Mweneumo Mungasendelerera Kufupi kwa Ciuta
Cipaturo 16
Mweneumo Mungasendelerera Kufupi kwa Ciuta
1. Kasi pali kukozgana uli mu visopo vinandi?
MULENDO wakakacezganga ku caru ca ku Mafumiro gha dazi wakazizwa na tumaluso twavisopo twakucitika pa tempele la Ŵabuda. Nangauli vikozgo vyawo kuti vikaŵa vya Mariya panji Kristu cara, tumaluso tunandi tukakozgananga na twa tcharici ca kukwawo. Mwaciyerezgero, wakawona kagwiriskiro ncito ka korona na malurombo ghakuwerezga-werezga. Ŵanandi ŵayerezgera mwakuyanawaka. Kumafumiro gha dazi na Kumanjiliro wuwo, ntowa izo ŵakujipereka ŵa visopo ŵakuyezgera kusenderera kufupi kwa Ciuta panji ku vintu ivyo ŵakusopa nzakuyana waka nkanira.
2. Kasi ndi mwauli mweneumo rombo larongosorekera, ndipo kasi cifukwa ncici ŵantu ŵanandi ŵakuromba?
2 Ŵanandi comene ŵakuyezga kusenderera kufupi kwa Ciuta mwa kuromba kwa iye. Rombo larongosoreka nga ndi “kacitiro kakuyowoyeskeranako kwa muntu na wakupatulika panji mutuŵa—Ciuta, ŵaciuta, malo ghakumacanya, panji nkongono za uciuta.” (The New Encyclopædia Britannica) Ndipouli, pakumufikira Ciuta mu lurombo, ŵanandi ŵakughanaghanira waka za canduro ico ŵasangengeko. Mwaciyerezgero, mwanarume munyake wakafumba yumoza wa Ŵakaboni ŵa Yehova kuti: “Usange mwanirombera, kasi vyakumara mahara ivyo nili navyo ine mu mbumba yane, ku ncito, ndiposo na muumoyo wane vimarenge?” Mwapakweru muntu uyu wakaghanaghananga mwanteura, kweni ŵanandi ŵakuromba nakusanga kuti vyakumara mahara vyawo vicari kurutilira. Nteura ise tingafumba kuti, ‘Cifukwa ncici pera tikwenera kusendelera kufupi kwa Ciuta?’
CIFUKWA CA KUSENDELERERA KUFUPI KWA CIUTA
3. Kasi nkwa njani uko malurombo ghithu ghangadunjiskikako, ndipo cifukwa ncici?
3 Rombo kuti nkaluso waka, nesi kuti ndi ntowa waka yakusangira kantu cara. Cifukwa cikuru cakumufikira Ciuta ndico kuti tiŵe naye pa wene na wene. Nteura malurombo ghithu ghakwenera kudunjikiskika kwa Yehova Ciuta. “Yehova wali pafupi na ŵose aŵo ŵakumucema,” wakayowoya nteura wa masalmo Davide. (Salmo 145:18) Yehova wakuticema ise kuti tiŵe pa wene na wene na iye. (Yesaya 1:18) Aŵo ŵakuzomerezga ncemo yake ŵakuzomerezgana na wa masalmo uyo wakati: “Kweni ine nkuti nkuweme kukhala pafupi na Ciuta.” Cifukwa? Cifukwa ncakuti aŵo ŵakukhala pafupi na Yehova ŵizamkuzaya na kukondwa kweneco na mtende wa maghanoghano.—Salmo 73:28.
4, 5. (a) Kasi cifukwa ncici ncakuzirwa kuromba kwa Ciuta? (b) Kasi ndi wene na wene wamtundu uli uwo tingakuzga na Ciuta kwizira mu malurombo?
