Kusopa Mwakukolerana mu Nyengo Yithu—Kasi Kukung’anamuraci?
Cipaturo 1
Kusopa Mwakukolerana mu Nyengo Yithu—Kasi Kukung’anamuraci?
1, 2. (a) Ncintu wuli cakukondweska ico cikucitika mu nyengo yithu? (b) Ncilindizga wuli ciweme ico ŵantu ŵaweme ŵali naco?
NCAKUKONDWESKA comene kuti pa caru cose capasi pali ŵantu ŵanandi comene awo ŵakuwunganiskika kuti ŵasope mwakukolerana. Ŵantu ŵanandi aŵa ŵakufumira mu vyaru, mafuko na viyowoyero vyakupambana-pambana. Cirimika cilicose ŵantu ŵanandi comene ŵakuwunganiskika. Baibolo likuŵazunura ŵantu aŵa kuŵa “ŵakaboni” ŵa Yehova ndipo ŵakucemekaso kuti “mzinda ukuru.” Iwo ŵakuteŵetera Ciuta “muhanya na usiku.” (Yesaya 43:10-12; Civumbuzi 7:9-15) Ncifukwa wuli iwo ŵakucita nteura? Ncifukwa cakuti ŵamumanya Yehova kuti ni Ciuta waunenesko yekha. Ici cikuŵapangiska kuti ŵasinte nkaro yawo kuti yiŵe yakuyana na ntowa zaurunji za Ciuta. Mwakusazgirapo, iwo ŵasambira kuti ŵakukhala mu “mazuŵa gha ku umaliro” gha mgonezi uwu, ŵamanyaso kuti sono-sono apa Ciuta waparanyenge mgonezi uwu, ndipo caru cipya ca paradiso cinjirenge mu malo mwake.—2 Timote 3:1-5, 13; 2 Petros 3:10-13.
2 Mazgu gha Ciuta ghakutiphalira kuti: “Kwakhala kanyengo, ndipo muheni kuti tiwaŵepo cara . . . Ŵakuzika ndiŵo tiŵaharenge caru, tiŵakondwenge na kusakata comene.” (Salmo 37:10, 11) “Ŵakunyoroka ŵamkuhara caru na kukhala mwenemumo kwandanda.” (Salmo 37:29) “Ndipo [Ciuta] wati wafyurenge sozi lose ku maso ghaŵo; ndipo nyifwa kuti yiti yiŵengekoso cara; panji nesi citengero kuti citi ciŵengekoso cara, nesi kulira, panji nesi kuŵinya: cifukwa vyakudanga viri kuruta.”—Civumbuzi 21:4.
3. Ni mwauli umo kusopa kwaunenesko kuliri kwamacitiko?
3 Awo sono ŵakusopa mwaunenesko ŵakupanga gulu la ŵantu lakwambilira ilo lizamukhala mu caru cipya. Iwo ŵasambira khumbo la Ciuta ndipo ŵakuyezgayezga kulicita. Kuti warongore kuzirwa kwa kusambira khumbo ili na kulicita, Yesu wakayowoya kuti: “Ndipo uwu mbumoyo wa muyirayira, kuti ŵamumanyani imwe, Ciuta mweneco yeka, na Yesu Kristu, mweneuyo mukamutuma.” (Yohane 17:3) Mpostole Yohane wakalemba kuti: “Caru cikuruta na makhumbiro ghake, kweni uyo wakucita khumbo la Ciuta, wakukhalirira muyirayira.”—1 Yohane 2:17.
Ico Kukung’anamura
4. (a) Kasi kuwunganiskika kwa ŵantu ŵanandi comene kuti ŵasope mwakukolerana mu nyengo yithu kukung’anamuraci? (b) Ni mwauli umo Baibolo likukonkoskera kuwunganiskika kwanteura uku?
4 Kasi kuwunganiska kwa ŵantu ŵanandi kuti ŵakolerane pakusopa mu nyengo yithu yino kukung’anamuraci? Pali ukaboni wakuwoneka makora comene wakuti kwakhala pacoko waka kuti caru ciheni ici cimare ndipo mwaluŵiro pamanyuma pake caru cipya ca Ciuta ciyambenge. Tikuwona kufiskika kwa maucimi gha Baibolo agho ghakayowoyerathu za kuwunganiskika kwa ŵantu. Umoza mwa maucimi agha ukuyowoya kuti: “Kwayamkuti mu mazuŵa ghakumarira [agha] kuti lupiri lwa nyumba ya Yehova lwamkukhozgeka pacanya pa mapiri ghose [pacanya pa kusopa kulikose], . . . ndipo mitundu ya ŵantu yamkutirimukira kwa iyo, mitundu yinandi yamkwiza, na kuti; ‘Zani, tiyeni tikwere ku lupiri lwa Yehova, ku nyumba ya Ciuta wa Jacob; mwakuti iye watisambizge ntowa zake ndipo ise tendengemo.’”—Mika 4:1, 2; Salmo 37:34.
