•  Ivyo ukwenera kumanya

•  Ivyo ungachita

•  Ivyo ŵanyako ŵakuyowoya

•   Palije mabwezi agho ghangaleka kukwiyiskana. Pakuti mose muli ŵambura kufikapo, munyako nanga ni uyo ukumuwona kuti ni mubwezi wako wapamtima, wangachita panji kuyowoya chinthu icho chingakukwiyiska. Kuluwa yayi kuti nawe ndiwe wambura kufikapo. Mulimose umo vingaŵira, nawe nyengo yinyake ukakwiyiskapo munthu munyake.—Yakobe 3:2.

•   Ntchipusu kukhuŵara para uli pa Intaneti. Mwachiyelezgero, munyamata munyake zina lake David wakati: “Para uli pa Intaneti ndipo ukuwona vithuzi vyaŵanyako apo ŵakaŵa ku pate, nyengo zinyake ungamba kudandawura kuti chifukwa wuli ine ŵakanichemako yayi. Mbwenu ungamba waka kuthukira.”

•   Usangasambira kumarana na masuzgo.

 Ujisandenge. Baibolo likuti: “Ungakwiyanga luŵiro chara, chifukwa vindere ndivyo vikukaŵa yayi kukwiya.”—Mupharazgi 7:9.

 “Nyengo zinyake ukuwamo paumaliro kuti ivyo vyangukukwiyiska, ni nkhani yakuti munthu wangathukira nayo nthena yayi.”—Alyssa.

 Ghanaghanira fundo iyi: Kasi ukutemwa kukhuŵara waka na nkhani yiliyose? Kasi ungasulako waka yayi maubudi gha ŵanyako?—Mupharazgi 7:21, 22.

 Uwemi wakugowokera. Baibolo likuti: “Mbutozi . . . kusulako maubudi.”—Zintharika 19:11.

 “Nanga ungaŵa na chifukwa chakudandawulira, ntchiwemi kugowokera munyako na mtima wose, ichi chikung’anamura kuleka kumusungira vyakusingo, panji kumuchichizga kuti wakuphepiske nyengo yiliyose iyo mwakumana. Para wamugowokera, mbwenu vimalire penepapo.”—Mallory.

 Ghanaghanira fundo iyi: Kasi nkhani iyi njikuru nadi? Kasi ungamugowokera waka yayi kuti usungilire mtende?—Ŵakolose 3:13.

 Ghanaghanira munyako. Baibolo likuti: “Kulaŵiska pa ivyo imwe mukukhumba pera yayi, kweniso ivyo ŵanyinu ŵakukhumba.”—Ŵafilipi 2:4.

 “Para iwe na mubwezi wako mukutemwana kweniso kuchindikana, vimovwiraninge kuti mumazge luŵiro suzgo ilo lilipo na chilato chakuti ubwezi winu ulutilire. Vikutora nyengo kuti mwambe kutemwana, ntheura ntchiwemi kusungilira ubwezi winu.”—Nicole.

 Ghanaghanira fundo iyi: Kasi ungawona vinthu vinyake ivyo mubwezi wako wakuchita makora?—Ŵafilipi 2:3.

 Manya kuti: Para wamanya umo ungachitira para munyako wakukwiyiska ndikuti wasanga usambazi uwo uzamukovwira para wakura. Walekerachi kusanga usambazi uwu sono?