Paradiso wazamuŵa nga ndi caru ico tikukhalamo sono cara. Ciuta wakakhumba cara kuti caru ciŵe cakuzara na masuzgo, citima, na vyakuŵinya. Muntazi umu Ciuta wazamuzgora caru capasi kuŵa paradiso. Kasi Paradiso wazamuŵa wuli? Tiyeni tiwone ivyo Baibolo likuyowoya:

Ŵantu ŵaweme. Paradiso wazamuŵa cikaya ca mabwezi gha Ciuta. Igho ghazamucitirana vintu viweme yumoza na munyake. Ghazamukhala mwakuyana na ntowa zaurunji za Ciuta.—Zintharika 2:21.

Cakurya cinandi. Mu Paradiso, muzamuŵavya njara. Baibolo likuyowoya kuti: ‘Kuzamuŵa fumpha ya vyakurya mu caru.’—Salmo 72:16.

Nyumba ziweme na ncito zakukondweska. Mu Paradiso pano pacaru capasi, mbumba yiliyose yizamuŵa na nyumba yake na yake. Waliyose wazamugwira ncito yeneiyo yizamwiziska cimwemwe ceneco.—Yesaya 65:21-23.

 Mtende pacaru cose. Ŵantu ŵazamutimbanaso panji kufwira mu nkondo cara. Mazgu gha Ciuta ghakuyowoya kuti: “[Ciuta] wakurekeska nkondo.”—Salmo 46:8, 9.

Umoyo uweme. Baibolo likulayizga kuti: “Nanga njumoza wa ŵenecaru [ca Paradiso] tiwanene, ‘Ndarwara.’” (Yesaya 33:24) Ndiposo, kuzamuŵavya ŵantu ŵakulemara panji ŵaciburumutira panji ŵambura kupulika panjiso ŵambuwu.—Yesaya 35:5, 6.

Umariro wa vyakuŵinya, citima, na nyifwa. Mazgu gha Ciuta ghakuyowoya kuti: “Nyifwa kuti yiti yiŵengekoso cara; panji nesi citengero kuti citi ciŵengekoso cara, nesi kulira, panji nesi kuŵinya: cifukwa vyakudanga viri kuruta.”—Civumbuzi 21:4.

Muzamuŵavya ŵantu ŵaheni. Yehova walayizga kuti: “Ŵaheni ŵadumulikenge mu caru, ndipo ŵajuvyi tiŵazgurikemo.”—Zintharika 2:22.

Ŵantu ŵazamutemwana na kucindikana yumoza na munyake. Kuzamuŵavya ucikana-marango, kusuzgana, uryezi, na thinko. Ŵantu ŵazamuŵa ŵakukolerana ndipo ŵazamukhala mwakukolerana na ntowa zaurunji za Ciuta.—Yesaya 26:9.