1. Cifukwa wuli nchakusuzga kupwelelera mbumba lero?

 VINTHU vinandi vikusintha, comenecomene pakuyowoya za mbumba. Vinthu ivyo tikati ni viwemi vilimika 40 panji 50 ivyo vyajumpha, sono ni viwemi viŵi yayi. Cifukwa ca kusintha uku, nchipusu yayi kupwelelera mbumba makoraghene. Nangauli vili nthena, para munthu walondezga ulongozgi wa mu Malemba, nchipusu kulimbana na masuzgo agho ghalipo.

2. Ni masuzgo wuli ghakusanga ndarama agho mbumba zikukumana nagho?

² Ŵanthu ŵanandi mu mbumba mazuŵa ghano ŵakukhorwa yayi na umoyo wambura kukhumba vinandi. Pakuti makampani ghakulutilira kupanga katundu munandi na kusaska malonda ghawo, ŵanalume na ŵanakazi ŵanandi ŵakugwira nchito kwa maora ghanandi kuti ŵasange ndarama zakugulira katundu uyu. Paliso ŵanthu ŵanandi awo ŵakusuzgika comene kuti ŵasange cakurya ca zuŵa limoza. Ŵakugwira nchito kwa maora ghanandi kuluska umo ŵakacitiranga kale. Nyengo zinyake ŵakugwira nchito kuŵiri kuti ŵasange ndarama zakukwana zakuti ŵagulire vinthu vyakukhumbikwa pa umoyo. Ŵanandi ŵakusuzgika kusanga nchito cifukwa ulova wahaŵa comene. Na masuzgo ghose agha, nchakusuzga kuti mbumba yende makora. Nangauli vinthu vili nthena, fundo za mu Baibolo zingawovwira mbumba kuti zikhale makora mwakuyana na ukhaliro uwo zilimo.

3. Ni fundo wuli iyo mpositole Paulosi wakalongosora, ndipo yingawovwira wuli kuti mbumba yipwelereke makora?

 ³ Mpositole Paulosi nayo wakaŵa na masuzgo gha kusanga ndarama. Pakulimbana na masuzgo agha, wakasambirapo kanthu. Fundo iyi yalongosoreka mu kalata iyo wakalembera Timote. Paulosi wakalemba kuti: “Tikizamo na kanthu mu caru cara, nesi tingamanya kufumamo na kanthu; kweni pakuŵa na vyakurya na vyakuvwara, tikhorwenge navyo.” (1 Timote 6:7, 8) Mbunenesko kuti mbumba yikukhumba vinandi padera pa cakurya na vyakuvwara. Yikweneraso kuŵa na pakukhala. Ŵana ŵakukhumbikwira kusambira sukulu. Pakukhumbikwira ndarama zakugulira munkhwara na vinthu vinyake. Nangauli pangakhumbikwira ndarama zinandi kuti vyose ivi vicitike, fundo ya Paulosi yikovwira nipera. Umoyo ungaŵa wakukondweska usange tingakhorwa na vinthu vyakukhumbikwa nadi kuluska kupenja vinthu vyambura kukhumbikwa.

4, 5. Kasi kunozgekera vyakucita na bajeti vikovwira wuli pa kupwelelera mbumba?

⁴ Fundo yinyake yakovwira yikusangika mu ntharika ya Yesu. Iyo wakati: “Ndi njani wa imwe uyo wakukhumba kuzenga cigongwe, wakuleka kukhala pasi danga na kupima mtengo, usange wali nazo zakucifiskira?” (Luka 14:28) Yesu wakayowoyanga fundo yakuti munthu wanozgekenge pakucita vinthu. Fundo iyi yikayowoyekaso mu Cipaturo 2 ca buku lino, umo tikasambira kuzirwa kwa kunozgekera para munyamata na msungwana ŵakukhumba kutorana. Para ŵatorana, fundo ya kunozgekera yikovwiraso pa kupwelelera mbumba. Kunozgekera kukusazgapo kumanya umo ndarama izo munthu wali nazo wangazigwiliskira nchito mwamahara. Para mbumba yili na bajeti, yikupwelelera kuti yileke kusamphanya ndarama, yikugura vinthu vyakukhumbikwa pera pa zuŵa ndiposo sabata yiliyose. Yikugwiliskira nchito ndarama mwakuyana na izo yikusanga.

