Cipaturo 73

Musamariya Uyo ni Muzengezgani Muwemi

PANYAKE Yesu wali pafupi na Betaniya, muzi uwo uli pa mtunda wa makilomita ghatatu kufuma ku Yerusalemu. Munthu yunji uyo ni nkhwantha ya Dango la Mozesi wakwiza kwa iyo na kumufumba kuti: “Msambizgi, nkhwenera kucitaci kuti nizakahare umoyo wamuyirayira?”

Yesu wakumanya kuti munthu uyu, uyo ni loya, wakufumba kuti wamanye vinthu yayi, kweni wakukhumba kumuyezga. Loya uyu wakukhumba kuti Yesu wazgore mu nthowa iyo yingakhuŵazga Ŵayuda. Ntheura Yesu wakukhumba kuti loya uyu wajizgore yekha, wakumufumba kuti: “Kasi mu Dango muli kulembeka vici? Ukuŵazga wuli?”

Pakuzgora, loya uyu wakulongora kuti wali na mahara, ndipo wakuzunura mazgu agho ghali mu dango la Ciuta pa Duteronome 6:5 na Leviticus 19:18, wakuti: “‘Utemwenge Yehova Ciuta wako na mtima wako wose na umoyo wako wose na nkhongono zako zose na maghanoghano ghako ghose,’ ndiposo ‘mzengezgani wako umo ukujitemwera wamwene.’”

Yesu wakuyowoya kuti: “Wazgora makora; ‘lutilira kucita ici ndipo uzamusanga umoyo.’”

Ndipouli, loya uyu wandakhorwe. Kwa iyo, zgoro la Yesu ndakukwana yayi. Munthu uyu wakukhumba kuti Yesu wakolerane na maghanoghano ghake ndiposo wakukhumba kuti wajilongore kuti ni murunji pa umo wakucitira na ŵanji. Ntheura wakufumba kuti: “Kasi mzengezgani wane ni njani comenecomene?”

Ŵayuda ŵakughanaghana kuti lizgu lakuti “mzengezgani” likung’anamura Ŵayuda ŵanyawo pera, nga ni umo nkhani yose ya pa lemba la Leviticus 19:18 yikupulikikwira. Nanga ni mpositole Petrosi wakazakayowoyapo kuti: “Mukumanya makora kuti nchambura kuzomerezgeka kwa Muyuda kujibatika iyomwene panji kusendelera kwa munthu wa mtundu unyake.” Ntheura loya uyu, panji na ŵasambiri ŵa Yesu wuwo, ŵakugomezga kuti mbarunji usange ŵakucitira lusungu Ŵayuda ŵanyawo pera, cifukwa ŵakughanaghana kuti ŵanthu ŵa mitundu yinyake mbazengezgani ŵawo cara.

Kasi Yesu wangaŵasambizga wuli awo ŵakumupulikizga kuti ŵasinthe maghanoghano ghawo kwambura kuŵakhuŵazga? Wakuyowoya ntharika, kweni panji ivyo wakuyowoya mu ntharika iyi vikucitika nadi. Wakulongosora kuti: “[Muyuda] yunji wakakhiranga kufuma ku Yerusalemu kuya ku Yeriko ndipo wakawira mu ŵakupoka vyaŵene, awo ŵakamuvura na kumutimba na mafayiti, ndipo ŵakaluta, ŵakamuleka wakhala pa singo pera.”

Yesu wakulutilira kuti: “Sono vikacitika kuti, musofi yunji wakakhiranga mu msewu wenewura, kweni wakati wamuwona, wakajumpha kumphepete. Mwakuyana waka, Mulevi nayo, wakati wafika pa malo ghara na kumuwona, wakajumpha kumphepete. Kweni Musamariya yunji uyo wakendanga mu msewu uwu wakafika pa iyo, ndipo pakumuwona, citima cikamukora.”

Ŵasofi ŵanandi na Ŵalevi awo ŵakuŵawovwira pa tempele ŵakukhala mu Yeriko, uwo ni mtunda wa makilomita 23 kufuma ku Yerusalemu. Malo agha ghali mumphepete mwa msewu wakofya uwo ukugodoboka makilomita 900 kufuma ku Yerusalemu uko ŵakuteŵetera mu tempele. Munthu wangakhazga kuti ŵasofi na Ŵalevi ŵawovwirenge Muyuda munyawo uyo wali mu suzgo. Kweni ŵakumovwira yayi. M’malo mwake, Musamariya ndiyo wakumovwira. Ŵayuda ŵakuŵatinkha comene Ŵasamariya mwakuti ni kale viŵi yayi apo ŵakamunena Yesu kuti “Musamariya.”

Kasi Musamariya wakucita vici kuti wawovwire Muyuda? Yesu wakuti: “Wakasendelera kwa iyo na kukaka vilonda vyake, wakapungulirapo mafuta na vinyo. Ndipo wakamukwezga pa mbunda yake na kumutolera ku nyumba ya ŵalendo kuti ŵakamupwelelere. Ndipo zuŵa lakulondezgapo, wakatora madinari ghaŵiri [pafupifupi malipiro gha mazuŵa ghaŵiri], wakapeleka kwa msungiliri wa nyumba ya ŵalendo, ndipo wakati: ‘Mumupwelelere, ndipo ndalama zose izo mungananga padera pa izi, nizamuwezgerapo para nakawera.’”

Wati wayowoya nkhani iyi, Yesu wakufumba loya uyu kuti: “Ni nju pa ŵatatu aŵa, uyo iwe ukuwona kuti wakajizgora mzengezgani kwa munthu uyo wakawira mu ŵakupoka vyaŵene?”

Pakuwona kuti cikumusuzga kulumba Musamariya, loya wakuzgora kuti: “Uyo wakacita cisungusungu kwa iyo.”

Yesu wakumalizga kuti: “Lutanga ndipo nawe ukacitenge mwakuyana waka.”

Yesu waphalirenge loya yura mwakudunjika kuti ŵanthu ŵa mitundu yinyake nawo mbazengezgani ŵake, mphanyi wanguzomera yayi kweniso mphanyi ŵanji awo ŵapulikizganga ŵangukolerana na loya uyu pakudumbiskana na Yesu. Ndipouli, nkhani iyi yikulongora pakweru kuti ŵanthu ŵanyake padera pa ŵa fuko panji mtundu withu nawo mbazengezgani ŵithu. Yesu wali na nthowa yapadera comene yakusambizgira. Luka 10:25-37; Milimo 10:28; Yohane 4:9; 8:48.

▪ Kasi loya wakumufumba mafumbo wuli Yesu, ndipo cilato cake nchakuti wuli?

▪ Kasi Ŵayuda ŵakugomezga kuti ŵazengezgani ŵawo mbanjani, ndipo pali cifukwa wuli cakugomezgera kuti ndimo ŵasambiri nawo ŵakughanaghanira?

▪ Kasi Yesu wakusambizga wuli loya mu nthowa yambura kususkika?