Masuzgo ghakuwira waliyose. Baibolo likuti: “Awo ŵakuluska pa chiphalizgano mbaluŵiro pera chara, panji vinkhara kuluska pa nkhondo, . . . Pakuti nyengo na vyakuchitika vyamabuchi vikuwira wose.” (Mupharazgi 9:11) Ŵachinyamata nawo ŵakusangana na masuzgo. Kasi ŵanyake ŵakachita wuli? Wonani viyelezgero viŵiri ivi.

•  REBEKAH

•  CORDELL

 Amama na adada nthengwa yikamara apo nkhaŵa na vyaka 14.

 Nkhagomezganga yayi kuti amama na adada nthengwa yingamara. Nkhaghanaghananga kuti adada panji ŵakukhumba ŵakhale ŵekha kwa nyengo yichoko waka. Iwo ŵakaŵatemwanga chomene amama, so chifukwa wuli wakukhumba kuŵaleka? Chifukwa wuli nane ŵakunileka?

 Vikanisuzganga kuphalira waliyose ivyo vikachitika. Nkhakhumbangaso yayi kughanaghanira nkhani iyi. Nkhakwiya chomene nangauli namwene nkhamanyanga yayi. Nkhamba kusuzgika chomene maghanoghano kweniso nkhatondekanga kugona.

  Amama ŵakafwa na kansa apo nkhaŵa na vyaka 19. Tikatemwananga chomene.

 Nthengwa ya amama na adada yikati yamara vikaniŵinya, kweni icho chikaniŵinya chomene ni nyifwa ya amama. Nichali kukumbuka nyifwa iyi. Pasono ndipo nkhutondekerathu kugona, nkhwenjerwa chomene.

 Nangauli nkhakumana na masuzgo agha, kweni nkhasanga vinthu vinandi ivyo vikanovwira. Mwachiyelezgero, lemba la Zintharika 18:1 likutichenjezga kuti tileke kujipatura ku ŵanyithu. So nkhalondezga ivyo vesi ili likuyowoya.

 Pakuŵa yumoza wa Ŵakaboni ŵa Yehova, nkhuŵerenga mabuku ghithu ghakulongosora Baibolo. Mabuku agha ngakukhozga chomene. Buku la Mayankho a Zimene Achinyamata Amafunsa, likanovwira nthengwa ya amama na adada yikati yamara, chomenechomene mutu wakuti, “Kodi Ndingasangalale Ngakhale Kuti Ndikuleredwa ndi Bambo Kapena Mayi Okha? mu Buku Lachiwiri.

 Lemba la Mateyu 6:25-34 nkhulitemwa chomene chifukwa likunovwira para nkhwenjerwa. Mu vesi 27, Yesu wakafumba kuti: “Ni njani wa imwe uyo chifukwa cha kwenjerwa wangasazgirako ora a limoza ku umoyo wake?”

 Tose viheni vikutiwira, kweni nkhasambirako kwa amama kuti chakuzirwa chomene ni umo ukuchitira na suzgo ilo. Iwo ŵakajumpha mu vinandi chomene. Kumara kwa nthengwa, kweniso kulwara matenda ghakuru agho ghakaŵatolera ku nyifwa. Nangauli ŵakakumana na vyose ivi, ŵakagongowa yayi. Ŵakalutilira kugomezgeka kwa Chiuta m’paka pa nyifwa yawo. Nizamuluwa yayi vyose ivyo ŵali kunisambizga vya Yehova.

 Vyakuti ughanaghanirepo: Kasi kuŵerenga Baibolo na mabuku ghakulongosora Baibolo vingakovwira wuli para wakumana na masuzgo?—Salimo 94:19.

 Apo nkhaŵa na vyaka 17, adada ŵakafwa nkhuwona na maso. Vikaniŵinya chomene.

 Nkhagomezga yayi kuti adada ŵafwa nadi. Apo ŵakaŵabenekeleranga na salu, nkhagomezga yayi kuti ŵakaŵa adada. Mu mtima nkhati, ‘Ŵawukenge namachero.’ Mahara ghakanimalira.

 Tose mu banja lithu ndise Ŵakaboni ŵa Yehova, ndipo adada ŵati ŵafwa mpingo withu ukatovwira chomene. Ŵakatipa chakurya, ŵakakhala nase, kweniso ŵakatovwira pa nyengo yakusuzga iyi. Ŵakatovwira kwa nyengo yitali. Chitemwa icho Ŵakaboni ŵa Yehova ŵakatilongora pa nyengo iyi, mbukaboni wakuti Mbakhristu ŵaunenesko nadi.—Yohane 13:35.

 Lemba la 2 Ŵakorinte 4:17, 18 likanikhozga chomene. Lemba ili likuti: “Nangauli suzgo njakanyengo na yakupepuka, yikutipa uchindami ukuru chomene ndipo ngwamuyirayira. Pakuti tikulaŵiska pa vinthu vyakuwoneka yayi, kweni pa vinthu vyambura kuwoneka. Chifukwa vinthu vyakuwoneka ni vya kanyengo, kweni vinthu vyambura kuwoneka ni vyamuyirayira.”

 Vesi 18 likanovwira chomene. Nyifwa ya adada njakanyengo, kweni ivyo Chiuta walayizga munthazi ni vyamuyirayira. Adada ŵakati ŵafwa, nkhamba kughanaghanira chomene ivyo nkhachitanga na kusintha vinthu vinyake ivyo nkhakhumbanga kuchita.

 Vyakuti ughanaghanirepo: Kasi masuzgo agho ukukumana nagho ghangakovwira wuli kusintha vinthu vinyake?—1 Yohane 2:17.