vinthu vinyake. Gulu limoza ilo likanyamura vyakugwilira ntchito na chakurya likati lafika pa msewu uwo ŵakajara, likazomerezgeka kujumpha kuti likapeleke wovwiri ku banja lakusuzgika. Ŵanthu ŵakujipeleka aŵa ŵakawovwiranga Ŵakaboni ŵanyawo kweniso ŵazengezgani ŵawo ŵa visopa vinyake.

Mwachiyelezgero, chipinda chapasi cha nyumba yinyake yakudikanya, chikazura maji. Ŵanthu ŵakuponoska ŵanyawo pangozi ŵati ŵakapamo maji, gulu la Ŵakaboni likawovwira Kaboni munyawo zina lake Antonio na banja lake kuwuskamo viswaswa mu chipinda chake. Kufuma apo, ŵanthu ŵakujipeleka aŵa ŵakawovwiraso ŵanyake awo ŵakaŵa mu nyumba iyi. Ŵakandanda mzere ndipo mu maora ghachoko waka ŵakawuskamo viswaswa mu vipinda vyose. Waliyose wakawonga chomene wovwiri wawo. Yumoza wa awo ŵakakhalanga mu nyumba iyi, zina lake Viviana, wakamuphalira muwoli wa Antonio, uku masozi ghachimwemwe ghali lengalenga, kuti: “Chonde mukaniwongereko ku ŵabali ŵinu—imwe muli ŵapadera nadi!”

Ŵanthu ŵa mu muzi unyake uwo ukakhwaskika chomene na kututuka kwa maji, ŵakawona magulu gha Ŵakaboni ghakovwira awo ŵakhwaskika na soka ili. Pakutoleka mtima na ivyo ŵakawona, ŵanthu ŵanyake ŵa mu muzi uwu ŵakajipeleka kovwira magulu gha Ŵakaboni agha ndipo ŵakaŵa ŵakukondwa kulondezga ulongozgi uwo ŵakapokera.

Nyumba ya munthu munyake yikanangika chomene, ndipo mu galaja mwake mukazura mathipa. Munthu uyu wakazizwa chomene kuwona Ŵakaboni 8 ŵakugwira ntchito kwambura kulekezga maora ghanayi, kuwuskamo mathipa mu galaja lake. Pakuwonga, munthu uyu wakavumbatira wose awo ŵakagwira ntchito iyi, kweniso wakalemba uthenga pa malo ghakuchezgera pa intaneti kuŵawonga chifukwa cha “wovwiri wapadera.”

Kaboni munyake wakuti: “Tikawovwira ŵazengezgani ŵanandi awo Mbakaboni yayi, ŵanandi ŵa iwo ŵali na vyaka vya m’ma 80. Ŵanyake ŵa iwo ŵakathiskanga masozi apo ŵakatiwonganga pa ivyo tikaŵachitira.” Yumoza wa ŵazengezgani aŵa uyo wakulitemwa chomene tchalitchi lake la Katolika, wakaphalira Ŵakaboni kuti wakuwonga chomene wovwiri wawo, ndipo wakatiso: “Changuŵa chakukondweska chomene kuwona kuti nangauli tikupambana visopa, kweni mwatovwira.” Mwanalume munyake wakati: “ntchachitima kuti tikumanya waka kuti mukwenda mu nyumba za ŵanthu mulenji uliwose pa Sabata, tikamanyanga yayi kuti mukovwiraso ŵanthu munthowa iyi.”