Satana na viŵanda vyake ŵakukhumba cara kuti imwe muteŵeterenge Ciuta. Iwo ŵakukhumba kupuruska waliyose kuti wafumeko kwa Ciuta. Kasi ndi mwauli umo ŵakucitira? Ntowa yimoza iyo ŵakugwiriskira ncito ndiyo cisopo cautesi. (2 Ŵakorinte 11:13-15) Cisopo cikuŵa citesi usange cikuleka kusambizga unenesko wa mu Baibolo. Cisopo cautesi cili nga ni ndrama yautesi—iyo yingawoneka kuŵa nga ni ndrama yeneco, kweni iyo njawaka-waka. Yingamupani suzgo yikuru.

Utesi wa visopo wungamukondweska Yehova cara, Ciuta wa unenesko. Peneapo Yesu wakaŵa pacaru capasi, pakaŵa ciwuru ca cisopo ceneico cikakhumbanga kumukoma. Iwo ŵakaghanaghananga kuti ntowa yawo ya kasopero yikaŵa yiweme. Iwo ŵakayowoya kuti: “Tiri na Dada yumoza, ndiyo Ciuta.” Kasi Yesu wakazomerezga? Cara! Iye wakayowoya nawo kuti: “Imwe wiskemwe ndi Satana.” (Yohane 8:41, 44) Mazuŵa ghano ŵantu ŵanandi ŵakughanaghana kuti ŵakusopa Ciuta, kweni ŵakuteŵetera Satana na viŵanda vyake!—1 Ŵakorinte 10:20.

 Nga ndi umo khuni liheni likupasira vipasi viheni, nteuraso ndimo cisopo cautesi cikupasira ŵantu awo ŵakucita vintu viheni. Caru ncakuzara na masuzgo cifukwa ca vintu viheni ivyo ŵantu ŵaheni ŵakucita. Pali uzaghali, kutimbana, kwiba, kusuzgana, kukomana, na kugona ŵanakazi mwakuŵacicizga. Ŵantu ŵanandi awo ŵakucita vintu ivi ŵali na cisopo, kweni cisopo cawo cikuŵakhuŵirizga cara kuti ŵacite ivyo nviweme. Iwo ŵangaŵa mabwezi gha Ciuta cara usange ŵakuleka cara kucita vintu viheni.—Mateyu 7:17, 18.

Cisopo cautesi cikusambizga ŵantu kusopa vikozgo. Ciuta wakuyowoya kuti mungasopanga vikozgo cara. Ici nciweme nadi. Kasi imwe mungatemwa usange yunji wakumuyowoyeskani cara kweni wakuyowoya na cithuzi-thuzi cinu? Kasi muntu uyo wangaŵa nadi bwezi linu leneco? Cara, napacoko pose. Yehova wakukhumba kuti ŵantu ŵayowoyenge naye, wakukhumba cara kuti ŵantu ŵayowoyenge na cikozgo panji cithuzithuzi vyeneivyo vilije umoyo.—Exodus 20:4, 5.

Cisopo cautesi cikusambizga kuti ncakuzomerezgeka kukoma ŵanyawo mu nyengo ya nkondo. Yesu wakayowoya kuti mabwezi gha Ciuta ghakwenera kuŵa na citemwa pakati pawo. Tikukoma cara ŵantu awo tikuŵatemwa. (Yohane 13:35) Ncakuzomerezgeka cara kwa ise kukoma nanga ŵangaŵa ŵantu ŵaheni. Peneapo ŵarwani ŵa Yesu ŵakiza kuzakamukora, iye wakaŵaphalira cara ŵasambiri ŵake kuti ŵatimbane na ŵarwani ŵake mwakuti wavikilirike.—Mateyu 26:51, 52.

Cisopo cautesi cikusambizga kuti ŵantu ŵaheni ŵazamusuzgika mu helo wamoto. Ndipouli, Baibolo likusambizga kuti kwananga kukurongozgera ku nyifwa. (Ŵaroma 6:23) Yehova ni Ciuta wacitemwa. Kasi Ciuta wacitemwa wangasuzga ŵantu kwamuyirayira? Napacoko pose! Mu Paradiso, muzamuŵa cisopo cimoza pera, cisopo ceneico Yehova wakuzomerezga. (Civumbuzi 15:4) Visopo vyose vyakuzikika pa mautesi gha Satana vizamuparanyika.