“PA NYENGO iyo ŵakapatuliranga ofesi ya munthavi ya ku Madagascar, pa Chisulo, Janyuwale 24, 2015, mudumbu munyake wakati: “Nili wakukondwa chomene.” Mudumbu uyu pamoza na ŵalendo 583 awo ŵakaŵapo pakupatulira ofesi iyi, ŵakakondwa chomene kuwona nyumba yiphya ya vipinda 19, chipinda chakulyeramo icho ŵakasazgirako, kweniso khichini ilo ŵakalinozgaso. Ŵakazengeraposo maofesi gha dipatimenti ya uteŵeti, ya maakaunti, ndiposo ya vyakuzenga. Kweniso ŵakazenga mastudiyo ghaphya gha dipatimenti ya vyakujambura, na yakung’anamura Chiyowoyero Chamawoko. Ndiposo dipatimenti yakupanga mabuku gha ŵanthu ŵambura kuwona (Braille) yikayamba. Awo ŵakiza pa ungano uwu ŵakapulikizga dankha umo ntchito yakupharazga yikwendera ku Madagascar. Kufuma apo, ŵakapulikizga nkhani yakupatulira munthavi kufuma kwa mubali Mark Sanderson wa mu Wupu Wakulongozga.

 Ŵanthu ŵa Yehova ku Jakarta, Indonesia, ŵakakondwa chomene ŵati ŵawona kuti vimaji ivyo vikasefukira mu tawuni iyi vyachepako panyengo yakupatulira munthavi uphya pa Febuluwale 14, 2015. Sono Ofesi ya munthavi yili mu nyumba yapasi mu nyumba 42 zakudikana kweniso mu nyumba yapafupi iyo njakudikana nyumba 12. Maofesi ghakupambanapambana gha Beteli ghali mu nyumba zichokozichoko zapafupi. Anthony Morris wa mu Wupu Wakulongozga ndiyo wakayowoya nkhani yakupatulira munthavi. Zuŵa lakulondezgapo, ŵanthu ŵakukwana 15,257 ŵakawungana mu sitediyamu kuti ŵapulikizge nkhani ya mutu wakuti, “Lutilirani Kuzizipizga pa Ntchito Yiwemi.” Ŵanthu ŵakukwana 11,189 mu malo ghanyake 41, ŵakapulikizgako nkhani iyi. Ungano uwu ndiwo ukaŵa na ŵanthu ŵanandi chomene mu mbiri ya charu cha Indonesia. Ronald Jacka, uyo wakaŵa yumoza wa ŵamishonale ŵakwamba kwiza ku Indonesia, wakati: “Apo nkhizanga kuno mu 1951, mu charu chose mukaŵa ŵapharazgi 26 pera. Kweni mwahuno, ŵanthu ŵakujumpha 26,000 ŵapulikizga nkhani iyi. Yehova watumbika nadi ŵanthu ŵake mu Indonesia.”