Baibolo likuti Yesu “wakakomeka mu thupi, kweni wakazgoka wamoyo [wakawuskika] mu mzimu.”​—1 Petrosi 3:18; Milimo 13:34; 1 Ŵakorinte 15:45; 2 Ŵakorinte 5:16.

 Ivyo Yesu wakayowoya vikulongora kuti wakawuskika na thupi la ndopa na nyama yayi. Iyo wakati wazamupeleka ‘thupi lake m’malo mwa umoyo wa charu,’ kuŵa sembe yakuwombora ŵanthu wose. (Yohane 6:51; Mateyu 20:28) Ntheura iyo wawuskikenge na thupi lanyama mphanyi vikaŵa nga wandapeleke sembe yakuwombora. Kweni ivi vikate vichitikenge yayi chifukwa Baibolo likuti iyo wakapeleka thupi na ndopa zake kuŵa sembe yakuwombora “kamoza pera.”​—Ŵahebere 9:11, 12.

Usange Yesu wakawuskika na thupi lauzimu, chifukwa wuli ŵasambiri ŵake ŵakamuwonanga?

•  Vilengiwa vyauzimu vingavwara thupi la wunthu. Mwachiyelezgero, ŵangelo awo ŵakavwara thupi la wunthu mu nyengo yakale ŵakarya kweniso kumwa lumoza na ŵanthu. (Genizesi 18:1-8; 19:1-3) Ndipouli, iwo ŵakaŵa kuti ŵachali vilengiwa vyauzimu ndipo ŵakalilekanga thupi la wunthu.​—Ŵeruzgi 13:15-21.

•  Yesu wati wawuskika, nayo wakavwara thupi la wunthu kwa nyengo yichoko waka, nga umo ŵangelo ŵakachitirapo kumanyuma uku. Pakuti iyo wakaŵa na thupi lauzimu, wakawonekeranga ku ŵanthu na kuzgeŵerekeraso. (Luka 24:31; Yohane 20:19, 26) Kweniso thupi la wunthu ilo wakaŵa nalo likawonekanga mwakupambanapambana. Lekani ŵabwezi ŵake ŵa pamtima ŵakatondekanga kumumanya luŵiro, kweni ŵakamumanya kwizira mu ivyo wakayowoyanga na kuchita.—Luka 24:30, 31, 35; Yohane 20:14-16; 21:6, 7.

•  Ndipo apo wakawonekeranga kwa mpositole Tomasi, wakawonekera na thupi la mabamba. Iyo wakachita nthena kuti wamovwire Tomasi kuŵa na chipulikano chakukhora chifukwa wakakayikanga kuti Yesu wawuskika.​—Yohane 20:24-29.