Davide wakathereska Goliyati chifukwa wakathembanga Yehova. (1Sa 17:45) Yehova wakukhumba kulongora nkhongono zake ku ŵateŵeti ŵake wose. (2Mi 16:9) Kasi tingagomezga wuli wovwiri uwo Yehova wakutipa m’malo mwa kuthemba maluso ghithu? Wonani nthowa zitatu izi:

• Mulombenge nyengo zose. Mungalombanga kwa Yehova para mukukhumba kuti wamugowokerani pera yayi pa ivyo mwabuda, kweniso mungalombaso para mwayezgeka kuti muchite chinthu chinyake chiheni. (Mt 6:12, 13) Kweniso mungalombanga waka kwa Yehova kuti watumbike ivyo mwasankha kale yayi kweni mungamulombaso kuti wamupani ulongozgi kweniso mahara pambere mundasankhe chakuchita.​—Yak 1:5

• Ŵani na ndondomeko ya kuŵerenga Baibolo kweniso kusambira. Ŵazgani Baibolo zuŵa lililose. (Sa 1:2) Mughanaghanirengepo pa viyelezgero vya mu Baibolo, na kulondezga ivyo mwasambira. (Yak 1:23-25) Munozgekerenge pambere mundalute mu uteŵeti, m’malo mwa kuthemba waka luso lwinu. Munozgekerenge maungano gha mpingo kuti mukapindure mwakukwana.

• Mukoleranenge na gulu la Yehova. Mwenderenge lumoza na gulu ndipo para vinthu vinyake vyasintha, mupulikirenge mwaluŵiro. (Maŵ 9:17) Mupulikirenge ŵalara para ŵakumuchenyani panji kumupani ulongozgi.—Heb 13:17

WONELERANI VIDIYO YA MUTU WAKUTI, PALIJE CHIFUKWA CHAKUWOPERA KUTAMBUZGIKA, NDIPO PAMANYUMA ZGORANI MAFUMBO GHAKULONDEZGAPO AGHA:

• Kasi ŵabali na ŵadumbu ŵakawopanga vichi?

• Kasi ntchivichi chikaŵawovwira kuti ŵatonde masuzgo ghawo?