 ⁵ Mu vyaru vinyake, kupanga bajeti kungasazgapo kukana kubweleka ndarama kuti munthu wagule vinthu vyambura kukhumbikwa. Kweniso cingang’anamuraso kujikora kuti munthu waleke kugura vinthu pa ngongoli. (Zintharika 22:7) Ndiposo cikung’anamura kujikora kuti munthu waleke kugura vinthu vyakuti wandanozgekere, mwambura kughanaghanira uheni wake. Kuŵa na bajeti kukovwira kuti ndarama zileke kunangikira pa vinthu nga ni kwenda njuga, kugulira hona na moŵa. Kunanga ndarama kwanthena kukukavuska mbumba ndiposo kukukolerana yayi na ivyo Baibolo likuyowoya.—Zintharika 23:20, 21, 29-35; Ŵaroma 6:19; Ŵaefeso 5:3-5.

6. Ni Malemba wuli agho ghakukhozga ŵakavu?

⁶ Wuli pakuyowoya za awo mbakavu? Ŵangapembuzgika na fundo yakuti masuzgo agho ghali pa caru cose nga kanyengo. Mu caru ciphya, Yehova wazamumazga ukavu pamoza na mauheni ghose agho ghahangayiska ŵanthu. (Salmo 72:1, 12-16) Pa nyengo yasono, Ŵakhristu ŵaunenesko, kwali ŵaŵe ŵakavu, kuti ŵakutayirathu mtima yayi. Ŵakugomezga ivyo Yehova walikulayizga: ‘Nditi ndikutayenge cara, panji nesi kukusida.’ Antheura Mkhristu mwacikanga wangayowoya kuti: “Fumu [Yehova] ndi movwiri wane; kuti nditi ndopenge cara.” (Ŵahebere 13:5, 6) Mu nyengo za masuzgo zino, Yehova wakovwira ŵasopi ŵake mu nthowa zinandi. Wakuŵawovwira para ŵakulondezga malango ghake na kuŵika Ufumu pa malo ghakwamba mu umoyo wawo. (Mateyu 6:33) Ŵakhristu ŵanandi ŵangayowoya nga ni umo wakayowoyera Paulosi kuti: “Mu vyose ndili kuzoŵezgeka kukhuta na kuŵa na njara wuwo, ndiposo na kuzara na kukavuka. Ndingamanya kucita vyose mwa Mweneuyo wakundikhomeska.”—Ŵafilipi 4:12, 13.

7. Kasi Yesu wakayowoya mazgu wuli agho ghangawovwira mbumba kuti yendenge makora?

⁷ Kuumaliro kwa uteŵeti wake, Yesu wakati: “Utemwenge  munyako nga ndi wamwene.” (Mateyu 22:39) Kulondezga fundo iyi mu mbumba kukovwira kuti yendenge makora. Nakwene nako, asi ŵazengezgani ŵapafupi comene ndiposo ŵakutemweka ni ŵa mu mbumba yithu, mfumu na muwoli, ŵapapi na ŵana? Kasi ŵanthu ŵangalongorana wuli citemwa mu mbumba?

