Ŵawukirano ŵanandi ŵakuwona kuti ni udindo wawo yayi kupwelelera ŵapapi ŵawo para ŵakulwara. Vingachitika kuti pajumpha vyaka vinandi kufuma apo ŵakambira kulwara.

 Kasi ungachita wuli usange ŵapapi ŵako ŵakulwara uku uchali mwana? Tiyeni tidumbiskane za ŵawukirano ŵaŵiri awo ŵakasangana na suzgo ili.

•  Nkhani ya Emmaline

•  Nkhani ya Emily

 Amama ŵakulwara nthenda ya Ehlers-Danlos (EDS), nthenda iyo yikupangiska kuti ŵapulikenge kuŵinya chomene mu mafindo, thupi lose, kweniso misempha.

 Nthenda iyi yilije munkhwala ndipo vyaka 10 ivyo vyajumpha vinthu vyafika paheni chomene. Umoyo wawo ukuŵa pa ngozi chomene chifukwa ndopa zikumara ndipo nyengo zinyake ŵakupulika vyakuŵinya chomene mwakuti ŵakukhumba waka kufwa.

 Mu banja lithu ndise Ŵakaboni ŵa Yehova, ndipo ŵabali na ŵadumbu mu mpingo withu ŵakutipembuzga chomene! Mwachiyelezgero, msungwana munyake wa msinkhu wane wakalembera khadi mbumba yithu, wakati wakutitemwa chomene ndipo walutilirenge kutovwira. Ntchakukhozga chomene kuŵa na mubwezi wanthena!

 Baibolo lanovwira chomene mu nyengo yakusuzga iyi. Mwachiyelezgero, lemba ilo nkhulitemwa chomene nda Salimo 34:18, ilo likuti: “Yehova wali pafupi na ŵakusweka mu mtima.” Linyake nda Ŵahebere 13:6, ilo likuti: “Yehova ni movwiri wane, nopenge chara.”

 Lemba la Ŵahebere ndilo likunifika pamtima chomene. Icho nkhopa chomene ntchakuti amama ŵafwenge. Nkhuŵatemwa chomene, ndipo nkhuwonga Yehova nyengo zose kuti nili na amama. Kweniso lemba ili likunovwira kuŵa na chigomezgo chiwemi nanga vinthu vingaŵa wuli.

 Kweni paliso chinthu chinyake icho nkhopa chomene. Nthenda ya, EDS nja mu ndopa. Amama wakatora nthenda iyi kwa amama ŵawo. Nane nili nayo nthenda iyi, ndipo nili kutolera kwa amama. Kweni lemba la Ŵahebere 13:6 likunisimikizgira kuti Yehova ni “movwiri wane.”

 Pasono nkhukondwa waka na umo vinthu viliri, m’malo mwa kughanaghanira waka vya kumanyuma panji kwenjerwa chomene na ivyo vichitikenge kunthazi. Kweniso nkhuwona kuti usange ningayaniskanga waka ivyo amama ŵakachitanga kale na sono, mbwenu nikhalirenge waka kwenjerwa. Baibolo likuti masuzgo agho tikusangana nagho ‘ngakanyengo na ghakupepuka,’ pakuyaniska na umoyo wamuyirayira uwo tizamusanga wambura matenda.—2 Ŵakorinte 4:17; Chivumbuzi 21:1-4.

 Fundo yakuti ughanaghanirepo: Kasi ntchivichi chikawovwira Emmaline kuti wawonenge vinthu mwakwenelera? Kasi ntchivichi chingakovwira kuti uwonenge vinthu mwakwenelera para wasangana na masuzgo?

 Apo nkhaŵa ku Yunivesite, adada ŵakamba kulwara nthenda ya kusuzgika maghanoghano. Vikaŵa nga mbadada ŵane yayi, kweni ni munthu munyake waka. Kufuma waka nyengo iyo ŵakambira kulwara ŵakuŵa ŵachitima chomene, ŵawofi kweniso ŵakukhalira waka kufipa mtima. Ŵasuzgika na nthenda iyi kwa vyaka 15 sono. Ntchakuŵinya chomene kuwona kuti ŵakusuzgika chomene na wofi, uku ŵakumanya kuti palije chifukwa chakuchitira nthena.

 Ndise Ŵakaboni ŵa Yehova, ndipo ŵabali na ŵadumbu mu mpingo ŵakutovwira chomene. Ŵabali na ŵadumbu ŵakuchita nase vinthu mwalusungu kweniso ŵakutipulikiska, ndipo ivyo ŵakuchita vikupangiska kuti adada ŵajipulikenge kuti mbakuzirwa chomene mu mpingo. Nkhukhozgeka chomene kuwona umo adada ŵakuzizipizgira, ivi vikunipangiska kuti niŵatemwenge chomene.

 Nasoŵa chomene umo adada ŵakachitiranga vinthu, ŵakenjerwanga yayi, ŵakalwaranga yayi kweni ŵakaŵanga ŵakukondwa nyengo zose. Chitima chikunikora chomene apo ŵakulimbana na mulwani uyo wali mukati mwawo.

 Kweni chakukondweska ntchakuti adada ŵakuŵikapo chomene mtima kuti ŵawonenge vinthu mwakwenelera. Nyengo yinyake apo nthenda yawo yikafika paheni chomene, ŵakaŵikapo mtima kuŵerenga Baibolo zuŵa lililose nangauli ŵakaŵerenganga mavesi ghachoko waka. Ivi vikaŵakhozganga chomene. Ndipo vikawovwiranga kuti ŵalutilire kuŵa na umoyo. Ndipo nkhaŵatemwanga chomene kuluska kumasinda kose.

 Lemba la Nehemiya 8:10 nkhulitemwa chomene, likuti: “Chimwemwe cha Yehova ni nkhongono zinu.” Uwu mbunenesko nadi. Chimwemwe icho nkhusanga para nili na ŵabali na ŵadumbu ku mpingo, kweniso para nkhuchita vinthu vinyake chikunovwira chomene para nili na chitima. Nyengo zose nkhuŵa wakukondwa chomene para nkhughanaghanira ivi. Chiyelezgero cha adada chanovwira kumanya kuti nanga ningasangana na masuzgo wuli, Yehova wanovwirenge nyengo zose.

 Fundo yakuti ughanaghanirepo: Kasi Emily wakachita wuli kuti wawovwire adada ŵake mu nyengo yakusuzga iyi? Kasi ungawovwira wuli munthu uyo wakusuzgika na nthenda ya kwenjerwa?