Wakukana Khristu ni munthu yumoza yayi panji gulu limoza la ŵanthu, chifukwa Baibolo likuti ŵalipo ŵanandi awo “ŵakukana Khristu.” (1 Yohane 2:18) Mazgu ghakuti “wakukana Khristu,” agho ghakufuma ku lizgu la Chigiriki ilo likung’anamura “wakwimikana na (panji m’malo mwa) Khristu,” ghakuyowoya vya waliyose uyo wakuchita ivi:

•   Wakususka kuti Yesu ni Khristu (Mesiya) panji wakususka kuti ni Mwana wa Chiuta.​—1 Yohane 2:22.

•   Wakususka Khristu, Wakuphakazgika wa Chiuta.​—Salimo 2:1, 2; Luka 11:23.

•   Wakujichema kuti Khristu.​—Mateyu 24:24.

•   Wakutambuzga ŵalondezgi ŵa Khristu, ndipo Yesu wakuwona kuti ivyo ŵanthu ŵakuchitira ŵalondezgi ŵake ndikuti ŵakuchitiraso iyo.​—Milimo 9:5.

•   Wakujichema kuti ni Mkhristu kweni wakuchita vinthu viheni panji uryarya.​—Mateyu 7:22, 23; 2 Ŵakorinte 11:13.

 Nangauli awo ŵakuchita ivyo tazunura pachanya apa ndikuti ŵakwimikana na Khristu, kweni Baibolo likuŵachema wose kuti “ŵakukana Khristu.” (2 Yohane 7) Awo ŵakukana Khristu ŵakamba kusangika mu nyengo ya Ŵapositole ndipo ŵaliko m’paka sono. Nakuti Baibolo likayowoyerathu kuti ŵazamuŵako.​—1 Yohane 4:3.

•   Ŵakusambizga fundo zautesi zakukhwaskana na Yesu. (Mateyu 24:9, 11) Mwachiyelezgero, awo ŵakusambizga chisambizgo cha Utatu panji kuti Yesu ni Chiuta Wankhongonozose, ŵakususkana na ivyo Yesu wakasambizga, apo wakati: “Adada mbakuru kuluska ine.”​—Yohane 14:28.

•   Awo ŵakukana Khristu ŵakususka ivyo Yesu wakayowoya vyakukhwaskana na umo Ufumu wa Chiuta ukuchitira vinthu. Mwachiyelezgero, ŵalongozgi ŵanyake ŵa chisopa ŵakusambizga kuti Khristu ndiyo wakulamulira maboma gha ŵanthu kwizira mu awo ŵakuwusa. Chisambizgo ichi chikususkana na ivyo Yesu wakayowoya kuti: “Ufumu wane ngwa charu chino chara.”—Yohane 18:36.

•   Iwo ŵakuti Yesu ni Fumu yawo, kweni ŵakupulikira yayi malango ghake, kusazgapo na dango lakuti ŵapharazgenge makani ghawemi gha Ufumu.​—Mateyu 28:19, 20; Luka 6:46; Milimo 10:42.