8. Kasi ŵa mu mbumba ŵangalongorana wuli citemwa?

⁸ Nthowa yimoza ni para waliyose mu mbumba wakugwirako nchito za pa nyumba. Ŵana ŵakwenera kusambizgika kuŵika vinthu pa malo ghawemi para ŵamara kuvigwiliskira nchito, kwali ni malaya panji vidoli. Kutandura mphasa mulenji wuliwose kukovwiraso kuti mbumba yende makora, nangauli vikutora nyengo  kuti munthu wamanye. Ŵangatondeka kucita vinyake makoraghene, kweni wose mu mbumba ŵangakolerana kuti nyumba yiwonekenge makora. Para mbumba yamara kurya, nchiwemi kovwirana kukhweza mbale na vinyake. Vinthu vikwenda makora yayi para pa nyumba ŵanyake mbakata, ŵakutemwa kucita vinthu mu nthowa yawo, kugazgana, na kucita kucicizgika pa kucita vinthu. (Zintharika 26:14-16) Kweni waliyose wakukondwa mu mbumba usange ŵakusekelerana na kovwirana nchito. “Ciuta wakutemwa uyo wakupa na kusangwa.”—2 Ŵakorinte 9:7.

9, 10. (a) Kasi kanandi muwoli wakugwira nchito wuli, ndipo wangawovwirika wuli? (b) Kasi nchito za pa nyumba zikwenera kugwilika wuli?

⁹ Kughanaghanirana na kutemwana kukovwira kuti mu mbumba muleke kuŵa masuzgo ghakuru. Kanandi ŵanakazi ndiwo ŵakugwira nchito zinandi za pa nyumba. Ŵakupwelelera ŵana, kutozga nyumba, kucapa, kugura na kuphika cakurya. Mu vyaru vinyake, ŵanakazi ŵakulima, ŵakuguliska malonda ku msika, ndiposo nawo ŵakupeleka ndarama zakwendeskera mbumba. Ku malo uko pakwamba ŵanakazi ŵakagwiranga nchito yakulembeka yayi, sono ŵakugwira kuti ŵasange ndarama. Muwoli ndiposo mama uyo wakugwira nchito zanthena izi wakwenera kulumbika comene. “Mwanakazi wamagomezgeko” uyo wali kuyowoyeka mu Baibolo, wakaŵa wakulimbikira comene kugwira nchito. ‘Wakaryanga vyakurya vya ukata cara.’ (Zintharika 31:10, 27) Ici cikung’anamura kuti mwanakazi ndiyo wagwirenge nchito za pa nyumba pera yayi. Para mfumu na muwoli wake ŵakomboka ku nchito, kasi muwoli ndiyo wakwenera kugwira yekha nchito zose pa nyumba uku mfumu wake wali waka phee? Napacoko pose. (Yelezgerani na 2 Ŵakorinte 8:13, 14) Mwaciyelezgero, usange mama wakuphika cakurya, wangakondwa usange ŵa mu mbumba ŵangowovwira nchito zinyake. Nchito zinyake izo  ŵangacita ni kugura vinthu, panji kutozga pa nyumba. Mbumba yose yovwiranenge pakugwira nchito.—Yelezgerani na Ŵagalatiya 6:2.

¹⁰ Ŵanyake ŵangayowoya kuti: “Uko ine nkhukhara, mwanalume wakugwira nchito izo zayowoyeka apa yayi.” Ndimo vingaŵira nadi, kweni kasi cingaŵa ciwemi yayi kughanaghanirapo nkhani iyi? Apo Yehova Ciuta wakakwatisa ŵanthu ŵakwamba, wakayowoyapo yayi kuti nchito zinyake ni za ŵanakazi pera. Zuŵa linyake apo Abrahamu wakapokera ŵalendo ŵapadera kufuma kwa Yehova, iyo wakawovwira muwoli wake kuphika cakurya ca ŵalendo. (Genesis 18:1-8) Baibolo likuti: “Ŵafumu . . . ŵakwenera kutemwa ŵawoli ŵawo na ŵawo nga ndi mathupi ghawo na ghawo.” (Ŵaefeso 5:28) Para kwafipa, usange mwanalume wakukhumba kupumura, mwambura kukayika, muwoli wake nayo wakujipulika ntheura pera. Muwoli wangavuka comene kuluska mfumu wake, asi nthena? (1 Petros 3:7) Kasi cingaŵa camahara yayi nthena kuti mfumu nayo wagwirenge nchito za pa nyumba?—Ŵafilipi 2:3, 4.