5, 6. (a) Kasi ncaunenesko wuli kuti mitundu yikuthirimukira kwa Yehova? (b) Ni mafumbo wuli agho tikwenera kujifumba?
5 Peneapo kuli kwakuti ni mitundu yose yayi ya ŵantu iyo yikwiza ku nyumba ya Yehova yauzimu kuti yimusope, ŵantu mamiliyoni ghanandi comene, waliyose payekha, awo ŵakufuma mu mitundu iyi ndiwo ŵakumusopa. Cifukwa ca kusambira vilato viweme na wuntu wakukondweska wa Yehova Ciuta, mitima yawo njakunweka kuti yimusope. Mwakujiyuyura, ŵakucita ivyo Ciuta wakukhumba. Lurombo lwawo lukuyana waka na lira la wamasalmo uyo wakayowoya kuti: “Ndisambizgani kucita khumbo linu cifukwa imwe ndimwe Ciuta wane.”—Salmo 143:10.
6 Kasi mukujiwona kuti muli pakati pa mzinda ukuru wa ŵantu awo Yehova wakuŵawunganiska pamoza sono kuti ŵamusope mwakukolerana? Kasi kacitiro kinu kurazga ku urongozgi uwo mwapokera kufuma mu Mazgu ghake kakurongora kuti mukuzirwiska nadi kuti Yehova ndiye Citopoko cake? Kasi ‘mwendenge mu ntowa zake’ mupaka pauli?
Umo Kuliri Kwamacitiko
7. (a) Kasi kusopa mwakukolerana kuzamufika mphani? (b) Ncifukwa wuli ncakukhumbikwa luŵiro kuti tiŵe musopi wa Yehova sono, ndipo ni mwauli umo tingawovwilira ŵanji kuti ŵacite nteura?
7 Cilato ca Yehova ncakuti ŵantu wose ŵakolerane pakusopa kwaunenesko. Mwee, nako nkunweka uko tiri nako kuti tizakawone zuŵa ilo ŵantu wose ŵamoyo ŵazamusopa Ciuta waunenesko yekha! (Salmo 103:19-22) Kweni pambere zuŵa ili lindafike, Yehova wakwenera kuwuskapo ŵantu wose awo ŵakukana kucita khumbo lake laurunji. Mwalusungu lwake, iye wacenjezgerathu ivyo wazamucita, mwanteura ŵantu kulikose uko ŵakukhala ŵali na mwaŵi wakuti ŵasinte nkaro yawo. (Yesaya 55:6, 7) Pa cifukwa ici, mu nyengo yithu yino, “ku mtundu wose na fuko na lulimi na ŵantu,” ncemo iyo yikuperekeka njakuti: “Mopani Ciuta, ndipo mupani ncindi: pakuti liza ora la ceruzgo cake: ndipo mulambirani mweneuyo wakalenga kucanya na caru ca pasi na nyanja na visimi vya maji.” (Civumbuzi 14:6, 7) Kasi mwazomerezga ncemo iyi? Usange mwazomerezga, ni mwaŵi winu sono wakuti namwe muceme ŵanji kuti ŵamumanye na kumusopa Ciuta waunenesko yekha.
8. Pamanyuma pakusambira visambizgo vikuru-vikuru vya Baibolo, kasi nkuruta pantazi wuli uko tikwenera kuyezgayezga kuti tipange?