4 Cakurombera kwa Ciuta ncivici usange iye ‘wakumanya ico ise tikukhumba pambere tindamufumbe’? (Mateyu 6:8; Salmo 139:4) Rombo likurongora kuti tiri na cipulikano mwa Ciuta ndipo tikumuwona nga ndiye Cisime ca “Vyawanangwa viweme vyose, na vyawanangwa vyakufiskika vyose.” (Yakobe 1:17; Ŵahebere 11:6) Yehova wakukondwa na malurombo ghithu. (Zintharika 15:8) Iye ngwakukondwa kupulika mazgu ghithu ghakufuma mu mtima gha kuwonga na kurumba, nga ndi umo dada wakukondwera pakupulika mwana wake mucoko wakuyowoya mazgu ghakuwongera kufuma mu mtima. (Salmo 119:108) Apo pali wene na wene uweme pakati pa dada na mwana, pakuŵaso kuyowoyeskana kwacitemwa. Mwana uyo ngwakutemweka wakutemwa kuyowoya na ŵawiske. Ni nteura pera pakuyowoya za wene na wene withu na Ciuta. Usange tikuwonga nadi ivyo tikusambira pakunena za Yehova na citemwa ico warongora kwa ise, tiŵenge na khumbo lankongono lakuyowoya naye mu rombo.—1 Yohane 4:16-18.
5 Pakufikira Ciuta Wapacanya Nkanira, tikwenera kuŵa ŵaulemu, nangauli palije cifukwa cakufipira mtima comene na mazgu gheneco agho tingayowoya naye mu lurombo. (Ŵahebere 4:16) Nyengo yiriyose tinamwaŵi wakumfikira Yehova. Ndipo ’mwe nawo ndi mwaŵi uwo tiri nawo wakuti ‘tingapungulira mitima yithu’ kwa Ciuta mu lurombo! (Salmo 62:8) Kuwongera kwa Yehova kukurongozgera ku wene na wene uweme na iye, nga ndi umo muntu wakugomezgeka Abrahamu wakaŵira nawo na Ciuta nga ndi mubwezi wake. (Yakobe 2:23) Kweni pakuromba kwa Fumunkuru ya cilengiwa cose, tikwenera kurondezga ivyo wakukhumba kuti timufikire iye.
VYAKUKHUMBIKWIRA KUTI TISENDELERE KUFUPI KWA CIUTA
6, 7. Nangauli Ciuta kuti wakhumba kumulipira cara kuti wapulike malurombo ghithu, kasi ncici ico wakukhumba kwa ise para tikuromba?
6 Kasi ndrama nzakukhumbikwira mwakuti timufikire Ciuta? Ŵantu ŵanandi ŵakulipira ŵarara ŵa visopo kuti ŵaŵarombereko. Ŵanji mupaka kugomezga kuti malurombo ghangazgoreka kwakuyana na vyakupereka ivyo ŵakupanga. Ndipouli, Mazgu gha Ciuta kuti ghakuyowoya cara kuti kufikira Yehova mu rombo kukukhumba ndrama. Ivyo wakutigaŵira ku mzimu na vitumbiko vyake vya kumufikira mu wene na wene na iye mu lurombo wakutipa kwawanangwa.—Yesaya 55:1, 2.
7 Ncici, pera, ico cikukhumbikwira? Cimoza ca ivyo ndico mtima wakunyoloka. (2 Midauko 6:29, 30; Zintharika 15:11) Mu mitima yithu tikwenera kuŵa na cipulikano mwa Yehova Ciuta nga ‘Ngwakupulika malurombo’ na “wakupa njombe kwa ŵose aŵo ŵakumupenja na mtima wose.” (Salmo 65:2; Ŵahebere 11:6, NW) Tikwenelaso kuŵa na mtima wakujicefya. (2 Mathemba 22:19; Salmo 51:17) Mu yimoza mwa ntarika zake, Yesu Kristu wakarongora kuti apo wakamufikiranga Ciuta wamsonko wakujicepeska wakuŵa na mtima wakujiyuyura wakawoneka murunji nkanira kuruska Mufarisi wakujikuzga. (Luka 18:10-14) Nga ndi umo tikufikira Ciuta mu lurombo, tiyeni tikumbukire kuti “Yose uyo wakujikuzga ndi mukazuzi kwa Yehova.”—Zintharika 16:5.
