Ŵabwezi ŵangatovwira kuti tiŵe na umoyo uwemi na wakukondweska. Kweni ŵabwezi ŵawemi ŵakovwirana kuti wose ŵaŵe na nkharo yiwemi.—Zintharika 27:17.

 Ndipouli, Baibolo likutiphalira uwemi uwo ukuŵapo para tasankha mwamahara ŵabwezi. Ndipo likutichenjezgaso uheni uwo ukuŵapo para tasankha uheni ŵabwezi. (Zintharika 13:20; 1 Ŵakorinte 15:33) Ŵabwezi ŵaheni ŵangatipangiska kusankha uheni vinthu panji kunanga nkharo yithu yiwemi.

Mu nkhani iyi:

•  Kasi mubwezi muwemi wakuŵa wuli?

•  Kasi Baibolo likuzunura anjani awo ŵakaŵa ŵabwezi ŵawemi?

•  Kasi munthu wangaŵa paubwezi na Chiuta?

•  Mavesi gha mu Baibolo pa nkhani ya ŵabwezi

 Baibolo likusambizga kuti ubwezi uwemi ukwenenera kujintha waka pakutemwa vinthu vimoza panji kuti vyakuyana yayi. Mwachiyelezgero, pa Salimo 119:63 pakuti: “Nili mubwezi wa wose awo ŵakumopani, a na awo ŵakusunga malanguro ghinu.” Wonani kuti mulembi wa Baibolo uyu wakati wakasankhanga ŵabwezi awo ŵakakondweskanga Chiuta kweniso kwendera malango ghake.

 Mu Baibolo muliso ivyo mubwezi muwemi wakwenera kuchita. Mwachiyelezgero, Baibolo likuti:

•   “Mubwezi wanadi wakutemwa nyengo zose ndipo ni mubali uyo wali kubabikira kovwira mu suzgo.”—Zintharika 17:17.

•   “Pali ŵabwezi awo mbakunozgeka kupwetekana, kweni pali mubwezi uyo wakudemelera kuluska mubali wako.”—Zintharika 18:24.

 Mavesi agha ghakutisambizga kuti mubwezi muweni wakuŵa wakugomezgeka, wachitemwa, walusungu, kweniso wakupa. Ndipo mubwezi wanadi ni uyo tikugomezga kuti wangatovwira para tasangana na masuzgo. Kweniso mubwezi wanadi wakuchita chikanga kutiphalira para tikukhumba kuchita vinthu viheni panji kusankha uheni vinthu vinyake.—Zintharika 27:6, 9.

 Mu Baibolo muli viyelezgero vya awo ŵakaŵa paubwezi uwemi nangauli ŵakaŵa ŵakupambana vyaka, uko ŵakakulira, mitheto, kweniso maudindo. Wonani viyelezgero vitatu ivi.

•   Rute na Naomi. Rute wakaŵa mukamwana wa Naomi, ndipo ivi vikulongora kuti Naomi wakaŵa mulara kwa Rute. Kweniso Rute na Naomi ŵakapambananga mitheto. Ndipouli, iwo ŵakaŵa paubwezi wakukhora chomene.—Rute 1:16.

•   Davide na Yonatani. Nangauli vikulongora kuti Yonatani wakaŵa mulara kwa Davide na vyaka 30, kweni Baibolo likuti Davide na Yonatani ‘ŵakatemwananga chomene.’—1 Samuyeli 18:1.

•   Yesu na ŵapositole ŵake. Yesu ndiyo wakaŵa na udindo pa ŵapositole ŵake, chifukwa ndiyo wakaŵa msambizgi na fumu yawo. (Yohane 13:13) Ndipouli wakaŵawonanga kuti mbapasi yayi kuŵa ŵabwezi ŵake. Kweni wakaŵa nawo paubwezi wakukhora chomene chifukwa ŵakalondezganga ivyo wakasambizganga. Iyo wakati: “Namuchemani ŵabwezi, chifukwa namumanyiskani vinthu vyose ivyo napulika kwa Adada.”—Yohane 15:14, 15.

 Enya, munthu wangaŵa paubwezi na Chiuta. Baibolo likuti: “Wakuŵa mubwezi wa ŵakunyoloka.” (Zintharika 3:32) Ivi vikung’anamura kuti, Chiuta wakusankha kuŵa paubwezi na ŵanthu awo ŵali na nkharo yiwemi, ŵanenesko, ŵantchindi, kweniso awo ŵakuyezgayezga kwendera malango ghake agho ghakovwira kupambaniska pakati pa chiwemi na chiheni. Mwachiyelezgero, Baibolo likuchita kuyowoya kuti mwanalume wakugomezgeka Abrahamu wakaŵa mubwezi wa Chiuta.—2 Midauko 20:7; Yesaya 41:8; Yakobe 2:23.