11. Ni mwauli umo Yesu wakapelekera ciyelezgero ciwemi kwa waliyose mu mbumba?

¹¹ Yesu nchiyelezgero ciwemi comene ca kukondweska Ciuta. Wakakondweskangaso awo ŵakaŵanga nayo. Nangauli wakatora yayi, kweni ŵafumu ŵangasambirako vinandi kwa iyo. Ŵawoli na ŵana nawo ŵangasambirakoso. Pakuyowoya za iyo mwene, wakati: “Mwana wa munthu wakawura kwizira kuteŵetereka, kweni kuteŵetera” ŵanji. (Mateyu 20:28) Mbumba zikuŵa zacimwemwe comene para waliyose mu mbumba wali na mtima wakovwira ŵanyake!

12. Kasi Yehova wakukhumba kuti awo ŵakumusopa ŵacitenge vici?

¹² Fundo yinyake iyo yingawovwira kuti mbumba  yendenge makora yikusangika pa 2 Ŵakorinte 7:1. Lemba ili likuti: “Tijitozge ku ukazuzi wose wa thupi na wa mzimu.” Awo ŵakulondezga mazgu agha ŵakutemweka na Yehova, cifukwa iyo wakukhumba “kusopa kuwemi na kwambura kukazuzgika.” (Yakobe 1:27) Mbumba iyo yikulondezga fundo iyi yikutumbikika comene.

13. Cifukwa wuli utozi ngwakukhumbikwa mu mbumba?

¹³ Baibolo likuti nyengo yikwiza apo kuzamuŵavya matenda na ulwari. Pa nyengo iyo, ‘nanga njumoza wa ŵenecaru wazamuyowoya kuti, “Ndalwara.”’ (Yesaya 33:24; Civumbuzi 21:4, 5) Pakuti nyengo iyi yindafike, waliyose sono wasuzgikenge na matenda nyengo na nyengo. Paulosi na Timote nawo ŵakalwaranga. (Ŵagalatiya 4:13; 1 Timote 5:23) Nangauli matenda ghakukata yayi, awo ŵakumanya vya munkhwara ŵakuti matenda ghanandi tingaghagega. Ŵanthu ŵamahara ŵakugega ukazuzi wa thupi na wauzimu. Para ŵacita  nthena, matenda ghanandi ghakugegeka. Tiyeni tiwone umo tingacitira.—Yelezgerani na Zintharika 22:3.

14. Kasi nkharo yiwemi yingavikilira wuli mbumba ku matenda?

¹⁴ Utozi wauzimu ukusazgapo kuŵa na nkharo yiwemi. Nga ni umo tikumanyira, Baibolo likuciska kuti ŵanthu ŵaŵenge na nkharo yiwemi. Likukana kuti munthu wagonanenge na uyo ni mfumu panji muwoli wake yayi. “Manyi mbazaghali, . . . manyi mbaleŵi, manyi mbauyaya, manyi mbakukazuzgana ŵanalume pera, . . . kuti ŵamkuhalira Ufumu wa Ciuta cara.” (1 Ŵakorinte 6:9, 10) Nchakuzirwa comene kuti Ŵakhristu ŵapulikilenge malango agha cifukwa tikukhala mu caru ico makhaliro ghake ngakunangika comene. Ciuta wakukondwa para munthu wakulondezga malango agha. Ndiposo malango agha ghakovwira kuti munthu waleke kutora matenda ghakupilana pakugonana, nga ni ezi, cindoko, gozoli na ghanyake.—Zintharika 7:10-23.

