PAKATI pajumpha pafupifupi myezi yiŵiri ŵati ŵafuma mu Egupto, Ŵaisrayeli ŵakafika pa Phiri la Sinayi, ilo likucemekaso Horebu. Pa malo agha ndipo Yehova wakayowoya kwa Mozesi kwizira mu civwati. Ŵanthu ŵakazenga misasa na kukhala pa malo agha kwa nyengo yicoko waka.

Peneapo ŵanthu ŵakalindiliranga musi mwa phiri, Mozesi wakakwera phiri. Pacanya pa phiri, Yehova wakaphalira Mozesi kuti Wakukhumba kuti Ŵaisrayeli ŵamupulikirenge ndiposo kuti ŵaŵe ŵanthu Ŵake ŵapadera. Mozesi wati wakhira, wakaphalira Ŵaisrayeli ivyo Yehova wakayowoya. Ŵanthu ŵakayowoya kuti ŵapulikirenge Yehova cifukwa ŵakukhumba kuŵa ŵanthu ŵake.

Yehova wakacita cinthu cacilendo. Wakacitiska josi kusunkha pacanya pa phiri ndiposo wakapangiska ŵaleza kududumira. Wakayowoyaso na ŵanthu kuti: ‘Ine ndine Yehova Ciuta winu mweneuyo wakamufumiskani mu caru ca Egupto.’ Ndipo wakaŵapa dango lakuti: ‘Mungasopanga ŵaciuta ŵanyake cara kweni ine ndekha.’

Ciuta wakapa Ŵaisrayeli malango ghanyake ghakukwana nayini. Ŵanthu ŵakatenthema comene. Ŵakaphalira Mozesi kuti: ‘Uyowoye nase ndiwe, cifukwa tikopa kuti usange Ciuta wangayowoya nase, mbwenu tifwenge.’

Pamanyuma pake Yehova wakaphalira Mozesi kuti: ‘Kwelera kuno kwa ine ku phiri. Nikupenge malibwe ghaŵiri ghakupapatala apo nalembapo malango agho nkhukhumba kuti ŵanthu ŵasunge.’ Mozesi wakalutaso ku phiri. Wakakhala kuko mazuŵa 40, muhanya na usiku.

Ciuta wakapa ŵanthu ŵake malango ghanandi. Mozesi wakalemba malango agha. Ciuta wakapaso Mozesi malibwe ghakupapatala ghaŵiri. Pa malibwe agha, Ciuta iye mwene wakalembapo malango 10 agho wakaphalira ŵanthu wose. Ghakacemeka Malango Khumi.

Malango Khumi agha ngakuzirwa comene. Kweni ndimoso ghaliri malango ghanyake agho Ciuta wakapeleka ku Ŵaisrayeli. Limoza mwa malango agha ni ili: ‘Utemwenge Yehova Ciuta wako na mtima wako wose, na maghanoghano ghako ghose, na umoyo wako wose ndiposo na nkhongono zako zose.’ Linyake ni ili: ‘Utemwenge munyako nga ni umo ukujitemwera wamwene.’ Mwana wa Ciuta, Yesu Khristu, wakati agha ndigho malango ghaŵiri ghakuru kuluska malango ghose agho Yehova wakapeleka ku ŵanthu ŵake Ŵaisrayeli. Kunthazi uku tisambirenge vinthu vinandi vyakukhwaskana na Mwana wa Ciuta na visambizgo vyake.