Cipaturo 52

Yesu Wakulyeska Ŵanthu Vikwi Vinandi Mwamunthondwe

ŴAPOSITOLE 12 ŵasangwa comene na upharazgi wapadera wa mu Galileya. Sono nyengo yicoko waka, Yohane wati wakomeka, ŵakuwelera kwa Yesu na kumuphalira vinthu vyakukondweska. Pakuwona kuti ŵavuka ndiposo kuti ŵanthu ŵanandi ŵakwiza na kuluta mwakuti iwo ŵalije nanga ni nyengo yakulyera, Yesu wakuti: ‘Tiyeni tilute kwatekha ku malo ghamayiyi uko mungakapumura.’

Ŵati ŵakwera boti, ca kufupi na Kaperenaumu, ŵakunyamuka kuya ku malo gha yii, vikuwoneka kuti nkhuvuma kwa Yorodani kujumpha Betesayida. Ndipouli, ŵanthu ŵanandi ŵaŵawona, ndipo ŵanji ŵamanya kuti ŵafumapo. Ŵanthu aŵa ŵakwamba kucimbira pasi mumphepete pera, ŵakudangirako, ndipo apo boti likufika pa mlima, ŵanthu ŵali penepara kuti ŵakumane nawo.

Pakufuma mu boti na kuwona mzinda ukuru, Yesu wakuŵalengera citima cifukwa ŵanthu aŵa ŵali nga ni mberere zambura muliska. Ntheura wakucizga ŵalwari ŵawo na kwamba kuŵasambizga vinthu vinandi.

Nakalinga nyengo yamara, ndipo ŵasambiri ŵa Yesu ŵakwiza kwa iyo ŵakuti: “Malo agha ngamayiyi, ndipo nyengo yamara kale. Muŵatume kuti ŵalutenge, kuti ŵalute mu vikaya na mu mizi yakuzingilira ndipo ŵakajigulire kanthu kuti ŵarye.”

Ndipouli, Yesu pakuzgora wakuti: “Imwe muŵape cakuti ŵarye.” Ndipo pakuti Yesu wakumanya kale ico wacitenge, wakuyezga Filipu, wakumufumba kuti: “Kasi tamugura nkhu vingwa vyakuti ŵanthu aŵa ŵarye?”

Filipu wakuwona kuti ivi vingacitika yayi. Cifukwa pali ŵanalume pafupifupi 5,000, ndipo panji wose pamoza ŵalipo 10,000 kupenderako ŵanakazi na ŵana. Filipu wakuzgora kuti: “Vingwa vya madinari mahandiredi ghaŵiri [nyengo yira dinari limoza ghakaŵa malipiro gha zuŵa limoza] vingaŵakwana cara, mwakuti waliyose wapokeko kacoko.”

Panji pakukhumba kulongora kuti vingacitika yayi kulyeska ŵanthu ŵanandi ntheura, Andireya wakuti: “Pali msepuka uyo wali na vingwa vinkhondi . . . vya balere na tusomba tuŵiri.” Wakusazgirapo kuti: “Kweni ivi nkhanthu wuli pakati pa ŵanthu wose aŵa?”

Pakuti ni mwezi wa Malici panji Epulero, pambere Paska la 32 C.E. lindacitike, pali utheka unandi wakubiliŵira. Ntheura Yesu wakutuma ŵasambiri ŵake kuti ŵaphalire ŵanthu kuti ŵakhale pasi pa utheka mu magulu gha ŵanthu 50 na 100. Wakutora vingwa vinkhondi vira na somba ziŵiri, wakulaŵiska kucanya na kulomba. Ndipo wakwamba kumenya vingwa na kugaŵa somba. Wakupeleka ku ŵasambiri ŵake, awo ŵakugaŵira ŵanthu. Cakutindika nchakuti ŵanthu wose ŵakurya na kukhuta.

Kufuma apo, Yesu wakuphalira ŵasambiri ŵake kuti: “Wunjikani pamoza vimenyu ivyo vyakhalapo, ntheura kuti paleke kusakazika kanthu.” Ŵati ŵawunjika, ŵakuzuzga vidunga 12 na ivyo vyakhalapo pa ivyo ŵanthu ŵarya. Mateyu 14:13-21; Mariko 6:30-44; Luka 9:10-17; Yohane 6:1-13.

▪ Cifukwa wuli Yesu wakupenjera ŵapositole ŵake malo gha yii?

▪ Kasi Yesu wakuluta nawo nkhu ŵasambiri ŵake, ndipo cifukwa wuli ŵatondeka kupumura ku malo agha?

▪ Nyengo yati yamara, kasi ŵasambiri ŵakuti vici, ndipo Yesu wakuŵapwelelera wuli ŵanthu?