Tili ŵakukondwa chomene kuti sono tili na burosha na buku liphya lakusambizgira ŵanthu Baibolo. Tikulomba Yehova kuti watumbike kuyezgayezga kwithu kuti tizgore ŵanthu ŵanandi kuŵa ŵasambiri. (Mt 28:18-20; 1Ko 3:6-9) Kasi tingagwiliskira wuli ntchito mabuku ghaphya agha?

Pakuti buku la Mungakondwa na Umoyo Kwamuyirayira!, lili kulembeka munthowa yakuti tidumbiskanenge na munthu, pali nthowa ziphya zakusambizgira, ndipo londezgani nthowa izi apo mukunozgekera kukachitiska masambiro gha Baibolo. *

• Ŵazgani nkhani na kudumbiskana mafumbo

• Ŵazgani malemba agho ghalembeka kuti “ŵazgani,” ndipo movwirani uyo mukusambira nayo umo wangalondezgera malemba agho

• Woneskani na kudumbiskana mavidiyo mwakugwiliskira ntchito mafumbo agho ghalipo

• Yezgani kuti mumalizgenge sambiro lililose panyengo yimoza

Mu uteŵeti, chakwamba mupani dankha burosha kuti mumanye usange munthu uyo wakukhumba kusambira. (Wonani bokosi la mutu wakuti “ Umo Mungagaŵilira Burosha la Mungakondwa na Umoyo Kwamuyirayira! Paulendo Wakwamba.”) Usange mwamalizga kusambira nayo burosha, ndipo msambiri wakukhumba kuti mulutilire kusambira, mupani buku ndipo yambani kusambira nayo sambiro 04. Usange pasono mukusambira na munthu buku la Kasi Baibolo Likutisambizga Vichi? panji la Kasi Mungachita Wuli Kuti Mukhalilire mu Chitemwa cha Chiuta?, mbwenu lekezgani dankha ndipo yambani kusambira buku la Mungakondwa na Umoyo Kwamuyirayira!, ndipo mungamanya mwekha apo mungayambira.

WONELERANI VIDIYO YA MUTU WAKUTI TAMUPOKELERANI KU SAMBIRO LA BAIBOLO, NDIPO PAMANYUMA ZGORANI MAFUMBO AGHA:

• Kasi ŵasambiri ŵasambirenge vichi mu buku liphya ili?

• Chifukwa wuli ŵasambiri ŵaphya mukwenera kuŵawoneska vidiyo iyi?

• Kasi ni vilato wuli ivyo mwapachokopachoko mukwenera kuchiska uyo mukusambira nayo Baibolo kuti waŵe navyo kweniso kuti wavifiske?—Wonani tchati chakuti “ Fundo Yikuru na Vyakuti Muchite pa Chigaŵa Chilichose”