Suzgo yikuru ni nyengo iyo pa charu pazamuŵa masuzgo ghakofya agho ghandachitikepo nakale. Kuyana na uchimi wa mu Baibolo, suzgo iyi yizamuchitika “mu mazuŵa ghaumaliro,” panji kuti “nyengo yaumaliro.” (2 Timote 3:1; Daniyeli 12:4) Yizamuŵa suzgo iyo “yindachitikepo kufuma pakwamba pa chilengiwa icho Chiuta wakalenga m’paka nyengo iyo, ndipo yizamuchitikaso chara.”​—Mariko 13:19; Daniyeli 12:1; Mateyu 24:21, 22.

Ivyo vizamuchitika pa suzgo yikuru

•   Kuparanyika kwa chisopa chautesi. Chisopa chautesi chizamuparanyika mwamabuchi kweniso mwaluŵiro chomene. (Chivumbuzi 17:1, 5; 18:9, 10, 21) Magulu gha ndyali agho ngankhongono ndipo ghakwimilirika na wupu wa United Nations ndigho ghazamuparanya chisopa chautesi pakufiska khumbo la Chiuta.​—Chivumbuzi 17:3, 15-18. a

•   Kuwukilika kwa chisopa chaunenesko. Mitundu iyo yizamukolerana, ndipo mu mboniwoni ya Ezekiyeli yikumanyikwa kuti “Gogi wa charu cha Magogi,” yizamuyezga kuti yiparanye awo ŵakusopa mwaunenesko. Ndipouli, Chiuta wazamuvikilira awo ŵakumusopa kuti ŵaleke kuparanyika.​—Ezekiyeli 38:1, 2, 9-12, 18-23.

•   Kweruzgika kwa ŵanthu. Yesu wazamweruzga ŵanthu wose ndipo “ndipo wazamupatura ŵanthu, yumoza ku munyake, nga ni umo muliska wakupatulira mberere ku mbuzi.” (Mateyu 25:31-33) Cheruzgo ichi chizamupelekeka kuyana na umo munthu waliyose wakachitiranga pa nkhani yakovwira “ŵabali,” ŵa Yesu awo ŵamuwusa lumoza na iyo kuchanya.​—Mateyu 25:34-46.

•   Kuwunganya awo ŵamuwusa na Yesu kuchanya. Ŵanthu ŵakugomezgeka awo ŵali kusoleka kukawusa na Khristu kuchanya ŵazamumalizga uteŵeti wawo wa pa charu chapasi ndipo ŵazamuwuskikira kuchanya.​—Mateyu 24:31; 1 Ŵakorinte 15:50-53; 1 Ŵatesalonika 4:15-17.

•   Aramagedoni. Iyi ni “nkhondo ya zuŵa likuru la Chiuta Wankhongonozose.” Yikumanyikwaso kuti “zuŵa la Yehova.” (Chivumbuzi 16:14, 16; Yesaya 13:9; 2 Petrosi 3:12) Awo Khristu wazamuŵeruzga kuti mbakwananga ŵazamuparanyika. (Zefaniya 1:18; 2 Ŵatesalonika 1:6-10) Ŵanyake awo ŵazamuparanyika ni magulu ghose gha ndyali, agho mu Baibolo ghakumanyikwa kuti ntchikoko cha mitu 7.​—Chivumbuzi 19:19-21.

Ivyo vizamuchitika pamanyuma pa suzgo yikuru

•   Satana na viŵanda vyake ŵazamukakika. Mungelo mulara wazamuponya Satana na viŵanda vyake mu “chizongwe,” apa ŵazamuŵa nga kuti ŵafwa. (Chivumbuzi 20:1-3) Panyengo iyi Satana wazamuŵa nga kuti wali mu jele; ndipo wazamutondeka kuti wapuluskeso ŵanthu.​—Chivumbuzi 20:7.

•   Kwamba kwa muwuso wa vyaka 1,000. Ufumu wa Chiuta uzamwamba kuwusa ndipo uzamuwusa kwa vyaka 1,000, ndipo ŵanthu ŵazamutumbikika chomene. (Chivumbuzi 5:9, 10; 20:4, 6) “Mzinda ukuru” uwo chiŵelengero chake chikumanyikwa yayi, ‘uzamufuma mu suzgo yikuru,’ ndipo uzamwamba kuwusika na Ufumu wa Chiuta uwo uzamuwusa kwa vyaka 1,000 pa charu chapasi.​—Chivumbuzi 7:9, 14; Salimo 37:9-11.