Sumu ya Solomoni 2:1-17
2 “Ndine luŵa la safuroni mu chidika,Luŵa la mu madambo.”+
2 “Nga ni luŵa pakati pa minga,Ndimo waliri wakutemweka wane pakati pa ŵamwali.”
3 “Nga ni khuni la maapulo pakati pa makuni gha mu nkhorongo,Ndimo waliri wakutemweka wane pakati pa ŵanyamata.
Nkhudokera chomene kukhala musi mu mfwiri wake,Ndipo chipambi chake chikunong’omera mu mulomo wane.
4 Wakaluta nane ku nyumba ya chiphikiro,*Ndipo ndembera yake pa ine yikaŵa chitemwa.
5 Unisanguluske na vibama vya mpheska zakomira.+Unikhozge na maapulo,Pakuti chitemwa chanilwariska.
6 Woko lake lamazere lili kusi kwa mutu wane,Ndipo woko lake lamalyero lanivumbatira.+
7 Nkhumulapizgani, imwe ŵana ŵanakazi ŵa Yerusalemu,Na mphoyo+ kweniso mbaŵala zamuthondo kuti:
Mungayezganga chara kusunkhunya panji kuwuska chitemwa mwa ine m’paka chikhumbe chekha.+
8 Mwapulika, mazgu gha wakutemweka wane!
Wonani, uyo wakwiza,Wakukwera mapiri, wakudukaduka pachanya pa tumapiri.
9 Wakutemweka wane wali nga ni mphoyo, nga nkhambaŵala kanalume.+
Wonani, yura wimilira kuseri kwa chiliŵa chithu,Wakudodoliskira pa windo,Wakulingizga mu vidangazi.
10 Wakutemweka wane wakuyowoya, wakuti kwa ine:
‘Wuka, wakutemweka wane,Wakutowa wane, tiye ulute nane.
11 Wona, chifuku chajumpha,*
Vula yamara, yaluta.
12 Maluŵa ghawoneka mu charu,+Nyengo yakuthenelera yafika,+Ndipo sumu ya njiŵa yapulikikwa mu charu chithu.+
13 Vipambi vyakwamba vya khuni la mkuyu vyaphya.+Mpheska zikuzota maluŵa ndipo ghakununkhira makora.
Wuka, wakutemweka wane, zanga.
Wakutowa wane, tiye ulute nane.
14 Iwe nkhunda yane, mu mphaku za jalawe,+Mu malo gha ku udesi gha vigodobu,Nikuwone na kupulika lizgu lako,+Pakuti lizgu lako ndakukondweska ndipo kawonekero kako nkhawemi saza cha.’”+
15 “Tikolera ŵakambwe,Ŵakambwe ŵachokoŵachoko awo ŵakunanga minda ya mpheska,Pakuti minda yithu ya mpheska yikuzota maluŵa.”
16 “Wakutemweka wane ngwane ndipo ine nili wake.+
Wakuliska+ mskambo mu maluŵa.+
17 M’paka kamphepo kapute* ndipo mifwiri yichimbire,Welera luŵiro, iwe wakutemweka wane.Nga ni mphoyo+ panji nkhambaŵala kanalume+ pa mapiri ghakupatukana.*
Mazgu Ghamusi
^ Mazgu gheneko, “nyumba ya vinyo.”
^ Panji kuti, “nyengo ya vula yajumpha.”
^ Mazgu gheneko, “zuŵa lithute.”
^ Panji kuti, “mapiri gha Betheri.”