15. Yowoyani ciyelezgero ca kuleka kujipwelelera ndiposo uheni wake.

¹⁵ ‘Kujitozga ku ukazuzi wose wa thupi na wa mzimu’ kukovwira mbumba kuti yijivikilire ku matenda ghanyake. Matenda ghanandi ghakukora ŵanthu cifukwa ca kuleka kujipwelelera. Ciyelezgero ca kuleka kujipwelelera ni kukhweŵa hona. Kukhweŵa hona kukunanga maphapu pera yayi, kweniso kukwananga vyakuvwara, mphepo, ndiposo kukulwariska. Ŵanthu mamiliyoni ghanandi ŵakufwa cifukwa ca kukhweŵa hona. Aghanaghanirani waka, usange ‘ŵajitozgenge ku ukazuzi wose wa thupi na mzimu,’ mwa kuleka kukhweŵa hona, nthena ŵanthu wose aŵa ŵakulwara yayi ndiposo kufwa luŵiro yayi!

16, 17. (a) Ni dango wuli la Yehova ilo likavikiliranga Ŵaisrayeli ku matenda ghanyake? (b) Kasi mbumba zingalondezga wuli fundo iyo yikusangika pa Duteronome 23:12, 13?

¹⁶ Tiyeni tiwone ciyelezgero cinyake. Pafupifupi vilimika  3,500 ivyo vyajumpha, Ciuta wakapeleka malango ku mtundu wa Israyeli. Malango agha ghakaŵawovwiranga kuti ŵasopenge mwakwenelera, ndiposo ghakaŵa ghakovwira pa umoyo wawo. Malango agha ghakavikiliranga Ŵaisrayeli ku matenda. Pakaŵa dango ilo likati para munthu wapatuka, wakeneranga kujimira kutali na misasa. Kucita nthena kukawovwira kuti misasa yileke kukazuzgika. (Duteronome 23:12, 13) Dango ili licari la kovwira na kwa ise wuwo. Lero napo ŵanthu ŵakulwara na kufwa cifukwa ca kuleka kulondezga dango ili. a

 ¹⁷ Fundo iyo tikusambirako ku dango ilo Ciuta wakapeleka ku Ŵaisrayeli njakuti, mukati na kuwaro kwa bafa ndiposo cimbuzi, kuwonekenge makora. Para cimbuzi nchautozi yayi, ndiposo pa khululu mphambura kubenekelerapo, mu cimbuzi mukuŵa membe bwekabweka. Majeremusi ghakukaŵa yayi kuthandazgikira ku nyumba na ku vyakurya! Ŵalara na ŵana ŵagezenge mu mawoko para ŵafuma ku cimbuzi. Para ŵaleka kugeza, mbwenu ŵayeghenge majeremusi. Dokotara munyake wa ku France wakati “kugeza mu mawoko kukovwira comene kuti munthu waleke kukoleka na matenda gha mu nthumbo, cikhoso panji vilonda vya pathupi.”

18, 19. Ni masacizgo wuli agho ghapelekeka gha kupwelelera pa nyumba ku malo uko kuli ukavu.

¹⁸ Mbunenesko kuti nchakusuzga kutozga malo mu vigaŵa ivyo mukukhara ŵanthu ŵakavu. Munthu munyake uyo wakumanya makora za suzgo la kukhala mu malo ghanthena agha wakati: “Cifukwa kukocha nyengo zose, cikusuzga kutozga malo. Kavuluvuru wakupangiska kuti fuvu liŵe palipose mu nyumba. . . . Umoyo ukuŵaso pa ngozi cifukwa ca kukwera kwa ciŵelengero ca ŵanthu awo ŵakukhara mu misumba ndiposo mu vikaya vinyake. Mu malo ghanyake mu matawuni muli mapayipi ghakuphulika agho ghakuyegha vinthu viheni, muli viswaswa bwekabweka, paliso vimbuzi vyambura kupwelelereka, majancha ghali palipose, ŵakabanthira ndiposo membe zili palipose.”