8. Usange nkwakuti Ciuta wazgore malurombo ghithu, kasi tikwenera kujitozga kufuma ku vici?
8 Usange tikukhumba kuti Ciuta watizgore malurombo ghithu, tikwenera kujitozga ise taŵene ku nkaro zithu zakwananga. Apo musambiri Yakobe wakaciska ŵanji kuti ŵasenderere kufupi kwa Ciuta, wakasazgako kuti: “Tozgani mawoko ghinu, mwa ŵakwananga; photorani mitima yinu, imwe mwa ŵamitima yiŵiri.” (Yakobe 4:8) Nanga ŵangaŵa ŵakwananga ŵangaŵa pa wene na wene wa mtende na Yehova usange ŵalapa nakuleka ntowa zawo zakale za umoyo. (Zintharika 28:13) Tingayowoyeskana naye cara Yehova usange tikupusikizgira waka kuti tajitozga kufuma ku ntowa zithu. “Pakuti maso gha [Yehova, NW] ghali pa ŵarunji, Ndipo makutu ghake ghakutegherezga kuŵeya kwawo: Kweni cisko ca [Yehova, NW] cikwimikana na aŵo ŵakucita uheni,” ndimo ghakunenera Mazgu gha Ciuta.—1 Petros 3:12.
9. Kasi tingamufikira Yehova kwizira mwa njani, ndipo ncifukwa uli?
9 Baibolo likuti: “Pakuti kulije murunji pano pasi uyo wakucita uweme kwambura kwananga.” (Mupharazgi 7:20) Mwanteura imwe mungafumba kuti: ‘Ndi mwauli, pera, umo tingamufikira Yehova Ciuta?’ Baibolo likuzgora: “Usange muntu wakwananga, tiri na Nkoswe kwa Ŵawiske, Yesu Kristu murunji.” (1 Yohane 2:1) Nangauli tiri ŵakwananga, tingamufikira Ciuta mwakumasuka mu kayowoyero kwizira mwa Yesu Kristu, uyo wakatifwira nga ncakuwombolera kwa ise. (Mateyu 20:28) Iye ndiye ntowa yekha mwa uyo tingamufikira Yehova Ciuta. (Yohane 14:6) Tingasangirangako mwaŵi cara pa sembe yakuwombola ya Yesu nakwanangira dala. (Ŵahebere 10:26) Ndipouli, usange tikuyezgayezga kutcheŵa kucita ico nciheni ndipo kweni tikwananga pa nyengo zinyake, tingalapa na kupempa cigowokero kufuma kwa Ciuta. Usange tamufikira iye na mtima wakujiyuyura, iye watipulikenge ise.—Luka 11:4.
MIPATA YAKUYOWOYERA NA CIUTA
10. Pakunena za rombo, kasi ndi mwauli umo ise tingamurondezgera Yesu, ndipo kasi ni mu vyakucitika vinyake mvi ivyo tingaperekera rombo la ku udesi?
10 Yesu Kristu wakawona wene na wene wake na Yehova kuŵa wakuzirwa comene. Mwanteura, Yesu wakapatura nyengo yakuyowoyera na Ciuta mu lurombo lwa ku udesi. (Marko 1:35; Luka 22:40-46) Ise tikucita makora kulondezga ciyerezgero ca Yesu na kuromba kwa Ciuta nyengo zose. (Ŵaroma 12:12) Nciweme comene kuliyamba zuŵa na mazgu gha lurombo, ndiposo pambere tindalute kukagona, tingawongaso Yehova cifukwa ca milimo iyo tafiska mu zuŵa ilo. Mukati mwa zuŵa, cipangeni kuŵa cakulata kumufikira Ciuta “nyengo zose.” (Ŵaefeso 6:18) Tingarombaso mwacisisi mu mtima withu, uku tikumanya kuti Yehova wangatipulika ise. Kuyowoya na Ciuta ku udesi kukutovwira ise kukhozga wene na wene withu na iye, ndipo kuromba kwa Yehova zuŵa na zuŵa kukutovwiraso kusenderera kufupi nkanira kwa iye.
11. (a) Kasi cifukwa ncici mbumba zikwenera kurombera pamoza? (b) Kasi cikung’anamuraci para mwayowoya kuti “Amen” paumaliro wa lurombo?
