KASI musepuka uyu ngwakutowa yayi? Zina lake ni Samuyeli. Munthu uyo waŵika woko lake pa mutu wa Samuyeli ni Eli, musofi mukuru wa Ŵaisrayeli. Awo ŵiza nayo kwa Eli ni Elikana, awiske ŵake, na Hana, anyina ŵake.

Samuyeli wali na vilimika pafupifupi vinayi panji vinkhondi pera. Kweni wakhalenge pa cihema ca Yehova na Eli pamoza na ŵasofi ŵanyake. Nchifukwa wuli Elikana na Hana ŵakapeleka mwana mucoko nthena kuti wateŵetere Yehova pa cihema cake? Tiye tiwone.

Vilimika vicoko waka kumanyuma, Hana wakaŵa na citima cikuru. Cikaŵa cifukwa cakuti wakaŵavya mwana, ndipo wakakhumbisiska comene kuti waŵe na mwana. Mwantheura zuŵa linyake apo Hana wakaluta ku cihema ca Yehova, wakalomba kuti: ‘A Yehova, lekani kuniruwa! Usange munganipa mwana mwanalume, mbwenu nimupelekenge kwa imwe kuti wamuteŵeteraninge umoyo wake wose.’

Yehova wakazgora lurombo lwa Hana, ndipo pati pajumpha myezi yicoko waka wakababa Samuyeli. Hana wakamutemwa comene mwana wake, wakayamba kumusambizga za Yehova wacali mwana mucoko comene. Wakaphalira mfumu wake kuti: ‘Para Samuyeli waleka waka konkha, nilutenge nayo ku cihema kuti wakateŵeterenge Yehova.’

Ici ndico tikuwona Hana na Elikana ŵakucita pa cithuzithuzi apa. Ndipo cifukwa cakuti Samuyeli wakasambizgika makora na ŵapapi ŵake, wakakondwa kuti wateŵetere Yehova pa cihema cake. Cilimika cilicose Hana na Elikana ŵakizanga kuzakasopa pa cihema capadera ici, na kuzakawona mwana wawo. Cilimika na cilimika Hana wakizanga na munjilira wupya uwo wakasoneranga Samuyeli.

Samuyeli wakalutilira kuteŵetera pa cihema ca Yehova kwa vilimika vinandi, ndipo Yehova na ŵanthu ŵakamutemwa. Kweni ŵana ŵa Eli, Hofini na Finihasi, ŵakaŵa ŵawemi yayi. Ŵakacita vinthu viheni vinandi, ŵakapangiskaso ŵanji kuleka kupulikira Yehova. Eli wakenelanga kuŵalekeska usofi, kweni wakaŵaleka waka.

Vinthu viheni ivyo vikacitikanga pa cihema vikapangiska Samuyeli kuleka kuteŵetera Yehova cara. Cifukwa cakuti mbanthu ŵacoko waka awo ŵakatemwa Yehova na mtima wose, pakajumpha nyengo yitali kufuma apo Yehova wakayowoya na ŵanthu. Samuyeli wati wakulako, cikacitika ni ici:

Samuyeli wakagona mu cihema peneapo wakapulika munthu munyake wakumucema. Iyo wakazgora kuti: ‘Ndine pano.’ Wakawuka na kucimbilira kwa Eli na kuyowoya kuti: ‘Ndine pano, pakuti mwanicema.’

Kweni Eli wakazgora kuti: ‘Nindakucemepo ine; luta kagone.’ Ntheura Samuyeli wakalutaso kukagona.

Wakupulikaso kucema kaciŵiri: ‘Samuyeli!’ Samuyeli wakawuka na kucimbiliraso kwa Eli. Iyo wakati: ‘Ndine pano, pakuti mwanicema.’ Kweni Eli wakazgora kuti: ‘Nindakucemepo mwana wane. Luta, kagoneso.’ Samuyeli wakalutaso kukagona.

‘Samuyeli!,’ lizgu likacemaso kacitatu. Samuyeli wakacimbilira kwa Eli. ‘Ndine, nafika, cifukwa mukwenera kuti mwanicema nadi sono,’ iyo wakayowoya ntheura. Sono Eli wakamanya kuti wakwenera kuŵa Yehova uyo wakamucemanga. Mwantheura wakaphalira Samuyeli kuti: ‘Luta, ukagone, ndipo usange wakukucemaso, uti: “Yowoyani Yehova, pakuti muteŵeti winu wakupulika.”’

Ici ndico Samuyeli wakayowoya kwa Yehova wati wamucemaso. Yehova wakaphalira Samuyeli kuti walangenge Eli na ŵana ŵake. Mukuluta kwa nyengo Hofini na Finihasi ŵakakomeka ku nkhondo na Ŵafilisiti, ndipo Eli wati wapulika za ico cikacitika wakawa cagada, singo yake yikaphyoka ndipo nayo wakafwa. Mwantheura mazgu gha Yehova ghakafiskika.

Samuyeli wakakura, ndipo wakaŵa mweruzgi waumaliro wa Ŵaisrayeli. Wati wacekura, ŵanthu ŵakamulomba kuti: ‘Tiyimikirani fumu kuti yitiwusenge.’ Samuyeli wakakhumba yayi kucita ici, cifukwa Yehova ndiyo wakaŵa fumu yawo. Kweni Yehova wakamuphalira kuti wapulikire ivyo ŵanthu ŵakayowoya.