8 Ncakulata ca Yehova yayi kuti wasopeke na ŵantu awo ŵakuyowoya pa mlomo pera kuti ŵakutamira mwa iye, kweni apo ŵakurutirizga kucita ivyo ŵakukhumba iwo ŵene. Ciuta wakukhumba kuti ŵantu ‘ŵazuzgike na kamanyiro [“Ŵaŵe na cimanyisko cakurondora,” NW] ka khumbo lake’ na kukarongora mu umoyo wawo. (Ŵakolose 1:9, 10) Anteura, ŵantu ŵa mtima wakuwongera para ŵasambira visambizgo vikuru-vikuru vya mu Baibolo ŵakukhumbisiska kuti ŵafike pa urara Wacikristu. Khumbo lawo likuŵa lakuti ŵamumanye makora Yehova, ŵamanye vinandi vyakukhwaskana na Mazgu ghake na kugwiriskira ncito mu umoyo wawo ivyo ŵakusambira. Ŵakuyezgayezga kuti ŵarongore mikhaliro ya Ŵadada ŵithu ŵakucanya mu umoyo wawo na kucita vintu mwakuyana na umo Iye wakukhumbira. Ici cikuŵapangiska kuti ŵapenjerezge ntowa izo ŵangacitira mulimo wa kuthaska umoyo uwo walinganizgika na Ciuta kuti ucitike pa caru cose capasi mu nyengo yithu yino. Kasi muli ŵakukhumbisiska kucita mulimo uwu?—Marko 13:10; Ŵahebere 5:12–6:3.
9. Ni mwa ntowa wuli izo kukolerana kweneco kuliri kwamacitiko sono ntena?
9 Baibolo likurongora kuti awo ŵakusopa Yehova ŵakwenera kuŵa ŵantu ŵakukolerana. (Ŵaefeso 4:1-3) Kukolerana uku kukwenera kucitika sono ntena, nangauli tikukhala mu caru ico ncakugaŵikana ndiposo ticali kulimbana na kuwura urunji kwithu. Yesu wakarombera ŵasambiri ŵake wose kuti ŵaŵe ŵamoza, ŵasangwe na umoza weneco. Kasi ici cikang’anamuranga vici? Cakwamba, cikang’anamuranga kuti ŵaŵe pa ubwezi na Yehova na Mwana wake. Caciŵiri, ŵakeneranga kuti ŵaŵe ŵakukolerana yumoza na munyake. (Yohane 17:20, 21) Kuti cakulata ici cifiskike, Yehova wakusambizga ŵantu ŵake kwizira mu mpingo Wacikristu.
Ni Vintu Wuli Ivyo Vikupangiska Kuti Kukolerana Kuŵepo?
10. (a) Ncici ico tikuŵa naco para tikugwiriskira ncito Baibolo kuti tisange mazgoro gha mafumbo agho ghakutikhwaska? (b) Sandani vintu ivyo vikupangiska kuti paŵe kukolerana kwa Cikristu mwakuzgora mafumbo agho ghakusangika mu ndime yino.
10 Pasi apa pali fundo zinkondi na ziŵiri izo zikupangiska kuti paŵe kukolerana pa kusopa. Peneapo mukuzgora mafumbo ghakurondezgapo, ghanaghanirani umo fundo yiliyose yikukhwaskira ubwezi winu na Yehova na Ŵakristu ŵanyinu. Kuranguruka pa fundo izi na kuŵazga malemba agho gharongoreka kumovwiraninge kuti musange vinjeru vyakufuma kwa Ciuta, luso lwa kughanaghana, na umanyi—mikhaliro yeneiyo ise tose tikukhumbikwira kuŵa nayo. (Zintharika 5:1, 2; Ŵafilipi 1:9-11) Sandani fundo izi yimoza na yimoza.
(1) Tikugomezga kuti Yehova ndiye ngwakwenerera kutiŵikira cipimo ca uweme na uheni. “Tamira mwa Yehova na mtima wako wose, ungeghamanga ku umanyi wako weka. Mu mendero ghako ghose umuzomere iye, ndipo tiwanyoroskenge ntowa zako.”—Zintharika 3:5, 6.
Ncifukwa wuli tikwenera kurondezga urongozgi wa Yehova pakupanga vyakusanka? (Salmo 146:3-5; Yesaya 48:17)
(2) Tiri na Mazgu gha Ciuta kuti ghatirongozge. “Para mukapokerera kwa ise mazgu gha uthenga, ndigho mazgu gha Ciuta, kuti mukaghapokerera nga ndi mazgu gha ŵantu cara, kweni nga umo ghariri kwakuneneska, mazgu gha Ciuta, gheneaghoso ghakucita mwa imwe ŵakupulikana.”—1 Ŵatesalonika 2:13.
