Yesaya 53:1-12
53 Ni njani wali na chipulikano mu ivyo wapulika kwa ise?*+
Kasi woko la Yehova+ lavumbulika kwa njani?+
2 Wafumenge nga ni mphukira+ pamaso pake,* nga ni msisi mu charu chambura maji.
Walije mawonekero ghawemi, nanga mbuchindami uliwose.*+Para tikumuwona, chisko chake chikutikopa chara.
3 Ŵanthu ŵakamuyuyura na kumugega,+Munthu uyo wakumanya vyakuŵinya, uyo wakazgoŵerana na ulwari.
Vikaŵa nga chisko chake chabisika kwa ise.*
Wakayuyulika, ndipo tikamuwona nga walije ntchito.+
4 Nadi, wakatora maulwari ghithu,+Na kuyegha vyakuŵinya vithu.+
Kweni tikamuwona nga ngwakukweŵeskeka, wakutimbika na Chiuta, na wakusuzgika.
5 Kweni wakalasika+ chifukwa cha maubudi ghithu.+Wakatimbika chifukwa cha mphuvya zithu.+
Wakapokera chilango kuti ise tisange mtende,+Ndipo chifukwa cha vilonda vyake tikachizgika.+
6 Nga ni mberere, tose tapuluka,+Waliyose wanjilira ku nthowa yake,Yehova wachitiska kuti maubudi gha tose ghawunjikike pa iyo.+
7 Wakayuzgika,+ wakazomera kuti wasuzgike,+Kweni wakajulapo chara mulomo wake.
Wakatoleka nga ni mberere yikuluta kukakomeka,+Nga ni mberere yanakazi iyo yili waka chete panthazi pa wakumeta,Wakajulapo chara mulomo wake.+
8 Wakayuzgika na kutoleka kwambura kweruzgika mwakwenelera.Ndipo ni njani wafipirenge mtima mdauko wa muwiro wake?*
Pakuti wakadumulikako ku charu cha ŵamoyo.+Wakathyapulika* chifukwa cha ubudi wa ŵanthu ŵane.+
9 Wakapika dindi* pamoza na ŵaheni,+Wakaŵa pamoza na ŵasambazi mu nyifwa yake,+Nangauli wakachitapo ubudi* uliwose chara,Ndipo mu mulomo wake mukaŵavya upusikizgi.+
10 Kweni likaŵa khumbo la Yehova* kumutimba, na kumuleka kuti walware.
Usange ungapeleka umoyo wake kuŵa sembe ya mulandu,+Wawonenge mphapu* yake, wasazgirengeko mazuŵa ghake,+Ndipo ivyo Yehova wakukondwa navyo* vifiskikenge mwa iyo.+
11 Chifukwa cha ulwilwi wake,* wawonenge na kukhorwa.
Kwizira mu kumanya kwake, muteŵeti wane+ murunji,Wawovwirenge ŵanthu ŵanandi kupimika ŵarunji,+Ndipo wayeghenge maubudi ghawo.+
12 Pa chifukwa ichi, nimupenge chigaŵa pakati pa ŵanandi,Ndipo wagaŵanenge vyakupoka na ŵankhongono,Chifukwa wakapungura umoyo wake m’paka ku nyifwa+Ndipo wakapendekera pamoza na ŵakuswa malango.+Wakayegha kwananga kwa ŵanthu ŵanandi,+Ndipo wakaŵeyelera m’malo mwa ŵakuswa malango.+
Mazgu Ghamusi
^ Pangayowoyekaso kuti, “mu ivyo ise tikapulika?”
^ “Pake” uyu wangang’anamura munthu uyo wakuwona, panji Chiuta.
^ Panji kuti, “Walije kawonekero kapadera kuti timudokere.”
^ Pangayowoyekaso kuti, “Wakaŵa nga ni munthu uyo ŵanthu ŵakamulazgiranga nkhonyoro.”
^ Panji kuti, “wafipirenge mtima vya umoyo wake?”
^ Panji kuti, “Wakatimbika na kufwa.”
^ Panji kuti, “Munyake wazamupeleka dindi lake.”
^ Panji kuti, “nkhaza zilizose.”
^ Panji kuti, “Yehova wakukhumba.”
^ Mazgu gheneko, “mbuto.”
^ Panji kuti, “Kweni Yehova wakakondwa.”
^ Panji kuti, “suzgo ya umoyo wake.”
