Cipaturo 117

Wakukweŵeka mu Munda

YESU wati wamara kulomba, iyo na ŵapositole ŵake ŵakugomezgeka khumi na yumoza ŵakwimba sumu zakulumba Yehova. Kufuma apo, ŵakukhira mu cipinda camucanya na kufumira kuwaro, na kunjirako waka ku mphepo ya usiku, ndipo ŵakuwelera ku Betaniya kujumpha Dambo la Kidroni. Kweni ŵali mu nthowa, ŵakwimilira dankha pa malo agho ŵakughatemwa, munda wa Getisemane. Munda uwu uli pa Lupiri lwa Maolive, panji cadera kwenekuku. Kanandi Yesu na ŵapositole ŵake ŵakutemwa kukumana kwenekuku, mu makuni gha maolive.

Wati waleka ŵapositole ŵankhondi na ŵatatu, panji pafupi na mulyango wakunjilira mu munda, wakuŵaphalira kuti: “Khalani pano apo ine nkhuya para kukalomba.” Ndipo wakutora ŵanyawo ŵatatu, Petrosi, Yakobe na Yohane, ndipo ŵakunjira mukati mu munda. Yesu wakwamba kuŵa na citima na kukweŵeka comene. Wakuŵaphalira kuti: “Umoyo wane uli na citima ca nyifwa. Khalani pano ndipo muŵenge maso pamoza na ine.”

Pakulutilirako panthazi pacoko, Yesu wakuwa kavunama ndipo wakwamba kuŵeyelera kuti: “Ŵadada, usange nchamacitiko, nkhombo iyi yinijumphilire. Ndipouli, umo nkhukhumbira ine cara, kweni umo imwe mukukhumbira.” Kasi wakung’anamura vici? Cifukwa wuli wali na “citima ca nyifwa”? Kasi sono wakughanaghana kuti waleke kufwa na kupeleka ciwombolero?

Cara! Yesu wakupempha kuti waleke kufwa yayi. Nanga ni ghanoghano lakuti waleke kufwa ilo Petrosi wakayowoya, ndawakawaka kwa iyo. M’malo mwake, iyo wakukweŵeka cifukwa wakopa kuti umo wafwirenge nga nchigeŵenga sonosono apa, zina la Ŵawiske litukikenge. Wakumanya kuti maora ghacoko waka kufuma sono, wapayikikenge pa khuni nga ni munthu muheni comene, wakuyuyura Ciuta. Ici ndico cikumukweŵeska comene.

Wati walomba nyengo yitaliko, Yesu wakuwelera na kusanga kuti ŵapositole ŵatatu aŵa ŵakugona. Pakuyowoya na Petrosi, wakuti: “Kasi imwe mwaŵanthu mungatondeka kuŵa maso pamoza na ine ora limoza? Muŵenge maso ndipo lutilirani kulomba, mwakuti muleke kunjira mu ciyezgo.” Pakumanya kuti nawo ŵakusuzgika maghanoghano, ndiposo kuti ni usiku comene, iyo wakuti: “Mzimu ngwakukhumbisiska nadi, kweni thupi ndakulopwa.”

Yesu wakuluta kukalomba kaciŵiri ndipo wakupempha kuti Ciuta wawuskeko “nkhombo iyi,” ndiko kuti cigaŵa ico Yehova wamupa, panji khumbo la Yehova kwa iyo. Wati wawelera, wakusangaso ŵatatu ŵara ŵakugona m’malo mwakuti ŵalombenge kuti ŵaleke kunjira mu ciyezgo. Apo Yesu wakuyowoya nawo, ŵakusoŵa cakumuzgora.

Paumaliro, Yesu wakulutaso kacitatu, pa mtunda uwo libwe lingafika para laponyeka, ndipo wati wajikama, wakulomba na kulira na masozi kuti: “Ŵadada, usange mukukhumba, sezganiko nkhombo iyi kwa ine.” Yesu wakupulika vyakuŵinya vikuru comene cifukwa cakuti umo wafwirenge nga nchigeŵenga vitukiskenge zina la Ŵawiske. Mulandu uwo ŵamupenge wakuti ngwamuyuyuro, panji munthu uyo wakutemba Ciuta, ngukuru comene kwa iyo.

Ndipouli, Yesu wakulutilira kulomba, wakuti: “Khumbo linu licitike, lane cara.” Yesu wakujilambika ku khumbo la Ciuta. Pa ici, mungelo wakwiza kufuma kucanya na kumukhozga. Mungelo wakwenera kuti wakuphalira Yesu kuti Ŵawiske ŵakukondwa nayo.

Ndipouli, Yesu wali na udindo ukuru comene. Umoyo wake wamuyirayira, ndiposo wa mtundu wose wa ŵanthu, uli mu mawoko ghake. Wakusuzgika comene mu maghanoghano. Ntheura Yesu wakufwilirapo comene kulomba, ndipo apo mavuci ghake ghakuwa pasi ghakuwoneka nga ni manthonyezi gha ndopa. Buku la The Journal of the American Medical Association likuti: ‘Nangauli ici cikucitika bweka yayi, mavuci gha ndopa ghangafuma para munthu wasuzgika comene maghanoghano.’

Ivi vyati vyajumpha, Yesu wakuweleraso ku ŵapositole ŵake kacitatu, ndipo wakusangaso ŵakugona. Vyaŵalemera cifukwa ca citima. Iyo wakuti: “Pa nyengo yantheura iyi mukugona na kupumura! Mbwenu! Ora lafika! Wonani! Mwana wa munthu wakupelekeka mu mawoko gha ŵakwananga. Wukani, tiyeni tilutenge. Wonani! Wakunipeleka wali pafupi.”

Wacali kuyowoya, Yudasi Isikariyoti wakwiza na mzinda ukuru uwo wayegha miliko na nyali na vilwero. Mateyu 26:30, 36-47; 16:21-23; Mariko 14:26, 32-43; Luka 22:39-47; Yohane 18:1-3; Ŵahebere 5:7.

▪ Ŵati ŵafuma mu cipinda camucanya, kasi Yesu wakuluta nawo nkhu ŵapositole ŵake, ndipo kwenekura wakucita vici?

▪ Apo Yesu wakulomba, kasi ŵapositole ŵakucita vici?

▪ Cifukwa wuli Yesu wakukweŵeka, ndipo wakupempha vici kwa Ciuta?

▪ Kasi mavuci gha ndopa agho ghakufuma mwa Yesu ghakulongora vici?