•   Imwe mukutemwa kuchita vinthu kwambura ndondomeko; apo munyinu wamunthengwa wakukhumba kuti chilichose chiŵe mu ndondomeko yake.

•   Imwe ndimwe ŵachete kweniso mukutemwa yayi kuyowoyayowoya; apo munyinu wamunthengwa wakutemwa kuyowoyayowoya na kuchezga na ŵanthu.

 Kasi munyinu wamunthengwa wali na tumikhaliro tunyake uto tukumukwenyerezgani? Para mukughanaghanira chomene pa uto munyinu wakubudiska, nthengwa yinu yingatimbanizgika. Lekani Baibolo likuti “uyo wakuwerezgawerezga waka nkhani wakupatuska ŵabwezi.”—Zintharika 17:9.

 M’malo mwakuti tunthu tuchokotuchoko uto munyinu wakuchita twambiske masuzgo mu nthengwa yinu, panji mungasambira waka umo mungawonera tunthu uto munthowa yakwenelera.

Ivyo vili mu nkhani iyi

•  Nthowa yiwemi yakuwonera tunthu uto tukumukwenyerezgani

•  Ivyo ŵakutorana ŵanyake ŵakuyowoya

•  Umo mungadumbiskirana

 Nkharo iyo yikumukwenyerezgani iyo munyinu wamunthengwa wali nayo, nyengo zinyake yingaŵa na kauwemi aka mungakadokera. Wonani viyelezgero vitatu ivi:

 “Mfumu wane kanandi ngwachizita pakuchita vinthu kweniso ngwachizingilika para tikukhumba kunyamuka kuluta ku malo ghanyake. Kweni kuchita nthena vikumovwira kuŵa wakuzikira—nanga ni para wakuchita vinthu na ine. Nyengo zinyake nkhukwenyelera para wakuchita chizita, kweni ntchimoza mwa vifukwa ivyo nkhumutemweraso.”—Chelsea.

 “Muwoli wane wakukukhumba kuti wachitenge vinthu mundondomeko pera; wakukhumba kuti wajipulikenge kuti vyose vili mu mawoko ghake, ndipo vikunikwenyerezga. Ku chigaŵa chinyake, pakuti wakuŵikapo mtima kuti vinthu vichitike mundondomeko, nyengo zose wakuŵa wakunozgeka.”—Christopher.

 “Mfumu wane nyengo zinyake wakuwona vinthu mwakupambanako, icho chikuŵa chinthu chakukhuŵazga. Panyengo yimozamoza, chifukwa chakuti wakuchita vinthu mwaubwezi ntchimoza mwa vinthu ivyo vikapangiska kuti nambe kumutemwa tati tamanyana waka. Nkhudokera mukhaliro wake wakuŵa wakuzikira munyengo za masuzgo.”—Danielle.

 Nga umo viliri kwa Chelsea, Christopher, na Danielle, ivyo munyithu wamunthengwa wakuchita makora na ivyo wakutondeka kuchita makora, kanandi vikuŵa waka vigaŵa vyakupambana vya mukhaliro uwo wali nawo. Ntheura vingachitika yayi kuti muwone waka vinthu ivyo munyinu wakutondeka kuchita makora kwambura kuwonaso viwemi ivyo wakuchita makora. Para mungachita nthena, vili nga kuti mukuwona lwande limoza la ndalama kwambura kuwonaso lwande lunyake.

 Mbunenesko kuti pali tunkharo tunyake uto tulije uwemi wake. Mwachiyelezgero, Baibolo likuyowoya kuti ŵanthu ŵanyake ‘ŵakutemwa kukalipa.’ (Zintharika 29:22) Para vyaŵa nthena, munthu wakwenera kuyezgayezga kuwuskako “mtima wa thinkho, ukali, kutukutwa, kukolomoka, na kayowoyero kaheni.” a—Ŵaefeso 4:31.

 Kweni para pali tunkharo tunyake uto tukumukwenyerezgani, londezgani ulongozgi wa mu Baibolo wakuti: “Lutilirani kuzizipizgirana . . . usange munthu wali na chifukwa chakudandawulira na munyake.”—Ŵakolose 3:13.

 Kweniso, yezgani kuwonamo tunthu tuwemi mwa munyinu, tunthu uto panji ndito tukamupangiskani kuti mukopeke na munyinu na kutorana nayo. Mfumu munyake zina lake Joseph wakayowoya kuti, “Kuŵika waka mtima pa tunthu uto munyako wamunthengwa wakubudiska, vili nga ukuwona waka mumphepete mwakuthwa mwa libwe la dayamondi kweni ukutondeka kuzirwiska kutowa kwake.”

 Chakwamba, waliyose wa imwe wangajifumba mafumbo payekha agho ghali pasi apa. Pamanyuma dumbiskanani mazgoro ghake na munyinu wamunthengwa.

•   Kasi munyinu wamunthengwa wali na tunkharo uto mukuwona kuti tukupangiska kuti mwambanenge munthengwa yinu? Para ni nthena, kasi nthunkharo wuli?

•   Kasi tunkharo uto wali nato nthuheni chomene, panji tukumukwenyerezgani waka?

•   Kasi tunkharo uto wali nato tuli na uwemi wake? Para ni nthena, kasi tuli na uwemi wuli, ndipo chifukwa wuli mukuwona kuti nthuwemi?