•  Chifukwa wuli ŵapapi ŵane ŵakunigada?

•  Ivyo ungachita

•  Ivyo ŵanyako ŵakuyowoya

 Panji ŵapapi ŵako ŵangakuphalira kuti ŵakukufipira chomene mtima. Kweni iwe ungawona kuti ŵakukuswera wanangwa wakuchita vinthu vyachisisi. Mwachiyelezgero:

•   Msungwana munyake zina lake Erin wakati: “Adada ŵakutemwa kutora foni yane nakwamba kuŵerenga mameseji. Ndipo nyengo zinyake para naŵakanira kuŵapa foni mbwenu ŵakuti nkhubisa vinthu vinyake.”

•   Denise uyo wali na vyaka vya m’ma 20 wakukumbuka zuŵa linyake apo amama ŵake ŵakapendesera ndalama izo wakugulira mayunisi, wakati: “Amama ŵakatoranga foni yane nakwamba kuwona manambara. Ŵakanifumbanga mweneko wanambara yiliyose kweniso ivyo nkhuchezga nayo.”

•   Msungwana munyake zina lake Kayla wakati zuŵa linyake amama ŵake ŵakaŵerenga kabuku kanyake ako wakusungamo vinthu vyachisisi mu foni yake. “Nkhulembamo ivyo vikuchitika pa umoyo wane kweniso vinyake vikuŵa vyakukhwaskana na amama! Kufuma waka zuŵa lira nkhaleka kulembamoso vinthu.”

 Fundo yakuti ughanaghanirepo: Ŵapapi ndiwo ŵali na udindo wakukupwelelera, ntheura iwe ulije wanangwa wakuŵaphalira ivyo ŵakwenera kuchita. Nyengo zinyake ŵangachita vinthu mwakujumphizga. Ndipouli pali vinyake ivyo ungachita kuti ŵapapi ŵako ŵaleke kukugada chomene.

 Uchitenge vinthu pakweru. Baibolo likutichiska kuti tikwenera “kuŵa ŵakugomezgeka mu vinthu vyose.” (Ŵahebere 13:18) Ŵikapo mtima kuti uchitenge vinthu pakweru na ŵapapi ŵako. Para ukuchita vinthu mwaunenesko kweniso pakweru, ŵapapi ŵako ŵakugadenge yayi.

 Jifumba kuti: Kasi ŵanthu ŵakuwona kuti ndine wakugomezgeka? Kasi nkhulondezga malango? Kasi nkhusankha mwakwenelera ŵanthu awo nkhuchezga nawo? Kasi nkhubisa vyakusanguluska ivyo nkhutemwa?

  “Ŵapapi ŵane nkhuŵabisa kanthu yayi. Nkhuŵaphalira chilichose icho chikuchitika pa umoyo wane. Nkhuŵaphalira chilichose icho ŵakukhumba kumanya, ivi vikovwira chomene kuti ŵanigomezgenge ndipo ŵakunigada yayi.”—​Delia.

 Muzikirenge. Baibolo likuti: “Lutilirani kuyezga umo imwe muliri.” (2 Ŵakorinte 13:5) Pakutora nyengo kuti ŵanthu ŵambe kukugomezga, ntheura ukwenera kuŵikapo mtima.

 Ghanaghanira fundo iyi: Nyengo yinyake ŵapapi ŵako nawo ŵakaŵa ŵachinyamata. Kasi ukuwona kuti ivyo ukuchita, ŵapapi ŵako ŵandajumphemo?

 “Nkhuwona kuti ŵapapi ŵakumanya ivyo ŵakabudiskanga apo ŵakaŵa ŵachinyamata, ntheura ŵakukhumba yayi kuti ndivyo nase tichitenge.”​—Daniel.

 Uwonenge vinthu mwakwenelera. Uwonenge vinthu nga umo ŵapapi ŵako ŵakuviwonera. Baibolo likuti muwoli muwemi “wakulaŵilira ivyo ŵamunyumba yake ŵakuchita,” kweniso likuti ŵadada lutilirani kuŵalera makora ŵana ŵinu “pa kuŵalanga na kuŵasambizga maghanoghano gha Yehova.” (Zintharika 31:27; Ŵaefeso 6:4) Kweni ntchipusu yayi kuchita ivi: ŵapapi ŵako ŵakwenera kukovwira.

 Ghanaghanira fundo iyi: Uŵenge kuti ndiwe mupapi, ndipo ukumanya makora ivyo ŵachinyamata ŵakuchita, kasi ungazomerezga kuti mwana wako ŵachitenge vinthu mwachisisi kwambura iwe kumanya kweniso kumuleka waka kwambura kumufumba mafumbo?

  “Para ndiwe wachinyamata ukuwona nga ŵapapi ŵako ‘ŵakukuswera’ wanangwa wakuchita vinthu vyachisisi ivyo ukukhumba. Pakuti sono nili mulara nkhumanya chifukwa icho ŵapapi ŵane ŵakachitiranga nthena. Ŵakulongora kuti ŵakunitemwa chomene.”​—James.