Salimo 49:1-20
Kwa wakulongozga sumu. Salimo la ŵana ŵa Kora.+ Sumu.
49 Pulikani ichi, mwaŵanthu mose.
Tegherezgani, mose imwe mukukhala mu charu,
2 Mose, ŵachoko na ŵakuru,Ŵasambazi na ŵakavu wuwo.
3 Mulomo wane uyowoyenge vinjeru,Ivyo nkhughanaghana mu mtima+ wane vilongorenge mahara.
4 Nithyenge khutu ku ntharika.Na bango, nilongosorenge mazgu ghakutindika.
5 Kasi niwoperengechi mu nyengo za suzgo,+Para nazingilizgika na uheni* wa awo ŵakukhumba kuniwiska?
6 Awo ŵakuthemba chuma chawo,+Na awo ŵakuthumbwa na usambazi wawo ukuru,+
7 Palije nanga njumoza wa iwo wangawombora mubali wake,Panji kumupelekera chiwombolero kwa Chiuta,+
8 (Mtengo wakuwombolera umoyo wawo ngwakuzirwa chomeneNgwakuti ŵangawukwaniska yayi).
9 Kuti munthu wakhale muyirayira na kuleka kuwona khululu.*+
10 Wakuwona kuti ŵavinjeru nawo ŵakufwa,Muzeleza na wambura mahara ŵakufwira lumoza,+Na kusidira ŵanthu ŵanyake usambazi wawo.+
11 Khumbo lawo ndakuti nyumba zawo zikhalilire muyirayira,Mahema ghawo ghaŵeko muwiro na muwiro.
Malo ghawo ŵaghathya mazina ghawo.
12 Kweni munthu, nanga wangaŵa wakuchindikika, wangakhalilira chara.+Wakuyana waka na vikoko ivyo navyo vikufwa.+
13 Iyi ni nthowa ya ŵazeleza+Na awo ŵakuŵalondezga, ŵeneawo ŵakukondwa na mazgu ghawo ghawakawaka. (Selah)
14 Nga ni mberere, ŵakulongozgekera ku Dindi.*
Nyifwa ndiyo yiŵenge muliska wawo.Wakunyoloka waŵawusenge+ mulenji.
Ŵazgeŵelekenge waka.+Dindi*+ ndilo liŵenge nyumba zawo, nyumba zauthemba chara.+
15 Kweni Chiuta waniwomborenge ku nkhongono* za Dindi,*+Pakuti wanikorenge pa woko. (Selah)
16 Ungawopanga yayi para munthu wasambazga,Para uchindami wa nyumba yake wasazgikira,
17 Pakuti para wafwa wayeghengepo kanthu yayi.+Uchindami wake ukhirenge nayo yayi.+
18 Chifukwa apo wakaŵa wamoyo, wakajitumbikanga yekha.+
(Ŵanthu ŵakukulumba para vinthu vikukwendera.)+
19 Kweni paumaliro wakuŵa pamoza na muwiro wa ŵasekuru ŵake.
Ŵawonengeso ungweru chara.
20 Munthu uyo wakuleka kupulikiska ichi, nanga wangaŵa wakuchindikika,+Wakuyana waka na vikoko ivyo navyo vikufwa.
Mazgu Ghamusi
^ Mazgu gheneko, “mphuvya za.”
^ Panji kuti, “dindi.”
^ Panji kuti, “Sheole,” ndiko kuti, malaro. Wonani Mang’anamuro gha Mazgu.
^ Panji kuti, “Sheole,” ndiko kuti, malaro. Wonani Mang’anamuro gha Mazgu.
^ Mazgu gheneko, “woko la.”
^ Panji kuti, “Sheole,” ndiko kuti, malaro. Wonani Mang’anamuro gha Mazgu.
