Kukwambilira kwa chaka cha 1916, Nkhondo Yakwamba ya pa Charu Chose yikamba ndipo yikatora chaka chimoza na myezi. Ŵanthu ŵanandi ŵakafwa pa nkhondo iyi.

Gongwe la Mulinda la Janyuwale 1, 1916, likati: “Nkhondo ya ku Europe yikapangiska kuti ŵanthu ŵanandi ŵambe kusopa na kwamba kufipa mtima na ivyo vichitikenge munthazi.” Magazini iyi yikatiso: “Tiyeni tilutilire kuŵa na chikanga na kulimbikira pa ntchito yithu yakupharazga uthenga wa Chiuta.”

Lemba la chaka cha 1916, ilo likafuma pa Ŵaroma 4:20, likakhozga chomene ŵabali kuti ŵalutilire kuŵa ‘ŵakukhora mu chipulikano.’ (King James Version) Ŵasambiri ŵa Baibolo ŵanandi ŵakalutilira kuŵa ŵakukhora mu chipulikano, ndipo Yehova wakaŵatumbika chomene.

Ŵateŵeti ŵakwendakwenda awo ŵakimiranga Watch Tower Society ŵakendanga mu matawuni ghakupambanapambana. Ŵakakhozganga na kupeleka ulongozgi ku Ŵasambiri ŵa Baibolo. Mu 1916, ŵateŵeti ŵakwendakwenda pafupifupi 69,  ŵakenda makilomita pafupifupi 1 miliyoni kuti ŵafiske ntchito iyi.

Walter Thorn uyo wakaŵa muteŵeti wakwendakwenda, wakayowoya nkhani pa ungano wa chigaŵa ku Norfolk, Virginia. Iyo wakayaniska nkhondo Yachikhristu na Nkhondo ya pa Charu Chose. Wakati: “Vikuwoneka kuti ŵanthu 20 miliyoni panji 30 miliyoni ŵakurwa nkhondo panyengo yasono. . . . Kweni paliso gulu linyake [la ŵasilikari] ilo ŵanthu ŵakulimanya yayi. Pali ŵasilikari ŵa Fumu awo ŵali nga mbasilikari ŵa Gidiyoni, ndipo ŵakurwa nkhondo kweni na vilwero vyanadi yayi. Ŵakulwera unenesko na urunji, ndipo ŵakurwa nkhondo yiwemi ya chipulikano.”

Ku France, ŵanthu ŵakujumpha 1 miliyoni ŵakapwetekeka panji kukomeka pa Nkhondo Yakwamba iyo yikachitikira ku dambo la Somme, kuumaliro wa 1916. Mu malo ghanyake ku France, ŵabali awo ŵakalimbikiranga chomene ŵakalutilira kovwira mipingo nanga ni apo vinthu vikaŵa vyakusuzga chomene  chifukwa cha nkhondo. Mu Gongwe la Mulinda la Janyuwale 15, 1916, mukaŵa kalata yakufuma kwa Joseph Lefèvre. Wakaŵa Msambiri wa Baibolo uyo wakachimbira kukaya kwake ku Denain, France, apo ŵasilikari ŵa German ŵakawukira charu ichi mu 1914. Wakaluta kumwera kwa Paris ndipo wakamba kuwungana na mpingo wa Ŵasambiri ŵa Baibolo mu tawuni iyi. Mu tawuni iyi mukaŵa mpingo umoza pera. Nangauli wakaŵa mulwari, kweni ndiyo wakachitiskanga maungano ghose.

Pamanyuma, Joseph wakaŵa na Théophile Lequime, uyo nayo wakachimbira ku Denain. Pakwamba, mubali Lequime wakaluta ku Auchel, France, uko wakamba kung’anamura nkhani kufuma mu Gongwe la Mulinda na kutumizgira ŵabali mu vigaŵa vinyake vya France. Wakachichizgika kuwukako ku Auchel chifukwa ŵalara ŵa ŵasilikari ŵakakayikiranga ivyo wakachitanga. Mubali Lefèvre wakawona kuti pemphero lake lazgoreka apo mubali Lequime wakiza ku Paris.

