KASI ukumucitira citima mwanalume mulwari uyu wali apa? Zina lake ni Yobu, ndipo mwanakazi uyu ni muwoli wake. Kasi ukumanya ivyo wakuphalira Yobu? ‘Tuka Ciuta kuti ufwe.’ Tiye tiwone cifukwa ico wakayowoyera nthena, na cifukwa ico Yobu wakasuzgikira.

Yobu wakaŵa munthu wakugomezgeka uyo wakapulikiranga Ciuta. Wakakhalanga mu caru ca Uzi, kutali cara na Kenani. Yehova wakamutemwanga comene Yobu, kweni pakaŵa munthu munyake uyo wakamutinkhanga. Kasi mukumumanya?

Wakaŵa Satana Dyabulosi. Kumbukira kuti, Satana ni mungelo muheni uyo wakutinkha Yehova. Wakapusika Adamu na Heva kuti ŵaleke kupulikira Yehova, ndipo wakaghanaghananga kuti wangapangiska waliyose kucita mwakuyana waka. Kweni kasi wakakwaniska? Yayi. Aghanaghanira ŵanalume na ŵanakazi ŵanandi ŵakugomezgeka awo tasambira. Kasi ungazunurapo ŵalinga?

Yakobe na Yosefe ŵakati ŵafwa mu Eguputo, Yobu ndiyo wakaŵa munthu wakugomezgeka comene kwa Yehova kuluska munthu waliyose pa caru cose capasi. Yehova wakakhumbanga kumuwoneska Satana kuti wangapangiska yayi munthu waliyose kuŵa muheni, wakati: ‘Laŵiska Yobu. Wona umo waliri wakugomezgeka kwa ine.’

Satana wakazgora wakati, ‘Wakugomezgeka cifukwa muli kumutumbika na vinthu viwemi vinandi. Kweni wamutukaninge usange mungamupoka vyose ivyo wali navyo.’

Yehova wakati: ‘Cita umo wayowoyera. Mupoka vyose ivyo wali navyo. Cita uheni wose uwo ukukhumba kwa Yobu. Tiwonenge usange wanitukenge. Kweni ungamukomanga cara.’

Cakwamba, Satana wakapangiska ŵanthu kwiba ng’ombe na ngamila za Yobu, ndipo mberere zake zikafwa. Pamanyuma pake Satana wakakoma ŵana ŵanalume na ŵanakazi ŵa Yobu na cimphepo cikuru. Paumaliro pake Satana wakamulwaliska Yobu nthenda yiheni comene. Yobu wakasuzgika comene. Ndico cifukwa cake muwoli wake wakamuphalira kuti: ‘Tuka Ciuta kuti ufwe.’ Kweni Yobu wakakana kutuka Ciuta. Ndiposo, kukiza ŵabwezi ŵake ŵatesi ŵatatu awo ŵakamuphalira kuti wakacita vinthu viheni lekani wakulwara nthena. Kweni Yobu wakalutilira kugomezgeka.

Ici cikakondweska comene Yehova, ndipo pamanyuma pake wakamutumbika Yobu nga ni umo ukuwonera pa cithuzithuzi apa. Wakamucizga nthenda yake. Yobu wakaŵaso na ŵana ŵanyake 10 ŵakutowa, ndipo wakaŵaso na ng’ombe, mberere na ngamila kuluska kaŵiri ivyo wakaŵa navyo pakwamba.

Kasi uŵenge ŵakugomezgeka nyengo zose nga ni umo Yobu wakacitira? Usange ucitenge nthena, naweso Ciuta wakutumbikenge. Mbwenu uzamukhala kwamuyirayira apo caru cose capasi cizamuŵa malo ghakutowa nga ni munda wa Edeni.