Ŵaphalirani umo mukujipulikira. Ŵamanyiskani ŵapapi ŵinu umo mwakhwaskikira na ivyo vyachitika. Panji ŵangamulongosolerani makora icho chikuchitika ndipo ivi vingamovwirani kuti muleke kwenjerwa chomene.

 Para ŵapapi ŵinu ŵakutondeka kumupani wovwiri uwo mukukhumbikwa, mungachita makora kuphalira mubwezi winu uyo ngwakukhwima.—Zintharika 17:17.

 Kuluska vyose, muphalirani Dada winu wakuchanya, uyo ‘wakupulika malurombo.’ (Salimo 65:2) Yowoyani vyose ivyo vili ku mtima winu “chifukwa wakumupwelelerani.”—1 Petrosi 5:7.

 Lekani kusunga vyakusingo. Daniel uyo ŵapapi ŵake nthengwa yikamara apo wakaŵa na vyaka 7, wakuti, “ŵapapi ŵane ŵakajighanaghaniranga ŵekha, ŵakapwelelerangako yayi kuti ivyo ŵachita vitikhwaskenge wuli.”

 Kasi chikati chichitikenge ntchivichi Daniel walutilirenge kuŵa wakukwiya na kusunga vyakusingo?—Fundo yakovwira: ŵazgani Zintharika 29:22.

 Chifukwa wuli chikate chiŵenge makora kuti Daniel waŵagowokere waka ŵapapi ŵake?—Fundo yakovwira: ŵazgani Ŵaefeso 4:31, 32.

 Gegani kuchita ivyo vingamupwetekani. Denny wakuti “Ŵapapi ŵane nthengwa yati yamara nkhaŵa wambura kukondwa kweniso nkhasuzgikanga maghanoghano. Ku sukulu nako vinthu vikamba kunisuzga ndipo nkhafeluka. Nkhatemwanga kuyowoya msinjiro, ndipo kanandi waka nkhatimbananga na ŵanyane.”

 Kasi mukughanaghana kuti Denny wakakhumbanga vichi pakwamba kuyowoyera ŵanyake msinjiro kweniso kuchita mbembe?

 Kasi fundo iyo yili pa Ŵagalatiya 6:7 yingawovwira wuli ŵanthu nga ni Denny kuti ŵagege nkharo iyo yingaŵapwetekeska?

 Mbunenesko kuti para ukusuzgika maghanoghano, pakutora nyengo kuti wambeso kujipulika makora. Kweni para mwayamba kuwona vinthu mwakwenelera, pachoko na pachoko vinthu vikwambaso kwenda makora.