Chiuta wakatumbika ntchito yawo ku Paris. Mubali Lefèvre wakati: “Pasono mpingo uli na ŵanthu pafupifupi 45. Ŵabali ŵanandi sono ŵakumanya uwemi wa kulimbikira uteŵeti, ndipo ŵakukura mwauzimu. Pafupifupi ŵabali wose ŵakuwungana sabata yiliyose.”

Apo nkhondo yikalutiliranga, ŵabali ŵithu ŵanandi ŵakaŵachichizganga kuti ŵanjilirepo pa vya charu. Ku Great Britain, ŵakakaka dango lakuti ŵanalume wose ŵa vyaka pakati pa 18 m’paka 40, ŵanjirenge usilikari ŵakhumbe ŵaleke. Kweni Ŵasambiri ŵa Baibolo ŵanandi ŵakakana kunjilirapo pa vya charu.

Mu Gongwe la Mulinda la Epulero 15, 1916, mukaŵa kalata yakufuma kwa mubali W.O.Warden wa ku Scotland. Warden wakati: “Mwana wane munyake munyamata wakwaniska vyaka 19. Walongora chiyelezgero chiwemi chomene pakukana kunjira usilikari. Nanga ŵangati ŵamulasenge chifukwa cha kukana kunjira usilikari, nili na chigomezgo chose kuti Yehova wamovwirenge kuti walutilire kulondezga fundo zaurunji na zaunenesko.”

 James Frederick Scott, uyo wakaŵa mupayiniya munyamata wa ku Edinburgh, Scotland, ŵakamupa mulandu wakukana kunjira usilikari. Khoti lati lapulika ukaboni wose wa nkhani iyi, likagamura kuti mubali Scott mwakuyana na dango la mu charu chake, walije mulandu.

Kweni ŵabali ŵanyake ŵanandi, boma likakana pempho lawo lakuti ŵaleke kunjira usilikari. Gongwe la Mulinda la Okutobala 15, 1916, likati: Pakufika mu Seputembala, ŵabali 264 awo ŵakapempha boma kuti ŵaleke kunjira usilikari, ŵabali 23 ŵakapika ntchito zambura kukhwaskana na usilikari. Pa ŵabali awo ŵakakhalapo, ŵanyake ŵakatambuzgika munthowa zakupambanapambana. Ŵanyake ŵakagwiranga ntchito za kunozga misewu, kujima malibwe, na zinyake. Ŵabali 5 pera ndiwo boma likazomerezga pempho lawo lakuti ŵaleke kunjira usilikari.

Pa Okutobala 16, 1916, Charles Taze Russell uyo wakalongozganga Ŵasambiri ŵa Baibolo pa nyengo iyo, wakamba kwendera chigaŵa cha kumanjiliro gha zuŵa kwa United States, kuyowoya nkhani. Wakawerako yayi. Pa Chiŵiri namise, Okutobala 31, Mubali Russell wakafwa apo wakaŵa mu sitima ku Pampa, Texas. Wakafwa wali na vyaka 64.

Ŵabali ŵanandi ŵakawonanga kuti palije uyo wanganjira m’malo mwa Mubali Russell. Ivyo wakakhumbanga Mubali Rassell vikaŵa mu Gongwe la Mulinda la Disembala 1, 1916. Mu Gongwe la Mulinda ili, wakalongosora ivyo wakakhumbanga vyakukhwaskana na ntchito iyo wakalongozga vyaka vinandi. Kweni fumbo likaŵa lakuti: Ni njani wanganjira m’malo mwa Russel na kufiska ivyo wakachitanga?

Fumbo ili likeneranga kuzgoreka pa ungano wa pa chaka wa Watch Tower Bible and Tract Society of Pennsylvania, uwo ukachitika kukwambilira kwa 1917. Awo ŵakaŵapo pa ungano uwu, ŵakachita voti ndipo ŵakakolerana chimoza. Kweni myezi yikati yajumphapo, vikawoneka kuti ivyo ŵakakolerana vikaŵa vyakanyengo ndipo ŵabali ŵanandi ŵakayezgeka.