11 Yehova wakutegherezgaso nanga ghangaŵa malurombo ghakuperekeka m’malo mwa viwuru vya ŵantu. (1 Mathemba 8:22-53) Tingasenderera kufupi kwa Ciuta nga ndi mbumba, pasi pa urongozgi wa mutu wa mbumba. Ici cikukhozga kukoreranako kwa mu mbumba, ndipo cikupangiska ŵana ŵinu kuwona Yehova kuŵa muntu mwene-mwene usange ŵakupulika ŵapapi ŵawo ŵakuromba mwakujiyuyura kwa Ciuta. Uli usange munyake wakuyimira ciwuru mu lurombo, mtepanji mpa ungano wa Ŵakaboni ŵa Yehova? Usange ise tiri yumoza mu ciwuru ico, tiyeni titegherezge mwatcheru mwakuti pa umaliro wa rombo, tingayowoya na mtima wose kuti “Amen,” ico cikung’anamura kuti “Viŵe nteura.”—1 Ŵakorinte 14:16.
MALUROMBO GHENEAGHO YEHOVA WAKUPULIKA
12. (a) Kasi cifukwa ncici Ciuta wakuzgora yayi malurombo ghanyake? (b) Kasi cifukwa ncici tikwenera kujighanaghanira comene pa vyakukhumba vithu pera yayi usange tikuromba?
12 Ŵanji ŵangajipulika kuti Ciuta wakuzgora cara malurombo ghaŵo nangauli ŵangaromba kwa iye kwizira mu zina la Kristu. Ndipouli, mpostole Yohane wakati: “Usange tikuromba kantu kwakuyana na khumbo [la Ciuta], wakutipulika.” (1 Yohane 5:14) Nteura, ipo, tikhumbikwirenge kuromba kwakuyana na khumbo la Ciuta. Pakuti wakukondweskeka na kakhaliro kithu ka ku mzimu, kalikose ako kakutikhwaska ku mzimu ndiko makani ghakwenelera kudumbizgana naye mu lurombo. Tikwenera kutcheŵa ciyezgo ca kughanaghanira comene pa vyakukhumbikwa vyakuthupi. Mwaciyerezgero, ukurwande nkwakwenerera kupemperera vinjeru na nkongono yakutikhozga pa nyengo ya matenda, vyenjezgo vya mu umoyo withu vingabenekeleranga vyakukhumba vithu vyakumzimu cara. (Salmo 41:1-3) Wakati wamanya kuti wakaŵa wakwenjerwa comene na umoyo wake, mwanakazi yumoza wa Cikristu wakapempa Yehova cifukwa ca covwiro kuti waŵe na kawonero kaweme ka matenda ghake. Nga ncakufumapo cake, vyakumara mahara vyake pakunena za umoyo vikazgoka nkani yicoko comene, ndipo wakajipulika kuti wakapika ‘nkongono zakuruska.’ (2 Ŵakorinte 4:7) Khumbo lake lakovwira ŵanji ku mzimu likakura, ndipo wakizakaŵa mupharazgi wa Ufumu wa nyengo zose.
13. Nga ndi umo kwarongolekera pa Mateyu 6:9-13, kasi ni makani uli ghakwenerera agho tingasazgamo mu malurombo ghithu?
13 Kasi ncici ico ise tingasazgamo mu malurombo ghithu mwakuti Yehova waŵenge wakukondwa kughapulika? Yesu Kristu wakaŵasambizga ŵasambiri ŵake ntowa ya karombero. Mu lurombo lwa ciyerezgero lakulembeka pa Mateyu 6:9-13, iye wakapereka mitu ya makani ghakwenerera kughapemperera. Kasi ncici ico cikwenera kuŵa cakufipira naco mtima comene mu malurombo ghithu? Zina la Yehova Ciuta na Ufumu wake ndivyo vikwenera kuŵa vyakudanga. Kuromba vyakukhumba vithu vyakuthupi nkwakwenerera. Kweniso ncakuzirwa kuromba cifukwa ca cigowokero ca zakwananga zithu nakutaskika ku viyezgo na muheni, Satana Diabolosi. Yesu kuti wakakhumba kuti ise tirombe mwakuwerezga-werezga lurombo ulu, kuyowoyanga waka kwambura kumanya cing’anamuro cake cara. (Mateyu 6:7) Kasi wate uŵe wene na wene wa mtundu uli usange mwana watenge wawerezgenge mazgu ghamo na ghamo nyengo yiriyose apo wakuyowoya na ŵawiske?
