Kasi Dango Lakuti “Jiso pa Jiso” Likung’anamurachi?
Ivyo Baibolo likuyowoya
Dango la “jiso pa jiso” ndimoza mwa malango agho Chiuta wakapeleka kwa Mozesi kuti waphalire Ŵaisrayeli, ndipo Yesu nayo wakalizunuraso pa Upharazgi wake wa pa Phiri. (Mateyu 5:38; Ekisodo 21:24, 25; Dotoronome 19:21) Dango ili likawovwiranga kuti munthu wapike chilango kuyana na mulandu uwo wachita. a
Dango ili likagwiranga ntchito kwa munthu uyo wapwetekera dala munyake. Para munthu wapweteka munyake mwadala, Dango la Mozesi likatenge: “Kuphyora pa kuphyora, jiso pa jiso, jino pa jino. Umo wapwetekera munyake ndimo nayo wapwetekekere.”—Levitiko 24:20.
Chifukwa wuli Chiuta wakapeleka dango la “jiso pa jiso”?
Dango la “jiso pa jiso” likazomerezganga yayi kuti munthu wawezgerenge yekha usange ŵamupweteka. Kweni likawovwiranga ŵeruzgi kuti ŵapeleke chilango chakwenelera, kuti ŵaleke kuŵa ŵankhaza panji kulekelera mulandu.
Dango ili likawovwirangaso ŵanthu kuti ŵaleke kupweteka ŵanyawo mwadala panji kuŵachitira chiŵembu. Dango ili likatenge: “Awo ŵakhalapo [awo ŵakawonanga kuti urunji wa Chiuta ukuchitika] ŵamupulika na kuchita wofi, ndipo ŵamuchitaso yayi chinthu chiheni chanthena ichi pakati pinu.”—Dotoronome 19:20.
Kasi Ŵakhristu ŵakwenera kulondezga dango la “jiso pa jiso”?
Yayi, Ŵakhristu ŵakwenera yayi kulondezga dango ili. Dango ili likapelekeka ku Ŵaisrayeli ndipo likaleka kugwira ntchito apo Yesu wakapeleka umoyo wake kuŵa sembe yakuwombora.—Ŵaroma 10:4.
Kweni dango ili likutovwira kumanya umo Chiuta wakuwonera vinthu. Mwachiyelezgero, likulongora kuti Chiuta wakukhumba kuti vinthu vichitikenge mwaurunji. (Salimo 89:14) Iyo wakukhumba kuti awo ŵabudiska ŵalangike “mwakwenelera.”—Yeremiya 30:11.
Mautesi ghakukhwaskana na dango la “jiso pa jiso”
Utesi: Dango la “jiso pa jiso” ndankhaza chomene.
Unenesko: Dango ili likazomerezganga yayi kuti ŵanthu ŵeruzgenge mwankhaza. Likawovwiranga ŵeruzgi kuti ŵamanye dankha nkhani yose na kuwona usange munthu wachitira dala, ndipo paumaliro ŵakapelekanga chilango chakwenelera. (Ekisodo 21:28-30; Maŵazgo 35:22-25) Ntheura dango la “jiso pa jiso” likawovwiranga ŵeruzgi kuti ŵaleke kupeleka chilango chinonono panji chankhaza.
Utesi: Dango la “jiso pa jiso” likazomerezganga kuti ŵanthu ŵawezgeranenge.
Unenesko: Dango la Mozesi likatenge: “Ungawezgeranga nduzga chara panji kuŵa na chimbimbiza pa ŵanthu ŵakwako.” (Levitiko 19:18) M’malo mwa kuzomerezga ŵanthu kuti ŵawezgeranenge, Dango ili likawovwiranga ŵanthu kugomezga Chiuta kweniso kulondezga dango kuti ŵaleke kuchita vinthu viheni.—Dotoronome 32:35.
a Dango ili, ilo mu Chilatini likuzunulika kuti lex talionis, likasangikangaso mu malango gha vyaru vinyake mu nyengo yakale.
Panji Mungatemwa Kuŵerengaso Nkhani Izi
GONGWE LA MULINDA
Kasi Dango Ilo Chiuta Wakapa Ŵaisrayeli Likaŵa Laurunji?
Fundo zinayi izo zikawovwiranga ŵeruzgi mu Israyeli.
GONGWE LA MULINDA
Ivyo Tingachita Kuti Timazge Thinkho—Kuwezgera Yayi
Mungaleka kuwezgera usange mukugomezga kuti sonosono apa Chiuta wawuskengepo vinthu vyose viheni.
BAIBOLO LIKUSINTHA UMOYO WA ŴANTHU
Nkhakhumbanga Kumarana na Vinthu Vyambura Urunji
Rafika wakajoyina kagulu kanyake kuti walimbane na vinthu vyambura urunji ivyo vikachitikanga. Kweni wakasambira ivyo Baibolo likulayizga pa nkhani ya mtende na urunji mu Ufumu wa Chiuta.
MANYANI VYA ISE
Pemphani Kuti Musambirenge Baibolo
Dumbiskanani fumbo la mu Baibolo, panji manyani vinandi vyakukhwaskana na Ŵakaboni ŵa Yehova.