Yehova wakuwona mwakupepuka yayi vilapo vya nthengwa. Iyo wakati mfumu na muwoli ŵakwenera kubatikana na kuŵa thupi limoza. (Mt 19:5, 6) Ŵanthu ŵa Chiuta ŵanandi nthengwa zawo zikwenda makora. Ndipouli, palije nthengwa iyo njakufikapo, yiliyose yikusangana na masuzgo. Kweni tikwenera yayi kutolera maghanoghano gha mu charu ichi ghakuti kupatukana panji kumazga nthengwa ndiyo ni nthowa yakumazgira masuzgo. Kasi Ŵakhristu ŵangavikilira wuli nthengwa zawo?

Tiyeni tiwone fundo zinkhondi zakuzirwa.

1. Vikilirani mtima winu mwa kugega kukopana na munthu uyo ni mfumu panji muwoli winu yayi, kweniso kugega vyakusanguluska viheni chifukwa vingananga nthengwa yinu.​—Mt 5:28; 2Pe 2:14.

2. Khozgani ubwezi winu na Yehova, na kulutilira kuchita vinthu ivyo wakukondwa navyo.​—Sa 97:10.

3. Lutilirani kuvwara wunthu uphya, na kulongora lusungu kwa munyinu wa mu nthengwa nanga mungaŵa mu tunthu tuchokotuchoko.​—Kol 3:8-10, 12-14.

4. Lutilirani kulongora ntchindi na kuyowoyeskana makora.​—Kol 4:6.

5. Longorani chitemwa kwa munyinu pa nkhani ya kugonana.​—1Ko 7:3, 4; 10:24.

Para Ŵakhristu ŵakuchindika nthengwa, ŵakuchindikaso Yehova uyo wakayambiska nthengwa.

WONELERANI VIDIYO YA MUTU WAKUTI TIKWENERA ‘KUZIZIPIZGA PAKUCHIMBIRA’—LONDEZGANI MALANGO GHACHIPHALIZGANO, NDIPO PAMANYUMA ZGORANI MAFUMBO GHAKULONDEZGAPO AGHA:

• Kasi nthengwa yingasangana na masuzgo wuli nanga yingaŵa kuti yamba makora?

• Kasi fundo za mu Baibolo zingawovwira wuli awo ŵakuwona kuti mu nthengwa yawo mulije chitemwa?

• Kasi Yehova wali kupeleka malango wuli ku ŵakutorana?

• Kasi ŵakutorana ŵakwenera kuchita vichi kuti nthengwa yawo yendenge makora?