14. Kusazgapo pa madando, kasi ndi malurombo uli agho tikwenera kupereka?
14 Kusazgapo pa madando na maŵeyerero ghithu ghakufumira pasi pa mtima, tikweneraso kupereka malurombo gha kurumba na kuwonga. (Salmo 34:1; 92:1; 1 Ŵatesalonika 5:18) Tingaromberaso nanga mbanyithu. Malurombo ghakurombera ŵabale na ŵadumbu ŵithu ŵa ku mzimu aŵo mbakufyenyeka panji ŵakutombozgeka ghakurongora kuŵafipira mtima kwithu, ndipo Yehova wakukondwa kutipulika ise kuti tikurongora kufipirana mtima kwanteura. (Luka 22:32; Yohane 17:20; 1 Ŵatesalonika 5:25) Nakwenenako, mpostole Paulos wakalemba kuti: “Mungenjerwanga na kantu; kweni mu vintu vyose, mu kuromba na kuŵeya pamoza na kuwonga mafumbo ghinu ghamanyikwe kwa Ciuta. Ndipo mtende wa Ciuta, uwo ukuzungura kuwamo kose, uti usungirirenge mitima yinu na maghanoghano ghinu mwa Kristu Yesu.”—Ŵafilipi 4:6, 7.
FWILIRIRANIPO PA KUROMBA
15. Kasi ncici ico tikwenera kukumbukira usange tikuwona kuti malurombo ghithu ghakuŵa ngati ghakuzgoreka cara?
15 Nangauli mukusanga cimanyisko cakunena za Ciuta, imwe mungajipulika ndipera kuti malurombo ghinu nyengo zinyake ghakuzgoreka cara. Ici cingaŵa nteura cifukwa mtepanji iyi yingaŵa nyengo yake cara yakuti Ciuta wazgorere lurombo ulo. (Mupharazgi 3:1-9) Yehova wangazomerezga kuti mukhaliro ulutilire kwa kanyengo, kweni wakuzgora malurombo ndipo wakumanya nyengo yake yiweme yakuzgorera.—2 Ŵakorinte 12:7-9.
16. Kasi cifukwa ncici tikwenera kukoserezga mu kuromba, ndipo kasi kucita nteura kungakhwaska uli wene na wene withu na Ciuta?
16 Kukoserezga kwithu pa kuromba kukuvumbura kukhumbisiska kwithu pa ivyo tikuyowoya kwa Ciuta. (Luka 18:1-8) Mwaciyerezgero, tingamuromba Yehova kutovwira kumazga mukhaliro wunyake wuheni. Mwakufwilirirapo mu malurombo nakucita mwakukoreranako na madando ghithu, tikurongora unenesko withu. Tikwenera kuyowoya madando ghithu mwakudunjika ndiposo mwaunenesko. Nkwakuzirwa comene kuromba na mtima wose usange tasangana na ciyezgo. (Mateyu 6:13) Para tikulutirira kuromba uku tikuyezga kujikora mu vikhuŵirizgo vithu vyakwananga, tiwonenge umo Yehova wakutovwirira. Ici cikuzgenge cipulikano cithu nakukhozga wene na wene withu na iye.—1 Ŵakorinte 10:13; Ŵafilipi 4:13.
17. Kasi tingapindura uli mwakukuzga mukhaliro wakuromba mu kuteŵetera kwithu Ciuta?
17 Mwa kuwukuzga mukhaliro wakuromba pakupereka uteŵeti withu wakupatulika kwa Yehova Ciuta, tifikenge pakumanya kuti kuti tikumuteŵetera mu nkongono za ise taŵene cara. Ndiye Yehova wakutipa nkongono kuti timuteŵetere. (1 Ŵakorinte 4:7) Kumanya ici kutovwirenge ise kuŵa ŵakujiyuyura ndipo kusazgirengeko ku wene na wene withu na iye. (1 Petros 5:5, 6) Enya, tiri na vifukwa vyakupulikikwa vyakufwilirirapo pa kuromba. Malurombo ghithu ghakufumira pasi pa mtima na cimanyisko cakuzirwa cakunena za umo tingasenderera kufupi kwa Ŵadada ŵithu ŵakucanya ŵakutemwa vipangiskenge umoyo withu kuŵa wakukondwa nadi.