¹⁹ Para ukhaliro wuli nthena, cikusuzga kuŵa na malo ghautozi. Kweni nchiwemi kupwelelera malo. Nchipusu kugura sopo na maji kuti mutozgere vinthu, kuluska kugura munkhwara ku cipatara. Para mukukhara ku malo uko nkhwambura kupwelereka, yezgayezgani kupwelelera nyumba yinu na luŵaza lwake. Phyelani matinginyoli (masusu) na ulongwe wa viŵeto vinu. Usange nthowa yakwizira pa nyumba yinu yikuŵa na  mathipa nyengo ya vura, mwalekeraci kuthiramo mcenga panji kuŵikamo malibwe kuti yileke kuŵa na mathipa? Para mukuvwara skapato panji nkhwaŵiro, mwalekeraci kuzivulira pawaro pa nyumba yinu? Ndiposo pwelelerani cisimi cinu kuti maji ghaleke kwanangika. Pafupifupi ŵanthu mamiliyoni ghaŵiri ŵakufwa pa cilimika cifukwa ca matenda agho ghakwiza cifukwa ca kugwiliskira nchito maji ghakubinkha na kuleka kupwelelera malo.

20. Ni njani wakwenera kutozga pa nyumba?

²⁰ Kuti nyumba yiŵe yautozi, ni nchito ya waliyose mu mbumba, amama, adada, ŵana na ŵalendo. Mama munyake ku Kenya uyo wali na ŵana eyiti wakati: “Wose ŵakucitako nchito za pa nyumba.” Para pa nyumba pakuwoneka makora, pakupeleka cithuzithuzi ciwemi ku mbumba. Cinthanguni ca ku Spain cikuti: “Ukavu ukupangiska munthu kutondeka kujitozga yayi.” Kwali munthu wakukhara mu nyumba yikuru comene, nyumba yicoko, nyumba ya botolo, panji cisakasa, utozi ngwakukhumbikwa comene kuti mbumba yiŵe na umoyo uwemi.

21. Mwakuyana na Zintharika 31:28, nchivici cikovwira kuti mbumba yiŵe yacimwemwe?

²¹ Pakulongosora muwoli wamagomezgeko, buku la Zintharika likuti: “Ŵana ŵake ŵakuwuka na kumucema wakutumbikika; mfumu wake nayo wakumulumba.” (Zintharika 31:28) Mphawuli apo mukalumba wa mu mbumba yinu? Tose tikukhumbikwira kulumbika. Muwoli wakujipulika makora para mfumu wake wakulumba nchito iyo wakugwira. Ndiposo muwoli wakukondwa kumanya kuti mfumu wake wakuzirwiska ivyo iyo wakucita. (Zintharika 15:23; 25:11) Ndiposo cikuŵa cakukhozga para muwoli wakulumba mfumu wake cifukwa ca nchito iyo wakugwira pa nyumba na uko  wali kulembeka. Ŵana nawo ŵakukondwa para ŵapapi ŵawo ŵakuŵalumba cifukwa ca nchito izo ŵakucita pa nyumba, ku sukulu na ku mpingo. Kulumbana nkhuwemi comene! Kasi munthu wangagomoka para wayowoya kuti: “Nawonga comene”? Nangauli mazgu agha ngacoko waka, kweni ghangakwezga nkhongono za waliyose mu mbumba.

22. Nchivici cikukhumbikwa kuti mbumba ‘yikhozgeke,’ ndipo vinjeru na umanyi vingasangika wuli?

²² Kupwelelera mbumba nchipusu yayi. Nangauli vili nthena, kweni nchamacitiko. Baibolo likuti: “Nyumba yikuzengeka na vinjeru, yikukhozgeka na umanyi.” (Zintharika 24:3) Wose mu mbumba ŵangaŵa na vinjeru ndiposo umanyi usange ŵakusambira khumbo la Ciuta na kulicita. Nadi pano, kuyezgayezga kuŵa na mbumba yacimwemwe nkhwacanduro!