Cipaturo 87

Nozgekerani Vyakunthazi Mwavinjeru

YESU wamalizga waka kuyowoya nkhani ya mwana wakuzgeŵa ku mzinda uwo pali ŵasambiri ŵake, ŵakusonkheska msonkho na ŵanji awo ŵakumanyikwa kuti mbakwananga, ndiposo ŵalembi na Ŵafarisi. Sono pakuyowoya na ŵasambiri ŵake, wakuyowoya ntharika ya munthu musambazi uyo wapulika lipoti liheni la muteŵeti wake mulara, panji wakupwelelera nyumba yake.

Mwakuyana na mazgu gha Yesu, munthu musambazi uyu wakucema muteŵeti wake mulara na kumuphalira kuti wamulekeskenge nchito. Muteŵeti mulara uyu wakujifumba kuti: “Kasi niciteci, pakuti fumu yane yinipokenge uteŵeti wane? Nkhongono nilije zakujimira pasi, nili na soni kupempheska. Sono namanya ico nicitenge, mwakuti para ŵanilekeska uteŵeti wane, ŵanthu ŵazamunipokelera mu nyumba zawo.”

Kasi muteŵeti mulara uyu wakukhumba kucita vici? Wakucema awo ŵali na ngongoli kwa fumu yake. Wakufumba kuti: “Kasi ukakongora vilinga?”

Wakwamba wakuzgora kuti, ‘magaloni 580 gha mafuta gha olive.’

Iyo wakumuphalira kuti: ‘Tora phangano lako la ngongoli ndipo khala pasi na kulemba luŵiro magaloni 290.’

Wakufumbaso munyake kuti: ‘Sono iwe, uli kukongora zilinga?’

Wakuti, ‘vibo vya tirigu 630.’

Iyo wakumuphalira kuti, ‘Tora phangano lako la ngongoli ndipo ulembe vibo 504.’

Muteŵeti mulara uyu wacali na wanangwa wa kukhizga ngongoli za fumu yake, pakuti wacali kulaŵilira vyuma vya fumu yake. Cifukwa ca kukhizgako ngongoli za ŵanthu aŵa, wakujipangira ŵabwezi awo ŵangakamucitira uwemi para nchito yamumalira.

Fumu yake yati yapulika ivyo vyacitika, yatoleka mtima. Ndipo ‘yikumulumba muteŵeti mulara uyu, nangauli ngwambura urunji, cifukwa wacita mwavinjeru.’ Nadi, Yesu wakusazgirapo kuti: “Ŵana ŵa mgonezi uwu mbavinjeru ku muwiro wawo kuluska umo ŵaliri ŵana ŵa ungweru.”

Sono pakukhumba kusambizga ŵasambiri ŵake, Yesu wakuŵaciska kuti: “Jipangirani ŵabwezi na usambazi wambura urunji, mwakuti para wantheura watondeka, ŵazakamupokelerani mu malo ghakukhalamo ghamuyirayira.”

Yesu wakulumba muteŵeti mulara uyu cifukwa ca ubendezi wake yayi kweni vinjeru vyake, vya kuwona patali. Kanandi, kwizira mu ndalama zawo panji udindo, “ŵana ŵa mgonezi uwu” mwakucenjera ŵakujipangira ŵabwezi awo ŵangazakaŵawezgera uwemi. Ntheura ŵateŵeti ŵa Ciuta, “ŵana ŵa ungweru,” nawo ŵakwenera kugwiliskira nchito mwavinjeru vinthu vyawo vyathupi, “usambazi wambura urunji,” kuti ŵasange candulo.

Kweni nga umo Yesu wakuyowoyera, ŵakwenera kujipangira ŵabwezi na usambazi uwu, awo ŵangazakaŵapokelera “mu malo ghakukhalamo ghamuyirayira.” Ku ŵa kamskambo kacoko, malo agha ghali kucanya; ku ŵa “mberere zinyake,” malo agha ghali mu Paradiso pa caru capasi. Pakuti ni Yehova Ciuta na Mwana wake pera awo ŵangapokelera ŵanthu mu malo agha, tikwenera kulimbikira kuti tiŵe nawo paubwezi, mwa kugwiliskira nchito “usambazi wambura urunji” uliwose uwo tingaŵa nawo kuti tikhozgere vinthu vya Ufumu. Ndipo para usambazi wathupi watondeka panji wamara, pakuti umalenge nadi, vinthu vizamutendera makora munthazi kwamuyirayira.

Yesu wakulutilira kuyowoya kuti ŵanthu awo mbakugomezgeka pakupwelelera nanga ni vinthu vyathupi panji kuti vicoko ivi, ŵaŵengeso ŵakugomezgeka pakupwelelera vinthu vyakuzirwa. Iyo wakulutilira kuti: “Ntheura usange mundajilongore mwaŵene kuŵa ŵakugomezgeka na usambazi wambura urunji, ni njani wamuŵikizganinge ico nchaunenesko [ndiko kuti, vinthu vyauzimu panji vya Ufumu]? Ndipo usange mundajilongore mwaŵene kuŵa ŵakugomezgeka pa ico nchamwene [vinthu vya Ufumu ivyo Ciuta waŵikizga ŵateŵeti ŵake], ni njani wamupaninge ico ncha mwaŵene [njombe ya umoyo mu malo ghakukhalamo ghamuyirayira]?”

Vingacitika yayi kuti pa nyengo yimoza tiŵe ŵateŵeti ŵanadi ŵa Ciuta na kuŵa ŵazga ŵa usambazi wambura urunji, panji kuti usambazi wathupi, nga umo Yesu wakumalizgira kuti: “Palije muteŵeti wa mu nyumba uyo wangaŵa muzga ku ŵeneco ŵaŵiri; cifukwa panji watinkhenge yumoza na kutemwa munyake, panji wademelerenge kwa yumoza na kwelura munyake. Mungaŵa ŵazga ŵa Ciuta na usambazi cara.” Luka 15:1, 2; 16:1-13; Yohane 10:16.

▪ Kasi muteŵeti mulara mu ntharika ya Yesu wakupanga wuli ŵabwezi awo ŵangamovwira para uteŵeti wamumalira?

▪ Kasi “usambazi wambura urunji” ni vici, ndipo tingajipangira wuli ŵabwezi na usambazi uwu?

▪ Mbanjani awo ŵangatipokelera mu “malo ghakukhalamo ghamuyirayira,” ndipo malo agha ni nga?