KUYOWOYA NA YEHOVA NKWACIGAŴA CIMOZA CARA
18. Kasi tingategherezga uli kwa Ciuta?
18 Usange tikukhumba kuti Ciuta wapulike malurombo ghithu, tikwenera kupulikira ku ivyo iye wakuyowoya. (Zekariya 7:13) Iye kuti wakutumaso uthenga wake kwizira mu ncimi zakufunyilirika mwauciuta cara ndipo mwanadi nta wakugwiriskira ncito ntowa za mizimu. (Duteronome 18:10-12) Kweni tingategherezga kwa Ciuta mwakuŵazga Mazgu ghake, Baibolo. (Ŵaroma 15:4; 2 Timote 3:16, 17) Nga ndi umo ise tingakhumbira kumanya kulaŵa cakurya ciweme, ise tikukhuŵirizgika “kupukwa suru la mzimu lambura uryarya.” Zgoŵerani kulaŵa cakurya cakumzimu mwakuŵerenga Mazgu gha Ciuta zuŵa lirilose.—1 Petros 2:2, 3; Milimo 17:11.
19. Kasi vili na candulo uli kuranguruka mu ivyo tikuŵerenga mu Baibolo?
19 Langurukani pa ivyo mukuŵerenga mu Baibolo. (Salmo 1:1-3; 77:11, 12) Ici cikung’anamura kughanaghanirapo za ico mwaŵerenga. Mungaciyerezgera ici na kugayika kwa cakurya. Mungagaya cakurya cakumzimu mwa kulinganizga ivyo mukuŵerenga na vintu ivyo mukuvimanya kale. Ghanaghaniranipo umo ivyo mukuŵerenga vikumukhwaskirani imwe mu umoyo winu, panji mulanguluke na umo vikuvumbulira pakunena za mikhaliro ya Yehova na vyakucita vyake. Nteura kwizira mu sambiro la imwe mwaŵene, mungasanga cakurya cakumzimu ico Yehova wakupereka. Ici cimusendezgeraninge kufupi na Ciuta ndipo cimovwiraninge kulimbana na vyakumara mahara vya zuŵa na zuŵa.
20. Kasi kufika pa maungano gha Cikristu kungatovwira uli ise kusenderera kufupi na Ciuta?
20 Mungasendeleraso kufupi kwa Ciuta mwakutegherezga Mazgu ghake agho ŵakudumbiskana pa ma ungano gha Cikristu, nga ndi umo ŵa Israyeli ŵakategherezgera mwakufwasa apo ŵakongana kuti ŵapulike kaŵazgikiro ka pakweru ka Dango la Ciuta. Awo ŵakaŵa ŵanjirikizgi pa nyengo iyo ŵakaŵazganga Dango nakurongosora ng’anamuro lake, mwanteura kovwira ŵategherezgi kuti ŵapulikiske nakukhuŵirizgika kugwirirapo ncito pa ivyo ŵapulika. Ici cikalongozgera ku kukondwa kukuru comene. (Nehemiya 8:8, 12) Mwanteura cipangeni kuŵa kaluso kinu kuŵapo pa maungano gha Ŵakaboni ŵa Yehova. (Ŵahebere 10:24, 25) Ici cimovwiraninge kupulikiska nakugwilirapo ncito pa cimanyisko ca Ciuta mu umoyo winu ndipo cimwiziskireninge kukondwa. Kuŵa mu cigaŵa ca ubale wa Cikristu wa caru cose kuti kumovwireni imwe kukhala kufupi na Yehova. Ndipo nga ndi umo tiwonerenge, imwe mungasanga civikiliro ceneco pakati pa ŵantu ŵa Ciuta.
YEZGANI CIMANYISKO CINU
Kasi cifukwa ncici mukwenera kusenderera kufupi kwa Yehova?
Kasi vinyake vyakukhumbikwira mvivici kuti tisenderere kufupi kwa Ciuta?
Kasi ncici ico mungasazgamo mu malurombo ghinu?
Kasi cifukwa ncici imwe mukwenera kufwilirirapo pa kuromba?
Kasi mungategherezga uli kwa Yehova lero?
[Mafumbo]
[Cithuzithuzi pa peji 157]
