Cipaturo 45

Munthu Uyo Mungamughanaghanira Yayi Kuti Wangaŵa Msambiri

APO Yesu wakufika pa mlima, wakuwona vyakofya. Ŵanalume ŵaŵiri, ŵakali comene, ŵakufuma ku malaro ndipo ŵakucimbilira kwa iyo. Ŵali na viŵanda. Pakuti yumoza wa iwo ndiyo wakwenera kuti ngwankhaza ndipo wasuzgika nyengo yitali na viŵanda, ndiyo wakulongosoreka comene.

Munthu wakucitiska citima uyu wakhala nyengo yitali ku malaro kwambura kuvwara malaya. Nyengo zose, muhanya na usiku, wakucemerezga na kujiceka na malibwe. Ngwankhaza comene mwakuti palije uyo wali na cikanga kujumpha uko wakukhala. Ŵanthu ŵayezga kumukaka, kweni wakudumura simbi na kuphwatura magwedi mu malundi ghake. Palije uyo wali na nkhongono kuti wamuthereske.

Apo munthu uyu wakwiza kwa Yesu na kumusindamira, viŵanda ivyo vili mwa iyo vikumucitiska kukolomoka kuti: “Nili namwe na kanthu wuli imwe, Yesu, Mwana wa Ciuta Wapacanya Nkhanira? Nkhumulapizgani na Ciuta kuti munganiyuzganga cara.”

Yesu wakulutilira kuyowoya kuti: “Fumamo mwa munthu uyu, iwe mzimu waukazuzi.” Kufuma apo, Yesu wakumufumba kuti: “Zina lako ndiwe njani?”

Wakuzgora kuti: “Zina lane ndine Cimzinda, cifukwa tilipo ŵanandi.” Viŵanda vikusangwa para vikuwona kuti awo vyaŵakora ŵakusuzgika, ndipo vikwenera kuti vikukondwa para vinandi vyanjira mwa munthu yumoza. Kweni vyati vyakumana na Yesu, vikuŵeya kuti waleke kuvituma ku cizongwe. Tikuwona kuti Yesu wali na nkhongono zikuru; wakuthereska nanga ni viŵanda vyakofya. Ici cikuvumburaso kuti viŵanda vikumanya makora kuti ceruzgo cawo caumaliro kufuma kwa Ciuta nchakuti vizamuponyeka mu cizongwe pamoza na mulongozgi wawo, Satana Dyabulosi.

Mskambo wa nkhumba pafupifupi 2,000 ukurya pa lupiri ulo luli pafupi. Ntheura viŵanda vikuti: “Mutitume mu nkhumba, mwakuti tikanjire mwa izo.” Viŵanda vikwenera kuti vikukondwa kunjira mu mathupi gha ŵanthu na vinyama. Yesu wati wavizomerezga kukanjira mu nkhumba, zose 2,000 zikukhilira pa cigodobu na kubira mu nyanja.

Awo ŵakuliska nkhumba ŵati ŵawona ici, ŵakucimbira kukaphara nkhani iyi mu msumba na vikaya. Pa cifukwa ici, ŵanthu ŵakwiza kuzakawona ico cacitika. Ŵati ŵafika, ŵakuwona munthu uyo mwafuma viŵanda. Wavwara malaya ndipo wali na mahara ghake, wakhala musi mu malundi gha Yesu.

Awo ŵanguwona apo ivi vyacitikanga, ŵakulongosora umo munthu uyu wacilira. Ŵakuŵaphaliraso ŵanthu umo nkhumba zafwira mwakucitiska citima. Ŵanthu aŵa ŵati ŵapulika ici, ŵakofiwa comene, ndipo ŵakuŵeyelera Yesu kuti wafumemo mu vigaŵa vyawo. Ntheura wakupulikira na kukwera boti. Munthu uyo wakaŵa na viŵanda wakuŵeyelera Yesu kuti wendenge nayo. Kweni Yesu wakumuphalira kuti: “Luta ku nyumba ku ŵabali ŵako, ndipo ukaŵaphalire vinthu vyose ivyo Yehova wakucitira na cisungusungu ico wakaŵa naco pa iwe.”

Kanandi Yesu wakuphalira awo waŵacizga kuti ŵaleke kuphalira munthu waliyose, cifukwa wakukhumba yayi kuti ŵanthu ŵatolekenge mtima na vyakupulika waka. Kweni apa wacita makora kumuphalira kuti wakayowoye, cifukwa munthu uyo wakaŵa na viŵanda wamupharazgira ŵanthu awo Yesu waŵenge na mpata yayi kuti waŵapharazgire. Kweniso munthu uyu mbukaboni wakuti Yesu wali na nkhongono zakucitira mulimo uwemi, kususka viheni ivyo ŵanji ŵangamuyowoyera cifukwa cakuti nkhumba zafwa.

Mwakuyana na ivyo Yesu wamuphalira, munthu uyo wakaŵa na viŵanda wakuluta. Wakwamba kupharazga mu Dekapoli mose vinthu vyose ivyo Yesu wamucitira, ndipo ŵanthu ŵakuzukuma waka. Mateyu 8:28-34; Mariko 5:1-20; Luka 8:26-39; Uvumbuzi 20:1-3.

▪ Kasi cingaŵa cifukwa wuli ico munthu yumoza pera uyo wali na viŵanda ndiyo wakulongosoreka comene uku ŵalipo ŵaŵiri?

▪ Kasi nchivici cikulongora kuti viŵanda vikumanya kuti kunthazi vizamuponyeka mu cizongwe?

▪ Kasi cingaŵa cifukwa wuli ico viŵanda vikutemwera kukora ŵanthu na vinyama?

▪ Cifukwa wuli Yesu wakuphalira munthu uyo wakaŵa na viŵanda yekha kuti wakaphalire ŵanji ivyo iyo wamucitira?