Kasi pali ngozi wuli kucita cintu ico “tikughanaghana” kuti nciweme? (Zintharika 14:12; Yeremiya 10:23, 24; 17:9)
Kasi tikwenera kucitaci usange tikumanya yayi urongozgi wa Baibolo pa nkani yinyake? (Zintharika 2:3-5; 2 Timote 3:16, 17)
(3) Tose tikusanga candulo na ndondomeko yimoza ya cakurya cauzimu. “Ŵose ŵana ŵako tiŵasambizgike na Yehova.” (Yesaya 54:13) “Tighanaghanirane na kukhuŵirizgirana ku kutemwa na ku milimo yiweme; kureka kongana cara, nga ndi umo kariri kaluso ka ŵanji, kweni kuciskana; ndipo comene comene apo mukuwona zuŵa [la paraniko] likuneng’enera.”—Ŵahebere 10:24, 25.
Kasi ni vyandulo wuli ivyo ŵakuvisanga awo ŵakurya cakurya cauzimu ico Yehova wakupereka? (Yesaya 65:13, 14)
(4) Yesu Kristu ndiye Murongozgi withu, muntu cara. “Mungacemekanga Rabi; cifukwa yumoza ndi msambizgi winu, ndipo imwe mose muli ŵabali. Ndipo mungamucemanga muntu kuti ndi wiskemwe pano pasi: cifukwa yumoza ndi Wiskemwe, Uyo wali kucanya. Ndiposo mungacemekanga ŵacirongozi: cifukwa yumoza ndi Cirongozi winu, mweneuyo ndi Kristu.”—Mateyu 23:8-10.
Kasi tikwenera kujiwona kuti ndise ŵapacanya kuruska ŵanji? (Ŵaroma 3:23, 24; 12:3)
(5) Tikulaŵiska ku boma la Ufumu wa Ciuta nga ncilindizga cekha ca ŵantu. ‘Nteura imwe pa kuromba, mutenge, Ŵadada ŵithu mwa ŵa kucanya, litumbikike zina linu. Ufumu winu wize. Khumbo linu licitike pano pasi, nga nkucanya. Kweni penjani danga Ufumu wake, na urunji wake.’—Mateyu 6:9, 10, 33.
Ni mwauli umo ‘kupenja danga ufumu’ kukuvikilirira kukolerana kwithu? (Mika 4:3; 1 Yohane 3:10-12)
(6) Mzimu utuŵa ukupangiska ŵasopi ŵa Yehova kuti ŵaŵe na mikhaliro yakuzirwa kuti paŵe kukolerana kwa Cikristu. “Vipambi vya mzimu ndi kutemwa, cimwemwe, mtende, kuzizipizga, wezi, uweme, magomezgeko, kuzika, kujikora.”—Ŵagalatiya 5:22, 23.
Kasi tikwenera kucitaci kuti mzimu wa Ciuta upambike vipambi mwa ise? (Milimo 5:32)
Ni mwauli umo kuŵa na mzimu wa Ciuta kukukhwaskira ubwezi withu na Ŵakristu ŵanyithu? (Yohane 13:35; 1 Yohane 4:8, 20, 21)
(7) Ŵasopi wose ŵaunenesko ŵa Ciuta ŵakupharazga makani ghaweme gha Ufumu. “Makani ghaweme gheneagha gha Ufumu ghamkupharazgika mu vyaru vyose ghaŵe cipanikizgo ku mitundu yose; penepapo ndipo umariro uti wizenge.”—Mateyu 24:14.
Kasi ncivici ico cikwenera kutikhuŵirizga kuti tipharazgenge comene? (Mateyu 22:37-39; Ŵaroma 10:10)
11. Kasi ncakufumapo wuli ico cikuŵapo para tikugwiriskira ncito visambizgo vya mu Baibolo mu umoyo withu?
11 Kusopa Yehova mwakukolerana kukutipangiska kuti tisenderere kwa iye ndiposo kukutipangiska kuti tisangwe na mendezgano ghaweme na Ŵakristu ŵanyithu. Salmo 133:1 likuti: “Wonani, nako nkukongora na kunozga uko ŵanambumba ŵakukhala pamoza na mtima wakurungana!” Mwee, nako nkukondweska kuti tilekane na caru ico ncakuzara na uryezi, uzaghali na ciwawa! Nciweme comene kuti tiwungane na awo ŵakutemwa nadi Yehova na kurondezga marango ghake!
