ŴANA ŵasepuka ŵaŵiri awo ŵali apa mbakupambana comene, ni nthena yayi? Kasi ukuŵamanya mazina ghawo? Ciŵinda uyo ni Esau, ndipo uyo wakupwelelera mberere ni Yakobe.

Esau na Yakobe ŵakaŵa ŵana ŵamuleza ŵa Yisake na Rabeka. Yisake wakatemwanga comene Esau, cifukwa wakakomanga nyama na kwiza nazo ku nyumba. Kweni Rabeka wakatemwanga comene Yakobe, cifukwa wakaŵa wakuzika na wakutemwa mtende.

Abrahamu, sekuru wawo, wakaŵa wacali wamoyo, ndipo tingaghanaghanira umo Yakobe wakatemwera kutegherezga kwa iye apo wakayowoyanga za Yehova. Nyengo yikati yalutapo, Abrahamu wakafwa na vilimika 175, apo Esau na Yakobe ŵakaŵa na vilimika 15.

Apo Esau wakati wafika vilimika 40 wakatora ŵanakazi ŵaŵiri ŵa mu Kenani. Ici cikakwiyiska comene Yisake na Rabeka, cifukwa ŵanakazi aŵa ŵakasopanga Yehova cara.

Zuŵa linyake, cinthu cinyake cikacitika ico cikapangiska Esau kukwiyira munung’una wake Yakobe. Nyengo yakuti Yisake watumbike mwana wake mulara yikakwana. Esau wakaghanaghananga kuti ndiyo wapokelenge vitumbiko ivi. Kweni Esau wakaŵa kuti waguliska kale ulara wake, antheura wakenelera cara kupokera vitumbiko kwa Yakobe. Ndiposo, ŵana ŵaŵiri aŵa ŵakati ŵababika Ciuta wakati Yakobe ndiyo wazamupokera vitumbiko. Ici ndico cikacitika nadi. Yisake wakatumbika mwana wake Yakobe.

Esau wakati wapulika za ici wakamukwiyira Yakobe. Wakakwiya comene mwakuti wakati wakomenge Yakobe. Rabeka wakati wapulika, wakafipa mtima comene. Antheura wakaphalira mfumu wake Yisake kuti: ‘Ciŵenge cinthu ciheni comene usange Yakobe watorenge ŵanakazi ŵa mu Kenani.’

Penepapo Yisake wakacema mwana wake Yakobe na kumuphalira kuti: ‘Ungatoranga mwanakazi mu Kenani yayi. Kweni ulute ku Harani ku nyumba ya Betuyeli sekuru wako. Ukatore yumoza wa ŵana ŵa Labani.’

Yakobe wakapulikira ŵadada ŵake, ndipo nyengo yeneyiyo wakayamba ulendo wake utali kuya ku Harani uko ŵabali ŵake ŵakakhalanga.