Tceŵani Mikhaliro Yakugaŵaniska
12. Ncifukwa wuli tikwenera kutceŵa mtima wa kujiyimira patekha?
12 Kuti tileke kwanangiska kukolerana kwa pa caru cose uko kulipo, tikwenera kutceŵa mikhaliro yakugaŵaniska. Umoza mwa mikhaliro iyi ni mtima wa kujiyimira pawekha na kuleka kugomezga Ciuta na marango ghake. Yehova wakutovwira kuti tiwutceŵe mwakutivumbulira muyambiski wa mtima uwu, Satana Diabolosi. (2 Ŵakorinte 4:4; Civumbuzi 12:9) Satana ndiye wakapusika Adamu na Heva kuti ŵaleke kupulikira ivyo Ciuta wakayowoya na kucita vintu mwakupambana na khumbo la Ciuta. Cakufumapo cake cikaŵa ciheni comene kwa iwo na kwa ise wuwo. (Genesis 3:1-6, 17-19) Caru ncakuzara na mtima wa kujiyimira pawekha na kuleka kurondezga marango gha Ciuta. Anteura ise tikwenera kuwukanizga mtima wanteura uwu.
13. Ncici ico cingarongora usange tikunozgekera nadi mwakukhumbisiska kuzakakhala mu caru cipya ca Ciuta?
13 Mwaciyerezgero, ghanaghanirani za layizgano lakukondweska la Yehova lakuti waparanye caru ciheni ici na kwiziska macanya ghapya na caru cipya ‘mwenemumo muzamukhala urunji.’ (2 Petros 3:13) Kasi mukughanaghana kuti ncakwenelera yayi kuti sono tiyambe kunozgekera kuzakakhala mu caru ico muzamuŵa urunji? Ici cikung’anamura kurondezga urongozgi wa mu Baibolo uwu: “Mungatemwanga caru, panji nesi vintu ivyo viri mu caru. Usange muntu wakutemwa caru, kutemwa kwa Ŵawiske kulimo mwa iyo cara.” (1 Yohane 2:15) Mwanteura tikwenera kutceŵa mikhaliro iyo njakuzara comene mu caru—mtima wakujiyimira pawekha, kujitemwa, uzaghali na ciwawa. Nyengo zose tikwenera kutegherezga ivyo Yehova wakuyowoya na kumupulikira na mtima wose, mwambura kupwerererako kantu kuti ndise ŵantu ŵambura ukongorekwa. Umoyo withu ukwenera kurongora kuti kaghanaghaniro kithu na vilato vithu vikweghamira pa kucita khumbo la Ciuta.—Salmo 40:8.
14. (a) Ncifukwa wuli ncakuzirwa kugwiriskira ncito makora mwaŵi uwo tiri nawo sono kuti tisambire ntowa za Yehova na kuzirondezga mu umoyo withu? (b) Ni sambiro wuli ilo malemba agho ghalembeka mu ndime yino ghakupereka kwa ise?
14 Para nyengo yakuŵikika yakwana yakuti Yehova waparanye mgonezi uwu uheni na ŵantu wose awo ŵakurondezga mikhaliro yake, iye waziwulikenge yayi. Iye wasintenge yayi nyengo panji kusinta vipimo vyake vyakakhaliro kuti wapereke mupata kwa ŵantu awo ŵacali kudemerera ku caru uku ndipo ŵakusambira khumbo la Ciuta mwambura kuŵikapo comene mtima. Sono ndiyo nyengo yakucitapo kantu! (Luka 13:23, 24; 17:32; 21:34-36) Mwee, ncintu cakukondweska comene kuwona mzinda ukuru ukugwiriskira ncito makora mwaŵi uwo ulipo, kurondezga urongozgi uwo Yehova wakupereka kwizira mu Mazgu ghake na gulu lake ndipo mwakukolerana ukwenda mu ntowa zake kuruta mu caru cipya! Peneapo tikusambira vinandi vyakukhwaskana na Yehova, ciŵenge cipusu kumutemwa iye comene na kumuteŵetera.
Kudumbiskana Mwakuweleramo
• Kasi cilato ca Yehova ncakuti wuli pa nkani ya kusopa?
• Pamanyuma pakusambira visambizgo vikuru-vikuru vya Baibolo, kasi nkuruta pantazi wuli uko tikwenera kuyezgayezga kuti tipange?
• Ncici ico waliyose payekha wakwenera kucita kuti tiŵe ŵakukolerana na ŵasopi ŵanyithu ŵa Yehova?
[Mafumbo]
[Cithuzithuzi pa peji 4]
‘Ŵakuzika tiŵaharenge caru ndipo tiŵakondwenge na kusakata comene’
